A iri lani ala “aMolenge ti Bekpa”
Fa ye na amolenge ti mo
A iri lani ala “aMolenge ti Bekpa”
NA NGOI ti ngu-nzapa, bekpa ayeke sungba ka. A sara mo mbeto awe?— * Lani Jésus airi ambeni disciple ti lo use “aMolenge ti Bekpa.” Zia e bâ ndani so lo iri ala tongaso.
Iri ti adisciple ni so ayeke Jacques na Jean. Ala yeke aita ita, na iri ti babâ ti ala ayeke Zébédée na ti mama ti ala ayeke Salomé. Salomé ayeke peut-être ita ti Marie, mama ti Jésus. Tongaso, Jacques na Jean ayeke lani aita ti Jésus na ala sara ngia oko nga ala kono oko.
Teti so Zébédée ayeke zo ti gbungo susu, Jacques na Jean kue aga azo ti gbungo susu nga. Ala yeke na popo ti akozo zo so Jésus airi ala ti mû peko ti lo. Na ngoi so lani Jésus aga airi ala ti mû peko ti lo, ala dö kua ti ala ti gbungo susu ni na lê ni lê ni ala zia na ala mû peko ti lo. Na pekoni, Jésus asoro akoli 12 ti ga abazengele ti lo, na Jacques na Jean ayeke na popo ti ala.
Ambeni nze kozoni si a fâ Jésus, lo na abazengele ti lo afâ yâ ti ahoto ti Samarie ti gue na mbeni gbata nde. Ndo akomanse ti vuko, na ala kue afatigué mingi. Tongaso ala hunda na azo ti Samarie wala lege ayeke dä ti tene ala lango na yâ ti gbata ti ala ni, me azo ni ake. Ala ke ngbanga ti nyen? Mo hinga ndani?— Zia e bâ.
Jésus na abazengele ti lo ayeke aJuif, na mingi ti aJuif aye tënë ti azo ti Samarie pëpe. Me Jésus aye ti lo ala. Lo sara ye nzoni na ala, na a lingbi Jacques na Jean kue asara tongana lo. Me ala sara ti ala nde. Tongana azo ni ake ti tene ala lango na yâ ti gbata ti ala ni, ngonzo agbu Jacques na Jean si ala hunda Jésus: ‘Mo ye e tene na wâ ti ga ti futi ala?’ Mo pensé Jésus atene nyen na ala?— Jésus atene na ala so a yeke nzoni pëpe ti tene sioni tënë tongaso. Biani, Jacques na Jean ayeke na ye mingi ti manda na ndo ti sarango nzoni bê na zo.
Mbeni kota kpale ti Jacques na Jean nga ayeke so ala ye kota ndo. Ngoi kete kozoni si Jésus akui, ala tokua mama ti ala na lo ti tene na lo: “Mû yanga ti tene amolenge ti mbi ti koli use so aduti na tere ti mo, oko na mbage ti maboko ti mo ti koli na oko na mbage ti maboko ti mo ti wali, na yâ ti royaume ti mo.” Me tongana tënë ni atï na mê ti tanga ti abazengele bale-oko ni, ngonzo agbu ala na tere ti Jacques na Jean. Tongana mo yeke lani kâ, mo nga kue ngonzo ayeke gbu mo?—
Ngonzo ayeke gbu mo peut-être. E ye ka ape tongana mbeni zo aye ti duti gi na ndo ti amba ti lo. Na pekoni Jacques na Jean abâ so ala sara ye nzoni pëpe, na ala changé. Ala ga anzoni bazengele nga ala sara ye na ndoye mingi. Ti mo, e manda nyen dä?—
Mbeni ye so a lingbi e manda na lege ti Jésus ayeke so a lingbi e nga kue e sara ye nzoni na mba ti e. Jésus asara lani nzoni na azo kue, akoli, awali na amolenge. Mo yeke sara ande kue ti bâ lakue tapande ti lo na ti sara tongana lo?—
Diko na Bible ti mo
Matthieu 27:55, 56; Marc 15:40, 41
Jean 4:4-15, 21-26; Luc 9:51-55
Matthieu 20:20-24; Marc 10:35-37, 41
[Kete tënë na gbe ni]
^ par. 3 Tongana mo yeke diko ye na molenge na mo bâ a zia (—), a fa so a lingbi mo luti kete nga mo wa lo ti fa tënë ti bê ti lo.
