Aita-koli, ala lu ye ndali ti yingo na ala gi ti sara ambeni kusala

“Zo so ayeke lu ye ndali ti yingo, fade lo yeke ko fini ti lakue lakue.”​—AGAL. 6:8.

1, 2. Na lege wa Matthieu 9:37, 38 ayeke ga tâ tënë laso? Ye so asara si a yeke na bezoin ti azo wa na yâ ti acongrégation?

 LASO mo yeke bâ aye so azo ayeke girisa ni ande lâ oko pëpe! Kusala so Jésus Christ asara tënë ni lani ague laso na li ni mingi. Jésus atene: “Akobe ti fango ni ayeke mingi, me azo ti kua ni ayeke mingi pëpe. Tongaso, ala hunda mingi na Wa ti kua ni ti tokua azo ti kua ti fâ akobe ti yaka ti lo.” (Mat. 9:37, 38). Jéhovah ayeke kiri tënë laso na mara ti sambela tongaso na mbeni lege so ayeke kota mingi. Na ngu ti kusala 2009, afini congrégation ti aTémoin ti Jéhovah 2 031 abâ gigi, a sara si wungo ti acongrégation kue na yâ ti dunia asi 105 298. Lango oko oko, azo 757 ayeke wara batême.

² Mara ti guengo na li ni tongaso ahunda ti tene aita-koli so alingbi amû li ni ti fa ye nga ti sara kua ti berger na yâ ti congrégation (aÉph. 4:11). Na yâ ti angu mingi so ahon, Jéhovah asoro ambeni koli so alingbi ti bata angasangbaga ti lo, na e hinga biani so lo yeke ngbâ ande ti sara tongaso. Prophétie so ayeke na Michée 5:4 afa so na alango ti nda ni, fade azo ti Jéhovah ayeke wara “aberger mbasambala” na “amokonzi miombe”, so ti tene akoli mingi so alingbi ayeke mû li ni na popo ti ala.

3. Ti “lu ye ndali ti yingo” aye ti tene nyen?

³ Tongana mo yeke mbeni ita-koli so awara batême awe, nyen la alingbi ti mû maboko na mo ti gi ti duti na nzara ti sara akusala? Kota ye ni ayeke ti tene mo “lu ye ndali ti yingo”. (aGal. 6:8). Ti sara tongaso ahunda ti sara ye na mbeni lege so yingo vulu ti Nzapa alingbi ti sara kusala nzoni na yâ ti fini ti mo. Sara kue ti “lu ye ndali ti mitele” pëpe. Zia pëpe si gingo gbâ ti kungba nga na sarango ngia akanga lege na mo ti bi tere ti mo mingi na yâ ti kusala ti Nzapa. A lingbi aChrétien kue ‘alu ye ndali ti yingo’ nga aita-koli so asara tongaso alingbi peut-être ti sara akusala na yâ ti congrégation. Teti so laso e yeke na bezoin mingi ti wara awakua ti mungo maboko wala a-ancien, a leke article so mbilimbili ndali ti aita-koli. Ni la, aita-koli, e wa ala ti gbu li nzoni na ndo ti article so na yâ ti sambela.

Gi ti sara nzoni kusala

4, 5. (a) Akusala wa a wa aita-koli so awara batême awe ti gi ti sara na yâ ti congrégation? (b) Tongana nyen ala lingbi ti gi ti sara ni?

⁴ Mbeni ita-koli ayeke ga ancien gi hio tongaso pëpe. A lingbi lo sara ngangu ti sara “kusala so ayeke nzoni mingi.” (1 Tim. 3:1). Ti sara ni ahunda nga ti sara kusala ndali ti amba ti lo aChrétien na bingo bê nzoni na aye so ala yeke na bezoin ni. (Diko Ésaïe 32:1, 2.) Mbeni ita-koli so nzoni bibe la apusu lo ti gi ti sara kusala ayeke gi pëpe ti wara kota ndo. Me, lo yeke na nzara ti sara ye ti nzoni na azo.

