Sara kusala nzoni na “épée ti yingo”

‘Yeda ti mû épée ti yingo, so ayeke tënë ti Nzapa’.​—AÉPH. 6:17.

1, 2. A lingbi e sara nyen ti tene awafango tënë ti Royaume awu?

 NA BANGO azo mingi so ye ti yingo amanke ala, Jésus atene na adisciple ti lo: “Akobe ti fango ni ayeke mingi, me azo ti kua ni ayeke mingi pëpe. Tongaso, ala hunda mingi na Wa ti kua ni ti tokua azo ti kua ti fâ akobe ti yaka ti lo.” Jésus atene gi tënë na yanga pëpe. Na pekoni so lo tene atënë so, “lo iri adisciple ti lo bale-oko” na lo tokua ala ti fa tënë, wala ‘ti fâ akobe ti yaka’. (Mat. 9:35-38; 10:1, 5). Na pekoni, Jésus “asoro ambeni nde bale-mbasambala na lo tokua ala use use” ti sara mara kusala so.​—Luc 10:1, 2.

² Kota bezoin ti awafango tënë ti Royaume ayeke nga laso mingi. Na ngu 2009, azo 18 168 323 aga na Matanga ti dango bê na kuâ ti Jésus so a sara ni na ndo ti sese kue. Na yâ ti azo so, azo kutu 10 ayeke aTémoin ti Jéhovah pëpe. Biani, akobe ni abe awe ti tene a ko ni (Jean 4:34, 35). Tongaso, a lingbi e sambela na e hunda ti tene a mû na e awakua mingi. Me, tongana nyen e lingbi ti sara ye ague oko na sambela so? E lingbi ti sara ni na gango anzoni wafango ye tongana e yeke mû mbage ti e na bê ti e kue na yâ ti kusala ti fango tënë ti Royaume nga na ti sarango adisciple.​—Mat. 28:19, 20; Marc 13:10.

3. Tongana nyen yingo ti Nzapa ayeke sara kota kusala na mungo na e maboko ti ga anzoni wakua?

³ Article so ahon afa so tongana yingo ti Nzapa afa lege na e, a yeke mû maboko na e ti “tene tënë ti Nzapa na mbeto pëpe.” (Kus. 4:31). Yingo so alingbi nga ti mû maboko na e ti ga anzoni wakua. Mbeni lege ti ga anzoni wakua ayeke ti sara kusala nzoni na pendere gbakuru so Jéhovah Nzapa amû na e: tënë ti lo so a sû na mbeti, Bible. A sû ni na gbe ti yingo vulu (2 Tim. 3:16). Atënë ti yâ ni alondo na Nzapa. Tongaso, tongana e ye ti tene yingo vulu afa lege na e, a lingbi e sara kusala nzoni na Bible ti fa na zo tâ tënë so ayeke na yâ ni. Kozoni si e bâ tongana nyen ti sara ni, zia e gbu li ti e kete na ndo ti ngangu so Mbeti ti Nzapa ayeke na ni.

‘Tënë ti Nzapa ayeke na ngangu ti sara ye’

4. Tënë ti Nzapa so ayeke na yâ ti Bible alingbi ti changé mbeni zo tongana nyen?

⁴ Tënë ti Nzapa ayeke na ngangu mingi (aHéb. 4:12)! Na lege ti fä, tënë so alondo na yâ ti Bible aza ahon épée kue so zo asara, teti na lege ti fä a kpo a lï juska a kangbi popo ti abio na mafuta ti yâ ti abio. Tâ tënë so ayeke na yâ ti Mbeti ti Nzapa alingbi ti ndu zo ti yâ ni ti mbeni zo na ti lï yâ ti bibe na atënë ti bê ti zo na fango na gigi ye so ayeke na yâ ti lo. Tâ tënë ti Bible alingbi biani ti sara ngangu na ndo ti mbeni zo ti changé lo. (Diko aColossien 3:10.) Biani, Mbeti ti Nzapa alingbi ti changé fini ti azo!

