“Yingo na wali so amû koli fini fini angbâ ti tene: ‘Ga!’”
“Yingo na wali so amû koli fini fini angbâ ti tene: ‘Ga!’”
“Yingo na wali so amû koli fini fini angbâ ti tene: ‘Ga!’ . . . Zo so nzara ti ngu asara lo, zia lo ga; zo so aye, zia lo nyon ngu so amû fini na zo, lo nyon ni senge senge.”—APOC. 22:17.
1, 2. A yeke nzoni e zia aye so andu kua ti Royaume na place wa na yâ ti fini ti e? Ngbanga ti nyen?
A YEKE nzoni e zia aye so andu kua ti Royaume na place wa na yâ ti fini ti e? Jésus awa adisciple ti lo ti ‘ngbâ ti gi royaume kozoni’, na lo dë bê ti ala so tongana ala sara ni, fade Nzapa ayeke mû na ala ye so ala yeke na bezoin ni (Mat. 6:25-33). Lo haka Royaume ti Nzapa na mbeni perle so ngere ni ayeke ngangu mingi so mbeni wadengo buze so ayeke tambela na nduzu awara, na “lo kä aye ti lo kue na lo vo perle so.” (Mat. 13:45, 46). Ni la, a yeke nzoni e bâ na nene ni mingi kua ti fango tënë ti Royaume na ti sarango adisciple.
2 Tongana ti so e bâ na yâ ti a-article use so ahon, sarango tënë na mbeto pëpe nga sarango kua nzoni na Mbeti ti Nzapa na fango tënë afa so yingo ti Nzapa la ayeke fa lege na e. Yingo so ayeke sara nga kpengba kusala na yâ ti mungo mbage ti e lakue na fango tënë ti Royaume. Zia e bâ ni.
A tisa azo kue!
3. Mara ti ngu wa a tisa azo kue ti “ga” ti nyon?
3 Na lege ti yingo vulu, a tisa azo kue. (Diko Apocalypse 22:17.) A tisa zo ti “ga” na ti kaï nzara ti ngu so lo yeke na ni na mbeni mara ti ngu so ayeke nde mingi. A yeke senge ngu pëpe. Atâa so ngu ayeke kpengba ye so abata fini ti aye na ndo ti sese, Jésus ayeke na mbeni mara ti ngu nde na li ti lo tongana lo tene na mbeni wali ti Samarie na yanga ti dungu: “Zo so anyon ngu so mbi yeke mû ande na lo, nzara ti ngu ayeke sara lo oko pëpe, me ngu so mbi yeke mû na lo ayeke ga tongana mbeni li ti ngu na yâ ti lo na ayeke sigigi ti mû na zo fini ti lakue lakue.” (Jean 4:14). Ngu so a tisa azo kue ti ga ti nyon ayeke tongana tanga ti angu pëpe, a yeke ngu so amû fini ti lakue lakue.
4. Bezoin ti ngu so amû fini abâ gigi lawa? Ngu so ayeke fä ti nyen?
4 Bezoin ti ngu so amû fini abâ gigi na ngoi so kozo koli, Adam, amû peko ti wali ti lo, Ève, na kengo yanga ti Jéhovah Nzapa, lo so asara ala (Gen. 2:16, 17; 3:1-6). A tomba kozo koli na kozo wali na yâ ti yaka so ayeke ndo ti ala “teti peut-être fade [Adam a]ye maboko ti lo, lo kamata lê ti keke ti mû fini nga, lo te na lo duti na fini lakue lakue”. (Gen. 3:22). Teti so Adam ayeke babâ ti azo ti sese kue, ni la lo ga na kuâ na ndo ti azo kue (aRom. 5:12). Ngu so amû fini ayeke fä ti aye kue so Nzapa leke ti zi azo so amä yanga ti lo na gbe ti siokpari na kui, na ti mû na ala fini so alingbi kue teti lakue lakue na yâ ti Paradis na ndo ti sese. Ye so ayeke tâ na gunda ti ye so Nzapa aleke so ayeke fini ti Jésus Christ so a mû tongana ngere so a futa ti zi na azo.—Mat. 20:28; Jean 3:16; 1 Jean 4:9, 10.
