Mo ke ye ti sioni?
Mo ke ye ti sioni?
“Mo [Jésus mo] ke sioye.”—PS. 45:8.
1. Nyen la Jésus afa na ndo ti tënë ti ndoye nyen?
TI FA na adisciple ti lo so ndoye ayeke kota ye mingi, Jésus Christ atene: “Mbi yeke mû na ala mbeni fini commandement: ala ndoye tere na popo ti ala. Legeoko tongana ti so mbi ndoye ala, zia ala nga ala ndoye tere na popo ti ala. A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.” (Jean 13:34, 35). Jésus amû yanga na adisciple ti lo ti ye tere na popo ti ala na bê kue. Ndoye so la ayeke fa so ala yeke adisciple ti lo. Jésus awa nga ala lo tene: “Ala ngbâ ti ndoye awato ti ala na ti sambela ndali ti azo so ayeke sara ye ti ngangu na ala.”—Mat. 5:44.
2. Ye wa a lingbi adisciple ti Christ ake ni?
2 Ye oko, na ndo ti ye so Jésus afa na adisciple ti lo na ndo ti ndoye, lo fa nga na ala ye so a lingbi ala ke ni. Bible asara tënë so na ndo ti Jésus atene: “Mo ndoye ye so ayeke mbilimbili na mo ke tënë ti kpengo ndia pëpe [ye ti sioni].” (aHéb. 1:9; Ps. 45:8). Ye so aye ti fa so a lingbi e ndoye mbilimbili nga e ke siokpari, wala kpengo ndia pëpe. A yeke nzoni ti hinga so bazengele Jean atene polele lo tene: “Zo kue so angbâ na yâ ti siokpari, lo yeke nga zo ti kpengo ndia pëpe. Tongaso, siokpari ayeke kpengo ndia pëpe.”—1 Jean 3:4.
3. Aye wa article so ayeke sara tënë na ndo ni ti mû maboko na e ti ke ye ti sioni?
3 Ni la, e so e yeke aChrétien, a yeke nzoni e hunda tere ti e: ‘Mbi ke ye ti sioni?’ Zia e bâ ambeni ye osio so na yâ ni e lingbi ti fa so e ke ye ti sioni: (1) bango ndo ti e na ndo ti tënë ti nyongo sämba ahon ndo ni, (2) sarango yorö, (3) sarango ye ti e na gbele aye so andu lango sioni, nga (4) bango ndo ti e na ndo ti azo so andoye ye ti sioni.
Ga ngbâa ti sämba pëpe
4. Ngbanga nyen Jésus ayeke na kamene lani pëpe tongana lo yeke mû wango na azo na ndo ti tënë ti nyongo sämba ahon ndo ni?
4 Na ambeni ngoi Jésus anyon vin lani, lo bâ ni tongana mbeni matabisi so alondo na Nzapa (Ps. 104:14, 15). Me lâ oko lo nyon ni ahon ndo ni pëpe (aProv. 23:29-33). Ye so asara si lo yeke na kamene pëpe tongana lo yeke mû wango na azo na ndo ti tënë ti nyongo sämba ahon ndo ni. (Diko Luc 21:34.) Nyongo sämba ahon ndo ni alingbi ti gue na zo ti tï na yâ ti ambeni kota siokpari. Ni la bazengele Paul atene: “Ala zia vin asulêe ala pëpe, ye so ague na zo ti sara ye ahon ndo ni, me ala zia si yingo vulu asi ala singo lakue.” (aÉph. 5:18). Lo mû nga wango na ambakoro-wali so ayeke na yâ ti congrégation ti duti “angbâa ti vin” pëpe.—Tite 2:3.
5. Ahundango ndo wa a yeke nzoni azo so ayeke nyon sämba ahunda tere ti ala na ni?
5 Tongana mo yeke nyon ka sämba, a yeke nzoni mo hunda tere ti mo: ‘Mbi yeke na bango ndo ti Jésus na ndo ti tënë ti nyongo sämba ahon ndo ni? Tongana a lingbi mbi mû wango na ambeni zo na ndo ti tënë ti nyongo sämba ahon ndo ni, kamene ayeke sara mbi pëpe? Mbi yeke nyon ka sämba ti tomba na avundu ti mbi? Yenga oko oko, mbi yeke nyon sämba gbani wala kete? Tongana mbeni zo atene so mbi nyon sämba ahon ndo ni, mbi yeke sara ye tongana nyen? Mbi yeke gi araison wala mbi yeke sara ngonzo?’ Nyongo sämba ahon ndo ni alingbi ti sara si a yeke duti ngangu na e ti gbu li ti e nzoni na ti mû anzoni desizion. Adisciple ti Christ ayeke sara kue ti bata ngangu ti gbungo li ti ala.—aProv. 3:21, 22.