⁵ Mbeni zo ayeke gi ti sara kusala tongana mbeni wakua ti mungo maboko wala ancien na sarango ye alingbi na ye so Bible afa ndali ni (1 Tim. 3:1-10, 12, 13; Tite 1:5-9). Tongana mo yeke mbeni ita-koli so awara batême awe, hunda tere ti mo: ‘Mbi yeke fa tënë mingi? Mbi yeke mû maboko na azo ti sara ni? Mbi yeke kpengba aita na mungo maboko na ala? A hinga mbi na mandango Mbeti ti Nzapa lakue? Mbi yeke sara anzoni commentaire ahon  ti kozo? Mbi yeke sara akusala so a-ancien amû na mbi nzoni?’ (2 Tim. 4:5). A yeke nzoni ti gbu li nzoni na ndo ti ahundango tënë so.

6. Kota ye wa ayeke mû lege na mbeni zo ti sara akusala na yâ ti congrégation?

⁶ Mbeni lege ti tene ala gi ti sara kusala na yâ ti congrégation ayeke ti “sara si zo ti yâ ni ti ala akpengba na mungo na ala ngangu na lege ti yingo ti [Nzapa]”. (aÉph. 3:16). Ti ga mbeni wakua ti mungo maboko wala ancien na yâ ti congrégation, a yeke soro zo ni sorongo na lege ti vote pëpe. Zo ayeke ga wakua ti mungo maboko wala ancien gi tongana lo gue na li ni na lege ti yingo. Zo ayeke gue na li ni na lege ti yingo tongana nyen? Mbeni lege ti tene mo sara ni ayeke ti “ngbâ ti tambela na lege ti yingo” nga ti lë lengo ti yingo ni (aGal. 5:16, 22, 23). Na ngoi so mo fa polele awe so mo lë alengo so a hunda ndali ti kusala so nga mo sara ye alingbi na awango so a mû na mo ti maï, fade “azo kue abâ maïngo ti mo.”​—1 Tim. 4:15.

A hunda ti duti nduru ti dö ambeni ye ti zia

7. Ti sara kusala ndali ti ambeni zo ahunda ye wa?

⁷ Ti sara kusala ndali ti ambeni zo ahunda ti sara kua ngangu nga ti duti nduru ti dö ambeni ye ti zia. Teti so a-ancien ayeke aberger na lege ti yingo, aye so andu kundu ni agbu bê ti ala mingi. Bâ tongana nyen kusala so Paul asara lani tongana berger agbu bê ti lo mingi. Lo tene na aita ti lo ti Corinthe, lo tene: “Teti a yeke na kota vundu nga na mawa mingi na bê si mbi sû lani mbeti na ala na ngu ti lê mingi; mbi ye pëpe si ala duti na vundu, me mbi ye si ala hinga ndoye so mbi yeke na ni mingi na mbage ti ala.” (2 aCor. 2:4). A yeke polele so Paul amû tere ti lo kue na kusala ti lo.

8, 9. Fa ambeni tapande ti yâ ti Bible so afa tongana nyen lani ambeni koli abâ lege ti ambeni zo.

⁸ A hinga akoli so ayeke sara kusala ndali ti nzoni ti awakua ti Jéhovah na lege so ala yeke ka nduru ti dö ambeni ye ti zia. Na tapande, e hinga so Noé atene lani pëpe na azo ti da ti lo: ‘Ala leke arche ni ahunzi awe si mbi ga’. Moïse  atene pëpe na azo ti Israël so ayeke na Égypte: ‘Ala gue na Ngu Bengba, fade e wara tere kâ.’ Josué atene pëpe: ‘Tongana gbagba ti Jéricho atï awe, ala ga atene na mbi.’ Nga Ésaïe afa pëpe mbeni zo, lo tene: ‘Bâ mbeni zo la, tokua lo.’​—És. 6:8

⁹ Jésus Christ ayeke nzoni tapande ti zo so azia lege na yingo ti Nzapa ti pusu lo ti sara ye. Lo yeda na bê ti lo ti sara kusala so a mû na lo ti zi azo (Jean 3:16). A yeke nzoni bibe so Jésus ayeke na ni ti dö ambeni ye ti zia apusu e nga ti sara tongaso. Mbeni ancien so aninga na kua ni afa tënë ti bê ti lo na ndo ti kundu ni, lo tene: “Tënë so Jésus atene na Pierre, bata akete ngasangbaga ti mbi, andu bê ti mbi mingi. Tongana angu ayeke hon, mbi bâ tongana nyen mbeni nduru tënë so zo atene na ndoye wala mbeni ye so zo asara na nzoni bê alingbi ti mû ngangu na mbeni zo. Kusala ti berger ayeke mbeni kua so mbi ye ni mingi.”​—Jean 21:16.