5. Tisango ndo ti ga ti ‘nyon ngu so amû fini na zo senge senge’ alondo na zo wa? Fa nda ni.
5 Tisango ndo ti ga ti ‘nyon ngu so amû fini na zo senge senge’ alondo na zo wa? Tongana aye kue so Nzapa aleke ti mû fini na zo na lege ti Jésus aga tâ tënë kue na ngoi ti Komandema ti Christ ti Ngu Saki Oko, a tene aye so kue ayeke tongana “mbeni bale so ngu ni amû fini na zo, lê ti ngu ni avuru tarara tongana tênë so zo alingbi ti bâ ndo na yâ ni kue”. A bâ bale ni “alondo na trône ti Nzapa nga na ti Molenge ti ngasangbaga ni”. (Apoc. 22:1). Tongaso, Jéhovah, Lo so amû fini, ayeke Lingu ti ngu so amû fini na zo (Ps. 36:10). A yeke Lo si amû ngu so na lege ti “Molenge ti ngasangbaga”, Jésus Christ (Jean 1:29). Bale so ayeke fä ti aye so Jéhovah asara ti zi aye ti sioni kue so Adam abi na ndo ti azo na lege ti kengo yanga so lo ke. Biani, Jéhovah Nzapa ayeke lo so atisa azo ti “ga”.
6. Lawa la “bale so ngu ni amû fini na zo” akomanse ti sua?
6 Atâa so “bale so ngu ni amû fini na zo” aton nda ti sua na “lâ ti Seigneur,” so akomanse na ziango “Molenge ti ngasangbaga” na ndo ti mbata ti gbia na yayu na ngu 1914, a yeke sua ande kue na ngoi ti Komandema ti Ngu Saki Oko ti Christ (Apoc. 1:10). Tongaso, ambeni ye so a leke teti mungo fini na azo abâ gigi na pekoni. Aye so andu Mbeti ti Nzapa, so ayeke Bible, teti a tene atënë ti yâ ni ayeke tongana “ngu”. (aÉph. 5:26). Ti mä na ti yeda na nzoni tënë ti Royaume ayeke mbeni tisango ndo ti ga ti nyon ngu so amû fini na zo, na tisango ndo so abâ azo kue. Me, zo wa la biani ayeke sara kusala ti tisango azo na lâ ti Seigneur so?
“Wali so amû koli fini fini” atene, “Ga!”
7. Zo wa la ayeke kozo zo so ayeke tisa azo na ndo kue na “lâ ti Seigneur”? A tisa azo wa?
7 Wali so amû koli fini fini (aChrétien so a soro ala na lege ti yingo vulu) ayeke kozo zo so ayeke tisa azo na ndo kue ti “ga”. Lo tisa azo wa? Wali so amû koli fini fini atene, “Ga!” na lo wani pëpe. Atënë ti lo abâ azo so ayeke na beku ti wara fini ti lakue lakue na ndo ti sese na peko ti “bira ti kota lango ti Nzapa, Lo ti ngangu ahon kue.”—Diko Apocalypse 16:14, 16.
8. Nyen la afa so aChrétien so a soro ala na lege ti yingo vulu angbâ ti tisa azo ngbene ye na ngu 1918?
8 A yeke ngbene ye na ngu 1918 la adisciple ti Christ so a soro ala ti gue na yayu ayeke tisa azo. Na ngu ni so, diskur so li ti tënë ni ayeke “Azo kutu mingi so ayeke na fini fadeso ayeke kui ande lâ oko pëpe” amû beku so fade azo mingi ayeke wara fini na yâ ti paradis na ndo ti sese na peko ti bira ti Harmaguédon. A mû mbeni diskur na ngoi ti kota bungbi ti aWamandango Bible so a sara ni na gbata ti Cedar Point, Ohio (na Amerika), na ngu 1922, na a hunda mingi na awamango tënë ni ti ‘fa tënë ti Gbia na royaume ti lo’. Iringo ndo so amû maboko na tanga ti ala so ayeke ti wali so amû koli fini fini ti gue ti tisa azo mingi. Na yâ ti Tour ti Ba Ndo ti 15 mars 1929 na Anglais, mbeni article ayeke dä so li ti tënë ni ayeke “Mbeni tisango ndo ti nzobe”; a gboto mama-tene ni na Apocalypse 22:17. Article ni atene: “Tanga ti aChrétien so a soro ala ti gue na yayu so ayeke be-ta-zo abungbi na [Lo so ayeke na nduzu na ndo ti aye kue] na yâ ti tisango ndo ti nzobe na ala tene, ‘Ga’. A lingbi a fa tënë so na azo so ayeke na nzara ti mbilimbili na ti tâ tënë. A lingbi a sara ni fadeso.” Juska laso, ala so ayeke ti wali so amû koli fini fini angbâ ti gue na tisango ndo so na ndo kue.
