Mo yeke sara ye ande alingbi na awango ti Jéhovah so ayeke polele?

“So ayeke lege ni, i tambela dä.”​—És. 30:21.

1, 2. Nyen la Satan ayeke gi lakue ti sara? Bible amû maboko na e tongana nyen?

NA NGOI so mo yeke na yâ ti tambela ti mo, mo bâ mbeni panneau so a zia ni ti fa lege na zo me yanga ni aturnê na mbage ti nzoni lege ni pëpe. Ye so alingbi ti sara si mo mû sioni lege. Mo ye ti bâ, mbeni kamarade ti mo atene na mo so mbeni sioni zo la aturnê ni ndali ti so lo ye ti tene azo agirisa. Kite ayeke pëpe so mo yeke mä wango ti kamarade ti mo ni so.

² Satan ayeke tongana sioni zo so na lo yeke sara kue ti handa e (Apoc. 12:9). Aye ti sioni kue so e sara tënë na ndo ni na yâ ti article so ahon ayeke aye so Satan ayeke sara kusala na ni ti pusu e ti ke yanga ti Jéhovah nga ti dö lege ti fini ti lakue lakue ti zia (Mat. 7:13, 14). Me e manda so kamarade ti e, Jéhovah Nzapa, agboto mê ti e na ndo ti amayele ti Satan. Fadeso e yeke sara tënë na ndo ti ambeni ye ota so Satan ayeke sara kusala na ni ti handa e nga tongana nyen Bible amû maboko na e ti kpe ni. Na ngoi so e diko Bible, a yeke mo bâ mo tene Jéhovah ayeke tambela na peko ti e na lo yeke tene na e: “So ayeke lege ni, i tambela dä.” (És. 30:21). Gbungo li na ndo ti awango ti Jéhovah so ayeke polele ayeke kpengba e ti sara ye lakue alingbi na ni.

Mû pëpe peko ti “awafango ye ti wataka”

3, 4. (a) Ngbanga ti nyen awafango ye ti wataka ayeke tongana adungu so yâ ni ahule? (b) Awafango ye ti wataka alondo mingi ni na ndo wa? Nyen la ala ye nyen?

³ Tara ti bâ so na yâ ti tambela ti mo ni, mo si na yando na nzara ti ngu ahon ndo ti mo. Yongoro kâ, mo bâ mbeni dungu. Mo pensé so ngu ayeke na yâ ni. Me na ngoi so mo si dä, mo bâ so yâ ni ahule. Bê ti mo ayeke son! Awafango ye ti wataka ayeke tongana adungu so yâ ni ahule. Azo kue so ague na mbage ti ala ti wara ngu ti tâ tënë ayeke wara vundu ngangu. Na lege ti bazengele Paul nga na Pierre, Jéhovah agboto mê ti e na ndo ti awafango ye ti wataka. (Diko Kusala 20:29, 30; 2 Pierre 2:1-3.) Awafango ye ni so ayeke azo wa? Tënë so Paul na Pierre atene afa na e ndo so awafango ye ti wataka so alondo dä nga tongana nyen la ala yeke handa azo.

⁴ Paul atene na a-ancien ti congrégation ti Éphèse lo tene: “Na popo ti ala wani, ambeni koli ayeke londo na ala yeke sara atënë so ala ba yâ ni kirikiri.” Na yâ ti mbeni mbeti so Pierre asû na gbâ ti acongrégation, lo tene: “Fade awafango ye ti wataka ayeke duti na popo ti ala nga.” Tongaso, awafango ye ti wataka alondo na yâ ti congrégation. Ala yeke a-apostat. * Ala ye nyen? Paul atene so na ngoi so ala dö bungbi ti Jéhovah azia, ala ye ti ‘gboto adisciple na peko ti ala.’ Adisciple so Paul asara tënë ti ala ayeke adisciple ti Jésus Christ. Awafango ye ti wataka so ague pëpe na gigi ti congrégation ti sara adisciple. Ala gi ti wara, wala ti nzi adisciple gi na yâ ti congrégation. Jésus atene so a-apostat ayeke tongana ambo ti ngonda so ayeke te angasangbaga. Ala ye ti futi mabe ti amembre ti congrégation nga ala ye ti tene amembre ti congrégation adö tâ tënë azia.​—Mat. 7:15; 2 Tim. 2:18.

