Nzoni tënë ndali ti awayere

MBETI TI NZAPA adë bê ti e atene: “Azo so ye amanke ala mingi, fade A girisa ala lakue pëpe.” (Psaume 9:19). Bible atene nga na ndo ti Wasarango e atene: “Mo lungula maboko ti Mo, na Mo mû ye alingbi na nzara ti ye kue so ayeke na fini.” (Psaume 145:16). Tënë so Bible atene so ayeke pëpe mbeni tënë ti bango li. Nzapa ti Ngangu Ahon Kue alingbi ti sara ye so a lingbi a sara ti hunzi yere. Awayere ayeke na bezoin ti nyen?

Mbeni zo ti Afrika so ahinga ye mingi na ndo ti tënë ti konomi atene so akodoro so ayeke na yâ ti yere ayeke biani na bezoin ti mbeni “ngangu gbia so ayeke komande na nzoni bê.” Tënë so afa so ti hunzi yere, a yeke na bezoin ti mbeni zo so ayeke na ngangu ti sara ambeni ye ti hunzi yere nga so na nzoni bê lo ye ti sara ni. E lingbi nga ti tene so a lingbi gbia so aye ti hunzi yere na yâ ti dunia kue aduti mbeni gbia so akomande dunia kue ndali ti so mingi ni ye so ayeke na gunda ti kota yere ayeke so ambeni kodoro ayeke na aye mingi na ambeni ayeke na ni pëpe. Na ndo ni, gbia so alingbi ti hunzi yere, a yeke nzoni lo duti mbeni zo so ayeke na ngangu ti zi ye so ayeke na gunda ti yere: kion so ayeke na yâ ti bê ti e. A yeke wara mara ti nzoni gbia tongaso na ndo wa?

Nzapa atokua Jésus ti fa nzoni tënë na awayere. Na ngoi so Jésus alondo ti diko tokua so Nzapa amû na lo, lo tene: “Yingo ti Jéhovah ayeke na ndo ti mbi, ngbanga ti so lo soro mbi ti fa nzoni tënë na awayere.”​—Luc 4:16-18.

Nzoni tënë wa?

Nzapa amû Jésus ti duti Gbia. Tënë so ayeke biani nzoni tënë. Lo la lo yeke Gbia so alingbi biani ti hunzi yere ndali ti so (1) lo yeke komande na ndo ti azo kue nga lo yeke na ngangu ti sara ye; (2) lo sara ye na awayere na bango mawa ti ala nga lo fa na adisciple ti lo ti bâ lege ti ala; nga (3) lo lingbi ti zi ye so ayeke na gunda ti yere, so ti tene bibe ti kion so a dü e dungo na ni. Zia e bâ ambage ota ti nzoni tënë so.

1. Jésus ayeke komande na ndo ti amara kue. Bible asara tënë ti Jésus atene: “A mû na lo ngangu ti komande . . . si azo kue, amara kue, na azo ti yanga nde nde kue, asara na Lo.” (Daniel 7:14). Tara ti bâ aye ti nzoni so ayeke ga tongana ngorogbia oko la akomande na ndo ti azo kue. Bira ayeke duti dä mbeni pëpe nga azo ayeke tiri mbeni pëpe ndali ti amosoro ti sese. Azo kue ayeke bâ nzoni legeoko. Jésus adë bê ti e so lo yeke duti ande Gbia ti dunia nga lo yeke na ngangu ti sara ye. Lo tene: “A mû na mbi komandema kue na yayu nga na sese.”​—Matthieu 28:18.

2. Jésus abâ mawa ti awayere. Na ngoi ti kusala ti Jésus na sese ge, lo sara ye na awayere na bango mawa ti ala. Na tapande, mbeni wali so abuba lani nginza ti lo kue ndali ti yorö andu bongo ti Jésus ti tene lo wara sava. Lo yeke na kobela so asara si mênë ayeke ga na tere ti lo mingi asara ngu 12 na kite ayeke pëpe so lo yeke na mênë mingi pëpe. Na lege ti Ndia, zo kue so wali so andu lo ayeke ga sioni. Me Jésus asara ye na lo na nzoni bê. Lo tene na lo: “Molenge ti mbi, mabe ti mo asava mo awe. Mo gue na siriri, na zia mo duti na nzoni seni na peko ti ngangu kobela ti mo so.”​—Marc 5:25-34.

Afango ye ti Jésus ayeke na ngangu ti sara si azo achangé bango ndo ti ala tongaso si ala nga kue asara ye na ambeni zo na bango mawa ti ala. Na tapande, bâ kiringo tënë ti Jésus na mbeni koli so aye ti hinga tongana nyen ti nzere na lê ti Nzapa. Koli ni ahinga so Nzapa aye ti tene e ye amba ti e, me lo hunda Jésus lo tene: “Zo wa si ayeke biani mba ti mbi ni?”