5. Na alege wa Bible alingbi ti fa lege na e? Aye ti pekoni ayeke so wa?

⁵ Na ndo ni, a lingbi ti wara ndara so ayeke na yâ ti Bible na mbeni ndo nde pëpe. Anzoni wango so ayeke na yâ ni alingbi ti mû maboko na azo ti hinga lege ti duti nzoni na yâ ti dunia so ayeke kirikiri na so akpale ayeke dä mingi. Mbeti ti Nzapa aza lumière gi na tere ti gere ti e pëpe me nga na ndo ti lege ti e kue (Ps. 119:105). A yeke mû maboko mingi na e na ngoi so e yeke na akpale, wala na ngoi so e yeke mû adesizion na ndo ti sorongo akamarade, angia, kua, bongo nga na ambeni ye (Ps. 37:25;  aProv. 13:20; Jean 15:14; 1 Tim. 2:9). Sarango ye alingbi na akpengba-ndia so ayeke na yâ ti Mbeti ti Nzapa alingbi ti sara si e mä tere nzoni na amba ti e (Mat. 7:12; aPhil. 2:3, 4). Tongana e zia Mbeti ti Nzapa aza lumière na lege ti e, e lingbi ti bâ tongana nyen adesizion so e mû alingbi ti sara ande ye na ndo ti e kekereke (1 Tim. 6:9). Mbeti ti Nzapa afa nga ye so Nzapa aye ti sara kekereke, a mû maboko na e ti tomba peko ti aye so ague oko na ye so lo ye (Mat. 6:33; 1 Jean 2:17, 18). So pendere fini si mbeni zo alingbi ti wara tongana lo zia si akpengba-ndia ti Nzapa afa lege na lo!

6. Tongana nyen Bible ayeke ngangu ye ti bira na yâ ti bira ti e ti yingo?

⁶ Gbu li nga na ndo ti ngangu ye ti bira so ayeke Bible na yâ ti bira ti yingo so e yeke sara. Paul airi tënë ti Nzapa “épée ti yingo”. (Diko aÉphésien 6:12, 17.) Tongana e fa tënë ti Bible nzoni, a lingbi ti zi azo na gbe ti ngangu so Satan ayeke sara na ndo ti fini ti ala. A yeke mbeni épée so ayeke sö fini ti ala ahon ti futi ala. A lingbi e sara ngangu ti sara kusala nzoni na ni.

Sara kusala na tënë ti Nzapa na lege ni

7. Ngbanga ti nyen a yeke kota ye ti manda ti sara kusala nzoni na “épée ti yingo”?

⁷ Mbeni turugu alingbi ti yapu na sarango kusala nzoni na aye ti bira ti lo gi tongana lo tara tere ti lo na ni nzoni na lo manda ti sara kusala na ni nzoni. A yeke legeoko nga na sarango kusala na “épée ti yingo” na yâ ti bira ti e ti yingo. Paul atene: “Mo sara ngangu kue ti duti mbeni zo so anzere na lê ti Nzapa, mbeni wakua so mbeni ye ti sara kamene na lo ayeke dä pëpe, wakua so ahinga ti sara kusala na lege ni na tënë so ayeke tâ tënë.”​—2 Tim. 2:15.

8, 9. Nyen la ayeke mû maboko na e ti gbu nda ti ye so Bible atene? Mû mbeni tapande.

⁸ Nyen la ayeke mû maboko na e ti “sara kusala na lege ni na tënë so ayeke tâ tënë” na fango tënë? Kozoni si e fa polele na ambeni zo ye so ayeke na yâ ti Bible, a lingbi e wani e gbu nda ni nzoni si. Ye so ahunda ti tene e zi lê mingi na ndo ti atënë so angoro mbeni versê wala mbeni tënë. A yeke mû lege na e ti hinga atënë so aga kozo wala aso aga na peko ti versê ni si e hinga nda ni polele.

⁹ Ti gbu nda ti mbeni versê ti Mbeti ti Nzapa na lege ni a hunda ti tene e bâ tënë so angoro ni. Tënë ti Paul so e wara na aGalate 5:13 ayeke mbeni tapande ni. Lo sû na mbeti lo tene: “Biani, aita, a iri ala ti duti na liberté. Me ala mû liberté so tongana mbeni lege ti sara na ye ti mitele pëpe. Me na lege ti ndoye, ala sara kua na mba na popo ti ala tongana angbâa.” Liberté wa la Paul aye ti sara tënë ni ge so? Lo ye ti sara tënë ti sigingo na gbe ti siokpari na kui? na gbe ti ngbâa ti afango ye ti anzapa ti wataka? wala na gbe ti mbeni ye nde? Atënë so angoro ni afa so Paul aye ti sara tënë ti liberté so aga na lege ti ‘zingo e na gbe ti deba so Ndia aga na ni na li ti e’. (aGal. 3:13, 19-24; 4:1-5). Lo ye ti sara tënë ti liberté so aChrétien awara na mungo peko ti Christ. Azo so abâ na nene ni liberté so asara  kusala na ndoye na amba ti ala tongana angbâa. Ti azo so asara ye na ndoye pëpe, ala te tere na ala sara sioni na mba.​—aGal. 5:15.

