Batême na iri ti Babâ, na ti Molenge na ti yingo vulu
Batême na iri ti Babâ, na ti Molenge na ti yingo vulu
“Tongaso ala gue, ala sara si azo . . . aga adisciple. Ala batize ala na iri ti Babâ, na ti Molenge na ti yingo vulu.”—MAT. 28:19.
1, 2. (a) Nyen la asi na Jérusalem na Pentecôte ti ngu 33? (b) Nyen la apusu azo mingi so ayeke na popo ti gbâ ti azo so aga ti wara batême?
JÉRUSALEM asi singo na azo so alondo na akodoro nde nde aga. Na lango ti Pentecôte ti ngu 33, a yeke sara mbeni kpengba matanga so azo mingi aga ti mû mbage ti ala dä. Me, mbeni ye ti ndima asi, na pekoni bazengele Pierre amû mbeni kpengba diskur so ye so aga na pekoni apika bê mingi. Atënë so andu bê ti azo 3000 so ayeke aJuif na aprosélyte, na ala ke lege ti sioni ti ala na ala wara batême na yâ ti ngu. Tongaso, ala ga na ndo ti azo ti congrégation so abâ gigi fini fini (Kus. 2:41). Batême so azo mingi awara na yâ ti alende ti ngu wala ando so a bata ngu dä asara si Jérusalem ayengi!
2 Nyen la ague na azo mingi so ti wara batême? Ye so asi kozoni na yâ ti lango ni ayeke so, ‘mbeni toto ti ye tongana pupu so alondo na yayu aya ngangu.’ Azo 120 so ayeke adisciple ti Jésus so abungbi na yâ ti kubu so ayeke na nduzu awara yingo vulu. Na pekoni, akoli na awali so akpe mbeto ti Nzapa si abungbi kâ, bê ti ala adö ti mä adisciple so ayeke “sara tënë na ayanga ti kodoro nde nde”. Azo mingi so amä tënë so Pierre atene nga na tënë so lo tene na ndo ti kuâ ti Jésus, “tënë ni andu bê ti ala ngangu”. A yeke nzoni ala sara nyen? Pierre akiri tënë: “Ala changé bê ti ala, na zia a batize ala oko oko na iri ti Jésus Christ . . . , na fade ala yeke wara yingo vulu so ayeke matabisi so a mû senge senge.”—Kus. 2:1-4, 36-38.
3. Na lango ti Pentecôte, a lingbi aJuif na aprosélyte so agbian bê ti ala asara nyen?
3 Bi bê ti mo na dutingo na lege ti yingo ti aJuif na aprosélyte so amä Pierre. Ala yeda kozoni awe so Jéhovah ayeke Nzapa ti ala. Na lege ti Mbeti ti Nzapa so a sû na yanga ti Hébreu, ala hinga tënë na ndo ti yingo vulu so ayeke ngangu so Nzapa asara kusala na ni na ngoi ti crééngo aye nga na pekoni (Gen. 1:2; aJu. 14:5, 6; 1 Sam. 10:6; Ps. 33:6). Me mbeni ye nde ayeke dä so a lingbi ala hinga ni. A yeke kota ye teti ala ti hinga na ti yeda na ye so Nzapa amû ti sö na azo: Messie ni so ayeke Jésus. Tongaso, Pierre aluti mingi na ndo ti nene ti tene “a batize ala oko oko na iri ti Jésus Christ”. Alango kete kozoni, Jésus so azingo na kuâ ahunda na Pierre nga na amba ti lo ti batize azo “na iri ti Babâ, na ti Molenge na ti yingo vulu.” (Mat. 28:19, 20). Nda ti tënë so alï mingi na ngoi ti akozo Chrétien, na a yeke nga tongaso laso. Tënë so ayeke nyen?
Na iri ti Babâ
4. Gbiango ye wa asi na yâ ti songo ti azo na Jéhovah?
4 Tongana ti so e bâ, azo so ayeda na diskur ti Pierre ayeke azo so avoro lani Jéhovah na ala yeke na songo na lo. Ala sara ngangu ti sara ye so Ndia ti lo ahunda, ndani la azo so ayeke ti akodoro nde aga na Jérusalem (Kus. 2:5-11). Ye oko, Nzapa aga na mbeni kota gbiango ye na yâ ti songo ti lo na azo. Lo ke aJuif so lo mû ala tongana mara ti lo; fadeso a yeke pëpe na lege ti batango Ndia si lo yeke yeda na ala (Mat. 21:43; aCol. 2:14). Tongana azo so amä tënë so aye ti ngbâ ti sara songo na Jéhovah, a lingbi ala sara mbeni ye nde na ndo ni.
