Nzoni wango na ndo ti dutingo kumbamba nga na mariage

“Mbi yeke sara tënë so . . . ti gue na ala na mbage ti ye so ayeke na lege ni na ye so a bâ ni tongana sarango kusala lakue na Seigneur, na ziango si mbeni ye agboto lê ti ala pëpe.”​—1 ACOR. 7:35.

1, 2. Ngbanga ti nyen a yeke nzoni zo agi wango na yâ ti Bible na ndo ti dutingo kumbamba wala mariage?

 MINGI ni songo na popo ti akoli na awali ayeke ga na ngia, vundu wala agingo bê. Ndali ti so aye tongaso ayeke si na e, e yeke na bezoin ti tene Nzapa afa lege na e, me mbeni raison ni nde ayeke dä. Mbeni Chrétien so ayeke na ngia ti duti kumbamba alingbi ti bâ so afami ti lo wala akamarade ti lo ayeke pusu lo ti sara mariage. Mbeni Chrétien nde aye peut-être ti sara mariage, me lo wara pëpe mbeni zo  so lo lingbi ti sara mariage na lo. Ambeni ayeke na bezoin ti tene a fa na ala tongana nyen ti leke tere ti ala ti sara ye so a ku na mbage ti mbeni koli wala wali so asara mariage awe. Nga, a lingbi aChrétien so ayeke kumbamba nga na ala so asara mariage awe abata tere ti ala si ala tï pëpe na yâ ti lango-sioni.

² Aye so alingbi ti sara ye na ndo ti ngia ti bê ti e nga nzoni iri so e yeke na ni na gbele Jéhovah. Na yâ ti chapitre 7 ti kozo mbeti ti Paul na aCorinthien, lo mû wango na ndo ti dutingo kumbamba nga na mariage. Ye so lo ye ayeke ti pusu azo so ayeke diko mbeti ti lo “na mbage ti ye so ayeke na lege ni na ye so a bâ ni tongana sarango kusala lakue na Seigneur, na ziango si mbeni ye agboto lê ti ala pëpe.” (1 aCor. 7:35). Na ngoi so mo yeke gbu li ti mo na ndo ti wango so lo mû na ndo ti akpengba tënë so, gi ti bâ dutingo ti mo tongana mbeni lege so azi na mo ti sara kusala ti Jéhovah nzoni, atâa mo yeke kumbamba wala mo sara mariage awe.

Kpengba desizion so zo oko oko ayeke mû

3, 4. (a) Nyen la alingbi ti si tongana akamarade nga na afami agi ti pusu mbeni zo ti sara mariage? (b) Tongana nyen wango ti Paul alingbi ti mû maboko na e ti duti na nzoni bango ndo na ndo ti mariage?

³ Legeoko na aJuif ti ngoi ti akozo Chrétien, na yâ ti akodoro mingi, azo abâ so a yeke kota ye mingi ti sara mariage. Tongana ngu ti mbeni maseka-koli wala maseka-wali ahon mingi na lo sara mariage pëpe, akamarade nga na afami so ayeke gi bê ti ala ahon ndo ni alingbi ti bâ so a lingbi ala mû wango na lo. Na yâ ti lisoro, ala lingbi ti wa lo ti sara ngangu ti wara mbeni wali wala koli ti sara mariage na lo. Ala lingbi même ti fa na lo mbeni wali wala koli so ala pensé atene lo lingbi ti sara mariage na lo. Ambeni aleke ti tene akumbamba use awara tere ndali ti so ala pensé so ala lingbi ti sara mariage. Ngoi na ngoi asarango ye so alingbi ti zia kamene na lê ti zo, ti buba yâ ti songo ti azo wala ti son bê ti zo.