“Zo so amä tënë so, zia lo tene: ‘Ga!’”
9, 10. Ala so amä tisango ndo so a tene, “Ga!” atene ti ala nyen?
9 Ka ti ala so amä tisango ndo ti “ga”, a yeke tongana nyen? A hunda na ala nga ti tene, “Ga!” Na tapande, na lembeti 232 ti Tour ti Ba Ndo ti 1 août 1932, na Anglais, a tene: “Zia aChrétien so a soro ala ti gue na yayu awa azo kue so ayeke mû ande mbage na fango nzoni tënë ti royaume. Ala yeke na bezoin ti tene Seigneur asoro ala ti gue na yayu si ala fa tënë ti lo pëpe. A yeke kota ye ti dengo bê teti atémoin ti Jéhovah ti hinga so a mû lege na ala ti gue na ngu so amû fini na zo na ambeni zo so a yeke sö ala na Harmaguédon na a yeke mû na ala fini ti lakue lakue na ndo ti sese.”
10 Na gbotongo lê mingi na ndo ti kusala ti ala so amä tisango ndo so, Tour ti Ba Ndo ti 15 août 1934 na Anglais, na lembeti 249, atene: “A lingbi ala so ayeke ti Jonadab ague legeoko na ala so ayeke ti Jéhu, so ayeke aChrétien so a soro ala ti gue na yayu, na ala fa tënë ti royaume, atâa so ala yeke atémoin ti Jéhovah so a soro ala ti gue na yayu pëpe.” Na ngu 1935, a hinga polele “azo mingi mingi” so a sara tënë ti ala na Apocalypse 7:9-17. Ye so amû kota ngangu na kusala ti kangbingo tisango ndo ti Nzapa na ndo kue. Ngbene ye na ngoi ni so, wungo ti azo mingi mingi ti atâ wavorongo Nzapa so ayeda na tisango ndo so angbâ ti gue na li ni (ala hon kutu mbasambala fadeso). Na peko ti so tënë so ala mä anzere na ala, ala mû tere ti ala na Nzapa, na ala wara batême ti ngu, na nga ala bungbi na wali so amû koli fini fini ti tisa azo ti ‘ga ti nyon ngu so amû fini na zo senge senge.’
“Yingo” atene, “Ga!”
11. Na ngoi ti akozo Chrétien, tongana nyen yingo vulu amû mbage na yâ ti kusala ti fango tënë?
11 Tongana lo yeke fa tënë na yâ ti synagogue na Nazareth, Jésus azi mbeti ti prophète Ésaïe so a rulê ni rulengo na lo diko: “Yingo ti Jéhovah ayeke na ndo ti mbi, ngbanga ti so lo soro mbi ti fa nzoni tënë na awayere. Lo tokua mbi ti fa na azo so a mû ala na ngbâa tënë ti zingo ala, ti fa na awaziba so ala yeke kiri ande ti bâ ndo, ti zi azo so awoko ngbanga ti so a sara ngangu na ala, si ala gue, ti fa tënë ti ngoi so Jéhovah ayeke sara nzoni na azo.” Na pekoni, Jésus afa so tënë so aga tâ tënë na ndo ti lo, lo tene: “Laso, tënë ti Mbeti ti Nzapa so ala londo ti mä so aga tâ tënë awe.” (Luc 4:17-21). Kozoni si lo gue na yayu, Jésus atene na adisciple ti lo: “Fade ala yeke wara ngangu tongana yingo vulu aga na ndo ti ala, na fade ala yeke duti atémoin ti mbi . . . juska na ambage ti sese so ayeke tâ yongoro.” (Kus. 1:8). Na ngoi ti akozo Chrétien, yingo vulu asara kpengba kusala mingi na yâ ti kusala ti fango tënë.
