Bibe ti Nzapa na ndo ti sämba ayeke so wa?

WASARANGO e, so aye gi aye so ayeke nzoni teti e, ake pëpe ti tene e nyon sämba alingbi na ni. * Nde na so, lo mû na zo “vin so asara si bê ti zo aduti na ngia, na mafuta so asara si lê ti lo aza, na kobe so asara si zo awara ngangu.” (Psaume 104:15). Mbeni lâ, ti sara si matanga ti mariage anzere na azo, Jésus Christ asara si ngu aga “nzoni vin”.​—Jean 2:3-10, Fini Mbuki, 2001.

A yeke na lege ni ti tene so Wasarango e ahinga mbilimbili tongana nyen so sämba ayeke sara sioni na tere ti e nga na mongoli ti e. Na yâ ti Bible, Babâ ti e ti yayu ‘awa e si e ga nzoni’ na lo gboto mê ti e ngangu na ndo ti nyongo angungu sämba ahon ndo ni (Ésaïe 48:17). Bâ tënë so lo tene:

“Ala zia vin asulêe ala pëpe, ye so ague na zo ti sara ye ahon ndo ni.” (aÉphésien 5:18). “Azo so ayeke ngbâa ti sämba, . . . Kodoro ti Gbia Nzapa ayeke nga ande ti ala pëpe.” (1 aCorinthien 6:9-11, FM 01). Mbeti ti Nzapa ake “nyongo sämba ahon ndo ni, pumba kirikiri, nga na ambeni ye tongaso.”​—aGalate 5:19-21.

Zia e bâ fadeso ambeni ye ti sioni so ayeke na peko ti nyongo sämba ahon ndo ni.

Aye ti sioni so aga na peko ti nyongo sämba ahon ndo ni

Atâa so sämba alingbi ti sara ambeni ye ti nzoni, a yeke wara na yâ ni asioni ye so ayeke buba li nga nzoni tambelango ti tere ti zo. Nyongo sämba ahon ndo ni alingbi ti ga na akpale mingi:

A yeke buba li ti zo, tongaso ‘fade lê ti lo abâ ye ti kirikiri’. (aProverbe 23:33). Allen, zo ti nyongo sämba mingi so a sara tënë ti lo na yâ ti article so ahon atene: “Nyongo sämba ahon ndo ni ayeke gi pëpe mbeni kobela so amû tere ti zo; a yeke kobela so andu li ti zo na sarango ye ti zo. Mo yeke bi bê ti mo pëpe na sioni so ayeke sara na amba ti mo.”

 A lingbi ti sara si kamene asara mo pëpe. Mbeti ti Nzapa agboto mê atene: “Vin na fini vin alungula hingango ye ti zo.” (Osée 4:11). Na lege wa? Tongana sämba ayeke na lê ti e, a lingbi ti handa e si e yeda na ambeni tënë nga na ambeni nzara so tongana fade lê ti e ayeke senge e yeke yeda na ni pëpe: atâa e ye ni kozo pëpe. Ngangu ti e ti sara ye so ayeke nzoni alingbi ti woko. Sämba alingbi ti buba aye so ayeke bata e si e duti na nzoni tambela, na tongaso a gue na e na akpale na lege ti yingo.

Na tapande, Jean, apapa na wali ti lo, lo zia lo na ngonzo na lo gue na bar. Lo nyon kozoni sämba kete ti tene ngonzo ti lo ade na ngoi ni so mbeni wali apusu na tere ti lo. Na peko ti so lo kiri lo nyon, Jean na wali so ague asara lango-sioni. Na pekoni, vundu agbu Jean mingi teti lo sara ye so lo pensé lâ oko ti sara ni pëpe.

A lingbi ti gue na zo ti sara tënë kirikiri nga ti sara ye kirikiri. Bible ahunda ndo atene: “Zo nyen ayeke na vundu? Zo nyen atiri?” A yeke “azo so angbâ na tere ti vin; azo so ague ti tara vin so agbian yâ ni.” (aProverbe 23:29, 30). Nyongo sämba ahon ndo ni alingbi ti sara si mo “ga tongana zo so alango na kota ngu ti ingo, wala tongana zo so alango na li ti mât ti bateau.” (aProverbe 23:34). Tongana mbeni zo asulêe si sämba ahunzi na lê ti lo, lo lingbi ti tene: “Ala pika mbi, na mbi hinga pëpe.”​—aProverbe 23:35.

