Sambela

6 A yeke mû maboko na e?

SAMBELA alingbi ti sara nzoni na e? Bible afa so sambela ayeke sara nzoni na zo. Asambela so awakua be-ta-zo ti Nzapa asara asara biani nzoni na ala (Luc 22:40; Jacques 5:13). Tâ tënë, sambela alingbi ti mû maboko na e ti wara ye so e yeke na bezoin ni na lege ti yingo nga même na lege ti mitele. A yeke sara nga si e duti na ngia. Tongana nyen?

Bâ so mo yeke na mbeni molenge so a mû na lo mbeni matabisi. Mo yeke fa na lo so gi ti mû merci na yâ ti bê ti lo alingbi awe? Wala mo yeke fa na lo ti tene merci ni na gigi? Tongana e sara tënë ti mbeni kpengba ye so agbu bê ti e, e yeke bi bê ti e dä mingi nga tënë ni ayeke kiri ti gbu bê ti e mingi. A yeke tongaso nga tongana a ndu tënë ti sarango tënë na Nzapa? Biani, a yeke tongaso! Zia e bâ ambeni tapande.

Asambela ti kiringo singila. Tongana e kiri singila na Babâ ti e ndali ti aye ti nzoni so asi na e, e yeke bi bê ti e na ndo ti aye ni so mingi. Ye so ayeke sara si e kiri singila mingi, e yeke na ngia nga e yeke duti na nzoni bango ndo.​—aPhilippien 4:6.

Mbeni tapande: Jésus akiri singila ndali ti so Babâ ti lo amä lo na akiri tënë na asambela ti lo.​—Jean 11:41.

Asambela ti hundango pardon. Na ngoi so e hunda Nzapa ti pardone e, yingo-ti-hinga ti e aga nzoni, e yeke changé bê ti e biani nga e yeke hinga biani so siokpari so e sara so ayeke sioni. E yeke wara nga dengo bê na peko ti faute ti e.

Mbeni tapande: David asambela lani ti fa changengo bê ti lo nga na vundu ti lo.​—Psaume 51:3-21.

Asambela ti gingo fango lege nga na ndara. Tongana e hunda na Jéhovah ti fa lege na e wala ti mû na e ndara so e yeke na bezoin ni ti mû anzoni desizion, a yeke mû maboko na e ti sara tere ti e kete. A yeke dabe ti e so e hinga aye kue pëpe nga a yeke sara si e zia bê ti e kue na ndo ti Babâ ti e ti yayu.​—aProverbe 3:5, 6.

Mbeni tapande: Na tâ be-ti-molenge Salomon ahunda ti tene Nzapa afa lege na lo na amû na lo ndara si lo komande na ni na ndo ti azo ti Israël.​—1 aGbia 3:5-12.

Sambela na ngoi ti kpale. Tongana e zi bê ti e na Nzapa na ngoi so e yeke na yâ ti kpale, bê ti e ayeke dë nga e yeke zia bê ti e kue na ndo ti Jéhovah ahon ti zia bê ti e na ndo ti e mveni.​—Psaume 62:9.

Mbeni tapande: Gbia Asa asambela na ngoi so lo yeke na gbele angangu wato.​—2 Chronique 14:10.

Sambela ndali ti abezoin ti ambeni zo. Asambela tongaso ayeke mû maboko na e ti gi ti bâ mawa ti zo mingi, ti zia tere ti e na place ti amba ti e na ti kpe ti bi bê ti e gi na ndo ti e wani.

Mbeni tapande: Jésus asambela ndali ti adisciple ti lo.​—Jean 17:9-17.

Asambela ti gondango Nzapa. Tongana e gonda Jéhovah ndali ti apendere kusala ti lo nga na asarango ye ti lo, e yeke kiri ti ne lo mingi nga e yeke kiri singila mingi na lo. Mara ti asambela so alingbi nga ti mû maboko na e ti ga nduru mingi na Nzapa Babâ ti e.

Mbeni tapande: David ayeke na ngia ti gonda Nzapa ndali ti aye so Lo créé.​—Psaume 8:2-10.

Mbeni ye ti nzoni so sambela ayeke ga na ni ayeke “siriri ti Nzapa so ahon ndo ti bibe kue”. (aPhilippien 4:7). Biani, gi azo oko oko la ayeke wara siriri na yâ ti dunia so, so aye ayeke tambela kirikiri dä. A yeke sara même nzoni na zo na lege ti mitele (aProverbe 14:30). Anzoni ye so aga gi ndali ti angangu so e wani e sara? Wala mbeni ye so ayeke kota mingi ahon so ayeke dä?

[Kete tënë na lembeti 10]

Sambela asara nzoni na zo na lege ti bibe, ti mitele na so ahon atanga ni kue ayeke na lege ti yingo