“Tene tënë ti Nzapa na mbeto pëpe”

‘Ala si na yingo vulu na ala yeke tene tënë ti Nzapa na mbeto pëpe.’​—KUS. 4:31.

1, 2. Ngbanga ti nyen a lingbi e sara ngangu ti fa tënë nzoni?

 LANGO ota kozoni si lo kui, Jésus atene na adisciple ti lo: “A yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.” Kozoni si lo gue na yayu, Jésus so azingo na kuâ amû yanga na adisciple ti lo ti ‘sara si azo na popo ti amara kue aga adisciple, na ti fa na ala ti bata aye kue so lo mû yanga na ala ti sara.’ Lo tene na ala so fade lo yeke na ala “juska na lâ ni so aye ti ngoi so ayeke gue ti hunzi.”​—Mat. 24:14; 26:1, 2; 28:19, 20.

² E so e yeke aTémoin ti Jéhovah, e yeke mû mbage ti e na mbeni kusala so ato nda ni na ngoi ti akozo Chrétien. Kusala ti fango tënë ti Royaume na ti sarango adisciple ayeke sö fini ti azo; mbeni kusala ti lingbi na ni ayeke dä pëpe. Tongaso, a yeke kota ye ti tene e sara kusala so nzoni! Na yâ ti article so, fade e yeke bâ tongana nyen fango lege ti yingo vulu ayeke mû maboko na e ti tene tënë na mbeto pëpe tongana e yeke fa tënë. A-article use so ayeke ga na peko ayeke fa tongana nyen yingo ti Jéhovah alingbi ti mû maboko na e ti fa ye na kode na ti ngbâ lakue ti fa tënë.

A lingbi e duti na mbeto pëpe

3. Ngbanga ti nyen a hunda ti duti na mbeto pëpe ti fa tënë ti Royaume?

³ E yeke na kota pasa ti sara kusala ti fango tënë ti Royaume so Nzapa amû na e. Ye oko, na ambeni ngoi sarango kusala so alingbi ti duti ngangu. Na ngoi so ambeni zo ayeke nduru ti yeda na nzoni tënë ti Royaume ti Nzapa, ambeni mingi ayeke tongana azo ti ngoi ti Noé. Jésus atene: “Ala gbu li lani na ndo ti ye so ayeke si so pëpe juska kota ngu apika na ahon na ala kue.” (Mat. 24:38, 39). Nga ambeni ayeke dä so ayeke he e wala ayeke kanga lege na e (2 Pi. 3:3). E lingbi ti wara kangango lege na mbage ti akota zo ti kodoro, amba ti e ti ekole wala ti place ti kua, wala même na mbage ti afami ti e. Na ndo ni, awokongo ti e wani alingbi nga ti kanga lege na e, aye tongana kamene na mbeto ti tene azo ake e. Aye mingi alingbi ti sara si aduti ngangu na e ti “sara tënë na kamene pëpe” na ti tene tënë ti Nzapa “na mbeto pëpe”. (aÉph. 6:19, 20). Ti ngbâ lakue ti tene tënë ti Nzapa ahunda ti duti na mbeto pëpe. Ye wa alingbi ti mû maboko na e ti duti na mbeto pëpe?

4. (a) Dutingo na mbeto pëpe ayeke nyen? (b) Ye wa amû maboko na bazengele Paul ti duti na mbeto pëpe ti fa tënë na azo ti Thessalonique?

⁴ Mbupa ti yanga ti Grec so a kiri pekoni na “mbeto pëpe” aye ti tene “tenengo tënë na lê ti azo, sarango tënë polele.” Mbupa so aye ti sara tënë ti “dutingo na ngangu . . . nga ti sarango ye na mbeto pëpe.” Ti sara ye na mbeto pëpe aye ti tene pëpe ti duti na zango yanga wala ti duti na sioni yanga (aCol. 4:6). Atâa so e yeke sara ye na mbeto pëpe, e ye nga ti duti na siriri na azo kue (aRom. 12:18). Legeoko nga, tongana e yeke fa nzoni tënë ti Royaume ti Nzapa na mbeni zo, a lingbi e sara ye na mbeto pëpe nga na ndara si e son bê ti lo senge senge pëpe. Tongaso, dutingo na mbeto pëpe ahunda ti  sara ngangu ti duti na ambeni nzoni sarango ye. A yeke gi na ngangu ti e pëpe si e yeke duti na mara ti sarango ye na mbeto pëpe so. Na peko ti so “a sara ye ti kamene na [bazengele Paul na akamarade ti lo] na kodoro ti Philippes”, ala sara tongana nyen ti ‘zi mbeto na yâ ti ala’ ti fa tënë na azo ti Thessalonique? Paul atene: A yeke “Nzapa ti e [si] asara”. (Diko 1 aThessalonicien 2:2.) Jéhovah Nzapa alingbi ti zi mbeto na yâ ti e na ti sara si e duti na mbeto pëpe tongana ti Paul na akamarade ti lo.

