Kpe ti mû vundu na yingo vulu ti Jéhovah
Kpe ti mû vundu na yingo vulu ti Jéhovah
“Ala mû vundu na yingo vulu ti Nzapa pëpe, yingo vulu so a sara na nzoroko na tere ti ala.”—AÉPH. 4:30.
1. Nyen la Jéhovah asara ndali ti azo kutu mingi? A lingbi ala sara nyen?
JÉHOVAH asara mbeni kota ye ndali ti azo kutu mingi so ayeke na yâ ti dunia ti kirikiri so. Lo sara si lege azi na ala ti ga nduru na lo na lege ti oko Molenge ti lo, Jésus Christ (Jean 6:44). Tongana mo mû tere ti mo na Nzapa awe na mo yeke sara ye alingbi na ni, mo yeke nga na popo ti azo ni so. So mo wara batême awe na iri ti yingo vulu, a lingbi sarango ye ti mo ague oko na yingo ni so.—Mat. 28:19.
2. Ahundango tënë wa e yeke gue ti bâ ni?
2 E so e “lu ye ndali ti yingo” e yü fini zo (aGal. 6:8; aÉph. 4:17-24). Me bazengele Paul amû wango na e nga lo gboto mê ti e ti mû vundu pëpe na yingo vulu ti Nzapa. (Diko aÉphésien 4:25-32.) Zia e gi fadeso nda ti wango so. Tongana Paul atene e mû vundu pëpe na yingo ti Nzapa, lo ye ti tene nyen? Na alege wa mbeni zo so amû tere ti lo na Jéhovah awe alingbi ti mû vundu na yingo ti lo? Nga tongana nyen e lingbi ti kpe ti mû vundu na yingo ti Jéhovah?
Paul aye ti tene nyen?
3. Mo yeke fa nda ti tënë so ayeke na aÉphésien 4:30 tongana nyen?
3 Kozoni kue, bâ atënë ti Paul so ayeke na aÉphésien 4:30. Lo tene: “Ala mû vundu na yingo vulu ti Nzapa pëpe, yingo vulu so a sara na nzoroko na tere ti ala ti ku na lango ti zingo ala na lege ti ngere so a futa ti zi azo.” Paul aye ti tene amba ti lo so lo ye ala mingi abuba pëpe songo ti ala na Nzapa. A yeke lani na lege ti yingo ti Jéhovah la a sara “nzoroko na tere ti ala ti ku na lango ti zingo ala na lege ti ngere so a futa ti zi azo.” Yingo ti Nzapa ayeke lani “ye so afa atene ye so ayeke ga ayeke si biani” teti ala so a soro ala ti gue na yayu na so angbâ be-ta-zo, laso nga kue a yeke tongaso (2 aCor. 1:22). Sarango nzoroko na tere ti ala afa so ala yeke ti Nzapa nga ala yeke wara ande fini na yayu. Na nda ni, wungo ti azo kue so a sara nzoroko na tere ti ala ayeke 144 000.—Apoc. 7:2-4.
4. Ngbanga ti nyen a lingbi e kpe ti mû vundu na yingo ti Nzapa?
4 Ti mû vundu na yingo alingbi ti duti kozo ye so ayeke gue na mbeni Chrétien ti zi tere ti lo na gbe ti ngangu so yingo ti Nzapa ayeke sara na yâ ti fini ti lo. Tënë so David atene na peko ti siokpari so lo na Bath-Shéba asara afa ni polele. David agbian bê ti lo na lo voro yanga na Jéhovah, lo tene: “Tomba mbi yongoro na tere ti Mo pëpe; na Mo lungula Yingo Vulu ti Mo na yâ mbi pëpe.” (Ps. 51:13). Gi ala so a soro ala ti gue na yayu na so ‘aduti be-ta-zo juska na kuâ’ si ayeke wara ande “couronne” ti fini ti lakue lakue na yayu (Apoc. 2:10; 1 aCor. 15:53). A-Chrétien so ayeke na beku ti wara fini na ndo ti sese ayeke nga na bezoin ti yingo vulu tongana ala ye ti ngbâ be-ta-zo na Nzapa nga ti wara fini na lege ti mabe so ala yeke na ni na yâ ti sandaga ti Christ so a mû ti zi azo (Jean 3:36; aRom. 5:8; 6:23). Ni la, a lingbi e kue e sara hange si e mû vundu na yingo vulu ti Jéhovah pëpe.
