Fa ye na amolenge ti mo

A si na mo awe ti bâ tere ti mo tongana mbeni wande?

WANDE ayeke zo so ambeni zo aye pëpe ti tene lo duti na popo ti ala. Peut-être ayeke ndali ti so poro ti tere ti lo, mara ti lo, fason ti sarango tënë ti lo wala sarango ye ti lo ayeke nde. A si na mo awe ti bâ tere ti mo tongana mbeni wande?— *

Zia e sara tënë na ndo ti mbeni koli so abâ tere ti lo lani tongana mbeni wande. Iri ti lo ayeke Méphiboseth. Lo yeke zo wa nga ngbanga ti nyen lo bâ tere ti lo tongaso? Tongana a si na mo awe ti bâ tere ti mo tongana mbeni wande, tapande ti Méphiboseth alingbi ti fa ye mingi na mo.

Méphiboseth ayeke lani molenge ti Jonathan so ayeke kota kamarade ti David. Kozoni si Jonathan akui na yâ ti bira, lo tene na David: ‘Sara nzoni na amolenge ti mbi.’ David aga gbia. Angu mingi na pekoni lo girisa tënë ti Jonathan so pëpe, nga Méphiboseth angbâ lani na fini. Na ngoi so lo de kete lo tï sioni sioni. Ye so asara si lo lingbi ti tambela mbeni pëpe. Mo hinga awe ye so asara si lo bâ tere ti lo tongana mbeni wande so?—

David aye ti sara nzoni na molenge ti Jonathan. Tongaso lo leke ti tene da ti Méphiboseth aduti nduru na ti lo na Jérusalem nga David aleke ti tene lo na Méphiboseth ate kobe lakue place oko. A mû Tsiba, amolenge ti lo nga na azo ti kua ti lo ti ga azo ti kua ti Méphiboseth. Biani, David ane molenge ti Jonathan! Mo hinga ye so asi na pekoni?—

David awara angangu kpale na yâ ti sewa ti  lo. Absalom so ayeke mbeni molenge ti David alondo na bira na tere ti David na lo ye ti mû mbata ti gbia. David akpe ti sö fini ti lo. Méphiboseth aye ti gue legeoko na David na ngoi so lo na gbâ ti azo ayeke kpe. Akamarade ti David so ahinga so David la ayeke na droit ti duti gbia ni. Me Méphiboseth alingbi pëpe ti gue ngbanga ti so gere ti lo abuba.

Na pekoni Tsiba atene na David so Méphiboseth aga pëpe ngbanga ti so lo ye ti ga gbia. David ayeda na tënë ti mvene so! Tongaso, lo mû asese ti Méphiboseth kue lo mû na Tsiba. Kete na pekoni David asö benda na ndo ti Absalom na yâ ti bira ni na lo kiri na Jérusalem. Fadeso David amä tënë ti yanga ti Méphiboseth na ndo ti tënë ni. David amû yanga ti tene Méphiboseth na Tsiba akangbi yâ ti asese ni. Ti mo, nyen la Méphiboseth asara lani?—

Lo tene pëpe so desizion so David amû ayeke na lege ni pëpe. Méphiboseth ahinga so gbia ni ayeke na bezoin ti duti na siriri ti tene lo sara kua ti lo nzoni. Tongaso Méphiboseth atene na Tsiba so lo lingbi ti mû asese ni kue senge. Ye so agbu bê ti Méphiboseth ayeke so David so ayeke wakua ti Jéhovah akiri na Jérusalem na lo komande.

Méphiboseth abâ pasi mingi. Fani mingi lo bâ tere ti lo tongana mbeni wande. Me Jéhovah aye lo na lo bâ lege ti lo nzoni. Ye so afa nyen na e?— Même tongana e sara ye na lege ni, ambeni zo alingbi ti tene mvene na ndo ti e. Jésus atene: “Tongana dunia so ake ala, ala hinga so lo ke mbi kozoni si lo ke ala.” Azo afâ même Jésus! A yeke nzoni e hinga na bê ti e kue so tongana e sara ye na lege ni, tâ Nzapa, Jéhovah, ayeke ye e na Molenge ti lo Jésus nga kue ayeke ye e.

Diko na Bible ti mo

1 Samuel 20:15-17, 41-43

2 Samuel 4:4; 9:1-10; 19:24-30

Jean 15:18

[Kete tënë na gbe ni]