10. Nyen la alingbi ti pusu mbeni ita-koli ti mû tapande ti Jésus ti sara kusala teti ambeni zo?

¹⁰ Tongana a yeke tënë ti kundu ti Nzapa, aita-koli so amû tere ti ala na Nzapa awe ayeke fa na gigi bibe ti Jésus so atene: “Fade mbi dë bê ti ala.” (Mat. 11:28). A yeke mabe so ala yeke na ni na Nzapa nga ndoye teti congrégation la apusu aita-koli ti gi ti sara nzoni kusala. Me a lingbi ala pensé pëpe so kua ni ayeke ngangu mingi wala ahunda ye mingi na zo. Ka tongana mbeni ita-koli ayeke na nzara ti sara mbeni kusala pëpe? Mbeni ita-koli alingbi ti gi ti duti na nzara ti sara kusala na yâ ti congrégation?

Gi ti duti na nzara ti sara kusala

11. Tongana nyen mbeni zo alingbi ti gi ti duti na nzara ti sara kusala teti ambeni zo?

¹¹ Tongana mo bâ so mo lingbi pëpe ti sara ambeni kusala, a yeke nzoni mo sambela ti wara yingo vulu (Luc 11:13). Yingo ti Jéhovah ayeke mû maboko na mo ti hon ndo ti agingo bê ti mo kue na ndo ti tënë so. Nzapa la ayeke zia nzara ti sarango kusala na yâ ti bê ti zo, teti a yeke yingo ti Jéhovah la ayeke pusu mbeni ita-koli ti gi ti sara kusala so ayeke nzoni-kue nga ni la ayeke mû ngangu na lo ti sara ni (aPhil. 2:13; 4:13). Tongaso, a yeke na lege ni ti hunda Jéhovah ti mû maboko na mo ti duti nduru ti yeda ti sara akusala.​—Diko Psaume 25:4, 5.

12. Mbeni zo alingbi ti sara nyen ti wara ndara ti sara na kusala so a mû na lo?

¹² Mbeni ita-koli alingbi ti soro ti sara pëpe ambeni kusala ndali ti so lo bâ so bango lege ti kundu ni ayeke mbeni kua so ayeke ngangu mingi nga ayeke mû ngoi mingi. Wala lo lingbi ti bâ so lo yeke na ndara ti sara kusala ni so pëpe. Tongana a yeke tongaso, lo lingbi ti wara ndara na mandango lakue Mbeti ti Nzapa nga na ambeti so bungbi ti Jéhovah asigigi na ni. A yeke nzoni lo hunda tere ti lo: ‘Mbi zia mbeni ngoi awe ti manda na Mbeti ti Nzapa? Mbi yeke sambela ti wara ndara?’ Disciple Jacques atene: “Tongana ndara amanke mbeni zo na popo ti ala, zia lo ngbâ ti hunda ni na Nzapa, teti Nzapa ayeke mû ye na azo kue na lo yeke suku ngbanga ni pëpe; na a yeke mû ni na lo.” (Jacq. 1:5). Mo mä na bê na tënë ti Mbeti ti Nzapa so? Ti kiri tënë na sambela ti Salomon, Nzapa amû na lo “bê ti ndara na bê ti hinga ye” ti mû lege na lo ti zia kangbi na popo ti nzoni na sioni tongana lo yeke fâ ngbanga (1 aGbia 3:7-14). Tâ tënë, ye so asi na Salomon so ayeke nde mingi. Me e lingbi ti hinga biani so Nzapa ayeke mû ndara na aita-koli so ayeke sara kusala na yâ ti congrégation tongaso si ala lingbi ti bâ lege ti angasangbaga ti lo nzoni.​—aProv. 2:6.