⁴ Paul agbu azo na ngangu lâ oko pëpe ti sara mariage wala ti ngbâ kumbamba (1 aCor. 7:7). Lo yeke lani na ngia ti sara na Jéhovah sân wali, me lo ne droit ti azo so asara mariage awe. Laso, aChrétien nga kue ayeke na droit ti soro ala wani ti sara mariage wala ti ngbâ kumbamba. A lingbi ambeni zo agbu ala na ngangu pëpe ti sara mariage wala ti ngbâ kumbamba.

Sara kusala nzoni na ngoi ti kumbamba ti mo

5, 6. Ngbanga ti nyen Paul awa aChrétien ti ngbâ kumbamba?

⁵ Mbeni nzoni ye so ayeke na yâ ti atënë so Paul atene na azo ti Corinthe ayeke nzoni bango ndo so lo yeke na ni na ndo ti dutingo kumbamba. (Diko 1 aCorinthien 7:8.) Akota zo ti Eglize so ayeke kumbamba abâ tere ti ala tongana azo so ayeke nzoni ahon ala so asara mariage, me atâa so Paul asara mariage pëpe lo sara ti lo tongaso pëpe. Lo fa pasa so awafango nzoni tënë mingi so asara mariage pëpe ayeke na ni. Pasa ni so ayeke so wa?

⁶ Mingi ni, mbeni Chrétien so ayeke kumbamba ayeke nduru ti yeda ti sara kusala na yâ ti bungbi ti Jéhovah, kusala so zo so asara mariage awe alingbi pëpe ti sara. Paul awara lani pasa ti sara kusala tongana “bazengele ti amara nde”. (aRom. 11:13). Diko mbeti ti Kusala chapitre 13 ti si na chapitre 20 na bâ tongana nyen Paul na amba ti lo amissionnaire afa tënë na yâ ti afini territoire na ala zia na sese afini congrégation na ando nde nde. Paul awara lani akpale mingi na yâ ti kusala ti lo. Akpale so asi laso na azo mingi pëpe (2 aCor. 11:23-27, 32, 33). Me ngia so lo wara na ngoi so lo yeke sara si azo aga adisciple amû maboko na lo ti gbu ngangu na yâ ti akpale ni so (1 aThes. 1:2-7, 9; 2:19). Paul alingbi fade lani ti sara aye so kue tongana lo sara mariage wala lo yeke na sewa? A yeke ngangu kete.

7. Fa mbeni tapande ti aTémoin so asara mariage pëpe na so amû ngoi ti ala ti fa tënë ti Royaume.

⁷ A-Chrétien mingi so asara mariage pëpe amû ngoi ti ala ti sara kusala ti Royaume mingi. Limbania nga na Sara so ayeke akumbamba  nga so ayeke sara kua ti pionnier na kodoro ti Bolivie ague lani na yâ ti mbeni kete kodoro so a sara ngu mingi a fa tënë dä pëpe. So wâ ti dada ayeke na ndo ni so pëpe, a yeke mbeni kpale? Aita-wali ni atene: “Radio wala télé ayeke na ndo ni so pëpe. Teti so mbeni ye ti ngia ti gboto lê ti azo ni ayeke dä pëpe, ala mû ngoi ti ala mingi ti diko ambeti.” Ambeni zo ti kete kodoro ni so afa na aita pionnier so angbene mbeti ti aTémoin ti Jéhovah so ala ngbâ ti diko ni. A yeke ambeti so a yeke sigigi na ni mbeni pëpe. Teti so na yâ ti mingi ti ada so aita-wali so afa tënë dä azo asara nzara ti tënë ni, a yeke ngangu na ala ti kiri ti bâ azo ti ada kue so ayeke na yâ ti territoire ni. Mbeni mbakoro-wali atene na ala atene: “Âmanke nda ni aga nduru awe, teti so aTémoin ti Jéhovah aga juska na e ge.” Kete na pekoni ambeni zo ti ndo ni so ague na abungbi.

8, 9. (a) Paul ayeke pensé lani na nyen na ngoi so lo yeke sara nzoni tënë ti dutingo kumbamba? (b) Pasa wa aChrétien so asara mariage pëpe ayeke na ni?