5. Awafango ye ti wataka ayeke handa azo tongana nyen?

⁵ Awafango ye ti wataka ayeke handa azo tongana nyen? Ala yeke sara ni na lege ti mayele. Na “mayele”, a-apostat asara si abibe ti ala alï na yâ ti congrégation legeoko tongana ti so mbeni sioni  zo ayeke lï na aye na hondengo ni na yâ ti mbeni kodoro. Ala yeke sara kusala na “atënë so a ba yâ ni bango.” So ti tene ala yeke sara si atënë ti ala so ayeke atënë ti wataka akpa tâ tënë, legeoko tongana ti so azo ti sarango faux papier ayeke sara ti tene ambeti ti ala so ayeke na lege ni pëpe akpa tâ mbeti ni. Ala gi ti tene azo mingi amä na bê na “afango ye ti ala ni so ahanda zo”. Pierre atene nga so ala ye ti “ba yâ” ti tënë ti Nzapa. Ala fa nda ti aversê ti Bible na lege ni pëpe ti sara si azo amä na bê na atënë ti ala (2 Pi. 2:1, 3, 13; 3:16). A-apostat aye nzoni ti e pëpe. Tongana e mû peko ti ala, e yeke dö lege ti fini ti lakue lakue ti zia.

6. Wango wa so ayeke polele Bible amû na e na ndo ti awafango ye ti wataka?

⁶ E lingbi ti sara nyen si awafango ye ti wataka asara sioni na e pëpe? Bible afa tâ ye so a lingbi e sara. (Diko aRomain 16:17; 2 Jean 9-11.) Bible atene polele atene: “Ala si nduru na azo so pëpe.” Ye so aye ti tene ti duti yongoro na ala. Wango ti Bible so ayeke tongana gbotongo mê so mbeni docteur amû na mo ti duti yongoro na zo so ayeke na mbeni kobela so alingbi ti mû ambeni zo. Docteur ni ahinga so tongana mo wara kobela ni so, mo yeke kui. Gbotongo mê so lo mû ayeke polele, a lingbi mo mä lo. Bible atene so a-apostat ayeke azo so ‘kobela ti atënë ti dengo kite na ti dengo gaba na ndo ti atënë asara li ti ala.’ (1 Tim. 6:3, 4). Ala yeke sara kusala na afango ye ti ala ti pusu azo ti pensé tongana ala. Jéhovah ayeke tongana nzoni docteur so. Lo tene na e polele so a lingbi e duti yongoro na awafango ye ti wataka. A lingbi e sara kue ti sara ye lakue alingbi na wango ti lo.

7, 8. (a) Nyen la a lingbi e sara ti kpe awafango ye ti wataka? (b) Ngbanga ti nyen mo yeke sara kue ti kpe awafango ye ti wataka?

⁷ Nyen la a lingbi e sara ti kpe awafango ye ti wataka? A lingbi e sara tënë na ala pëpe nga e tisa ala na ndo ti e pëpe. A lingbi e bâ pëpe aye so ala fa na télé nga e diko ambeti ti ala pëpe. Ambeti so ala zia na ndo ti Internet, e diko ni pëpe nga e zia acommentaire na ndo ni pëpe. Ngbanga ti nyen? Kozoni kue, a yeke ngbanga ti so e ye “Nzapa ti tene-biani”. Ni la, e ye pëpe ti mä afango ye ti wataka so ague nde na tâ tënë so ayeke na yâ ti Bible (Ps. 31:6; Jean 17:17). E ye nga bungbi so Jéhovah ayeke sara kusala na ni ti fa na e apendere tâ tënë. Bungbi ti Jéhovah la afa na e tâ tënë na ndo ti iri ti Jéhovah, nda ti iri ni, ye so lo leke ti sara teti sese, ye so ayeke si na e na ngoi so e kui, nga beku ti zingongo ti akuâ. Mo dabe ti mo tongana nyen tere ti mo anzere na ngoi so mo manda lani fini fini atâ tënë so nga na ambeni? Tongaso, zia pëpe si atënë ti mvene so alondo na awafango ye ti wataka apusu mo ti ke bungbi so afa na mo atâ tënë so.​—Jean 6:66-69.