13, 14. (a) Fa tongana nyen “ndoye so Christ ayeke na ni” apusu Paul ti sara ye. (b) “Ndoye so Christ ayeke na ni” apusu e ti sara nyen?

¹³ Mbeni ye so ayeke mû maboko na zo ti duti na nzara ti sara kusala teti ambeni zo ayeke gbungo li mingi na ndo ti aye kue so Jéhovah na Jésus asara ndali ti e. Na tapande, bâ tënë so ayeke na 2 aCorinthien 5:14, 15. (Diko ni.) Na lege wa “ndoye so Christ ayeke na ni apusu e ti sara ye”? Ndoye so Christ afa na mbage ti e na ziango fini ti lo na lê ti kuâ ti gue  oko na ye so bê ti Nzapa aye ayeke kota mingi. Tongana e bâ ye so na nene ni, bê ti e ayeke pusu e ti sara kusala. Ndoye so Christ afa la apusu Paul ti sara ye. A sara si lo gi ye gi teti lo mveni pëpe na a mû maboko na lo ti zia na gbele lo ti sara gi na Jéhovah nga ti sara na amba ti lo so ayeke na yâ ti congrégation nga na ala so ayeke na gigi ni.

¹⁴ Ti gbu li na ndo ti ndoye so Christ ayeke na ni teti azo ayeke pusu e ti kiri singila. Ye so ayeke sara si e yeke bâ so a yeke na lege ni pëpe ti ngbâ ti “lu ye ndali ti mitele” na tombango peko ti aye ti mitele nga na sarango gi aye so anzere na e wani. Me e yeke gbian aye na yâ ti gigi ti e ti zia na kozo ndo kusala so Nzapa amû na e ti sara. Ye so ayeke pusu e ti sara ‘kua tongana angbâa’ teti aita ti e so e ndoye ala mingi. (Diko aGalate 5:13.) Tongana e bâ tere ti e wani tongana angbâa so ayeke sara kua na tâ be-ti-molenge teti awakua ti Jéhovah so amû tere ti ala na lo, e yeke ne ala. Biani, e ye pëpe ti mû peko ti Satan so ayeke kasa gi azo na ayeke bi gi tënë na li ti ala.​—Apoc. 12:10.

Mungo maboko ti azo ti sewa

15, 16. Kozoni ti soro mbeni ita-koli ti ga ancien wala wakua ti mungo maboko, ye wa a ku na mbage ti azo ti da ti lo?

¹⁵ Tongana mbeni ita-koli asara mariage awe si lo yeke na amolenge, ti bâ wala lo lingbi ti sara kusala tongana mbeni wakua ti mungo maboko wala ancien, a yeke bâ dutingo ti sewa ti lo kozoni si. Biani, a yeke bâ kozoni dutingo ti sewa ti lo na lege ti yingo nga na nzoni sarango ye ti sewa ni si a soro lo ti ga wakua ti mungo maboko wala ancien. Ye so afa biani nene ti kusala so sewa ayeke sara ti mû maboko na babâ ti sewa ni na ngoi so lo yeke gi ti sara kusala na yâ ti congrégation tongana wakua ti mungo maboko wala ancien.​—1 Timothée 3:4, 5, 12.

¹⁶ Jéhovah ayeke na ngia tongana azo ti yâ ti sewa ayeke sara kusala maboko na maboko (aÉph. 3:14, 15). Ti tene mbeni babâ ti sewa asara kusala ti lo ti congrégation nga lo fa lege “nzoni” na azo ti da ti lo, a hunda na lo ti sara ye na ndara. Ndani la, a yeke kota ye ti tene mbeni ancien wala wakua ti mungo maboko amanda Bible na sewa ti lo ti tene ala kue abâ nzoni na lege ti Mandango tënë ti Nzapa na sewa yenga na yenga. A yeke nzoni lo fa tënë legeoko na ala lakue. Ndali ti oko raison so, a yeke nzoni mingi ti tene azo ti yâ ti sewa asara kusala maboko na maboko na mokonzi ti sewa ni.

Mo yeke kiri ti sara kusala ni?

17, 18. (a) Tongana mbeni ita asara kusala mbeni pëpe tongana ancien wala wakua ti mungo maboko, ye wa lo lingbi ti sara? (b) A yeke nzoni lo gi ti duti na bango ndo wa?