5, 6. A-Juif na aprosélyte so ayeke na ngoi ti akozo Chrétien asara nyen ti duti na songo na Nzapa?
5 A yeke ti tene ala gue nde na Jéhovah pëpe, Lo so amû fini na ala (Kus. 4:24). Me, azo so ayeda na tënë so Pierre afa alingbi ti bâ fadeso nzoni mingi so Jéhovah ayeke Babâ ti nzoni bê. Lo tokua Messie ti sö ala na lo yeke nduru ti pardone même ala so Pierre asara tënë na ala lo tene: “Zia azo ti da ti Israël kue ahinga biani so Nzapa amû lo ti ga Seigneur na Christ, lo Jésus so ala kanga lo na ndo ti keke.” Biani, azo so asara ye alingbi na tënë ti Pierre alingbi ti duti fadeso na kota raison ti kiri singila teti ye so Babâ ni asara ndali ti azo kue so aye ti lë songo na Nzapa!—Diko Kusala 2:30-36.
6 Biani, aJuif na aprosélyte so alingbi fadeso ti bâ so dutingo na songo na Jéhovah andu nga ti hinga lo tongana Lo so amû salut na lege ti Jésus. Tongaso, mo lingbi ti hinga ndani so ala ke siokpari ti ala, so andu nga fango Jésus atâa ala hinga so ala mû mbage na yâ ni wala ala hinga ni pëpe. A yeke nga na lege ni si na alango so aga na pekoni “ala ngbâ ti mû tere ti ala kue na fango ye ti abazengele”. (Kus. 2:42). Ala lingbi ‘ti ga nduru na trône ti kota nzobe ti Nzapa na sarango tënë na kamene pëpe’ na ala ye ti sara ni.—aHéb. 4:16.
7. Tongana nyen azo mingi laso achangé bango ndo ti ala na ndo ti Nzapa na a batize ala na iri ti Babâ?
7 Laso, azo kutu na kutu so alondo na ando nde nde amanda tâ tënë na ndo ti Jéhovah na yâ ti Bible (És. 2:2, 3). Ambeni lani atene Nzapa ayeke dä pëpe wala ambeni atene Nzapa ayeke dä me lo bi bê ti lo na aye so lo créé pëpe. Me fadeso ala yeda so Nzapa so ayeke Wasarango ye ayeke dä na ala lingbi ti duti na nzoni songo na lo. Ambeni avoro lani Nzapa Babâ, Nzapa Molenge, na Nzapa Yingo vulu nga ambeni avoro ayanda nde nde. Fadeso ala manda so gi Jéhovah oko la ayeke Lo ti Ngangu Ahon Kue, na ala yeke sara tënë na lo na iri ti lo. Ye so ague oko na tënë so Jésus atene a lingbi adisciple ti lo awara batême na iri ti Babâ.
8. Azo so ahinga tënë na ndo ti siokpari ti Adam pëpe a lingbi ala hinga nyen na ndo ti Babâ ni?
8 Ala hinga nga so ala wara siokpari na mbage ti Adam (aRom. 5:12). A yeke mbeni fini ye so a lingbi ala hinga ni tongana tâ tënë. A lingbi ti haka azo tongaso na mbeni zo so ahinga kobela so ayeke son lo pëpe. Lo lingbi ti wara ambeni ye so afa so tere ti lo ason, aye tongana ambeni songo ti yâ ti tere so ayeke mû zo ngoi na ngoi. Me, teti so a gi nda ti kobela ni pëpe, lo lingbi ti tene so lo yeke na nzoni seni. Andâ, ye ni ayeke ti lo nde. (Bâ 1 aCorinthien 4:4.) Ka ye ni ayeke duti tongana nyen tongana a gi nda ti kobela ni nzoni? A yeke na lege ti ndara pëpe teti lo ti gi na ti mû yorö so azo ahinga ngangu ni nga na nzoni kusala so ayeke sara na tere ti zo? Legeoko nga, na hingango so ala wara siokpari na mbage ti Adam, azo mingi ayeda ti tene Bible “agi nda ti kobela” ti ala na ala hinga so Nzapa la ayeke “kaï” ni. Biani, azo kue so ague yongoro na Babâ ni ayeke na bezoin ti turnê na mbage ti Lo so alingbi ti “kaï” kobela ti ala.—aÉph. 4:17-19.