Kpe sarango yorö
6, 7. (a) Jésus asara ye lani tongana nyen na mbage ti Satan nga na asioni yingo? (b) Ngbanga ti nyen sarango yorö amû ndo laso mingi?
6 Na ngoi so Jésus ayeke lani na ndo ti sese, lo dö sese na Satan na asioni yingo. Satan lo wani aga ti tara Jésus ti bâ wala lo yeke be-ta-zo, me Jésus adö sese na lo (Luc 4:1-13). Satan agi nga na lege ti mayele ti sara ngangu na ndo ti pensé ti lo nga na asarango ye ti lo. Jésus ahinga ni na lo dö sese na ni (Mat. 16:21-23). Jésus amû maboko na azo so bê ti ala ayeke nzoni ti sigigi na gbe ti ngangu ti asioni yingo.—Marc 5:2, 8, 12-15; 9:20, 25-27.
7 Na pekoni so a zia Jésus na ndo ti mbata ti Gbia na ngu 1914, lo tomba Satan na asioni yingo na yayu si ye ti sioni aduti kâ mbeni pëpe. Ye so asara si fadeso Satan ayeke sara ngangu mingi ahon ti kozo ti “handa sese kue so azo ayeke dä.” (Apoc. 12:9, 10). Ni la, bê ti e adö pëpe ti bâ so tënë ti sarango yorö agbu bê ti azo mingi na ayeke gue gi guengo na li ni. Nyen la e lingbi ti sara ti kpe ni?
8. Atënë wa a lingbi e hunda tere ti e na ni na ndo ti aye tongana abuku, angia ti vidéo wala afilm?
8 Bible afa polele aye ti sioni so ayeke ga na peko ti sarango yorö. (Diko Deutéronome 18:10-12.) Laso Satan na asioni yingo ti lo ayeke sara ngangu na ndo ti bibe ti azo na lege ti afilm, abuku, nga na angia ti vidéo so ayeke yä na nduzu sarango yorö. Tongaso, e oko oko kue e hunda tere ti e: ‘Na yâ ti anze so ahon, mbi bâ mbeni film, wala mbi bâ télé, wala mbi sara mbeni ngia ti vidéo, wala mbi diko mbeni mbeti so afa aye ti ndima na yâ ni? Mbi hinga so a yeke kota ye ti kpe mara ti aye so? Wala mbi tene so a yeke sara ye oko na ndo ti mbi pëpe? Mbi gi ti hinga tënë ti bê ti Jéhovah na ndo ti aye so mbi soro ti bâ wala ti diko? Tongana mbi zia si Satan asara ngangu na ndo ti mbi si mbi tï na yâ ti aye tongaso, yengo so mbi ye na Jéhovah nga na afango ye ti lo so ayeke mbilimbili ayeke pusu mbi ti sara ngangu kue ti sigigi na gbe ni?’—Kus. 19:19, 20.
Sara ye alingbi na wango ti Jésus na ndo ti tënë ti lango-sioni
9. Tongana nyen mbeni zo alingbi ti sara si nzara ti ye ti sioni adü na yâ ti lo?
9 Jésus ayä na nduzu afango ye ti Jéhovah so andu tënë ti bungbingo koli na wali. Lo tene: “Ala diko na yâ ti Mbeti ti Nzapa pëpe? Na tongo nda ni, lo so asara ala, lo sara ala koli na wali, na lo tene: ‘Ndani la, koli ayeke zia ande babâ na mama ti lo, na lo gue ande ti duti na wali ti lo na ala use ayeke ga mitele oko.’ Tongaso ala yeke use mbeni pëpe, me mitele oko. Ni la, ye so Nzapa abungbi ni na gbe ti joug oko, zia mbeni zo akangbi yâ ni pëpe.” (Mat. 19:4-6). Jésus ahinga so ye so lê ti e ayeke bâ alingbi ti sara ngangu na ndo ti bê ti e. Ndani la, na yâ ti fango ye ti lo na ndo ti Hoto, lo tene: “Ala mä awe so a tene: ‘Mo gi wali wala koli nde pëpe.’ Me mbi tene na ala: Zo kue so angbâ ti bâ mbeni wali si lo sara nzara ti wali ni so, andâ lo gi lo na wali na yâ ti bê ti lo awe.” (Mat. 5:27, 28). Ti tâ tënë ni, azo so asara sanka ti wango ti Jésus so ayeke sara si nzara ti ye ti sioni adü na yâ ti ala.