⁸ Atâa awafango ye ti wataka atene nyen, e yeke mû peko ti ala pëpe! E yeke na mbeni raison oko pëpe ti mä azo so ayeke tongana adungu so yâ ni ahule. Azo so amä ala ayeke wara vundu. E yeke sara kue ti ngbâ be-ta-zo na Jéhovah nga na bungbi ti lo. Bungbi so azia lâ oko vundu na bê ti e pëpe. Lo mû na e lakue gbâ ti ngu ti tâ tënë so sioni oko ayeke dä pëpe so ayeke na yâ ti Bible.​—És. 55:1-3; Mat. 24:45-47.

Mû pëpe peko ti “ambaï ti mvene”

9, 10. Wango wa Paul amû na Timothée na ndo ti “ambaï ti mvene”? “Ambaï ti mvene” wa Paul ayeke pensé lani na ni? (Bâ nga kete tënë na gbe ni.)

⁹ Na ambeni ngoi zo alingbi ti bâ hio so panneau  so a zia ti fa lege na zo, yanga ni aturnê na nzoni lege ni pëpe. Me na ambeni ngoi, a lingbi ti duti ngangu ti hinga ni. Amvene so alondo na Satan ayeke nga tongaso. Tongana lê ti e akpengba pëpe, e lingbi ti mä na bê na ambeni mvene ti lo. Bazengele Paul awa e na ndo ti amvene ni so. Lo iri amvene ni so “ambaï ti mvene”. (Diko 1 Timothée 1:3, 4.) Ambaï ti mvene ni ayeke nyen? Tongana nyen la e lingbi ti kpe ti mä ni? A lingbi e wara kiringo tënë na ahundango tënë so tongaso si e ngbâ na ndo ti lege so ague na fini ti lakue lakue.

¹⁰ Gbotongo mê so Paul amû na ndo ti ambaï ti mvene ayeke na yâ ti kozo lettre ti lo na Timothée so ayeke lani mbeni ancien. Paul atene na lo ti bata congrégation si ye ti sioni alï dä pëpe nga ti mû maboko na aita ti ngbâ be-ta-zo na Jéhovah (1 Tim. 1:18, 19). Mbupa ti Grec so Paul asara kusala na ni aye ti sara tënë ti atënë ti pande, atënë ti tere, wala ti mvene. Mbeni buku (The International Standard Bible Encyclopaedia) atene so mbupa ti grec so aye ti sara tënë ti “mbeni mbaï na ndo ti tënë ti Nzapa so ayeke tâ tënë pëpe.” Peut-être Paul ayeke pensé lani na amvene so alondo na angbene mbaï so azo asigigi na ni nga so apusu ambeni zo ti gi ti hinga ye na ndo ni. * Paul atene so ambaï so ayeke sioni ndali ti so ala yeke ‘dü gi ahundango ndo so amû ngoi ti zo mingi’. Ye so aye ti tene so azo so adengi mê na ambaï so ayeke to nda ti hunda tënë na ndo ti aye so ayeke atâ ye pëpe na ala yeke mû ngoi ti ala ti gi akiringo tënë ni. Satan ayeke sara kusala na ambaï ti mvene so nga na amvene so alondo na abungbi ti vorongo nzapa ti sara si azo agirisa na ndo ti aye so ayeke akota ye. Wango ti Paul ayeke polele: Dengi mê pëpe na ambaï ti mvene!

11. Tongana nyen Satan ayeke sara kusala na bungbi ti vorongo nzapa ti wataka ti handa na azo? Wango wa a lingbi e sara ye alingbi na ni?

