Sambela

3 A lingbi a sara ni tongana nyen?

MINGI ti abungbi ti vorongo nzapa, tongana ala ye ti sambela, ala yeke luti mingi na ndo ti aye tongana lege so zo ayeke duti na ni ti sambela, atënë so lo yeke tene nga kode ti tenengo sambela ni. Ye oko, Bible amû maboko na e ti zia lê ti e mingi pëpe na ndo ti aye so, me na ndo ti mbeni tënë so ayeke kota mingi: “A lingbi e sambela tongana nyen?”

Bible asara tënë ti awakua be-ta-zo ti Nzapa so ayeke sambela na ando nde nde nga afa alege nde nde so ala duti na ni ti sambela. Ala sambela na yâ ti bê ti ala wala na kota go alingbi na aye so asi. Ala yeke bâ ndo na nduzu na ngoi so ala yeke sambela nga ambeni ayeke kuku na sese tongana ala yeke sambela. Ahon ti mû aye tongana a-image, achapelet wala abuku ti sambela si ala sambela na ni, ala yeke tene atënë ti bê ti ala kue na yâ ti sambela ni nga na lege ti atënë ti ala wani. Nyen la asara si Nzapa amä asambela ti ala?

Tongana ti so a fa na yâ ti article so ahon, ala tene asambela ti ala ni na oko tâ Nzapa, Jéhovah. Mbeni kpengba ye nde ayeke nga dä. Na 1 Jean 5:14 a tene: “Bê so e zia na ndo ti lo ayeke so: Atâa ye wa e hunda, tongana a gue oko na ye so bê ti lo aye, lo yeke mä e.” Ti tene Nzapa amä e, a lingbi asambela ti e ague oko na ye so bê ti lo aye. Ye so aye ti tene nyen?

Ti tene asambela ti e ague oko na ye so bê ti Nzapa aye, a lingbi e hinga ye so bê ti lo ni aye. Ni la, ti manda Bible ayeke mbeni kpengba ye so ayeke sara si asambela ti e aga nzoni. Ye so aye ti tene so Nzapa ayeke ke ti mä e juska e ga mbeni wandara ti Bible awe si? Oko pëpe! Nzapa aye ti tene e gi ti hinga ye so bê ti lo aye, e gbu ndani nga e sara ye alingbi na ni (Matthieu 7:21-23). A lingbi sambela ti e ague oko na ye so e manda.

Na ngoi so e yeke hinga ye na ndo ti Jéhovah nga na ye so bê ti lo aye, mabe ti e ayeke kono. Mabe ayeke nga mbeni kpengba ye na yâ ti sambela. Jésus atene: “Aye kue so ala hunda ni na yâ ti sambela na mabe, fade ala yeke wara ni.” (Matthieu 21:22). Ti mä na bê aye pëpe ti tene ti yeda na ye kue gi tongaso. Me a ye ti tene ti mä na bê na mbeni ye so aye mingi afa so ayeke dä biani, atâa so zo abâ ye ni so pëpe (aHébreu 11:1). Na yâ ti Bible a yeke wara gbâ ti aye so afa so Jéhovah so e lingbi pëpe ti bâ lo ayeke dä biani, zo alingbi ti zia bê ti lo kue na ndo ti lo nga lo yeke nduru ti kiri tënë na sambela ti azo so amä na bê na lo. Na ndo ni, e lingbi ti hunda na lo lakue ti sara si mabe ti e akiri akono, nga Jéhovah aye mingi ti mû na e ye so e yeke na bezoin ni.​—Luc 17:5; Jacques 1:17.

Bâ mbeni ye nde so ayeke kota mingi na ngoi so e yeke sambela. Jésus atene: “Zo kue so aga na Babâ ayeke ga gi na lege ti mbi.” (Jean 14:6). Biani, Jésus ayeke lege so a lingbi e mû ni ti ga nduru na Babâ ti e, Jéhovah. Ni la, Jésus afa na adisciple  ti lo ti sambela na iri ti lo (Jean 14:13; 15:16). Ye so aye pëpe ti tene so a lingbi e sambela Jésus. Me, e yeke sambela na iri ti Jésus, na hingango so a yeke ndali ti Jésus la e lingbi ti ga nduru na Babâ ti e so alingbi kue nga so ayeke nzoni-kue.

Adisciple ti Jésus so ayeke lani nduru na lo mingi ahunda lo atene: “Seigneur, fa na e tongana nyen ti sambela.” (Luc 11:1). A yeke polele so ala yeke hunda lo lani pëpe na ndo ti aye so e sara tënë na ndo ni ge. Ala ye biani ti hinga aye so ala lingbi ti sara tënë ni na yâ ti sambela ti ala, so ti tene ‘aye wa a lingbi e sambela ndali ni?’

[Foto na lembeti 6]

Asambela so Nzapa amä ni ayeke ati so ague oko na ye so bê ti lo aye, so a tene ni na mabe nga na iri ti Jésus