10. Ti gbu nda ti Bible nzoni, asango wa a lingbi e gi ti hinga ni? Tongana nyen e lingbi ti wara ni?

¹⁰ Ti gbu nda ti mbeni versê nzoni, a lingbi e gi nga ti hinga asango so andu tënë ni, na tapande zo wa la asû mbeti ni, a sû ni lawa na ye wa asi si a sû ni. A yeke mû ande maboko mingi ti hinga ndani so a sû buku ni, na tongana lege ayeke dä a yeke mû maboko ti hinga dutingo ti azo ni, tambela ti ala nga lege so ala yeke voro Nzapa na ngoi ni kâ. *

11. A lingbi e sara hange na nyen na ngoi so e yeke zi nda ti aversê na mbeni zo?

¹¹ Ti “sara kusala na lege ni na tënë so ayeke tâ tënë”, a hunda ti zi nda ti atâ tënë ti Mbeti ti Nzapa na lege ni. A yeke nzoni e sara hange si e sara kusala na Bible pëpe ti zia mbeto na yâ ti azo. Atâa so e lingbi ti sara kusala na Mbeti ti Nzapa ti gbu koko ti tâ tënë, tongana ti so Jésus asara na ngoi so Zabolo atara lo, a lingbi e gbu zo na ngangu pëpe ti mä na bê na tënë ti e (Deut. 6:16; 8:3; 10:20; Mat. 4:4, 7, 10). A yeke nzoni e mä wango ti bazengele Pierre so atene: “Na yâ ti bê ti ala, zia ala hinga so Christ ayeke nzoni-kue na ala bâ lo tongana Seigneur, lakue ala duti nduru ti gbu koko ti beku ti ala na gbele azo kue so ayeke hunda ala na nda ti beku ni so; me ala sara ni na ngangu pëpe nga na nengo zo mingi.”​—1 Pi. 3:15.

12, 13. Aye wa so “gere ni aluti ngangu” tâ tënë ti Mbeti ti Nzapa alingbi ti kinda ni? Mû mbeni tapande.

¹² Ye wa tâ tënë ti Mbeti ti Nzapa alingbi ti sara na ndo ti mbeni zo tongana e sara kusala na ni nzoni? (Diko 2 aCorinthien 10:4, 5.) Tâ tënë ti Mbeti ti Nzapa alingbi ti kinda “aye so gere ni aluti ngangu”, so ti tene a fa na gigi afango ye ti wataka, asarango ye so asara sioni na zo nga na atënë ti ndara so alondo na azo so alingbi kue pëpe. E lingbi ti sara kusala na Bible ti zi na yâ ti li ti azo atënë kue so “alondo ti ke hingango ye ti Nzapa”. E lingbi ti sara kusala na afango ye ti Bible ti mû maboko na amba ti e ti tene bibe ti ala ague oko na atâ tënë ti Mbeti ti Nzapa.