10. Fa mbeni ye so asi so afa so zo alingbi ti zia lege ti bango porno.
10 Satan ayeke sara kusala na porno ti maï tënë ti lango-sioni. Porno amû ndo laso na yâ ti dunia. Azo so abâ porno abâ so a yeke ngangu na ala ti girisa na ndo ti asioni limon so ala bâ. Ala lingbi même ti ga ngbâ ti bango porno. Bâ ye so asi na mbeni ita-koli. Lo tene: “Mbi yeke bâ lani porno na hondengo ni. Na yâ ti li ti mbi mbi yeke na yâ ti mbeni dunia so ayeke nde na ti so na yâ ni mbi yeke sara na Jéhovah. Mbi hinga so ye so mbi yeke sara so ayeke sioni, me mbi tene so kusala so mbi yeke sara na Nzapa angbâ lakue ti nzere na lo.” Nyen la amû maboko na ita-koli so ti changé bango ndo ti lo? Lo tene: “Atâa so a yeke lani ngangu mingi na mbi ti gue ti sara tënë ti kpale ni na a-ancien, mbi mû desizion ti gue ti sara tënë ni na ala.” Na nda ni, ita-koli so azia lege ti bango porno. Lo tene: “Na pekoni so mbi zia lege ti siokpari so, mbi bâ biani so mbi yeke na nzoni yingo-ti-hinga.” A lingbi azo so ake ye ti sioni amanda ti ke porno.
11, 12. Na ndo ti tënë ti amozoko so e soro ti mä, tongana nyen la e lingbi ti fa so e ke ye ti sioni?
11 Mozoko nga na atënë ti yâ ni alingbi ti sara ngangu mingi na ndo ti pensé ti e nga na bê ti e. Mozoko lo wani ayeke mbeni matabisi so alondo na Nzapa na a sara angu mingi awe so a yeke sara kusala na ni ti voro na tâ Nzapa (Ex. 15:20, 21; aÉph. 5:19). Me sioni dunia ti Satan asara si amozoko so ayä na nduzu tënë ti lango-sioni amû ndo (1 Jean 5:19). Mo yeke sara tongana nyen ti hinga wala mozoko so mo yeke mä ayeke sara sioni na mo wala pëpe?
12 Mo lingbi ti hunda tere ti mo: ‘Abia so mbi yeke mä ayeke yä na nduzu tënë ti fango zo, tënë ti gingo koli wala wali nde, tënë ti lango-sioni nga na zonga? Tongana mbi diko atënë ti yâ ti ambeni bia na mê ti mbeni zo, zo ni ayeke bâ mbi tongana mbeni zo so ake ye ti sioni? Wala atënë ni ayeke fa so bê ti mbi aga sioni awe?’ E lingbi pëpe ti tene so e ke ye ti sioni nga na oko ngoi ni e yeke mä abia so ayä na nduzu tënë ti ye ti sioni. Jésus atene: “Aye so asigigi na yanga ti zo alondo na bê, na a yeke aye so la asara si zo aga sioni. Na tapande, aye so alondo na bê ayeke: sioni tënë, tënë ti fango zo, tënë ti gingo wali wala koli nde, tënë ti lango-sioni, tënë ti nzi, tënë ti témoin ti wataka nga na zonga.”—Mat. 15:18, 19; bâ Jacques 3:10, 11.