Mbeni Chrétien alingbi ti mû vundu na yingo vulu tongana nyen?
5, 6. Mbeni zo alingbi ti mû vundu na yingo ti Jéhovah tongana nyen?
5 E so e yeke aChrétien so e mû tere ti e na Nzapa awe, e lingbi ti kpe ti mû vundu na yingo ti Nzapa. E lingbi ti kpe ti mû vundu na yingo tongana e “ngbâ ti tambela na lege ti yingo”, ndali ti so na sarango tongaso e yeke hon ndo ti asioni nzara ti mitele nga e yeke duti pëpe na asioni sarango ye (aGal. 5:16, 25, 26). Ye oko, sarango ye ti e alingbi ti changé. Na yâ ti ambeni ye e lingbi ti mû vundu na yingo ti Nzapa tongana e zia si yeke na yeke, peut-être sân ti tene e hinga, e tï na yâ ti ambeni sarango ye so Mbeti ti Nzapa so a sû na gbe ti yingo ti lo ake ni.
6 Tongana e ngbâ ti sara ye ague nde na fango lege ti yingo vulu, e yeke mû vundu na yingo vulu nga na Jéhovah, Lo so yingo ni alondo na lo. Gingo nda ti aÉphésien 4:25-32 ayeke fa na e asarango ye so a lingbi e duti na ni nga a yeke mû maboko na e ti kpe ti mû vundu na yingo ti Nzapa.
Tongana nyen ti kpe ti mû vundu na yingo vulu?
7, 8. Fa ndani so a lingbi e tene tâ tënë.
7 A lingbi e tene tâ tënë. Na aÉphésien 4:25, Paul atene: “So ala ke mvene awe so, zia zo oko oko na popo ti ala atene tâ tënë na mba ti lo, teti e yeke amembre ti tere ti mba.” Teti so e kue e yeke oko tongana “amembre ti tere ti mba”, e ye pëpe ti sara ye na mayele wala ti handa amba ti e aChrétien, teti so sarango tongaso ayeke tenengo mvene na ala la. Mbeni zo so angbâ ti tene mvene ayeke fâ yâ ti songo ti lo na Nzapa.—Diko aProverbe 6:16-19.
8 Atënë ti handa nga na asarango ye ti handa alingbi ti ga na kangbi na yâ ti congrégation. Tongaso, a yeke nzoni e sara ye tongana prophète Daniel so zo alingbi ti zia bê na ndo ti lo, lo yeke zo so asara ye ti sioni oko pëpe (Dan. 6:4). A lingbi e bata nga na li ti e wango so Paul amû na aChrétien so ayeke na beku ti gue na yayu. Lo fa so membre oko oko ti “tere ti Christ” ayeke ti amba ti lo kue na a lingbi lo ngbâ beoko na tanga ti amba ti lo so a soro ala na so ayeke tene tâ tënë (aÉph. 4:11, 12). Tongana e ye ti wara fini ti lakue lakue na ndo ti sese, a lingbi e nga kue e tene tâ tënë. Ye so ayeke sara si sewa ti e ti aita ti dunia kue aduti beoko.
