Ngbanga ti nyen ti ne ambakoro?

NA YANGA ti mbeni ngu na kodoro ti Californie (Amerika), a yeke wara mbeni keke so ayeke na popo ti akeke ti dunia so azo asara foto ni mingi. Azo ti kodoro ni airi ni “Lone Cypress”. A tene so keke so asara ngu 250 na ndo ni awe. Azo mingi ahinga keke so ndali ti so aye tongana kota pupu wala ngu nga na ambeni ye tongaso awara lege pëpe ti kinda ni. Tongaso, azo asara aye mingi ti bata pendere keke so. Na tapande, a kanga akota kamba ti wen na tere ni nga a leke atênë na gere ni ti bata ni si a tï pëpe.

Keke so adabe ti e na aita so aga mbakoro awe so ayeke na popo ti e. Ala gbu ngangu na yâ ti aye mingi. Mbeni pendere ye so ala sara ti fa so ala gbu ngangu ayeke fango nzoni tënë. Prophète Joël afa kozoni awe so “ambakoro koli” ayeke fa tënë so ayeke na yâ ti Bible (Joël 2:28-32; Kus. 2:16-21). Gbu li na ndo ti angbonga mingi mingi so ambakoro so ayeke mû na bê ti ala kue ti mû maboko na ambeni zo ti hinga ye na ndo ti “nzoni tënë ti royaume”! (Mat. 24:14). Ambeni na popo ti ambakoro so, so ayeke fa tënë ti Royaume agbu ngangu na gbele akangango lege wala na yâ ti ambeni kpale teti angu mingi. Senge keke so azo ahinga ni ndali ti so aye tongana kota pupu wala ngu nga na ambeni ye tongaso awara lege pëpe ti kinda ni, a zia atênë na gere ni na a kanga akamba ti wen na tere ni ti bata ni. Legeoko nga, aita ti e so aga mbakoro awe, ala lingbi biani ti tene e bi bê ti e na ala nga e ne ala!

Jéhovah amû yanga na Israël ti giriri, lo tene: “A lingbi mo londo, mo luti na gbele zo so kuali ti lo avuru, na mo yekia lê ti mbakoro zo.” (Lév. 19:32). Na popo ti awakua ti Jéhovah laso, e yeke wara pendere tapande ti abe-ta-zo so ‘atambela na Nzapa’ teti angu mingi (Mi. 6:8). Na ngoi so ala ngbâ ti sara ye alingbi na atënë ti yanga ti Nzapa, vuru kuä ti li ti ala ayeke biani “couronne ti gloire”.​—aProv. 16:31.

Bazengele Paul amû yanga na Timothée, lo tene: “Mo suku ngangu mingi pëpe na mbeni mbakoro-koli.” Me a lingbi Timothée ‘avoro yanga na lo tongana babâ ti lo’ nga lo ‘voro yanga na ambakoro-wali tongana amama ti lo’. (1 Tim. 5:1, 2). Ni la, a lingbi Timothée ‘alondo’ lo  luti na gbele zo so kuä ti li ti lo avuru. Tâ tënë, Jéhovah aku ti tene sarango tënë ti e afa so e ne ambakoro.

A-Romain 12:10 atene: “Na ndo ti tënë ti nengo mba na popo ti ala, zia ala duti azo so amû li ni kozo ti sara ni.” A-ancien so ayeke na yâ ti congrégation ayeke ne biani aChrétien so ayeke ambakoro. Me a lingbi e kue e mû li ni ti ne amba ti e.

A yeke biani kusala ti azo ti sewa ti bâ lege ti ababâ na amama ti ala nga na a-âta ti ala. Ti keke so e sara tënë ni, azo asara ambeni ye ti bata ni, na ala ngbâ ti sara ni. Biani, a lingbi e sara kue ti bata nengo ti ababâ na amama ti e nga na a-âta ti e. Na tapande, ti duti zo so ayeke dengi mê nzoni ti mä zo ayeke kanga lege na e ti sara gi aye so e ye sân ti bi bê na atënë ti bê ti ala.​—aProv. 23:22; 1 Tim. 5:4.

Jéhovah abâ na nene ni mingi ambakoro so ayeke na popo ti e. Lo yeke dö ala ti zia pëpe (Ps. 71:18). Tâ Nzapa ayeke mû biani ngangu na ala ti ngbâ ti sara na lo na bê ti ala kue. Zia e nga kue e ngbâ ti mû maboko na ambakoro na e ne ala.

[Afoto na lembeti 13]

Legeoko tongana ti Lone Cypress so ayeke na bezoin ti tene a sara aye mingi ti bata ni, ambakoro nga kue ayeke na bezoin ti tene e mû maboko na ala nga e ne ala

[Lingu ti foto ni]

American Spirit Images/age fotostock