Azo wa la ayeke fa nzoni tënë?

“A yeke fa ande nzoni tënë . . . na ndo ti sese kue.”​—MATTHIEU 24:14.

A-TÉMOIN TI JÉHOVAH ayeke fa nzoni tënë na ndo ti sese kue. Ala yeke sara ni na alege nde nde. Mbeni lege ni ayeke . . .

Sarango tënë na zo na yanga. Na tapande ti Jésus nga na adisciple ti lo, aTémoin ti Jéhovah ayeke gue na mbage ti azo ti fa nzoni tënë na ala (Luc 8:1; 10:1). Ala ku pëpe ti tene azo la aga na mbage ti ala. Fango tënë na azo na ndo ti Royaume ti Nzapa ayeke mbeni ye so aTémoin ti Jéhovah kue, so wungo ti ala ahon kutu mbasambala, ayeke sara ni. Ala yeke fa tënë da na da, na ndo ti lege, na lege ti téléphone nga na ambeni lege nde. Na ngu so ahon, aTémoin ti Jéhovah amû ngbonga ahon ngbundangbu oko na ndambo ti sara kusala so.

Ala yeke fa ye na azo gi pëpe na ndo ti Royaume ti Nzapa, me nga na ndo ti “aye kue so [Jésus a]mû yanga na ala ti sara.” (Matthieu 28:20). Lakue ala yeke manda Bible senge senge na azo ahon kutu miombe na yanga-da ti ala.

A-Témoin ti Jéhovah ayeke fa tënë na ndo ti sese kue na yâ ti akodoro 236. Ala yeke fa tënë na azo so alondo na ando nde nde. Ala yeke fa tënë na yâ ti akete kodoro nga na gbata, na yâ ti kota gbako ti Amazone nga na kota gbako ti taïga na mbage ti Sibérie, na yâ ti yando ti Afrika nga na aHoto ti Himalaya. A yeke futa ala ndali ti kusala so pëpe, ala mû mosoro ti ala wani nga na ngoi ti ala ti sara na ni. Ndoye so ala yeke na ni teti Nzapa nga teti azo la apusu ala ti sara ni. Ala yeke fa nga nzoni tënë na azo na lege ti . . .

Ambeti. Iri ti mbeti-sango so so mo yeke diko so ayeke Tour ti Ba Ndo Afa Tene ti Royaume ti Jéhovah. A sara ni na ayanga ti kodoro 185 nga Tour ti Ba Ndo oko oko so a yeke sigigi na ni, wungo ni ahon kutu 42. Mbeni mbeti ni ayeke Réveillez-vous! so ayeke sara nga tënë na ndo ti Royaume; a sara ni na ayanga ti kodoro 83 nga Réveillez-vous! oko oko so a yeke sigigi na ni, wungo ni asi kutu 40 tongaso.

Ambeti nga na agbakuru so asara tënë na ndo ti aye so Bible afa, a yeke wara ni na ayanga ti kodoro 540. A yeke aye tongana abuku, abrochure, atract, aCD, aMP3 nga na aDVD. Ambeti so aTémoin ti Jéhovah asigigi na ni na ala kangbi ni na yâ ti angu bale-oko so ahon, wungo ni ahon ngbundangbu 20. Tongana a mû azo ti sese kue, zo oko oko ayeke wara mbeti ota.

A-Témoin ti Jéhovah apete nga aBible wala ala leke si a pete ni na ayanga ti kodoro nde nde. Mbeti ti Nzapa ti fini dunia so aTémoin ti Jéhovah akiri na pekoni, so ala pete ni nga ala kangbi ni, a yeke wara ni fadeso kue wala gi mbage ni na ayanga ti kodoro 96. Wungo ni kue so ala kangbi ni ahon kutu 166. A-Témoin ti Jéhovah ayeke fa nga nzoni tënë ti Royaume na ngoi ti . . .

Abungbi. Abungbi so a yeke sara ni yenga na yenga na yâ ti aDa ti Royaume ayeke pëpe gi asenge bungbi ti nzapa. A zia ni na sese ti fa ye na azo. Na ngoi ni, a yeke mû adiskur na ndo ti atënë so andu Bible nga a yeke manda Bible na  lege ti Tour ti Ba Ndo nga na ambeni mbeti nde. Na ngoi ti abungbi so, aTémoin ti Jéhovah ayeke manda nga ti duti anzoni wafango nzoni tënë.

A-Témoin ti Jéhovah ayeke manda oko ye na yâ ti acongrégation so wungo ni ahon 107 000 na ndo ti sese kue, ye so amû lege na ala ti duti beoko. Lege azi na azo kue ti ga na abungbi so. A yeke hunda nginza kâ pëpe. Tâ tënë, aye so kue ayeke duti gi senge senge tongana aTémoin asara ye a lingbi pëpe na ye so ala yeke fa. Ni la, ala yeke tara ti pusu azo ti yeda na nzoni tënë na lege ti . . .

Tapande ti ala wani. Ala yeke sara ngangu ti duti aChrétien so ayeke na nzoni tambela na lege so ala yeke sara kue ti sara ye na azo tongana ti so ala ye a sara na ala (Matthieu 7:12). Atâa so ala lingbi kue pëpe nga na ambeni ngoi ala yeke sara faute, ala yeke sara ngangu ti sara ye na azo kue na ndoye na fango na ala nzoni tënë nga na mungo maboko na ala na ambeni lege nde tongana lege ayeke dä.

A-Témoin ti Jéhovah ayeke gi pëpe ti sara si azo ti dunia kue aga aTémoin. Me, tongana a fa tënë juska a lingbi na ti so bê ti Jéhovah aye awe, nda ni ayeke ga tongana ti so Jésus afa kozo awe. Tongana nda ni aga, nyen la ayeke si na sese nga na azo?

[Foto na lembeti 7]

A-Témoin ti Jéhovah ayeke fa nzoni tënë na ndo ti sese kue