9. Ngbanga ti nyen a yeke kota ye ti sara ye alingbi na aÉphésien 4:26, 27?
9 A lingbi e ke Zabolo, e mû lege na lo pëpe ti buba songo ti e na Nzapa (Jacq. 4:7). Yingo vulu ayeke mû maboko na e ti luti na Satan. Na tapande, e lingbi ti luti na Zabolo na kpengo ti sara ngonzo ahon ndo ni. Paul atene: “Tongana ngonzo asara ala, ala sara siokpari pëpe; ala zia lâ akui na ndo ti ala na ngonzo na bê pëpe, nga ala zia ndo na Zabolo pëpe.” (aÉph. 4:26, 27). Biani, atâa tongana e yeke na raison ti sara ngonzo, ti sambela hio na yâ ti bê ti e alingbi ti mû maboko na e ti wara ‘yingo so aduti kpô’. A yeke sara si e kanga nzara ti bê ti e ahon ti sara ye na mbeni lege so ayeke mû vundu na yingo ti Nzapa (aProv. 17:27). Ni la, zia e ngbâ ti bata ngonzo na bê pëpe na e mû lege pëpe na Satan ti pusu e ti sara ye ti sioni (Ps. 37:8, 9). Mbeni lege ti luti na Satan ayeke ti leke tënë hio alingbi na wango ti Jésus.—Mat. 5:23, 24; 18:15-17.
10, 11. Ngbanga ti nyen a lingbi e nzi pëpe nga e sara ye ti likisi pëpe?
10 A lingbi e nzi pëpe nga e sara ye ti likisi pëpe. Na ndo ti tënë ti nzi, Paul atene: “Zia zo ti nzi anzi ye mbeni pëpe, me ahon ti nzi ye, zia lo sara kua ngangu, lo sara nzoni kua na maboko ti lo wani tongaso si lo wara mbeni ye ti kangbi na zo so ayeke na bezoin ni.” (aÉph. 4:28). Tongana mbeni Chrétien so amû tere ti lo na Nzapa awe anzi ye, lo yeke “buba iri ti Nzapa” na gango na zonga na ndo ni (aProv. 30:7-9, Tene ti Nzapa, Kozo Mbouki). Même yere ayeke pëpe mbeni raison ti tene zo anzi. Azo so andoye Nzapa nga na amba ti ala ahinga so zo ayeke na raison oko pëpe ti nzi.—Marc 12:28-31.
11 Paul asara gi pëpe tënë ti aye so a lingbi e sara ni pëpe, me lo fa nga aye so a lingbi e sara. Tongana e yeke tambela na lege ti yingo vulu, e yeke sara kua ngangu ti bâ lege ti sewa ti e nga e yeke wara “mbeni ye ti kangbi na zo so ayeke na bezoin ni.” (1 Tim. 5:8). Jésus na abazengele ti lo abata lani mbeni nginza ti mû maboko na awayere, me Judas Iscariote, zo ti kango zo, ayeke nzi ambeni nginza ni (Jean 12:4-6). A yeke polele so yingo vulu la ayeke fa lani lege na lo pëpe. E so yingo ti Nzapa ayeke fa lege na e, e yeke “sara ye mbilimbili na yâ ti aye kue.” (aHéb. 13:18). Na sarango tongaso, e yeke kpe ti mû vundu na yingo vulu ti Jéhovah.
Ambeni lege ti kpe ti mu vundu na yingo ti Nzapa
12, 13. (a) Tongana ti so a fa na aÉphésien 4:29, amara ti tënë wa a lingbi e kpe ni? (b) A lingbi atënë ti yanga ti e aduti tongana nyen?
12 A lingbi e bata yanga ti e. Paul atene: “Ala zia fungo tënë asigigi na yanga ti ala pëpe, me gi atënë so ayeke nzoni ti kpengba zo tongana a yeke ngoi ni, si a lingbi ti sara ye ti nzoni na azo so ayeke mä ni.” (aÉph. 4:29). Ge kue, bazengele ni afa gi pëpe ye so a lingbi e sara pëpe; me lo fa nga na e ye so a lingbi e sara. Tongana yingo vulu ti Nzapa ayeke fa lege na e, e yeke tene “atënë so ayeke nzoni ti kpengba zo . . . si a lingbi ti sara ye ti nzoni na azo so ayeke mä ni.” Na mbage, a lingbi e zia si “fungo tënë” asigigi na yanga ti e pëpe. Mbupa ti yanga ti Grec so a kiri pekoni na “fungo” ayeke mbeni mbupa so aye ti sara tënë ti fungo lê ti keke, fungo susu wala fungo nyama. Legeoko tongana ti so e yeke kpe mara ti afungo kobe tongaso, e ke atënë so ayeke sioni na lê ti Jéhovah.