¹⁷ Peut-être lani mo yeke wakua ti mungo maboko wala ancien, me fadeso mo yeke sara kusala so mbeni pëpe. Mo ndoye Jéhovah na mo hinga biani so lo ngbâ ti bâ ndo na ndo ti mo (1 Pi. 5:6, 7). A-ancien atene na mo so a lingbi mo gbian ambeni ye na yâ ti fini ti mo? Yeda na faute ti mo na hunda na Nzapa ti mû maboko na mo ti sara ngangu ti hon ndo ni. Kpe ti bata ngonzo na bê. Sara ye na ndara nga duti na nzoni bango ndo. Mbeni ancien so asara kusala ni teti angu mingi na so a zi lo na kua ni atene: “Mbi sara lani kue ti ngbâ ti gue na abungbi, ti fa tënë nga ti diko Bible tongana ti so mbi yeke sara na ngoi so mbi de  ancien. A yeke ye so mbi zia lani na gbele ti mbi ti sara. Mbi manda ti kanga bê ti ku ndali ti so mbi pensé so na yâ ti ngu oko wala ngu use mbi lingbi ti kiri ti sara kusala ti ancien, me mbi ku juska ngu mbasambala si mbi kiri mbi ga ancien. Na yâ ti ngoi ni so, wango so aita amû na mbi ti nze pëpe me ti ngbâ lakue ti gi ti sara ambeni kusala amû maboko na mbi mingi.”

¹⁸ Tongana mo yeke mbeni ita-koli so ye so a sara tënë ni ge asi na mo, zia bê ti mo anze pëpe. Gbu li na ndo ti lege so Jéhovah airi tënë nzoni na ndo ti kusala ti mo nga na azo ti da ti mo. Kpengba azo ti sewa ti mo na lege ti yingo, sara vizite na aita so atï kobela nga mû wango ti kpengba azo so bê ti ala anze. Na ndo ni kue, bâ na nene ni pasa so mo yeke na ni ti gonda Nzapa nga ti fa nzoni tënë ti Royaume tongana Témoin ti Jéhovah. *​—Ps. 145:1, 2; És. 43:10-12.

Kiri mo bâ dutingo ti mo

19, 20. (a) A wa aita-koli kue so awara batême awe ti sara nyen? (b) Article ti peko ayeke sara ande tënë na ndo ti nyen?

¹⁹ Laso e yeke na bezoin ti a-ancien na awakua ti mungo maboko mingi ahon ti kozo. Ni la, e wa aita-koli kue so awara batême awe ti kiri ti bâ dutingo ti ala nzoni na ti hunda tere ti ala na tënë so: ‘Tongana mbi yeke pëpe wakua ti mungo maboko wala ancien, nyen la akanga lege na mbi ti sara kusala so?’ Zia yingo ti Nzapa amû maboko na ala ti duti na nzoni bango ndo na ndo ti kota tënë so.

²⁰ Azo kue na yâ ti congrégation ayeke bâ nzoni na lege ti ngangu so ambeni ita ayeke sara ti mû tere ti ala ti sara kusala ndali ti amba ti ala awamabe. Tongana na nzoni bê e gi ye teti e mveni pëpe, e yeke wara ngia ndali ti so e sara kusala teti amba ti e nga ndali ti so e lu ye ndali ti yingo. Me article ti peko ayeke fa na e tongana nyen e lingbi ti kpe ti mû vundu na yingo ti Nzapa.

[Kete tënë na gbe ni]

Mo yeke kiri tënë tongana nyen?

• Prophétie ti Michée 5:4 adë bê ti e na ndo ti nyen?

• Ti duti nduru ti dö ambeni ye ti zia aye ti tene nyen?

• Tongana nyen mbeni zo alingbi ti gi ti duti na nzara ti sara kusala teti ambeni zo?

• Tongana nyen sarango kusala maboko na maboko na yâ ti sewa ayeke mû maboko na mbeni ita-koli ti ga wakua ti mungo maboko wala ancien?

[Ahundango tënë ti manda na ye]

[Afoto na lembeti 25]

Na lege wa mo lingbi ti gi ti sara ambeni kusala?