9. Nyen la Jéhovah asara ti mû lege na azo ti sara songo na lo?
9 Tongana mo mû fini ti mo na Jéhovah Nzapa na mo wara batême awe, mo hinga so a yeke pendere ye mingi ti duti na songo na lo. Mo lingbi fadeso ti bâ tongana nyen Jéhovah ayeke Babâ ti mo ti ndoye. (Diko aRomain 5:8.) Atâa so Adam na Ève asara siokpari na tere ti lo, Nzapa amû devant ni na sarango mbeni ye ti tene ahale ti ala (so e nga kue e yeke na popo ni) alingbi ti duti na nzoni songo na lo. Na sarango tongaso, a lingbi Nzapa akanga bê ti bâ Molenge ti lo so lo ye lo mingi abâ pasi na akui. Hingango ye so amû maboko na e ti yeda na komandema ti Nzapa na ti bata acommandement ti lo pëpe? Tongana ade mo sara ye so pëpe, mo hinga fadeso ndani so a lingbi mo mû tere ti mo na Nzapa na mo wara batême.
Na iri ti Molenge
10, 11. (a) Mo yeke fa singila ti mo tongana nyen na mbage ti Jésus? (b) Tënë ti bê ti mo ayeke so wa na ndo ti kuâ ti Jésus tongana ngere so a futa ti zi azo?
10 Me kiri mo gbu li ti mo na ndo ti tënë so Pierre atene na azo mingi so. Lo luti na ndo ti tënë ti yengo dä na Jésus, so kamba ayeke na popo ni na mungo batême “na iri . . . ti Molenge”. Tongaso, ngbanga ti nyen a yeke kota ye lani na ngoi ni kâ, nga ngbanga ti nyen a yeke kota ye laso? Ti yeda na Jésus na ti mû batême na iri ti lo, a ye ti tene ti hinga kusala ti lo na yâ ti songo ti e na Wasarango ye. A lingbi a pika Jésus na ndo ti keke ti pasi tongaso si a zi deba so Ndia aga na ni na ndo ti aJuif; ye oko, kuâ ti lo aga na kota ye ti nzoni (aGal. 3:13). Lo mû fini ti lo na sandaga ti zi azo, ye so azo kue ayeke na bezoin ni (aÉph. 2:15, 16; aCol. 1:20; 1 Jean 2:1, 2). Ndani la, Jésus agbu ngangu na yâ ti aye ti sioni so a sara na lo senge senge, azonga, sarango sana, na nda ni lo kui. Mo fa so mo kiri singila teti sandaga so tongana nyen? Bâ so mo la mo yeke mbeni molenge-koli ti ngu 12 so ayeke gue na voyage na yâ ti kota mangboko so iri ni ayeke Titanic, mangboko so lani akpo mbeni kota hoto ti glason na alï ngu na ngu 1912. Mo tara ti huru na yâ ti mbeni kete mangboko so ayeke ti sö fini ti azo, me yâ ni asi awe. Na pekoni, mbeni koli so ayeke na yâ ti kete mangboko ni asu ngbangba ti wali ti lo, lo huru lo kiri na yâ ti kota mangboko ni, na lo zia mo na yâ ti kete mangboko ni. Tënë ti bê ti mo ayeke so wa? Kite ayeke dä pëpe so mo yeke kiri singila na lo! Mo lingbi ti hinga tënë ti bê ti molenge-koli so ye so asi na lo. * Me, ye so Jésus asara teti mo ahon so. Lo kui ti tene a mû lege na mo ti wara fini ti lakue lakue.