⁸ Tâ tënë, aChrétien so asara mariage awe nga kue ayeke wara aye ti nzoni na ngoi so ala yeke fa nzoni tënë na yâ ti aterritoire so fango tënë dä ayeke ngangu. Me ambeni kua so apionnier so ayeke kumbamba awara lege ti sara ni, azo so asara mariage awe nga na ala so ayeke na amolenge alingbi ti sara ni pëpe. Na ngoi so Paul asû mbeti na acongrégation, lo hinga so akua angbâ mingi ti sara ti fa nzoni tënë. Lo ye ti tene azo kue aduti na ngia tongana lo. A yeke ndali ni la Paul asara nzoni tënë ti dutingo kumbamba ti sara na Jéhovah.

⁹ Mbeni ita-wali so ayeke pionnier nga so ayeke kumbamba na kodoro ti Amerika atene: “Ambeni zo apensé so azo so asara mariage pëpe alingbi pëpe ti duti na ngia. Me mbi bâ so dutingo na nzoni songo na Jéhovah la ayeke sara si zo aduti na tâ ngia. Atâa so dutingo kumbamba ayeke mbeni sacrifice, a yeke duti mbeni pendere matabisi tongana mo sara kusala na ni nzoni.” Na ndo ti tënë ti warango ngia, lo tene: “Dutingo kumbamba ayeke mbeni lege so azi na mo ti wara ngia, me pëpe mbeni ye so akanga lege na mo ti wara ni. Mbi hinga so Jéhovah aye azo kue, akumbamba nga na azo so asara mariage awe.” Na ndembe so, ita-wali so ayeke na ngia ti sara na Jéhovah na mbeni ndo so a yeke na bezoin ti awafango tënë dä mingi. Tongana mo yeke kumbamba, mo lingbi ti mû liberté so mo yeke na ni ti fa tâ tënë na azo mingi ahon ti kozo? Mo nga kue mo lingbi ti bâ so dutingo kumbamba ayeke mbeni matabisi so alondo na Jéhovah.

 Akumbamba so aye ti sara mariage

10, 11. Tongana nyen la Jéhovah ayeke mû maboko na azo so aye ti sara mariage me so ade awara zo ti sara mariage na lo pëpe?

¹⁰ Ambeni wakua ti Jéhovah so angbâ kumbamba teti mbeni ngoi alingbi ti soro na pekoni ti sara mariage. Teti so ala hinga so ala yeke na bezoin ti tene a fa lege na ala, ala yeke hunda na Jéhovah ti mû maboko na ala ti wara mbeni zo so ala lingbi ti sara mariage na lo na ti duti na ngia.​—Diko 1 aCorinthien 7:36.

¹¹ Tongana mo ye ti sara mariage gi na mbeni zo so aye ti sara na Jéhovah na âme ti lo kue tongana mo, sara tënë ni na Jéhovah na yâ ti sambela (aPhil. 4:6, 7). Atâa mo yeke ku teti ngoi oke, zia bê ti mo awoko pëpe. Zia bê ti mo kue na Jéhovah, lo hinga ye so mo yeke na bezoin ni nga lo yeke mû maboko na mo ti gbu ngangu.​—aHéb. 13:6.

12. Ngbanga ti nyen a yeke nzoni mbeni Chrétien agbu li ti lo nzoni tongana mbeni zo ahunda ti sara mariage na lo?

¹² Mbeni zo so songo ti lo na Nzapa akpengba pëpe wala mbeni zo so ayeke Témoin ti Jéhovah pëpe alingbi ti hunda ti sara mariage na mbeni Chrétien so ayeke kumbamba na so aye biani ti sara mariage. Tongana ye tongaso asi na mo, dabe ti mo so vundu so mo yeke wara tongana mo soro nzoni zo pëpe ti sara mariage na lo ayeke duti kota mingi ahon vundu so mo yeke na ni na ngoi so mo ngbâ kumbamba. Nga tongana mo sara mariage awe, mo yeke ngbâ na zo ni na yâ ti fini ti mo kue atâa aye atambela nzoni wala pëpe (1 aCor. 7:27). Sara mariage pëpe na mbeni zo gi ngbanga ti so mo pensé so gi oko pasa ti mo ti sara mariage la. Mbeni lâ mo lingbi ti tene tongana mbi hinga ândö ka mbi sara ni pëpe.​—Diko 1 aCorinthien 7:39.