13 A yeke nzoni atënë ti yanga ti e ane zo, aduti nzoni, a “zia ingo dä”. (aCol. 3:8-10; 4:6). A lingbi tënë ti yanga ti e amû lege na azo ti hinga so e yeke ti e nde. Tongaso, zia e mû maboko na amba ti e na lege ti atënë so ayeke “nzoni ti kpengba zo”. Zia e sara nga ye tongana ti mbeni wasungo psaume so ahe bia, atene: “Zia tënë ti yanga ti mbi na bibe ti mbi amû ngia na Mo, O L’Éternel, Tênë ti mbi na Zo Ti Ton mbi.”—Ps. 19:15.
14. Ti gue oko na aÉphésien 4:30, 31, aye wa a lingbi e zia lege ni?
14 A lingbi e zia batango zo na bê, ngonzo, zonga nga na asioni ye kue. Na pekoni so lo wa aChrétien ti mû vundu pëpe na yingo ti Nzapa, Paul atene: “Ala zi batango zo na bê, songo bê, ngonzo, dengo kongo na ndo ti zo na zonga, ala zia ni yongoro kâ, ala zi nga asioni ye kue.” (aÉph. 4:30, 31). Teti so e yeke azo so alingbi kue pëpe, a lingbi e kue e sara ngangu ti fa lege nzoni na abibe nga na asarango ye ti e. Tongana e zia si “batango zo na bê, songo bê, ngonzo” afa lege na e, e yeke mû vundu na yingo ti Nzapa. E yeke mû nga vundu na yingo vulu tongana e diko aye ti sioni so mbeni zo asara na e, e bata tënë na bê ti e nga e ke ti kiri ti sara songo na zo so ason bê ti e. Tongana e to nda ti sara sanka ti awango ti Bible, e lingbi ti maï asarango ye so ayeke gue na e ti sara siokpari na tere ti yingo na e lingbi ti wara aye ti sioni na pekoni.
15. Tongana a sara mbeni ye ti sioni na e, a lingbi e sara nyen?
15 A lingbi e sara nzoni bê, e bâ mawa ti zo nga e pardone mba. Paul atene: “Ala sara nzoni na mba, ala bâ mawa ti zo mingi, ala pardone mba na popo ti ala na bê ti ala kue legeoko tongana ti so Nzapa nga apardone ala na bê ti lo kue na lege ti Christ.” (aÉph. 4:32). Atâa tongana a sara mbeni ye ti sioni na e si a son bê ti e ngangu, zia e pardone ni tongana ti so Nzapa ayeke pardone e (Luc 11:4). Na tapande, tongana mbeni ita atene mbeni sioni tënë na ndo ti e. Ti leke kpale ni, e yeke gue ti bâ lo. Lo fa so lo yeke biani na vundu na lo hunda pardon. E yeke pardone lo, me a lingbi e sara ye mingi ahon so. Lévitique 19:18 atene: “Mo futa kula ti mo mveni pëpe, na mo bata ngonzo na bê ti mo na tere ti amolenge ti mara ti mo pëpe, me mo ndoye zo so ayeke nduru na mo legeoko tongana mo ndoye mo mveni, Mbi yeke L’Éternel!”
A lingbi lê ti e akpengba
16. Mû mbeni tapande so afa so a lingbi e zia lege ti ambeni ye ti tene e mû vundu pëpe na yingo ti Jéhovah.
16 Même tongana e yeke gi e oko, bê ti e alingbi ti pusu e ti sara mbeni ye so Nzapa aye pëpe. Na tapande, mbeni ita-koli ayeke mä mbeni mozoko so ayeke nzoni pëpe. Yingo-ti-hinga ti lo agi lo ndali ti so lo sara sanka ti wango so ayeke na yâ ti mbeti so “ngbâa be-ta-zo so ayeke sara ye na ndara” asigigi na ni (Mat. 24:45). Lo lingbi ti sambela ndali ni nga peut-être lo yeke dabe ti lo na tënë so ayeke na aÉphésien 4:30. Teti so lo ye pëpe ti sara mbeni ye so amû vundu na yingo ti Nzapa, lo mû desizion ti kiri ti mä asioni mozoko pëpe ato nda ni na lango ni so. Jéhovah ayeke iri tënë nzoni na ndo ti mara ti bibe tongaso. Ni la, zia e sara hange lakue ti mû vundu pëpe na yingo ti Nzapa.