Duti na bango ndo ti Jésus na ndo ti azo so aye ti kpe ndia pëpe
13. Azo so akpengba na yâ ti siokpari, bango ndo ti Jésus na ndo ti ala ayeke so wa?
13 Jésus atene so ni ga ti iri awasiokpari, wala azo ti kpengo ndia pëpe ti tene ala changé bê ti ala (Luc 5:30-32). Me ti azo so akpengba na yâ ti siokpari, bango ndo ti lo na ndo ti ala ayeke so wa? Jésus agboto mê ti e ngangu ti zia pëpe si azo tongaso asara ngangu na ndo ti e (Mat. 23:15, 23-26). Lo tene nga polele lo tene: “A yeke pëpe zo kue so atene na mbi, ‘Seigneur, Seigneur,’ si ayeke lï ande na yâ ti royaume ti yayu. Me zo so asara ye so bê ti Babâ ti mbi so ayeke na yayu aye si ayeke lï ande. Na lâ ni kâ [na ngoi ti fango ngbanga ti Nzapa], fade azo mingi ayeke tene na mbi, ‘Seigneur, Seigneur, e tene aprophétie na iri ti mo pëpe? E tomba asioni yingo na iri ti mo pëpe? E sara akusala ti ngangu mingi na iri mo pëpe?’” Ye oko, lo yeke ke azo so asara siokpari na ake ti changé bê ti ala. Lo yeke tene na ala: “Ala hon yongoro kâ na tere ti mbi.” (Mat. 7:21-23). Ngbanga ti nyen a fâ mara ti ngbanga tongaso na ndo ti ala? A yeke ngbanga ti so azo tongaso abi zonga na ndo ti iri ti Nzapa nga asarango ye ti ala so akpe ndia pëpe asara sioni na ambeni zo.
14. Ngbanga ti nyen a lingbi a zi na yâ ti congrégation azo so asara siokpari na ake ti changé bê ti ala?
14 Mbeti ti Nzapa atene so a lingbi a zi na yâ ti congrégation azo so asara siokpari na ake ti changé bê ti ala. (Diko 1 aCorinthien 5:9-13.) A yeke nzoni ti sara tongaso ndali ti araison ota: (1) ti zia si zonga aga na ndo ti iri ti Nzapa pëpe, (2) ti bata congrégation si ye ti sioni alï dä pëpe, nga (3) ti mû maboko na zo so asara siokpari ni ti changé bê ti lo tongana lege ayeke dä.
15. Tongana e ye ti ngbâ be-ta-zo na Jéhovah, akpengba hundango tënë wa a lingbi e hunda tere ti e na ni?
15 E yeke na bango ndo ti Jésus na ndo ti azo so aye ti ngbâ gi na yâ ti siokpari ti ala? A lingbi e gbu li ti e na ndo ti ahundango tënë so: ‘Mbi yeke sara songo lakue na azo so a bi ala na gigi wala na azo so azi tere ti ala wani na congrégation? Ka tongana zo ni ayeke fami ti mbi me mbi na lo e lango da oko mbeni pëpe?’ Aye tongaso alingbi ti zia ndoye ti e teti ye so ayeke mbilimbili nga na dutingo be-ta-zo ti e na Nzapa na yâ ti tara. *
16, 17. Kpale wa mbeni ita-wali atingbi na ni? Nyen la amû maboko na lo ti sara ye alingbi na ye so Bible afa na ndo ti azo so a bi ala na gigi?
16 Bâ ye so asi na mbeni ita-wali. Molenge ti lo ti koli so aga kota zo awe andoye ândö Jéhovah. Ye oko, na pekoni lo sara siokpari na lo ke ti changé bê ti lo. Ye so asara si a bi lo na gigi. Ita-wali so andoye Jéhovah, me lo ye nga molenge ti lo na lo bâ so a yeke ngangu mingi na lo ti sara ye alingbi na yanga so Bible amû ti kpe ti sara songo na molenge ti lo ni.
17 Wango wa si mo yeke mû na ita-wali so? Mbeni ancien amû lani maboko na lo ti bâ so Jéhovah ahinga vundu so lo yeke na ni. Ancien ni atene na lo ti pensé na ndo ti vundu so Jéhovah ayeke na ni lani na ngoi so ambeni ange so ayeke amolenge ti lo ake yanga ti lo. Ancien ni ague na ita-wali ni ti bâ so atâa so Jéhovah ahinga so ye so alingbi ti mû vundu na zo, lo hunda ti tene a bi na gigi azo so asara siokpari na ake ti changé bê ti ala. Ita-wali ni ayeda na wango ni na bê ti lo kue na lo sara ye alingbi na ye so Bible afa na ndo ti azo so a bi ala na gigi ti bungbi. * Ti duti be-ta-zo na Jéhovah na yâ ti aye tongaso ayeke zia ngia na bê ti lo.—aProv. 27:11.