Leke tere ti mo ndali ti aye so ayeke ku mo na yâ ti mariage

13-15. Aye wa so alingbi ti ga na vundu na yâ ti mariage a lingbi koli na wali asara lisoro dä na ngoi so ala ngbâ ti gi ti hinga tere ti sara mariage?

¹³ Atâa so Paul awa aChrétien ti sara na Jéhovah kumbamba, lo bâ pëpe azo so aye ti sara mariage tongana ambumbuse zo. Nde na so, wango so yingo ti Jéhovah apusu lo ti mû amû maboko na azo so asara mariage awe ti hinga aye so ayeke ku ala tongana ala sara mariage nga ti sara si mariage ti ala angbâ lakue.

¹⁴ A lingbi ambeni zo so asara mariage awe achangé bango ndo ti ala na ndo ti ye so ala ku na yâ ti mariage. Na ngoi so azo use so aye ti sara mariage ayeke gi ti hinga tere nzoni, ala lingbi ti pensé so ala ye tere ngangu. Ala pensé so ala la aye tere ahon tanga ti azo kue. Ala yeke ngbâ na bibe ni so na tongo nda ti mariage ti ala nga ala pensé so mbeni ye ayeke buba yâ ti ngia ni so lâ oko pëpe. Mara ti bibe tongaso ayeke na lege ni pëpe. Zo alingbi ti duti na ngia na ngoi kue pëpe. Tâ tënë, na ambeni ngoi bolingo ni alingbi ti nzere, me a lingbi pëpe ti mû maboko na ala ti leke akpale kue so ala yeke wara na yâ ti mariage ti ala.​—Diko 1 aCorinthien 7:28. *

¹⁵ Li ti azo mingi so asara mariage ade ti ninga pëpe akpe wala vundu asara même ala na ngoi so ala mä tere pëpe na koli wala wali ti ala na ndo ti aye so ayeke kota mingi. Ala use kue alingbi ti bâ so ala mä tere pëpe na ndo ti lege so a lingbi ala sara kua na nginza ti ala, ngoi so ala yeke mû ti sara na ngia, ndo so ala yeke lango dä nga fani oke la ala lingbi ti gue ti bâ akogara ti ala. Nga zo oko oko ayeke na awokongo ti lo so alingbi ti son bê ti mba ti lo. Na ngoi so azo use ayeke gi ti hinga tere nzoni kozoni si ala sara mariage, ala lingbi ti pensé so ala yeke na bezoin ti sara tënë na ndo ti akota ye so pëpe. Me, aye so alingbi ti ga na kota kpale na yâ ti mariage ti ala na pekoni. A yeke nzoni koli na wali abâ lege ti atënë so kozoni si ala sara mariage.

16. Ngbanga ti nyen a yeke nzoni koli na wali amä tere na ndo ti lege so ala yeke leke na akpale ti ala?

¹⁶ Ti tene mbeni koli na wali aduti nzoni nga na ngia na yâ ti mariage ti ala, a lingbi ala bungbi oko ti leke akpale ti ala. A lingbi ala mä  tere na ndo ti fason so ala yeke fa na ye na amolenge ti ala nga tongana nyen ti bâ lege ti ababâ na amama ti ala so aga mbakoro. A lingbi ala zia pëpe si akpale so ala wara na yâ ti sewa ti ala akangbi yâ ti ala. Tongana ala sara ye alingbi na awango ti Bible, ala yeke leke akpale mingi, ala yeke gbu ngangu na gbe ti akpale so angbâ nga ala yeke ngbâ ndo oko nga na ngia.​—1 aCor. 7:10, 11.