17. Tongana lê ti e akpengba pëpe nga e sambela pëpe, nyen la alingbi ti si?
17 Tongana lê ti e akpengba pëpe nga e sambela pëpe, e lingbi ti tï na yâ ti mbeni sioni sarango ye so ayeke mû vundu na yingo vulu. Teti so yingo vulu ayeke mû lege na e ti fa na gigi asarango ye ti tere ti Babâ ti e ti yayu, tongana e sara mbeni ye ti sioni, e lingbi ti mû vundu na yingo vulu (aÉph. 4:30). Ascribe ti ngoi ti Jésus asara siokpari na tenengo so a yeke na ngangu ti Satan la Jésus asara amiracle. (Diko Marc 3:22-30.) Awato ti Christ so “azonga yingo vulu” na ala sara siokpari so a yeke pardone ni pëpe. Zia si e sara mara ti ye tongaso lâ oko pëpe!
18. Na lege wa e lingbi ti hinga so e sara pëpe mbeni siokpari so a yeke pardone ni pëpe?
18 Teti so e ye pëpe ti sara mbeni siokpari so a yeke pardone ni pëpe, a lingbi e girisa pëpe wango so Paul amû ti tene e mû vundu na yingo vulu pëpe. Me ka tongana e sara mbeni kota siokpari? Tongana e gbian bê ti e na a-ancien amû maboko na e, e lingbi ti tene so Nzapa apardone e awe tongaso e sara siokpari na tere ti yingo vulu pëpe. Na lege ti mungo maboko ti Nzapa, e lingbi nga ti kpe ti kiri ti mû vundu na yingo vulu.
19, 20. (a) Ambeni ye wa a lingbi e kpe ni? (b) A lingbi e sara kue ti sara nyen?
19 Jéhovah asara kusala na yingo vulu ti lo ti sara si azo ti lo ayeke na ndoye, ngia nga ala duti beoko (Ps. 133:1-3). Tongaso, a lingbi e kpe ti mû vundu na yingo vulu na tenengo asioni kpere-kpere wala na tenengo atënë so ayeke sara si azo ane pëpe ala so a soro ala na gbe ti yingo ti Nzapa ti sara kusala ti aberger (Kus. 20:28; Jude 8). Nde na so, a lingbi e sara si congrégation aduti beoko nga e ne mba na popo ti e. Biani, a lingbi e zia kangbi na yâ ti congrégation pëpe na dutingo nduru gi na ambeni ita na ti ke ambeni. Paul atene: “Mbi wa ala na iri ti Seigneur ti e Jésus Christ ti tene tënë ti ala kue amä tere, si kangbi aduti na popo ti ala pëpe, me si ala duti biani beoko na yâ ti bibe oko nga na bango ndo oko.”—1 aCor. 1:10.
20 Jéhovah ayeke na nzara ti mû maboko na e si e mû vundu na yingo ti lo pëpe na lo lingbi biani ti sara ni. Zia e ngbâ lakue ti sambela ti wara yingo vulu na e sara kue ti mû vundu na ni pëpe. E ngbâ lakue ti “lu ye ndali ti yingo”, e gi na bê ti e kue fango lege ti lo laso nga teti lakue lakue.
Mo yeke kiri tënë tongana nyen?
• Ti mû vundu na yingo ti Nzapa aye ti tene nyen?
• Tongana nyen mbeni zo so amû tere ti lo na Jéhovah awe alingbi ti mû vundu na yingo vulu?
• Na yâ ti aye wa e lingbi ti kpe ti mû vundu na yingo vulu?
[Ahundango tënë ti manda na ye]
[Foto na lembeti 30]
Leke tënë hio
[Foto na lembeti 31]
Atënë ti yanga ti mo ayeke tongana nyen?