Aye so kue ayeke hunzi biaku!

TONGANA mbeni zo atene na mo, “Na yâ ti kete ngoi akpale so kue ayeke hunzi,” mo yeke tene nyen? Peut-être mo yeke tene, “Ye ni mo bâ li ti mo bango? A yeke aye so ayeke si ka lakue.” Wala peut-être mo yeke tene na bê ti mo, ‘Mbeni ye asara lo?’

Atâa so na bango ni aye tongana sukungo ti ngu na yengingo ti sese ayeke dä lakue, e yeke na beku so a yeke changé mbeni lâ. Me, zo la ayeke changé ni pëpe. Zo alingbi ti hinga aye kue kue kue na ndo ni pëpe, na même ti kanga lege na ni wala ti changé ni. Salomon, gbia ti Israël ti giriri, so a hinga lo teti ndara ti lo nga so ahinga ti bâ ye nzoni, atene: “Zo alingbi hinga pëpe nda ti kusala so ayeke na gbe ti lâ; kamême tongana zo asara kusala mingi ti gi ye so, fade lo wara pëpe; biani, na a hon so, kamême zo ti ndara atene lo hinga ye so, lo lingbi wara ye ni pëpe.”​—Zo-ti-fa-tene 8:17.

Tongana zo ayeke na ngangu na ndo ti aye tongana yengingo ti sese wala sukungo ti ngu pëpe, ka zo wa la alingbi ti duti na ngangu na ndo ni? Bible atene so Wasarango e la ayeke zo so alingbi ti sara si aye so achangé. A yeke lo la lo sara aye kue so ayeke tambela nzoni na ndo ti sese na tapande ngu so apika, akiri na yayu si akiri apika (Zo-ti-fa-tene 1:7). Nde na azo, Nzapa ayeke na ngangu na ndo ti aye kue. Prophète Jérémie afa ni polele tongana lo tene: “Seigneur L’Éternel! bâ, Mo sara ayayu na sese na lege ti kota ngangu ti Mo, na lege ti tïtî Mo so Mo ye na ndo azo. Ye so ahon ngangu ti Mo ayeke pëpe.” (Jérémie 32:17). Teti so Nzapa la asara sese na aye kue so ayeke na ndo ni, a yeke na lege ni ti tene lo hinga tongana nyen ti sara kusala na aye ni so si azo alingbi ti duti dä na siriri.​—Psaume 37:11; 115:16.

Tongaso, Nzapa ayeke kaï ande aye so tongana nyen? Dabe ti mo so use article ni atene so mingi ti aye ti mbeto so ayeke si na ndo ti sese so ayeke “fä” ti “aye ti ngoi so ayeke gue ti hunzi”. Jésus atene: “Tongana ala bâ aye so ayeke si, . . . zia ala hinga so royaume ti Nzapa aga nduru awe.” (Matthieu 24:3; Luc 21:31). Royaume ti Nzapa, so ayeke ngorogbia so Nzapa azia gere ni na yayu, ayeke changé ande aye mingi na ndo ti sese. Même aye tongana sukungo ti ngu na yengingo ti sese, lo yeke duti na ngangu na ndo ni. Atâa  so Jéhovah Nzapa ayeke na ngangu ti sara ye so lo wani, lo zia ni na tïtî Molenge ti lo. Prophète Daniel asara tënë ti lo, a tene: “A mû na lo ngangu ti komande, na gloire, na royaume, si azo kue, amara kue, na azo ti yanga nde nde kue, asara na Lo.”​—Daniel 7:14.

Nzapa amû na Molenge ti lo, Jésus Christ, ngangu so alingbi ti changé aye na sese si aga ndo so azo alingbi ti duti na ngia dä. A sara ngu saki use awe, na ngoi so Jésus ayeke na ndo ti sese, lo fa mbeni kete yanga ti ngangu ti lo na ndo ti aye tongana pupu na ngu. Mbeni lâ, tongana lo na adisciple ti lo ayeke na yâ ti ngö na ndo ti Kota ngu ti Galilée, “kota pupu aya ngangu na amapo ti ngu ni ayeke tuku na yâ ti ngö ni, tongaso ngu aga nduru ti si yâ ti ngö ni.” Li ti adisciple ni aga kirikiri. Teti so mbeto ti kuâ asara ala, ala iri Jésus. Nyen la lo sara? “Lo suku [gi] na pupu ni na lo tene na kota ngu ni: ‘Kaï! Duti kpô!’ Na pupu ni akaï na ndo adë ngii.” Bê ti adisciple ni adö na ala hunda tere ti ala: “So zo wa la tongaso, so même pupu na kota ngu kue amä yanga ti lo so?”​—Marc 4:37-41.