17. Ngbanga ti nyen koli na wali so asara mariage awe ayeke ‘gi bê ti ala na ndo ti aye ti dunia so’?

¹⁷ Paul asara tënë ti mbeni ye so ayeke si ka na yâ ti mariage na 1 aCorinthien 7:32-34. (Diko ni.) Azo so asara mariage awe ayeke ‘gi bê ti ala na ndo ti aye ti dunia so’, aye tongana kobe, bongo, da nga na ambeni ye so ala yeke na bezoin ni. Ngbanga ti nyen tongaso? Na ngoi so mbeni ita-koli angbâ kumbamba, peut-être lo yeke mû ngoi mingi ti fa tënë. Me na ngoi so lo sara mariage awe, lo yeke bâ so a lingbi lo mû mbeni mbage ti ngoi nga na ngangu ti lo ti bâ lege ti wali ti lo tongaso si lo nzere na lo. Wali nga kue ayeke sara tongaso na mbage ti koli ti lo. Jéhovah ahinga so koli aye ti tene wali ti lo aduti na ngia nga wali aye si koli ti lo aduti na ngia. Jéhovah ahinga so ti tene mbeni mariage aduti nzoni a lingbi koli na wali ti lo amû mbeni mbage ti ngoi nga na ngangu so ala yeke sara lani na kusala ti lo, na ngoi so ala ade kumbamba, ti bâ na lege ti mba.

18. Agbiango ye wa so andu ngia a lingbi koli na wali asara na peko ti mariage ti ala?

¹⁸ Ka ti ngoi so koli na wali ni ayeke mû teti ngia nga na ambeni ye na ngoi so ala yeke kumbamba ayeke tongana nyen? Tongana a lingbi koli na wali amû mbeni ngoi nga na ngangu so ala yeke sara na kusala ti Jéhovah ti kpengba na mariage ti ala, a lingbi ala sara nga tongaso na ngoi nga na ngangu so ala yeke mû kozo ti sara na ngia na ngoi so ala yeke kumbamba. Tongana mbeni koli amû ngoi mingi ti sara ngia ti wanguru na akamarade ti lo, a yeke sara nyen na ndo ti wali ti lo? Ka tongana mbeni wali amû ngoi mingi ti sara ngia na akamarade  ti lo, bê ti koli ti lo ayeke duti tongana nyen? Koli wala wali ni alingbi ti bâ so lo yeke gi lo oko, lo yeke na ngia pëpe nga so mba ti lo ni andoye lo pëpe. Azo so asara mariage awe alingbi ti kpe mara ti ye tongaso tongana ala sara ye kue so ala lingbi ti sara ti kpengba songo ti ala ti koli na wali.​—aÉph. 5:31.

Jéhovah ahunda na e ti duti na sioni oko pëpe

19, 20. (a) Ngbanga ti nyen a lingbi azo so asara mariage awe abata tere ti ala si ala tï pëpe na yâ ti lango-sioni? (b) Kpale wa azo so asara mariage awe alingbi ti wara tongana ala duti nde na mba aninga mingi?

¹⁹ Awakua ti Jéhovah aleke na bê ti ala ti ngbâ ti duti na sioni oko pëpe. Ambeni asoro ti sara mariage tongaso si ala tï pëpe na yâ ti lango-sioni. Me, gi sarango mariage ni la ayeke bata zo yongoro na lango-sioni pëpe. Na ngoi ti giriri akota gbagba so ayeke na tere ti mbeni gbata ayeke bata azo ti yâ ni gi tongana ala ngbâ na yâ ti gbagba ni. Tongana mbeni zo asigigi na yâ ti gbagba ni na ngoi so abandii na azo ti nzi ayeke dä, ala lingbi ti nzi ye ti lo na ngangu wala ti fâ lo. Legeoko nga koli na wali ayeke bata tere ti ala si ala tï pëpe na yâ ti lango-sioni gi tongana ala sara ye alingbi na andia so Jéhovah alu teti mariage.

