Ga nduru na Nzapa

Lo ne e na lege so lo zia e ti soro ye e wani

2 AGBIA 18:1-7

A KU na mbage ti ababâ na amama ti zia nzoni tapande na amolenge ti ala. Nzoni sarango ye ti babâ na mama alingbi ti mû maboko na molenge ti ala ti duti na anzoni sarango ye nga ti mû anzoni desizion na yâ ti gigi ti lo. Mawa ni ayeke so mingi ti ababâ na amama azia nzoni tapande na amolenge ti ala pëpe. So aye ti tene so mara ti amolenge tongaso alingbi ti sara ye ti nzoni na yâ ti gigi ti ala pëpe? Kiringo tënë ni ayeke na yâ ti mbeni tâ tënë so adë bê ti zo: Jéhovah Nzapa ane e oko oko kue na lege so lo mû na e pasa ti soro ye e wani. Bâ tapande ti Ézéchias so ayeke na 2 aGbia 18:1-7.

Ézéchias ayeke lani ‘molenge ti Achaz gbia ti Juda.’ (Versê 1). Achaz asara lani si azo so lo komande na ndo ti ala azia ti voro Jéhovah. Sioni gbia so avoro Baal na lo mû azo na sandaga. Lo fâ ambeni ita ti Ézéchias ti koli. Achaz akanga yanga ti temple na “lo sara gbalaka na mbage kue ti Jérusalem.” Lo sara si ‘ngonzo ti L’Éternel alondo.’ (2 Chronique 28:3, 24, 25). A yeke polele so babâ ti Ézéchias ayeke tâ lani sioni mingi. Me, Ézéchias ayeke sara ye ande gi tongana ti babâ ti lo?

Na pekoni so Ézéchias aga gbia, gi na tongo nda ni lo sara ambeni ye so afa so lo yeke mû peko ti sioni tapande ti babâ ti lo pëpe. Ézéchias “asara ye so ayeke mbilimbili na lê ti L’Éternel”. (Versê 3). Ézéchias azia bê ti lo na Jéhovah na “mbeni gbia tongana lo ayeke na popo ti agbia ti Juda pëpe”. (Versê 5). Na kozo ngu ti komandema ti lo, gbia ni so ade maseka ato nda ti sara ambeni kota ye ndali ti tâ vorongo. Lo zi aye so a leke ni ti voro na anzapa ti apaïen. A zi yanga ti temple na azo akiri ti voro Jéhovah. (Versê 4; 2 Chronique 29:1-3, 27-31). Ézéchias ‘azia bê ti lo na L’Éternel’ na “L’Éternel ayeke na lo”.​—Versê 6, 7.

Nyen la amû maboko na Ézéchias ti mû pëpe peko ti sioni tapande ti babâ ti lo? E hinga ye mingi pëpe na ndo ti Abi, mama ti Ézéchias. Wala nzoni tapande ti mama ti lo asara ye mingi na ndo ti lo? Wala nzoni tapande ti Ésaïe so ato nda ti kusala ti lo ti prophète kozo si a dü Ézéchias asara aye mingi na ndo ti gbia ni so ade maseka? * Bible asara tënë na ndo ni pëpe. Atâa ye ni ayeke so wa, ye so e hinga ayeke so: Ézéchias asoro ti sara ye na mbeni lege so ayeke nde na ti babâ ti lo.

Tapande ti Ézéchias ayeke kpengba azo kue so abâ pasi na ngoi so ala ade molenge ndali ti so ababâ na amama ti ala azia nzoni tapande na ala pëpe. Aye so asi ahon awe, zo alingbi ti changé ni pëpe. Ni la, e lingbi pëpe ti zi aye ti sioni so asi na e ândö. Me tongana amara ti ye tongaso asi na e, a ye pëpe ti tene so ti ti e awe. E lingbi ti soro ti sara ye ti nzoni laso na ye so ayeke gue na e ti wara ngia na yâ ti ngoi so ayeke ga. Na tapande ti Ézéchias, e lingbi ti soro ti ye tâ Nzapa Jéhovah na ti voro lo. Tongana e sara tongaso, e yeke wara ngia laso na ye so alingbi ti gue na e ti wara fini ti lakue lakue na yâ ti fini dunia ti Nzapa (2 Pierre 3:13; Apocalypse 21:3, 4). E kiri singila mingi na Nzapa ti ndoye so ane e oko oko kue na mungo na e kota pasa ti soro ye e wani!

[Kete tënë na gbe ni]