18, 19. (a) Tongana e fâ yâ ti songo na zo so angbâ gi ti sara ye ti sioni, e yeke fa polele so e ke nyen? (b) Tongana e ngbâ be-ta-zo na Nzapa nga na aye so lo leke, ye ti pekoni alingbi ti duti so wa?
18 Tongana mara ti ye tongaso asi na mo, dabe ti mo so Jéhovah ahinga ye so asi na mo so. Tongana mo fâ yâ ti songo na zo so a bi lo na gigi wala na zo so lo wani azi tere ti lo na bungbi, mo yeke fa so mo ke bango ndo ti zo ni nga na aye so lo sara si na nda ni a bi lo na gigi so. Na mbage, mo yeke fa nga so mo ndoye zo so asara ye ti sioni ni so na ye so mo sara ayeke ndali ti nzoni ti lo. Tongana mo ngbâ be-ta-zo na Jéhovah, ye so alingbi peut-être ti sara si zo so asara siokpari ni achangé bê ti lo na lo kiri na Jéhovah.
19 Mbeni zo so lani a bi lo na gigi so na pekoni lo kiri na bungbi atene: “Mbi yeke na ngia so ndoye ti Jéhovah na mbage ti azo ti lo apusu lo ti sara kue si bungbi ti lo angbâ lakue ti duti na saleté oko pëpe. Atâa so ti bi zo na gigi ti bungbi alingbi ti nzere pëpe na azo so ayeke aTémoin pëpe, a yeke kota ye ti sara ni nga a yeke fä ti ndoye.” Mo pensé so tongana amembre ti congrégation so ambeni ayeke nga afami ti lo angbâ lani ti lê songo na lo na ngoi so a bi lo na gigi, ye so ayeke mû maboko na lo ti tene mara ti tënë tongaso? Tongana e sara ye alingbi na aye so Bible atene na ndo ti azo so a bi ala na gigi ti bungbi, e yeke fa polele so e ndoye ye ti mbilimbili nga e yeda so Jéhovah la ayeke na droit ti fa na zo nzoni lege ti sarango ye.
“Ke sioye!”
20, 21. Ngbanga ti nyen a yeke kota ye ti gi ti ke ye ti sioni?
20 Bazengele Pierre awa e lo tene: “Ala zia li ti ala kpô, zia lê ti ala akpengba.” Ndali ti nyen? Ndali ti so “wato ti ala Zabolo ayeke tambela tongana mbeni bamara so ayeke toto, na lo yeke gi mbeni zo ti te lo.” (1 Pi. 5:8). Mo la mo yeke duti ande zo ni so? Lege so mo yeke ke na ye ti sioni la ayeke mû kiringo tënë ni.
21 Ti gi ti ke ye ti sioni ayeke kete ye pëpe. A dü e na yâ ti siokpari nga e yeke na yâ ti mbeni dunia so ayeke pusu zo ti sara ye alingbi na anzara ti mitele (1 Jean 2:15-17). Ye oko, tongana e mû tapande ti Christ nga e ndoye Jéhovah Nzapa ngangu, e lingbi biani ti ke ye ti sioni. Zia e sara kue ti “ke sioye” na hingango na bê ti e kue so Jéhovah ayeke “bata âme ti azo [so ayeke be-ta-zo, FD], lo zi ala na tïtî azo ti sioni.”—Ps. 97:10.
[Akete tënë na gbe ni]
^ Ti hinga anzene nzene tënë na ndo ti tënë so, bâ Tour ti Ba Ndo ti 15 décembre 1981, lembeti 25-30 na Français.
^ Bâ nga Tour ti Ba Ndo ti 15 janvier 2007, lembeti 17-20 na Français.
Mo yeke kiri tënë tongana nyen?
• Nyen la ayeke mû maboko na e ti hinga bango ndo ti e na ndo ti sämba?
• Nyen la e lingbi ti sara ti kpe asarango yorö?
• Ngbanga ti nyen bango porno ayeke sioni?
• Tongana a bi mbeni zo so e ye lo na gigi, tongana nyen la e yeke fa so e ke ye ti sioni?
[Ahundango tënë ti manda na ye]
[Foto na lembeti 29]
Tongana mo yeke nyon sämba, aye wa a yeke nzoni mo gbu li dä?
[Foto na lembeti 30]
Sara hange na aye tongana alimon so Satan ayeke sara kusala na ni ti sara ngangu na ndo ti azo
[Foto na lembeti 31]
Zo so abâ porno ayeke maï nzara ti nyen na yâ ti lo?