A lingbi ti buba seni ti zo. “Na ndani, fade [sämba a]te zo tongana ngbo, na a kpo zo tongana kpalakongo.” (aProverbe 23:32). Gingo nda ti akobela so awanganga agi afa so tënë ti ndara so ayeke tâ tënë. Sämba so zo anyon mingi ayeke mbeni sioni yorö so alingbi ti sara si molenge so ade na yâ ti mama ti lo ayeke maï nzoni pëpe, a lingbi ti sara si zo awara cancer nde nde, hépatite, kobela ti foie, kobela ti pancréas, diabète, tension wala kobela ti bê; so ayeke gi ambeni aye ti sioni so aga na peko ti nyongo sämba mingi. Même tongana na mbeni ngoi zo anyon mingi, lo lingbi ti tï na popo ti kuâ na zingo wala lo kui. Me kota sioni ye so nyongo sämba mingi alingbi ti sara na ndo ti zo mbeni buku oko na ndo ti kaïngo kobela asara tënë ni pëpe.

Kota kpale ti nyongo sämba. Atâa tongana mbeni zo asulêe pëpe, nyongo sämba mingi aga na akpale na lege ti yingo. Bible atene polele: “Vundu aga na azo so alondo fade  fade na ndapre si ala lingbi nyon sämba; ala so aduti na bï yongoro mingi juska vin asara ala tongana wâ!” Ngbanga ti nyen? Ésaïe afa aye ti sioni so zo ayeke wara na lege ti yingo tongana lo nyon sämba ahon ndo ni, lo tene: “Ala bâ kusala ti L’Éternel pëpe, na ala bi bê ti ala na kusala ti tïtî Lo pëpe.”​—Ésaïe 5:11, 12.

Mbeti ti Nzapa amû wango na e ti ‘duti pëpe na popo ti azo so anyon vin mingi’. (aProverbe 23:20). A gboto mê ti awali so ngu ti ala ayeke mingi ti “duti angbâa ti vin pëpe”. (Tite 2:3) Ngbanga ti nyen? Yeke na yeke, mingi ni sân ti hinga, azo ato nda ti nyon kete kete na ala yeke nyon lakue ti gue na ni. Na nda ni, zo ti nyongo sämba alingbi ti tene: “Fade mbi zingo na lango na l’heure ti nyen? Fade mbi kiri mbi gue ti nyon mbeni.” (aProverbe 23:35). Azo so anyon sämba mingi alingbi ti si na mbeni katikati so ayeke sioni tongana ala gi ti nyon sämba na ndapre ti tene ala wara ngangu na peko ti sämba so ala nyon na bï.

Bible atene azo so abi tere ti ala na yâ ti “nyongo vin ahon ndo ni, apumba ti kirikiri, nyongo sämba mingi . . . ayeke kiri tënë na lo so ayeke nduru ti fâ ngbanga ti azo so ayeke na fini na ti ala so akui awe.” (1 Pierre 4:3, 5). Na ndo ti ngoi ti ngangu so e yeke dä, Jésus atene: “Ala sara hange si tënë ti tengo kobe ahon ndo ni, nyongo sämba ahon ndo ni nga na gingo bê ngbanga ti aye ti gigi ane bê ti ala pëpe, na lango [ti Jéhovah] aga hio tongaso na ndo ti ala tongana mbeni kûkû.”​—Luc 21:34, 35.

Tongaso, nyen la azo so ayeke nyon sämba mingi alingbi ti sara si ‘bê ti ala ane pëpe na nyongo sämba ahon ndo ni’?

[Kete tënë na gbe ni]

[Afoto na lembeti 4, 5]

Nyongo sämba mingi alingbi ti ga na akpale mingi