11 Tënë ti bê ti mo ayeke so wa tongana mo hinga ye so Molenge ti Nzapa asara ndali ti mo? (Diko 2 aCorinthien 5:14, 15.) Peut-être bê ti mo ayeke pusu mo ti kiri singila mingi. Ye so amû maboko na mo ti mû fini ti mo na Nzapa na ‘ti ngbâ na fini ndali ti mo wani mbeni pëpe, me ndali ti lo so akui ndali ti mo’. Ti wara batême na iri ti Molenge aye ti tene ti hinga ye so Jésus asara ndali ti mo na ti yeda na komandema ti lo tongana “Kota Mokonzi so azi lege ti fini.” (Kus. 3:15; 5:31). Mo yeke kozoni na songo na Wasarango ye pëpe, na biani beku so mo yeke na ni lani ayeke tâ beku pëpe. Me so mo mä na bê na mênë ti Jésus Christ so atuku nga mo wara batême awe so, mo yeke fadeso na songo na Babâ ni (aÉph. 2:12, 13). Bazengele Paul asû tënë so: “Ala so ândö ala yeke yongoro na Nzapa na ala yeke awato ti lo ngbanga ti so ala yeke bi bê ti ala lani gi na ndo ti asioni kusala, fadeso Nzapa asara si songo akiri na popo ti lo na ala na lege ti tere ti [Jésus] so lo kä na kuâ, ti tene lo ga na ala na gbele Nzapa tongana azo so ayeke nzoni-kue, so sioni oko ayeke na tere ti ala pëpe.”—aCol. 1:21, 22.
12, 13. (a) Na lege wa warango batême na iri ti Molenge ni andu sarango ye ti mo tongana mbeni zo ason bê ti mo? (b) So mo yeke Chrétien so awara batême na iri ti Jésus, a yeke ngbanga ti mo ti sara nyen?
12 Atâa so a batize mo na iri ti Molenge ni, mo hinga nzoni mingi so a dü mo na bibe ti sarango sioni. Hingango ye so ayeke mû maboko mo lâ oko oko. Na tapande, tongana mbeni zo asara ye so ason bê ti mo, mo yeke dabe ti mo so ala use kue ayeke awasiokpari? Ala use kue ayeke na bezoin ti tene Nzapa apardone ala, na a yeke nzoni ala pardone mba (Marc 11:25). Jésus amû mbeni tapande ti luti mingi na ndo ti pardon, lo tene: Wa ti mbeni ngbâa azi na li ti ngbâa ni bon ti talent saki bale-oko, so ti tene denier kutu 60. Na pekoni, ngbâa so aye ti zi pëpe bon ti lo ti denier 100 so ayeke na li ti mbeni mba ti lo ngbâa. Na nda ni Jésus atene: Fade Jéhovah apardone pëpe zo so apardone ita ti lo pëpe (Mat. 18:23-35). Biani, ti wara batême na iri ti Molenge ni aye ti tene ti hinga komandema ti Jésus na ti sara ngangu ti mû peko ti lo na afango ye ti lo, so abâ nga dutingo nduru ti pardone ambeni zo.—1 Pi. 2:21; 1 Jean 2:6.
13 So mo lingbi kue pëpe, mo lingbi pëpe ti sara ye kue tâ gi tongana ti Jésus. Me so mo mû tere ti mo na Nzapa na bê ti mo kue, mo ye ti sara ye kue so mo lingbi ti sara ti sara ye tongana ti Jésus. Ye so ahunda ti tene mo ngbâ ti sara ngangu ti zi ngbene zo na ti yü fini zo. (Diko aÉphesien 4:20-24.) Tongana mo ne mbeni kamarade ti mo, peut-être mo yeke tara ti mû tapande ti lo nga na anzoni sarango ye ti lo. Legeoko nga, mo ye ti manda ye na mbage ti Christ na ti sara ye tongana lo.
14. Mo lingbi ti fa tongana nyen so mo yeda na Jésus tongana Gbia ti Royaume ti yayu?
14 Mbeni lege nde ayeke dä so mo lingbi ti fa so mo gbu nda ti ye so aye ti tene ti wara batême na iri ti Molenge ni. Nzapa “[a]zia nga aye kue na gbe ti gere ti [Jésus], na Lo sara si lo duti li ti aye kue ti congrégation”. (aÉph. 1:22). Tongaso, a lingbi mo bâ na nene ni fango lege so Jésus ayeke fa na azo so amû tere ti ala na Jéhovah. Christ ayeke sara kusala na azo so alingbi kue pëpe na yâ ti congrégation, mbilimbili akoli so akpengba na lege ti yingo, a-ancien so a zia ala na ndo ti congrégation. A zia azo so na ndo ti congrégation ti “kiri na azo so ayeke nzoni-kue na nzoni lege, . . . na ti leke tere ti Christ”. (aÉph. 4:11, 12). Même tongana zo so alingbi kue pëpe asara mbeni ye na lege ni pëpe, Jésus so ayeke Gbia ti Royaume ti yayu alingbi ti bâ lege ti tënë ni na ngoi so alingbi nga na lege ni. Mo yeda na ni?