¹³ Bâ na tapande mbeni ita-wali ti kodoro ti Inde so ngu ti lo ayeke 93. Tongana lo ngbâ kete, a fa na lo tënë ti kiringo ti âme na yâ ti mbeni tere nde na peko ti kuâ. Tongana lo to nda ti manda Bible na lege ti ambeti so lo na molenge ti lo ti koli so ayeke na kodoro wande ayeke tokua na popo ti ala, lo yeda hio na ye so lo yeke manda na ndo ti Jéhovah nga na azendo ti lo. Ye oko, tënë ti kiringo ti âme na yâ ti mbeni tere nde alï yâ ti li ti lo ngangu, ni la tongana lo diko tënë so molenge ti lo asû na lo na ndo ti dutingo ti akuâ, lo ke. Lo tene: “Mbi gi li ti mbi gbâ na tâ tënë so Mbeti ti Nzapa ti mo atene. Abungbi ti vorongo nzapa kue afa atene mbeni ye na yâ ti e ayeke kui pëpe. Na mbi  hinga ti mbi lakue mbi tene tongana zo akui mbeni mbage ti tere ti lo so lê ti zo abâ pëpe ayeke kiri na yâ ti mbeni tere nde fani 8 400 000. Tënë so ayeke tâ tënë pëpe ni tongana nyen? Mvene la mingi ti abungbi ti vorongo nzapa afa so?” Mara ti tënë so gere ni aluti ngangu so, épée ti yingo alingbi ti kinda ni? Na peko ti so ala sara lisoro mingi na ndo ti tënë so na lege ti Mbeti ti Nzapa, ambeni yenga na pekoni lo sû mbeti lo tene: “Fadeso mbi komanse ti hinga tâ tënë na ndo ti kuâ awe. A mû na mbi ngia mingi ti hinga so na ngoi ti zingongo ti akuâ, fade e lingbi ti tingbi na asewa ti e so akui. Mbi yeke na beku so Royaume ti Nzapa ayeke ga na yâ ti kete ngoi.”

Sara kusala na ni ti ga na azo ti yeda na tâ tënë

14. Ti ga na zo ti yeda na tënë aye ti tene nyen?

¹⁴ Sarango kusala nzoni na Bible na fango tënë ayeke gi ti fa aversê pëpe. Paul “[a]ga na azo ti yeda na tënë” so lo yeke tene, a yeke nzoni e sara nga legeoko tongaso. (Diko Kusala 19:8, 9; 28:23.) Ti “ga na zo ti yeda na tënë” aye ti tene ti “ga na zo ti changé kozo bibe ti lo”. Zo so mbeni zo aga na lo ti yeda na mbeni ye a yeke zo so “azia bê ti lo kue na ye ni”. Tongana e ga na mbeni zo ti yeda na fango ye ti Bible, e ga na lo ti zia bê ti lo na fango ye ni so. Ti sara ni, a lingbi e gi ti ga na wamango e ti hinga na bê ti lo so tâ tënë la e yeke fa na lo so. E lingbi ti sara ni na alege so e yeke gue ti bâ fadeso.

15. Tongana nyen mo lingbi ti gboto lê ti zo na ndo ti Bible na mbeni lege so asara si lo bâ ni na nene ni?

¹⁵ Gboto lê ti lo na ndo ti Mbeti ti Nzapa na mbeni lege so asara si lo bâ ni na nene ni. Tongana mo fa mbeni versê, fa so a yeke kota ye ti hinga bango ndo ti Nzapa na ndo ti tënë ni. Na peko ti so mo hunda tënë na zo ni na mo mä kiringo tënë ti lo, mo lingbi ti tene mbeni tënë tongaso: ‘Zia e bâ bango ndo ti Nzapa na ndo ti tënë ni.’ Wala mo lingbi ti hunda lo: ‘Nzapa atene ti lo nyen na ndo ti ye so?’ Sarango kusala tongaso na aversê afa so Bible alondo na Nzapa na amû lege na zo ni ti bâ ni na nene ni. A yeke kota ye ti sara tongaso tongana e yeke fa tënë na mbeni zo so amä na bê na Nzapa me ahinga ye so Bible afa pëpe.​—Ps. 19:8-11.

16. Nyen la ayeke mû maboko na mo ti fa nda ti aversê nzoni?

¹⁶ Diko gi aversê ni pëpe, me nga fa nda ni. Na yâ ti aye so lo yeke fa na azo, lakue Paul ayeke “zi nda ti tënë ni nga lo fa na ala na lege ti atënë ti yâ ti Mbeti ti Nzapa”. (Kus. 17:3). Mingi ni, versê ti Bible oko alingbi ti tene tënë mingi, na a lingbi mo luti gi na ndo ti angbongboro tënë so abâ ye so ala yeke sara lisoro na ndo ni. Mo lingbi ti sara ni na kiringo na ndo ti tënë so ngbongboro tënë ni aluti na ndo ni wala na hundango atënë so ayeke mû maboko na zo ni ti hinga ni. Na pekoni, fa nda ti mbage ti versê so andu tënë ti lisoro ni. Tongana mo sara ni awe, mû maboko na zo ni ti bâ tongana nyen versê ni andu lo.