5. Tongana nyen Jéhovah azi mbeto na yâ ti Pierre, Jean nga na ambeni disciple?

⁵ Tongana “amokonzi [ti azo], a-ancien nga na ascribe” ahunda na ala ngbanga ti nyen ala ngbâ ti fa tënë, bazengele Pierre na bazengele Jean atene: “Wala a yeke nzoni na lê ti Nzapa ti tene e mä ala ahon ti mä Nzapa, a yeke na ala ti bâ. Me ti e, e lingbi ti kaï pëpe ti sara tënë na ndo ti aye so e bâ na e mä.” Ahon ti tene ala sambela Nzapa ti kanga lege na ye ti ngangu so a sara na ala, ala na amba ti ala asambela atene: “Jéhovah, mo dengi mê ti mo na atënë so ala tene ti zia mbeto na bê ti e so, na mo mû lege na angbâa ti mo ti ngbâ ti fa tënë ti mo na mbeto oko pëpe.” (Kus. 4:5, 19, 20, 29). Jéhovah akiri tënë na sambela ti ala tongana nyen? (Diko Kusala 4:31.) Jéhovah azi mbeto na yâ ti ala na lege ti yingo ti lo. Yingo ti Nzapa alingbi ti sara tongaso teti e nga. Tongaso, tongana nyen e lingbi ti wara yingo ti Nzapa si alingbi ti fa lege na e na fango tënë?

Ye so e lingbi ti sara ti duti na mbeto pëpe

6, 7. Nduru lege ti wara yingo ti Nzapa ayeke so wa? Mû ambeni tapande.

⁶ Nduru lege ti wara yingo vulu ti Nzapa ayeke ti hunda ni. Jésus atene na awamango lo: “Asinga ala so ala yeke sioni, ala hinga tongana nyen ti mû amatabisi so ayeke nzoni na amolenge ti ala, si fade Babâ so ayeke na yayu ayeke mû yingo vulu na ala so ahunda ni na lo pëpe?” (Luc 11:13). Biani, a lingbi e ngbâ lakue ti sambela ti hunda yingo vulu. Tongana e yeke na mbeto ti fa tënë na tere ti lege, na alege kue so azi na e wala na ando ti dengo buze, e lingbi ti sambela Jéhovah ti mû na e yingo ti lo na ti hunda na lo ti zi mbeto kue na yâ ti e.​—1 aThes. 5:17.

⁷ A yeke ye so mbeni ita-wali so iri ti lo ayeke Rosa asara. * Mbeni lâ tongana Rosa ayeke na place ti kua ti lo, mbeni mba ti lo wafango mbeti adiko mbeni tondo so mbeni ekole asara na ndo ti sarango sioni na amolenge. Ye so wafango mbeti so adiko ason lo mingi na lo dekongo lo tene: “Nyen asi na dunia so tongaso?” Rosa alingbi pëpe ti zia mara ngoi ti fango tënë tongaso ahon. Lo sara nyen ti wara ngangu ti to nda ti lisoro na wali so? Rosa atene: “Mbi sambela Jéhovah na mbi hunda lo ti mû na mbi yingo ti lo ti mû maboko na mbi.” Lo wara lege ti fa tënë nzoni, na lo na wali ni aleke kapa ti kiri ti sara lisoro na ndo ti tënë ni. Bâ nga ye so asi na mbeni kete molenge-wali ti ngu oku so iri ti lo ayeke Milane so ayeke na gbata ti New York City. Milane atene: “Kozo si mbi hon na ekole, mbi na mama ti mbi e yeke sambela Jéhovah lakue.” Nyen la ala sambela ndali ni? Ala sambela ti tene Milane awara ngangu ti sara mbeto pëpe na ti fa tënë na ndo ti Nzapa ti lo! Mama ti lo atene: “Ye so amû maboko na Milane ti fa tënë ti mabe ti lo na ndo ti amatanga ti dungo, ti abungbi ti nzapa nga na ti kodoro; na ti sara amatanga ni so pëpe.” Atapande so afa so sambela alingbi ti mû maboko na e ti zi mbeto na yâ ti e.