Ti kiri tënë na lo, Jésus amû mbeni pendere toli na ndo ti mbeni koli so alondo na Jérusalem ti gue na Jéricho na so azo ti gbungo ye ti azo na ngangu amû aye ti lo kue, ala pika lo sioni na  tongana ala zia lo ala hon, lo yeke “nduru na kuâ.” Mbeni prêtre so ayeke hon abâ lo, prêtre ni ahon na mbage ti lege ni. Mbeni zo ti Lévi asara nga tongaso. “Me, mbeni zo ti Samarie so ayeke hon na lege ni asi na ndo ti lo, na tongana lo bâ koli so, mawa asara lo.” Lo sukula lê ti kä ti koli ni, lo mû lo lo gue na lo na mbeni ndo so agene ayeke futa ti lango dä, lo mû nginza na zo ti batango da ni ti bâ lege ti koli ni. Jésus ahunda lo: “Zo wa la asara ye tongana mba ti zo so atï na maboko ti azo ti gbungo aye ti azo na ngangu?” Koli ni akiri tënë atene: “Lo so asara nzoni bê na koli so.” Na Jésus atene na lo: “Gue na mo kue mo sara tongaso.”​—Luc 10:25-37.

Azo so aga aTémoin ti Jéhovah amanda afango ye ti Jésus na ala changé bango ndo ti ala na ndo ti tënë ti mungo maboko na azo so a lingbi a mû maboko na ala. Na tapande, na yâ ti buku (Women in Soviet Prisons) ti mbeni wali ti kodoro ti Lettonie, lo sara tënë na ndo ti kobela ti lo na ngoi so lo yeke sara kua na yâ ti da ti kanga ti Potma na popo ti ngu 1960-1970. Lo tene: “Na ngoi ti kobela ti mbi ni kue, [aTémoin ti Jéhovah] ayeke azo so ayeke bâ lege ti azo ti kobela nzoni mingi. Ala la abâ lege ti mbi nzoni.” Lo kiri lo tene: “A-Témoin ti Jéhovah abâ so a yeke ti ala ti mû maboko na azo atâa bungbi ti vorongo Nzapa ti zo ni ayeke so wa wala kodoro ti lo ayeke so wa.”

Na ngoi so kpale ti konomi asara si ambeni Témoin ti Jéhovah ti Ancón, Équateur, ayeke na kua pëpe wala a futa ala nze na nze pëpe, amba ti ala aTémoin ti Jéhovah agi mbeni lege ti wara nginza ndali ti ala. Ala tö kobe ti kä na azo ti gingo asusu so ayeke kiri na yanga ti ndapre na pekoni so ala gi susu na bï (bâ foto so ayeke na mbage ti koli). Azo kue na yâ ti congrégation amû mbage na yâ ti kusala ni so, même amolenge. Ala to nda ti kua ni na ngbonga oko ti ndapre tongaso si ti si na ngbonga osio ti ndapre na ngoi so abateau ni ayeke kiri, ala hunzi ti tö kobe ni awe. Nginza so ala wara, ala kangbi yâ ni alingbi na bezoin ti zo oko oko.

Mara ti aye tongaso afa so tapande ti Jésus nga na afango ye ti lo ayeke biani na ngangu ti changé bango ndo ti azo na mbage ti azo so a lingbi a mû maboko na ala.

3. Jésus ayeke na ngangu ti zi siokpari. Ye so ayeke pusu mingi ni azo ti sara ye na lege ti kion ayeke ye so e kue e hinga ni. Bible airi ni “siokpari.” Même bazengele Paul atene: “Tongaso mbi bâ ndia so na ndo ti mbi: Tongana mbi ye ti sara ye so ayeke mbilimbili, ye so ayeke sioni si ayeke na yâ ti mbi.” Lo kiri lo tene: “Zo wa si ayeke sö mbi ande na yâ ti tere so ayeke gue na mbi ti wara kuâ so? Singila na Nzapa na lege ti Jésus Christ.” (aRomain 7:21-25). Ge Paul ayeke sara tënë ti lege so Nzapa, na lege ti Jésus, ayeke zi atâ wakua ti Nzapa na yâ ti aye so siokpari ayeke pusu zo ti sara, so mbeni oko ayeke kion, so ayeke na gunda ti yere. Lo yeke sara ni tongana nyen?

Na mbeni ngoi na peko ti batême ti Jésus, Jean Wabatizengo zo afa Jésus lo tene: “Ala bâ, so Molenge ti ngasangbaga ti Nzapa la, lo so azi siokpari ti dunia so!” (Jean 1:29). Na yâ ti kete ngoi sese ayeke si singo na azo so a zi siokpari na tere ti ala awe, ye so andu nga bibe ti kion (Ésaïe 11:9). Jésus ayeke zi ande ye so ayeke na gunda ti yere

Tara ti bâ ngia so ayeke duti dä tongana azo kue awara ye so ala yeke na bezoin ni! Bible atene: “Fade azo oko oko kue aduti na gbe ti vigne ti ala mveni, na gbe ti keke ti figue ti ala mveni; zo oko ti mû mbeto na ala ayeke pëpe.” (Michée 4:4). Atënë so asara tënë ti ngoi so azo kue ayeke wara nzoni kua, ala yeke duti nzoni, nga ala yeke na pasa kue ti duti na yâ ti mbeni dunia so yere ayeke dä pëpe. Ye so ayeke mû ande gonda na Jéhovah.