Gi verre oko na ndo ni

ALLEN ato nda ti nyon sämba ahon ndo ni na ngoi so lo yeke na ngu 11. * Lo na akamarade ti lo ague na yâ ti gbako ti sara ngia, ti tara peko ti azo so ala bâ ala na limon. Azo so lo na akamarade ti lo atara ti sara ye tongana ala ayeke atâ zo pëpe, me sämba so Allen na akamarade ti lo anyon ayeke tâ sämba.

Tony so ayeke na ngu 40 ayeke nyon verre ti sämba oko wala use lakue na lakui, yeke na yeke lo to nda ti nyon verre oku wala omene. Na nda ni, lo hinga pëpe wungo ti verre ti sämba so lo nyon na yâ ti lango oko.

Allen agi ti wara mungo maboko ndali ti kpale ti nyongo sämba so lo yeke na ni. Tony ake ti lo mungo maboko so asewa ti lo na akamarade ti lo amû na lo. Allen ayeke na fini laso ni la lo fa na e peko ti ye so asi na lo; Tony akui ti lo asara ngu mingi na yâ ti mbeni ndao ti kutukutu na peko ti so lo nyon angangu sämba ahon ndo ni.

Tongana mbeni zo anyon sämba ahon ndo ni, aye ti peko ti nyongo sämba ti lo ayeke ndu nga fini ti ambeni zo, na mingi ni aye ti pekoni ayeke sioni. Nyongo sämba na lege ni pëpe ayeke lakue mbeni ye so apusu zo ti tene sioni yanga, ti sara ngangu na ndo ti amba ti lo, ti tiri nga ti fâ zo. A lingbi ti sara nga si zo asara ndao ti kutukutu, ndao ti kua, nga ti wara akpale ti seni. Nginza so ngu oko oko ayeke hon teti nyongo sämba ahon ndo ni ayeke mingi, abungbi na sioni so a yeke sara na zo lo wani nga na vundu so lo, asewa ti lo nga na amolenge ti lo ayeke wara.

Me, mbeni Ndokua ti kodoro ti Amerika so ayeke bâ tënë ti seni ti azo atene so “a yeke pëpe gi azo so ayeke nyon sämba lakue la ayeke na kpale ti nyongo sämba, na a yeke pëpe azo kue so ayeke na kpale ti nyongo sämba la ayeke nyon ni lâ oko oko.” Azo mingi so ayeke nyon sämba ahon ndo ni pëpe amû tere ti ala yeke yeke na nyongo sämba mingi sân ti tene ala hinga. Ambeni anyon ti ala lakue pëpe me ala nyon ahon verre oku tongana lege azi na ala.

Tongana mo ye ti nyon sämba, verre oke la mo nyon si ahon ndo ti mo? Tongana nyen mo lingbi ti hinga so ayeke ngoi ti mû gi verre oko na ndo ni la pëpe? (aProverbe 23:29, 30). A-article so ayeke ga ayeke mû ande maboko na e na ndo ti tënë so.

[Kete tënë na gbe ni]