8. E lingbi ti manda nyen na ndo ti prophète Jérémie ti duti na mbeto pëpe?

⁸ Gbu li nga na ndo ti ye so amû maboko na prophète Jérémie ti duti na mbeto  pëpe. Tongana Jéhovah azia lo tongana prophète ti amara, Jérémie atene: “Bâ, mbi hinga lege ti sara tënë pëpe, teti mbi de molenge.” (Jér. 1:4-6). Me na pekoni, Jérémie afa tënë na mbeto pëpe nga lo ngbâ dä, na a sara si mingi ti azo abâ lo tongana zo so ayeke sara gi tënë ti aye ti sioni (Jér. 38:4). Teti ngu 65, lo fa tënë ti fango ngbanga ti Jéhovah na mbeto pëpe. A hinga lani Jérémie nzoni mingi na kodoro ti Israël tongana zo so afa tënë na mbeto pëpe nga na ngangu, a sara si ngu 600 na pekoni tongana azo abâ Jésus so ayeke fa tënë na mbeto pëpe, ambeni zo abâ atene ayeke Jérémie la azingo na kuâ so (Mat. 16:13, 14). Tongana nyen prophète Jérémie so kozoni aye kua ni pëpe ahon ndo ti kamene ti lo? Lo tene: “Na yâ bê ti mbi [tënë ti Nzapa aga] tongana wâ so agbi ye, a gbi na yâ bio ti mbi; mbi woko na lege ti batango ye so.” (Jér. 20:9). Biani, tënë ti Jéhovah ayeke na ngangu na ndo ti Jérémie na apusu lo ti sara tënë.

9. Ngbanga ti nyen tënë ti Nzapa alingbi ti sara ye na ndo ti e tongana ti so asara na ndo ti Jérémie?

⁹ Na yâ ti mbeti ti lo na aHébreu, bazengele Paul atene: “Tënë ti Nzapa ayeke na fini na ayeke na ngangu ti sara ye, a za ahon épée so yanga ni ayeke use na a kpo a lï juska a kangbi popo ti âme na yingo, a kangbi nga popo ti ando so abio atingbi tere dä na mafuta ti yâ ti abio ni, na a lingbi ti hinga nda ti abibe ti bê ti zo nga na aye so bê ti zo ni aye ti sara.” (aHéb. 4:12). Tënë ti Nzapa alingbi ti sara ye na ndo ti e tongana ti so asara na ndo ti Jérémie. E dabe ti e so atâa so a sara kusala na azo ti sû Bible, a yeke ndara ti azo la ayeke na yâ ni pëpe, teti tënë ni alondo na Nzapa. Mbeti 2 Pierre 1:21 atene: “Aprophétie aga lâ oko pëpe na lege ti ye so bê ti zo aye, me azo asara tënë ti ye so alondo na Nzapa tongana yingo vulu afa lege ni na ala.” Tongana e mû ngoi ti bi tere ti e na yâ ti mandango Bible e wani, li ti e ayeke si na tënë so a sû na gbe ti yingo vulu. (Diko 1 aCorinthien 2:10.) Tënë so alingbi ti duti “tongana wâ so agbi ye” na yâ ti e, tongaso e lingbi pëpe ti bata ni gi ndali ti e.

10, 11. (a) Tongana e ye ti sara tënë na mbeto pëpe a lingbi e manda Bible tongana nyen? (b) Fa mbeni ye oko so mo yeke sara ti maï kode ti mandango ye ti mo.

¹⁰ Ti tene Mandango Bible e wani asara ngangu na ndo ti e, a lingbi e sara ni na mbeni lege so atënë ti yâ ni alï bê ti e ngangu, a ndu zo ti e ti yâ ni. Na tapande, a mû na prophète Ézéchiel mbeni suma so na yâ ni a hunda na lo ti te mbeti so a rulê ni rulengo so mbeni ngangu tokua ayeke na yâ ni ti fa ni na azo so aye ti mä tënë pëpe. A lingbi Ézéchiel ahinga tënë ti yâ ti tokua ni nzoni na lo sara si aga mbage ti tere ti lo. Na sarango tongaso, a lingbi ti sara si fango peko ti tokua so anzere: tongana ngu-lavu,  wala mafuta ti wotoro.​—Diko Ézéchiel 2:8–3:4, 7-9.