17. Tongana nyen mo lingbi ti pika patara na ndo ti Mbeti ti Nzapa na mbeni lege so apusu zo ti yeda na tënë ni?

¹⁷ Sara kusala na Mbeti ti Nzapa ti pika na patara na mbeni lege so apusu zo ni ti yeda na tënë ni. Na azo so ayeke na gbele lo, Paul ahunda na ala na bê ti lo kue ti mä lo nga lo sara tënë na lege ni, “lo mû Mbeti ti Nzapa si lo pika na patara na ala”. (Kus. 17:2, 4). Na tapande ti Paul, sara ngangu ti ndu bê ti wamango mo. “Tö” wala sigigi na ye so ayeke na bê ti lo na hundango na lo atënë so afa so mo bi bê ti mo na lo (aProv. 20:5). Kpe ti sara tënë na ngangu. Fa atënë  ti mo polele nga na lege ni. A yeke nzoni mo fa ambeni ye so afa so tënë ti mo ni ayeke tâ tënë. Zia si atënë ti mo alondo gi na yâ ti Mbeti ti Nzapa. A yeke nzoni ti mû gi versê oko ti fa nda ni nzoni na ti mû mbeni tapande na tere ni ahon ti diko versê use wala ota na loro na peko ti tere. Sarango kusala na ambeni ye so amû ngangu na tënë ti mo alingbi nga ti ga na zo ti yeda na tënë ni. Na ambeni ngoi alingbi ti duti nzoni ti gi nda ti tënë ni na ti mû ambeni sango na ndo ni. Wali ti ngu 93 so e sara tënë ti lo fade aye ti hinga ngbanga ti nyen tënë ti âme (wala yingo) so akui pëpe amû ndo mingi. Na hingango ndo so tënë so alondo dä nga tongana nyen alï na yâ ti abungbi ti vorongo nzapa ti dunia, amû maboko na lo ti yeda na ye so Bible afa na ndo ti tënë ni. *

Ngbâ ti sara kusala na ni nzoni

18, 19. Ngbanga ti nyen a yeke nzoni e ngbâ ti sara kusala nzoni na “épée ti yingo”?

¹⁸ Bible atene: “Aye so ayeke si na yâ ti dunia so ayeke changé tere changengo.” Azo ti sioni angbâ gi ti sara sioni ti gue na ni (1 aCor. 7:31; 2 Tim. 3:13). Tongaso, a yeke kota ye ti tene e ngbâ ti kinda “aye so gere ni aluti ngangu” na sarango kusala na “épée ti yingo, so ayeke tënë ti Nzapa”.

¹⁹ So tâ ngia si e yeke na ni ti duti na Mbeti ti Nzapa, na ti sara kusala na tënë ti yâ ni so ayeke na ngangu ti zi na yâ ti li ti azo afango ye ti wataka kue na ti ndu bê ti azo so aye tâ tënë! Mbeni ye so gere ni aluti ngangu ti hon tënë ti Mbeti ti Nzapa ayeke dä pëpe. Tongaso, zia e gi lege kue ti sara kusala nzoni na épée ti yingo na yâ ti kusala ti fango tënë ti Royaume so Nzapa amû na e.

[Akete tënë na gbe ni]

Mo manda nyen?

• Mbeti ti Nzapa ayeke na ngangu ti sara nyen?

• Tongana nyen e lingbi ti “sara kusala na lege ni na tënë so ayeke tâ tënë”?

• Tënë ti yâ ti Bible alingbi ti sara nyen na “aye so gere ni aluti ngangu”?

• Tongana nyen mo lingbi ti maï kode so mo yeke ga na azo ti yeda na tënë ni na fango tënë?

[Ahundango tënë ti manda na ye]

[Encadré/​Foto na lembeti 21]

Lege ti sara kusala na Bible ti ga na azo ti yeda na tâ tënë

▪ Sara si azo abâ ni na nene ni

▪ Fa nda ti Mbeti ti Nzapa

▪ Pika patara na azo ti ndu bê ti ala ti yeda na tënë ni

[Foto na lembeti 20]

A lingbi mo manda ti sara kusala nzoni na “épée ti yingo”