Ti si na laso, Jésus akiri na yayu awe na Nzapa akiri amû na lo ngangu ahon ti kozo. So lo yeke Gbia ti Royaume ti Nzapa, a yeke na lo ti changé aye na ndo ti sese nga lo yeke na ngangu ti sara si azo aduti nzoni nga na siriri.

Ye oko, tongana ti so e bâ fade, a yeke azo si asara si e wara akpale mingi, wala akpale ni akiri akono ndali ti kota bê ti azo so aye gi ti wara ye mingi. Fade Royaume ni ayeke sara nyen na azo so angbâ na yâ ni na aye ti changé pëpe? Bible afa so “Seigneur Jésus ayeke sigigi na yayu, lo na angangu ange ti lo, na yâ ti mbeni menga-wa, tongana lo yeke futa kula na azo so ahinga Nzapa pëpe nga na azo so asara ye alingbi pëpe na nzoni tënë na ndo ti Seigneur ti e Jésus.” Tâ tënë, lo yeke “[futi] azo so ayeke buba sese.”​—2 aThessalonicien 1:7, 8; Apocalypse 11:18.

Na pekoni, “Gbia ti agbia” so, wala Jésus Christ, ayeke duti ande na ngangu na ndo ti aye kue, tongana ngu, pupu na sese (Apocalypse 19:16). Lo yeke sara si azo ayeke bâ pasi pëpe na gbe ti komandema ti Royaume ni. Na lege ti ngangu ti lo, lo yeke sara si pupu, ngu nga na ambeni ye ni nde asara kua maboko na maboko ndali ti nzoni ti azo. Ye so ayeke sara si zendo ti Jéhovah Nzapa so aga tâ tënë, so lo tene ândö: “Fade Mbi sara si [ngu-nzapa] apika na ngoi ni, na sese alë le-kobe, na keke ti yaka alë lê ni.” (Lévitique 26:4). Ande kâ, azo ayeke leke da na mbeni ye ti ga ti buba ni ayeke duti dä pëpe, teti so Bible atene: “Fade azo asara da, na ala duti na yâ ni; fade ala lu vigne na yaka, na ala te lê ni.”​—Ésaïe 65:21.

A lingbi mo sara nyen?

Kite ayeke pëpe so, tongana ti azo mingi, mo ye ti duti na yâ ti mbeni dunia so mara ti akpale tongaso asi dä pëpe. Me a lingbi mo sara nyen kozo? Teti so “azo so ahinga Nzapa pëpe nga na azo so asara ye alingbi pëpe na nzoni tënë” ayeke duti ande pëpe na yâ ti mara ti dunia so, a yeke polele so a lingbi e gi ti hinga ye na ndo ti Nzapa nga e yeda na komandema ti Royaume ti lo. Nzapa aku ti tene e hinga lo nga e yeda na nzoni tënë ti Royaume so lo zia gere ni na lege ti Molenge ti lo.

Ye so ayeke mû lege na e nzoni mingi ti sara ni ayeke ti manda Bible a lï. Na yâ ni, a fa ambeni ye so a lingbi e sara ti duti na ndo ti sese na yâ ti siriri na gbe ti komandema ti Royaume ti lo. Ni la, e wa mo ti hunda aTémoin ti Jéhovah ti ga ti fa na mo ye so Bible afa. Ala yeke duti nduru ti mû maboko na mo. Ti tâ tënë ni, tongana mo sara kue ti hinga Nzapa nga ti yeda na nzoni tënë ti Royaume, fade atënë ti aProverbe 1:33 ayeke ga tâ tënë na ndo ti mo, a tene: “Zo so amä mbi, fade lo duti na siriri, na bê ti lo aduti nzoni, na mbeto ti sioye asara lo pëpe.”