¹¹ Dutingo ti e ayeke tongana ti Ézéchiel. Laso, gi senge senge tongaso azo mingi aye ti mä tënë ti Bible pëpe. Tongana e ye ti ngbâ ti fa tënë ti Nzapa, a yeke kota ye ti tene e manda Mbeti ti Nzapa na mbeni lege so ayeke mû maboko na e ti gbu nda ni nzoni na ti yeda na atënë ti yâ ni. A lingbi e manda tënë ti Nzapa lakue lakue, me ngoi na ngoi pëpe. A lingbi e duti na mara bibe ti wasungo psaume so ahe bia atene: “Zia tënë ti yanga ti mbi na bibe ti mbi amû ngia na Mo, O L’Éternel, Tênë ti mbi na Zo Ti Ton mbi.” (Ps. 19:15). A yeke kota ye ti mû ngoi ti gbu li ti e na ndo ti ye so e diko tongaso si tâ tënë ti Bible alï bê ti e ngangu! Biani, a lingbi e sara ngangu ti maï kode ti mandango ye ti e wani ahon ti kozo. *

12. Ngbanga ti nyen abungbi ayeke mû maboko na e ti tene yingo vulu afa lege na e?

¹² Mbeni lege ti wara yingo vulu ti Jéhovah ayeke ti “bi lê na ndo ti mba ti pusu mba ti duti na ndoye na ti sara apendere kusala, [na ti] kpe bungbi ti e pëpe”. (aHéb. 10:24, 25). Anzoni lege ti tene yingo afa lege na e ayeke ti sara ngangu ti gue lakue na abungbi, ti mä tënë nzoni na ti sara ye alingbi na ye so e manda. Kozoni kue, a yeke yingo vulu ti Jéhovah la ayeke fa lege na congrégation.​—Diko Apocalypse 3:6.

Dutingo na mbeto pëpe aga na aye ti nzoni

13. Ye wa e lingbi ti manda na ndo ti ye so akozo Chrétien asara na yâ ti kusala ti fango tënë?

¹³ Yingo vulu ayeke ngangu so ahon tanga ti angangu kue na yâ ti dunia, na a lingbi ti mû ngangu na azo ti sara ye so Jéhovah aye. Akozo Chrétien asara kota kusala ti fango tënë na gbe ti ngangu ti yingo so. Ala fa nzoni tënë “na création kue so ayeke na gbe ti yayu”. (aCol. 1:23). Tongana e bâ so mingi ti ala ayeke lani “azo so amanda mbeti pëpe na ala yeke asenge zo,” a yeke polele so mbeni ngangu so ayeke kota ahon so ala yeke na ni si apusu ala ti sara kusala so.​—Kus. 4:13.

14. Nyen la alingbi ti mû maboko na e ti tene “yingo aduti tongana wâ na yâ ti tere” ti e?

¹⁴ Tongana fini ti e ague oko na fango lege ti yingo vulu, a yeke pusu e ti fa tënë na mbeto pëpe. Aye ti nzoni so e yeke wara na lege ti sambelango lakue ti wara yingo vulu, ti mandango ye nzoni e wani, ti gbungo li na ndo ti ye so e diko nga ti guengo lakue na abungbi alingbi ti mû maboko na e ti tene “yingo aduti tongana wâ na yâ ti tere  ti [e]”. (aRom. 12:11). Na ndo ti “mbeni Juif [so] asi na Éphèse, [so] iri ti lo ayeke Apollos, [so] a dü lo na Alexandrie”, Bible atene: “Teti so yingo ayeke tongana wâ na yâ ti tere ti lo, lo yeke sara tënë na lo yeke fa aye na ndo ti Jésus tâ na lege ni.” (Kus. 18:24, 25). Tongana “yingo aduti tongana wâ na yâ ti tere” ti e, e yeke duti na mbeto pëpe ti fa tënë da na da nga na ngoi kue so lege azi na e ti fa tënë.​—aRom. 12:11.