15. Tongana mo ye ti wara batême, aye ti nzoni wa mo lingbi ti ku ti wara na pekoni?
15 Ambeni zo ade ti mû tere ti ala na Jéhovah pëpe nga ade ala wara batême pëpe. Tongana ade mo sara ni pëpe, mo lingbi ti bâ na lege ti aye so e sara tënë ni na nduzu ge so ti hinga Molenge ni ayeke ye so ayeke na lege ni na ayeke fa so mo kiri singila. Warango batême na iri ti Molenge ni ayeke mû ande lege na mo ti bâ nzoni mingi na pekoni.—Diko Jean 10:9-11.
Na iri ti yingo vulu
16, 17. Ti mo, ti wara batême na iri ti yingo vulu aye ti tene nyen?
16 Ti wara batême na iri ti yingo vulu aye ti tene nyen? Tongana ti so e bâ kozo, azo so amä tënë ti Pierre na lango ti Pentecôte ahinga tënë na ndo ti yingo vulu. Biani, ala lingbi ti bâ na lê ti ala aye so afa so Nzapa angbâ ti sara kusala na yingo vulu. Pierre ayeke oko ti azo so “asi na yingo vulu na [so a]to nda ti sara tënë na ayanga ti kodoro nde nde”. (Kus. 2:4, 8). Tënë “na iri ti”, a ye ti tene pëpe na iri ti mbeni zo. Laso, a sara aye mingi “na iri ti ngorogbia,” so ayeke pëpe mbeni zo. A sara aye so na ngangu ti ngorogbia ni. Legeoko nga, zo so a batize lo na iri ti yingo vulu ahinga so yingo vulu ayeke zo pëpe, me ayeke ngangu so Jéhovah ayeke sara kua na ni. Mara ti batême tongaso afa so zo ahinga kusala so yingo vulu ayeke sara na yâ ti ye so Nzapa aleke ti sara.
17 A yeke na lege ti mandango Bible la mo hinga ye na ndo ti yingo vulu pëpe? Na tapande, mo hinga so a sû Bible na gbe ti yingo vulu ti Nzapa (2 Tim. 3:16). Tongana mo yeke gue na li ni na lege ti yingo, peut-être mo hinga nzoni mingi so “Babâ so ayeke na yayu ayeke mû yingo vulu na ala so ahunda ni na lo”. Mo nga kue lo lingbi ti mû ni na mo (Luc 11:13). Peut-être mo bâ awe kusala so yingo vulu asara na yâ ti fini ti mo. Na mbage, tongana mo ye ti wara batême na iri ti yingo vulu, Jésus atene so Babâ ayeke mû na mo yingo vulu, so ti tene aye ti nzoni ayeke ku mo tongana mo wara yingo so.
18. Aye ti nzoni wa azo so awara batême na iri ti yingo vulu ayeke wara?
18 A yeke polele so laso Jéhovah ayeke fa lege na congrégation ti aChrétien na lege ti yingo ti lo. Yingo so ayeke mû nga maboko na e oko oko na yâ ti akusala ti e ti lâ na lâ. Batême so e wara na iri ti yingo vulu aye ti tene e yeda na kusala so yingo vulu ayeke sara na yâ ti fini ti e na e fa singila ti e na sarango kusala maboko na maboko na yingo so. Me, ambeni zo alingbi ti hunda tere ti ala: tongana nyen e lingbi ti sara ye ague oko na mungo tere ti e so e mû na Jéhovah nga ye so abâ yingo vulu tongana nyen? E yeke bâ ni na yâ ti article ti peko.
[Kete tënë na gbe ni]
^ par. 10 Bâ Réveillez-vous! ti 22 octobre 1981, lembeti 3-8.
Mo dabe ti mo na ni?
• Ti wara batême na iri ti Babâ aye ti tene nyen teti mo?
• Ti wara batême na iri ti Molenge aye ti tene nyen?
• Tongana nyen mo lingbi ti fa so mo gbu nda ti ye so warango batême na iri ti Babâ na ti Molenge aye ti tene?
• Ti wara batême na iri ti yingo vulu aye ti tene nyen?
[Ahundango tënë ti manda na ye]
[Afoto na lembeti 10]
Songo wa afini disciple ayeke na ni na Babâ na peko ti Pentecôte ti ngu 33?
[Lingu ti foto ni]
Na lege ti nzoni bê ti Israel Museum, Jerusalem