12. Tongana nyen yingo ti Nzapa ayeke mû mbage laso na yâ ti kusala ti tisango azo na ndo kue?
12 Tongana nyen yingo vulu ti Nzapa ayeke mû mbage laso na yâ ti kusala ti tisango azo na ndo kue? Yingo vulu alondo na Jéhovah. Lo sara kusala na ni ti zi bê ti ala so ayeke ti wali so amû koli fini fini nga na li ti ala ti gbu nda ti Mbeti ti lo so ayeke Bible. Yingo apusu ala ti gue na tisango ndo na ndo kue na azo, na ti fa nda ti tâ tënë so ayeke na yâ ti Mbeti ti Nzapa na azo so ayeke na beku ti duti na fini lakue lakue na yâ ti Paradis na ndo ti sese. Ka ti ala so ayeda na tisango ndo so, so aga adisciple ti Jésus Christ na so ague na tisango ndo ni na azo, a yeke tongana nyen? Yingo asara kusala nga na ala. Na mungo batême na ‘iri ti yingo vulu’, ala sara kusala maboko na maboko na ni na ala zia bê ti ala na ndo ti yingo ni ti mû maboko na ala (Mat. 28:19). Gbu li ti mo nga na ndo ti tënë so aChrétien so a soro ala ti gue na yayu na azo mingi mingi so wungo ti ala angbâ ti gue na li ni afa. Tënë ni alondo na Bible: buku so a sû na gbe ti ngangu ti yingo ti Nzapa. Tongaso, tisango ndo so amû ndo kue na lege ti yingo vulu. Biani, a yeke yingo so si ayeke fa lege nga na e. Ye so andu wungo ti ngbonga so e yeke sara na kusala ti tisango azo tongana nyen?
Ala ‘ngbâ ti tene: “Ga!”’
13. Tënë so atene “Yingo na wali so amû koli fini fini angbâ ti tene: ‘Ga!’” aye ti fa nyen?
13 “Yingo na wali so amû koli fini fini” atene: “Ga!” gi senge pëpe. Mbupa so a sara kusala na ni ge afa mbeni ye so zo asara aninga. Ndani la, Fini dunia atene: “Yingo na wali so amû koli fini fini angbâ ti tene: ‘Ga!’”, ti fa so ayeke lakue lakue si a yeke gue na tisango ndo ti Nzapa so na azo. Ka ti azo so amä na ayeda na tisango ndo ni, a yeke tongana nyen? Ala nga kue atene, “Ga!” A sara tënë ti azo mingi mingi so ayeke atâ wavorongo Nzapa tongana azo so ayeke ‘sara na Jéhovah kusala so ayeke nzoni-kue bï na lâ na yâ ti temple ti lo.’ (Apoc. 7:9, 15). Na lege wa ala yeke ‘sara kusala bï na lâ’? (Diko Luc 2:36, 37; Kusala 20:31; 2 aThessalonicien 3:8.) Tapande ti prophète-wali Anne so ayeke mbakoro mingi na ti bazengele Paul afa so ‘sarango kusala bï na lâ’ aye ti tene ti ngbâ lakue na ti sara ngangu ti fa tënë.
14, 15. Tongana nyen Daniel afa nene ti vorongo Nzapa lakue?
14 Prophète Daniel nga afa nene ti vorongo Nzapa lakue. (Diko Daniel 6:4-10, 16.) Lo changé sarango ye ti lo na lege ti yingo pëpe (lo yeke sambela Nzapa “lege ota, lâ na lâ, . . . legeoko tongana lo sara giriri”) même teti nze oko, atâa so a lingbi ti bi lo na dû ti abamara ndali ni. Ye so lo sara afa polele na azo so ayeke bâ lo so mbeni ye ti hon vorongo Jéhovah lakue ayeke dä pëpe!—Mat. 5:16.
15 Na peko ti so Daniel asara lango oko na dû ti abamara, gbia ni ague kâ na lo tene: “Ô Daniel, boi ti Nzapa so ayeke na fini, Nzapa ti mo, Lo so mo sara na Lo lakue, Lo lingbi zi mo na yanga ti abamara?” Hio Daniel akiri tënë: “Ô gbia, mo ngbâ na fini lakue. Nzapa ti mbi ato ange ti Lo, lo kanga yanga ti abamara na ala sara sioni na mbi pëpe; teti na gbele Lo, a wara sioye na yâ mbi pëpe; na gbele mo nga, Ô gbia, mbi sara sioye pëpe.” Jéhovah airi tënë nzoni na ndo ti Daniel teti lo sara na lo “lakue.”—Dan. 6:19-22.
16. Ahundango ndo wa tapande ti Daniel alingbi ti pusu e ti hunda tere ti e na ni na ndo ti mungo mbage ti e na fango tënë?
