Ye so Jésus afa lani na ndo ti lo wani

“Lani, Jésus ayeke na kite oko pëpe na ndo ti lo wani, na ndo ti ndo so lo londo dä si lo ga, ngbanga ti nyen lo ga na sese nga ye wa ayeke ku lo.”​—WASUNGO MBETI HERBERT LOCKYER.

KOZONI si e yeda na aye so Jésus afa lani na e mä na bê na ni, a yeke nzoni e hinga mbeni ye na ndo ti lo. Jésus ayeke lani biani zo wa? Lo londo na ndo wa? Lo yeke gi lani nyen na yâ ti fini ti lo? Na yâ ti aÉvangile (Matthieu, Marc, Luc na Jean), e lingbi ti wara atënë ti yanga ti Jésus.

Lo yeke lani na fini kozoni si lo ga na sese Mbeni lâ Jésus atene: “Kozo si Abraham abâ gigi, mbi yeke lani dä.” (Jean 8:58). Abraham ayeke lani na fini a sara nduru na ngu 2000 kozoni si a dü Jésus. Me Jésus ayeke même na fini kozo si be-ta-zo Abraham abâ gigi. Jésus ayeke lani kozoni na ndo wa? Lo tene: “Mbi londo na yayu mbi zu.”​—Jean 6:38.

Molenge ti Nzapa Jéhovah ayeke na a-ange mingi so ayeke amolenge ti lo. Ye oko, ti Jésus ayeke nde mingi. Lo wani lo fa tere ti lo tongana “oko Molenge so Nzapa adü.” (Jean 3:18). Tënë so aye ti tene so Jésus ayeke gi oko ye so Nzapa wani la asara ni. Oko molenge so Nzapa adü ayeke zo so na lege ti lo Nzapa asara tanga ti aye kue.​—aColossien 1:16.

“Molenge ti zo” Jésus asara kusala na tënë so fani mingi ahon atanga ni kue ti sara tënë ti lo wani (Matthieu 8:20). Na sarango tongaso, lo fa so lo yeke pëpe mbeni ange so amû tere ti zo wala mbeni nzapa so amû tere ti zo. Nde na so, lo yeke biani tâ zo ti mitele. Na lege ti yingo vulu ti lo, kâ na yayu Nzapa atokua fini ti Molenge ti lo ti ga na sese. Lo sara si Marie, molenge-wali so ade ti hinga koli pëpe, amë ngo. Ye ti pekoni ayeke so, a dü Jésus tongana zo so alingbi kue, so ayeke na siokpari pëpe.​—Matthieu 1:18; Luc 1:35; Jean 8:46.

Messie so a mû zendo ni Mbeni wali ti Samarie atene na Jésus, atene: “Mbi hinga so Messie, lo so a iri lo Christ, ayeke ga.” Jésus akiri tënë na lo atene: “Mbi so mbi yeke sara tënë na mo so, mbi yeke lo.” (Jean 4:25, 26). Tënë “Messie” nga na tënë “Christ” aye ti tene “Lo so a soro lo.” Nzapa asoro Jésus ti sara mbeni kua so ayeke nde mingi na yâ ti gango tâ tënë ti azendo ti Nzapa.

Kozo ye so a tokua lo ndali ni Mbeni lâ Jésus atene: “A lingbi mbi fa nga nzoni tënë ti royaume ti Nzapa na ambeni gbata nde, ngbanga ti so a yeke ndali ni si a tokua mbi.” (Luc 4:43). Atâa so lo sara lani anzoni ye mingi ndali ti azo, fango tënë na ndo ti Royaume ti Nzapa ayeke kozo ye so lo yeke sara na yâ ti fini ti lo. E yeke sara tënë ande na ndo ti ye so lo fa lani na ndo ti Royaume.

A yeke polele so Jésus ayeke lani pëpe gi mbeni senge zo tongaso. * Tongana ti so e yeke bâ ni ande, fini so lo yeke na ni kozo na yayu asara si atënë so lo tene na ndo ti sese ge ane. A yeke ye ti dongo bê pëpe so lo fa lani mbeni tënë so ayeke ndu fini ti azo kutu na kutu na ndo ti sese kue.

[Kete tënë na gbe ni]