¹¹ Ambeni mbaï ti mvene wa so tongana e sara hange pëpe alingbi ti handa e? E lingbi ti tene so mbaï ti mvene ayeke afango ye ti abungbi ti vorongo nzapa so ayeke pusu e ti ‘kanga mê ti e na tâ tënë’. (2 Tim. 4:3, 4). Satan ayeke na mayele mingi. Lo yeke sara kusala na bungbi ti vorongo nzapa ti wataka ti handa azo. A yeke ndali ni la Bible atene so lo wani lo yeke changé tere ti lo ti ga “mbeni ange ti lumière.” (2 aCor. 11:14). Na tapande, abungbi ti vorongo nzapa so atene ala yeke mû peko ti Christ ayeke fa atënë ti mvene tongana tënë ti Nzapa Babâ, Nzapa Molenge, na Nzapa Yingo vulu nga tënë ti enfer ti wâ. Ala fa nga so âme ayeke kui pëpe. Azo mingi apensé so Matanga ti Noël na ti Pâques anzere na Nzapa, me aye so azo ayeke sara na ngoi ti amatanga so alondo biani na vorongo ti wataka. Ambaï ti mvene ayeke handa e pëpe tongana e sara ye alingbi na wango ti Nzapa so ahunda na e ti duti nde na bungbi ti vorongo nzapa ti wataka nga ti “zia ti ndu sioni ye”.​—2 aCor. 6:14-17.

12, 13. (a) Amvene ota wa Satan asigigi na ni? Tâ tënë ni ayeke so wa? (b) E lingbi ti sara nyen si e tï pëpe na yâ ti ambaï ti mvene ti Satan?

¹² Ambeni mvene ti Satan ayeke nga dä so tongana e sara hange pëpe e yeke tï na yâ ni. Zia e sara tënë na ndo ti ambeni ota. Kozo mvene ni: Mo lingbi ti sara ye kue so mo ye; a yeke na mo ti mû desizion na ndo ti ye so ayeke nzoni na ye so ayeke sioni. Mingi ni e yeke mä atënë so na télé, na yâ ti afilm, wala e diko ni na yâ ti ambeti-sango wala na ndo ti Internet. Teti so e yeke mä ni lakue, a yeke ngangu pëpe ti to nda ti pensé tongaso nga ti mû peko ti asioni bibe ti dunia so. Me tâ tënë ni ayeke so a lingbi Nzapa la afa na e ye so ayeke nzoni na ye so ayeke sioni (Jér. 10:23). Use mvene ni: Nzapa ayeke changé ande ye oko na ndo ti sese pëpe. Bibe so apusu azo ti pensé gi na ndo ti fini ti ala ti laso. Ala pensé pëpe na gigi ti kekereke nga ala gi pëpe ti nzere na Nzapa. E lingbi ti to nda ti pensé tongana ala. Ye so ayeke sara si e “duti gi senge senge” nga e “lë lengo” pëpe na yâ ti kusala ti Nzapa (2 Pi. 1:8). Tâ tënë ni ayeke so lâ ti Jéhovah ayeke ga na loro na a lingbi e ngbâ ti ku ni (Mat. 24:44). Ota mvene ni: Nzapa ayeke bi bê ti lo na mo pëpe. Satan aye ti tene e mä na bê so e kpa pëpe ti tene Nzapa andoye e. Tongana e mä na bê na mvene ti Satan so, e lingbi ti zia ti sara na Jéhovah. Tâ tënë ni ayeke so Jéhovah aye awakua ti lo oko oko kue, nga lo bâ ala oko oko kue na nene ni mingi.​—Mat. 10:29-31.

 ¹³ A lingbi e sara hange lakue si e pensé pëpe tongana azo ti dunia ti Satan. Na ambeni ngoi atënë ti ala nga na apensé ti ala akpa ye so ayeke tâ ye. Me girisa pëpe so Satan aye ti handa e, nga mbeni zo ti handango azo ti lingbi na lo ayeke dä pëpe. A lingbi e sara ye alingbi na awango ti Bible tongana e ye pëpe ti tene Satan ahanda e na lege ti ambaï ti mvene.​—2 Pi. 1:16.