15. Tongana nyen fango tënë mingi na mbeto pëpe aga na aye ti nzoni na e?

¹⁵ Tongana e fa tënë mingi na mbeto pëpe, a yeke sara ye ti nzoni na ndo ti e. Bango ndo ti e ayeke ga nzoni teti e hinga nzoni mingi nene ti kusala ti e nga na aye ti nzoni so aga na pekoni. Nzara ti fango tënë akiri ti dü na bê ti e ndali ti kota ngia so e wara tongana e sara kusala ni nzoni. Nga, e yeke fa tënë na bê ti e kue teti e hinga so ngoi so ayeke ngoi ti lango na yâ ti kusala ni la pëpe.

16. A lingbi e sara nyen tongana nzara ti e ti fango tënë akiri na peko?

¹⁶ Ka tongana e yeke na nzara ti fango tënë mbeni pëpe wala nzara ni asara e mingi tongana ti kozo pëpe? Tongana a yeke tongaso, bâ tere ti mo wani ti hinga ye wa atambela nzoni pëpe. Paul atene: “Ala ngbâ ti bâ tere ti ala ti bâ wala ala yeke na yâ ti mabe, ala ngbâ ti bâ tere ti ala ti bâ wala ala wani ala yeke tongana nyen.” (2 aCor. 13:5). Hunda tere ti mo: ‘Yingo ayeke lakue tongana wâ na yâ ti tere ti mbi? Mbi yeke sambela Jéhovah ti wara yingo ti lo? Asambela ti mbi afa so mbi zia bê ti mbi na ndo ti lo ti sara ye so lo ye? Atënë ti yâ ti sambela ti mbi afa so mbi kiri singila teti kusala so lo mû na e? Mbi yeke manda ka ye tongana nyen? Mbi yeke mû ngoi oke ti gbu li na ndo ti aye so mbi yeke diko na mbi yeke mä? Mbi yeke mû mbage ti mbi tongana nyen na yâ ti abungbi ti congrégation?’ Ti gbu li na ndo ti mara ti ahundango tënë so alingbi ti mû maboko na mo ti hinga ndo so mo woko dä na ti gi ti leke ni.

Zia yingo ti Nzapa asara si mo duti na mbeto pëpe

17, 18. (a) Laso, kusala ti fango tënë ague na li ni tongana nyen? (b) Tongana nyen e lingbi ti fa so e yeke fa nzoni tënë ti Royaume ti Nzapa na “kamene oko pëpe”?

¹⁷ Jésus so azingo na kuâ atene na adisciple ti lo: “Ala yeke wara ngangu tongana yingo vulu aga na ndo ti ala, na fade ala yeke duti atémoin ti mbi na Jérusalem, na yâ ti Judée kue nga na Samarie na juska na ambage ti sese so ayeke tâ yongoro.” (Kus. 1:8). Kusala so ato nda ni lani kâ ague na li ni laso mingi. A-Témoin ti Jéhovah nduru na kutu mbasambala ayeke fa tënë ti Royaume na yâ ti akodoro ahon 230, ala sara ngbonga ngbundangbu oko na ndambo ngu oko oko na yâ ti kusala so. A nzere mingi ti sara na bê ti e kue kusala so, so a kiri ti sara ni mbeni pëpe!

¹⁸ Tongana ti ngoi ti akozo Chrétien, kusala ti fango tënë so a yeke sara ni na ndo ti sese kue ayeke tambela na gbe ti fango lege ti yingo ti Nzapa. Tongana e yeda ti tene yingo afa lege na e na yâ ti kusala ti e, fade e yeke “sara ni tâ na kamene oko pëpe”. (Kus. 28:31). Tongaso, zia yingo afa lege na e na ngoi so e yeke fa nzoni tënë ti Royaume ti Nzapa!

[Akete tënë na gbe ni]

Mo manda nyen?

• Ngbanga ti nyen a lingbi e tene tënë ti Nzapa na mbeto pëpe?

• Nyen la amû maboko na akozo Chrétien ti tene tënë na mbeto pëpe?

• A lingbi e sara nyen ti duti na mbeto pëpe?

• Tongana nyen dutingo na mbeto pëpe aga na ye ti nzoni na e?

[Ahundango tënë ti manda na ye]

[Foto na lembeti 16]

Na lege wa ababâ na amama alingbi ti mû maboko na amolenge ti ala ti duti na mbeto pëpe?

[Afoto na lembeti 17]

Nduru sambela alingbi ti mû maboko na mo ti zi mbeto na yâ ti mo na fango tënë