²⁰ Paul asara tënë ni na 1 aCorinthien 7:2-5. Koli ayeke na droit ti bungbi koli na wali gi na wali ti lo; wali nga kue ayeke na droit ti bungbi koli na wali gi na koli ti lo. Zo oko oko ayeke ku ti tene mba ti lo amû na lo “ye” ti lo, wala bungbingo koli na wali so azo so asara mariage awe ayeke na droit na ni. Tongana koli na wali aduti yongoro na mba aninga, ala lingbi pëpe ti mû “ye” ti mba na mba. Ambeni koli na ambeni wali amû congé me zo oko oko ague na mbeni ndo nde na ti mba ti lo. Ambeni aduti yongoro na koli wala wali ti ala aninga ndali ti kua ti nginza ti ala. Bâ kpale so ayeke si tongana mbeni oko ‘akanga nzara ti tere ti lo pëpe’ na lo zia si Satan asara ngangu na ndo ti lo na lo bungbi na mbeni koli wala mbeni wali nde. Jéhovah ayeke iri tënë nzoni na ndo ti amokonzi ti sewa so ayeke mû ye na sewa ti ala sân ti gi ti zia mariage ti ala na yâ ti kpale.​—Ps. 37:25.

Ti sara ye alingbi na wango ti Bible ayeke ga na mo aye ti nzoni

21. (a) Ngbanga ti nyen desizion ti ngbango kumbamba wala ti sarango mariage ayeke ngangu mingi? (b) Ngbanga ti nyen wango so ayeke na 1 aCorinthien chapitre 7 ayeke nzoni mingi?

²¹ Ti ngbâ kumbamba wala ti sara mariage ayeke na popo ti adesizion so ayeke ngangu mingi so zo oko oko la ayeke mû. Azo kue ayeke na siokpari na yâ ti tere ti ala, siokpari so la ayeke na gunda ti mingi ti akpale so azo ayeke wara na amba ti ala. Ni la, même azo so Jéhovah aye ala na so lo iri tënë nzoni na ndo ti ala, ala nga kue ayeke wara ka vundu, atâa ala yeke kumbamba wala ala sara mariage awe. Tongana mo sara ye alingbi na nzoni wango so ayeke na 1 aCorinthien chapitre 7, mo lingbi ti sara si akpale ni aduti kamême mingi pëpe. Atâa mo yeke kumbamba wala mo sara mariage awe, mo lingbi ti nzere na lê ti Jéhovah. (Diko 1 aCorinthien 7:37, 38.) Ye so ayeke kota ahon atanga ti ye kue so mo lingbi ti gi ti sara ayeke ti nzere na lê ti Nzapa. E lingbi ti nzere na lê ti Nzapa laso nga na ngoi so e yeke duti na fini na yâ ti fini dunia. Na yâ ti fini dunia so, akpale so ayeke mingi laso na popo ti akoli na awali ayeke duti dä pëpe.

[Kete tënë na gbe ni]

Mo yeke kiri tënë tongana nyen?

• Ngbanga ti nyen a lingbi mbeni zo apusu mba ti lo pëpe ti sara mariage?

• Tongana nyen la mbeni wakua ti Jéhovah alingbi ti sara kusala nzoni na ngoi ti kumbamba ti lo?

• Tongana nyen la mbeni koli na wali so ayeke gi ti sara mariage alingbi ti leke tere ndali ti akpale so ayeke si na yâ ti mariage?

• Ngbanga ti nyen gi mariage wani akanga lege na zo pëpe ti tï na yâ ti lango sioni?

[Ahundango tënë ti manda na ye]

[Afoto na lembeti 16]

A-Chrétien so asara mariage pëpe me so amû ngoi ti ala ti fa tënë mingi ayeke na ngia

[Foto na lembeti 18]

Aye wa ambeni zo alingbi ti changé na peko ti mariage ti ala?