“Mû peko ti Satan” pëpe

14. Wango wa Paul amû na ambeni womua so ade maseka? Ngbanga ti nyen a lingbi e kue e sara ye alingbi na wango so?

¹⁴ Tara ti bâ so a sû na ndo ti mbeni panneau atene: “Lege so ague na peko ti Satan.” Zo wa la ayeke yeda ti mû mara ti lege tongaso? Me Paul agboto mê ti e na ndo ti ambeni ye so na lege ni atâ Chrétien alingbi ti “mû peko ti Satan.” (Diko 1 Timothée 5:11-15.) Paul atene tënë so na ambeni ‘womua so ade maseka,’ me tënë so abâ e kue. Peut-être awali ti ngoi ti akozo Chrétien so apensé pëpe so ala yeke mû peko ti Satan. Me asarango ye ti ala afa so ala mû peko ti lo. E lingbi ti sara nyen si e mû pëpe peko ti Satan sân ti tene e hinga? Zia e gbu li na ndo ti wango so Paul amû na ndo ti asioni kpere-kpere.

15. Nyen la Satan aye nyen? Tongana ti so Paul afa, aye wa Satan ayeke sara na kusala ti pusu e ti sara ye so lo ye?

¹⁵ Satan aye si e sara tënë ti mabe ti e pëpe. Lo ye si e zia ti fa nzoni tënë (Apoc. 12:17). Ti kanga lege na e, lo yeke gi ti pusu e ti tomba peko ti aye so ayeke buba ngoi ti e wala ti sara si kangbi a tï na popo ti e. Paul afa ambeni ye so Satan ayeke sara kusala na ni ti pusu e ti sara ye so lo ye. Paul atene so awomua ti ngoi ti lo ayeke “duti senge senge, ti tambela”. Ala mû ngoi ti ala mingi ti gue ti bâ akamarade ti ala na ti sara lisoro na ndo ti aye so ayeke kota ye pëpe. A lingbi e sara hange si e sara mara ti ye tongaso pëpe. Na tapande, e lingbi ti mû gbâ ti ngoi ti e nga na ti ambeni zo ti diko amessage na ndo ti téléphone wala Internet nga ti tokua ni; ti iri ala wala ti wara tere na ala ti sara lisoro na ndo ti aye so ayeke kota ye pëpe nga so mingi ni a yeke nga tâ tënë pëpe. Paul atene so awomua so ayeke “diko kpere-kpere”. Ngoi na ngoi, azo ti dikongo kpere-kpere ayeke tene asioni tënë na ndo ti ambeni zo. A yeke sioni ngbanga ti so a lingbi ti ga pango ndo, so ayeke tenengo mvene na ndo ti zo nga mingi ni a yeke ga na tiri (aProv. 26:20). Azo so ayeke tene mvene na ndo ti ambeni zo ayeke tongana Satan Zabolo même tongana ala hinga ni pëpe. * Na pekoni Paul atene so awomua ni ayeke “yôro yanga ti ala na yâ ti atënë ti ambeni zo”. E yeke pëpe na droit ti fa na azo lege so a lingbi ala sara aye so abâ gi ala wani. Asioni ye so kue alingbi ti sara si e zia ti pensé na ndo ti kusala ti fango tënë ti Royaume so Nzapa amû na e. Tongana e zia lege ti fango tënë, e yeke to nda ti mû peko ti Satan. Na tongana e mû peko ti Satan andâ e ke Jéhovah awe. A lingbi e soro zo so e ye ti mû peko ti lo.​—Mat. 12:30.

16. Wango wa sarango ye alingbi na ni ayeke mû maboko na e ti kpe ti “mû peko ti Satan”?

¹⁶ Sarango ye alingbi na wango ti Bible ayeke mû maboko na e ti kpe ti “mû peko ti Satan.” Bâ ambeni wango ti ndara so Paul amû. Lo tene e duti “na ye mingi ti sara na yâ ti kusala ti Seigneur”. (1 aCor. 15:58). Dutingo na aye mingi ti sara na yâ ti kusala ti Royaume ayeke sara si e yeke buba ngoi ti e pëpe ndali ti asenge senge ye nga na aye so alingbi ti ga na e kpale (Mat. 6:33). Lo tene e tene atënë so ayeke “nzoni ti kpengba zo”. (aÉph. 4:29). Sara kue ti mä asioni kpere-kpere pëpe nga kangbi ni pëpe. * E gi ti zia bê ti e na aita ti e na e ne ala. Na sarango tongaso e yeke duti nduru ti tene atënë so akpengba ala ahon ti zia vundu na bê ti ala. Paul atene: ‘Sara kue ti sara gi ye so abâ gi mo.’ (1 aThes. 4:11). Bi bê ti mo na amba ti mo, me sara  ni na mbeni lege so afa so mo yeke yôro tere ti mo pëpe na yâ ti aye so abâ gi ala nga na mbeni lege so abuba nengo ti ala pëpe. Girisa nga pëpe so, a lingbi e pusu amba ti e pëpe ti duti na oko bango ndo so e yeke na ni na ndo ti aye so a lingbi ala wani amû desizion dä.​—aGal. 6:5.