16 Daniel ayeke nduru ti kui ahon ti zia ti voro Nzapa lakue. Ka ti e, a yeke tongana nyen? Aye wa e zia wala e yeke nduru ti sara tongaso si e fa nzoni tënë ti Royaume ti Nzapa lakue? A yeke nzoni e zia pëpe nze oko ahon e sân ti sara tënë ti Jéhovah na ambeni zo! Tongana lege ayeke dä, a yeke nzoni e sara ngangu ti mû mbage ti e yenga oko oko na fango tënë. Même tongana e yeke na akpale ti seni wala e ga mbakoro na e lingbi ti fa tënë gi teti penze ngbonga 15 na yâ ti nze ni, a yeke nzoni e mû rapport ti kusala so. Ngbanga ti nyen? Ngbanga ti so e ye ti tene e na yingo nga na wali so amû koli fini fini e ngbâ ti tene, “Ga!” Biani, e ye ti sara ye kue so e lingbi ti sara ti duti lakue awafango tënë ti Royaume.
17. Angoi wa a yeke nzoni e manke ni pëpe ti mû tisango ndo ti Jéhovah na azo?
17 A yeke pëpe gi na angoi so e leke awe ti fa na tënë si e yeke mû tisango ndo ti Jéhovah na azo kue, me e yeke sara ni na alege kue so azi na e. So pasa si e yeke na ni ti tisa azo so nzara ti ngu asara ala ti ‘ga ti nyon ngu so amû fini na zo senge senge’ na ambeni ngoi nde, tongana e yeke gue ti vo ye, e yeke na voyage, e yeke na vacance, e yeke sara kua wala e yeke na ekole! Même tongana azo so ayeke na komandema akanga lege na fango tënë, e yeke ngbâ ti fa tënë na hondengo ni: peut-être e fa tënë kete na mbeni ndo, na pekoni e gue na mbeni ndo nde wala e fa tënë mingi na ambeni lege so azi na e.
Ngbâ ti tene, “Ga!”
18, 19. Mo yeke fa tongana nyen so mo bâ na nene ni pasa ti sara kusala maboko na maboko na Nzapa?
18 Na yâ ti angu bale gumbaya so ahon, yingo na wali so amû koli fini fini ayeke tene, “Ga!” na azo kue so ayeke na nzara ti ngu so amû fini na zo. Mo mä nzoni tisango ndo ti ala so awe? Tongaso, a wa mo ti mû tisango ndo so na ambeni zo nga.
19 Wala tisango ndo so Jéhovah atisa azo na ndoye ayeke ninga ande ngoi oke e hinga pëpe, me so e yeda na ni na tenengo, “Ga!” a sara si e ga azo so asara kusala maboko na maboko na Nzapa (1 aCor. 3:6, 9). So kota pasa! A yeke nzoni e fa so e bâ na nene ni pasa so e yeke na ni, na “e mû lakue na Nzapa sandaga ti gonda” na fango tënë lakue (aHéb. 13:15). Zia ala so ayeke ti wali so amû koli fini fini na e so e yeke na beku ti wara fini na ndo ti sese e ngbâ ti tene, “Ga!” Nga zia azo mingi anyon ngu so ayeke mû fini na zo senge senge!
Mo manda nyen?
• A tisa azo wa ti “ga”?
• Ngbanga ti nyen e lingbi ti tene so tisango ndo ti “ga” alondo na Jéhovah?
• Tongana nyen yingo vulu ayeke mû mbage na yâ ti kusala ti tisango azo na ndo kue?
• Ngbanga ti nyen a yeke nzoni e sara ngangu ti fa tënë lakue?
[Ahundango tënë ti manda na ye]
[Tableau/Afoto na lembeti 25]
(Ti bâ ni mbilimbili, bâ buku ni.)
Ngbâ ti tene, “Ga!”
1914
Awafango tënë 5 100
1918
Fade azo mingi ayeke wara fini na yâ ti Paradis na ndo ti sese
1922
“Fa tënë, fa tënë, fa tënë ti Gbia na royaume ti lo”
1929
Tanga ti aChrétien be-ta-zo so a soro ala ti gue na yayu atene, “Ga!”
1932
Tisango ndo ti tene, “Ga!” angbâ gi pëpe na aChrétien so a soro ala ti gue na yayu
1934
A tisa ala so ayeke ti Jonadab ti fa tënë
1935
A hinga “azo mingi mingi”
2009
Awafango tënë 7 313 173