17. (a) Ngbanga ti nyen Jéhovah amû wango na e na ndo ti aye so a lingbi e mû pekoni pëpe? (b) A lingbi e leke na bê ti e ti sara nyen?

¹⁷ Singila mingi na Jéhovah so afa na e polele aye so a lingbi e mû pekoni pëpe! Zia e girisa pëpe so a yeke ndoye la apusu Jéhovah ti mû na e awango so e sara tënë na ndo ni na yâ ti article so nga na ti so ahon so. Lo ye pëpe si Satan ahanda e nga si e bâ pasi. Lege so Jéhovah aye si e mû ni ayeke ngangu, me a yeke gi oko lege so ayeke gue na zo na fini ti lakue lakue la (Mat. 7:14). Zia e sara kue ti sara ye lakue alingbi na awango ti Jéhovah na ngoi so lo tene na e: “So ayeke lege ni, i tambela dä.”​—És. 30:21.

[Akete tënë na gbe ni]

Mo yeke kiri tënë tongana nyen?

Tongana nyen la mo lingbi ti sara ye ague oko na awango so ayeke na yâ ti aversê so?

• 2 Pierre 2:1-3

• 1 Timothée 1:3, 4

• 1 Timothée 5:11-15

[Ahundango tënë ti manda na ye]

[Encadré/Foto na lembeti 19]

Tukungo akuä ti tere ti ndeke na yâ ti pupu

Mbeni ngbene mbaï ti aJuif afa kpale so ayeke ga na lege ti kangbingo asioni kpere-kpere.

Mbeni koli atene mvene na gbâ ti azo na ndo ti mbeni koli so ayeke na ndara mingi na yâ ti kete gbata ti lo. Na pekoni, zo ti mvene ni so abâ so atënë so lo tene ayeke na lege ni pëpe. Tongaso, lo gue lo bâ koli ni so ayeke na ndara mingi so ti hunda pardon. Lo tene ni yeke sara ye kue so a lingbi ni sara ti tene lo pardone ni. Zo ti ndara ni ahunda na lo mbeni ye oko: Lo tene na lo ti gue ti mû mbeni coussin so na yâ ni gbâ ti kuä ti tere ti ndeke ayeke dä na ti suru yâ ni ti tene pupu ahon na akuä ti tere ti ndeke ni. Zo ti tenengo mvene ni agi li ti lo gbä na ye so koli ni ahunda na lo ti sara so. Me lo gue lo sara ni na pekoni lo kiri lo ga lo bâ zo ti ndara ni.

Lo tene: “Awe mo pardone mbi awe?”

Zo ti ndara ni atene: “Gue mo ro akuä ti tere ti ndeke ni kue awe si.”

Lo tene: “Mbi yeke sara tongana nyen ti ro ni? Pupu ahon na ni kirikiri awe.”

Zo ti ndara ni atene: “Legeoko tongana ti so mo lingbi pëpe ti ro akuä ti tere ti ndeke so, mo lingbi pëpe ti sara si azo agirisa atënë so mo tene so.”

Tënë ni ayeke polele. Tënë so asigigi na yanga ti zo alingbi ti kiri pëpe nga a lingbi ti duti ngangu ti zi aye ti sioni so aga na peko ti tënë so e tene. Kozoni si e tene mbeni sioni tënë na ndo ti mbeni zo, a lingbi e dabe ti e so atënë so e tene ayeke tongana akuä ti tere ti ndeke so pupu ahon na ni.

[Foto na lembeti 16]

Na lege wa ambeni zo alingbi ti tisa a-apostat na ndo ti ala?