Ngoi ti ndoye na ngoi ti ke

“NZAPA ayeke ndoye.” Na ambeni kodoro, azo ayeke zia atënë so na ndo ti atableau na ala kpo ni na tere ti mur ti da ti ala. Biani, tënë so afa tâ pendere mingi so Nzapa ayeke tâ gi ndoye ni mveni.

Ye oko, azo mingi ahinga pëpe so atënë so ayeke na yâ ti Bible. Bazengele Jean la asû atënë so, lo tene: “Zo so ayeke na ndoye pëpe ahinga Nzapa pëpe, ndali ti so Nzapa ayeke ndoye.” (1 Jean 4:8). Jean asû nga atënë so na ndo ti ndoye so Nzapa afa na mbage ti azo ti siokpari: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.”​—Jean 3:16.

Tënë so asara si ambeni zo apensé so Nzapa ayeke lakue nduru ti kanga lê na ndo ti aye kue so e sara. Dutingo ti azo mingi afa so ti ala, atâa nyen la ala sara, Nzapa ayeke fâ ande ngbanga na ndo ti ala pëpe. A yeke tâ tënë la? Nzapa andoye azo kue, atâa azo ti nzoni wala azo ti sioni? A yeke si ka so Nzapa ake zo?

Ndoye ti Nzapa nga kengo ndo ti lo

Salomon, gbia so ayeke na ndara, atene: “Ngoi ayeke teti ye kue, na lâ ayeke teti kusala nde nde kue so ayeke na gbe ti yayu . . . lâ ti ndoye, na lâ ti ke.” (Zo-ti-fa-tene 3:1, 8). Atënë so aye ti fa so, atâa Nzapa aye azo mingi nga lo sara nzoni na ala, ambeni ngoi ayeke dä so lo yeke ke zo.

Kozoni kue, tënë “ke” na yâ ti Bible aye ti tene nyen? Mbeni mbeti atene: “Na yâ ti Bible, tënë ‘ke’ ndani ayeke mingi. A lingbi ti tene ti ke zo ni na bê oko na ti ye gi sioni ti lo. Mara ti kengo ndo tongaso alingbi ti gue na zo ni ti sara sioni na mba ti lo ni.” Ti so la e hinga ni mingi, na e yeke bâ aye ti pekoni na ndo ti sese mobimba. Me oko mbeti so akiri atene: “Tënë ‘ke’ aye nga ti tene kengo ye ngangu, me ti gi ti sara sioni na zo ni so asara ye ni so pëpe.”

Use ndani so la si e yeke bâ ni fadeso. Mara ti kengo ndo ni so apusu zo ti ke na bê oko ye so mba ti lo ni asara, me pëpe ti gi ti sara sioni na lo. Tënë so andu Nzapa nga? Bâ tënë so aProverbe 6:16-19 atene: “Ye omene ayeke so L’Éternel ake, même ye mbasambala so ayeke ye ti sioni mingi na lê ti Lo: Lê so abâ ndo na fandara, menga so asara tënë ti wataka, na maboko so asa mênë ti azo ti mbilimbili, bê so agi lege ti sara sioye, na gere so akpe fade fade ti sara sioni, témoin ti wataka so asara tënë ti mvene, na zo so abi tënë ti tiri na popo ti aita.”

Tongana ti so e bâ, Nzapa ake ambeni sarango ye. Me a yeke pëpe na yâ ti aye kue la si lo yeke ke zo ni so asara aye ni so. Lo yeke bâ yâ ti aye ni, na tapande awokongo ti e, ndo so ye ni asi dä, ndo so zo ni akono dä, nga lo yeke  bâ wala zo ni asara ni na mbana wala na mbana pëpe (Genèse 8:21; aRomain 5:12). Zo so asû mbeti ti aProverbe afa ndani na lege ti pendere tapande so ge, lo tene: “Zo so L’Éternel andoye lo, Lo se lo, legeoko tongana babâ ase molenge so amû ngia na lo.” (aProverbe 3:12). Babâ ni alingbi ti ke sioni ye so molenge ti lo ni asara, me lo ngbâ ti ye molenge ti lo ni lakue, nga lo yeke se molenge ni ti mû maboko na lo ti zia sioni sarango ye ti lo ni so. Ti Jéhovah nga a yeke tongaso tongana lo bâ so beku ayeke dä ti sö mbeni wasiokpari.

Ye so asara si Nzapa ake mbeni zo

Ka tongana zo ni ahinga ye so bê ti Nzapa aye me lo ke ti sara ni? Zo ni so ayeke nzere na lê ti Nzapa pëpe. Tongana lo sara aye so Jéhovah ake ni na mbana ti bê ti lo, Jéhovah ayeke ke lo. Na tapande, Bible atene: “L’Éternel atara azo ti mbilimbili; me Lo ke zo ti sioni na zo so andoye sioye ti ngangu.” (Psaume 11:5). Tongana zo ti sioni so agbian bê ti lo pëpe, Jéhovah ayeke pardone lo pëpe, tongana ti so bazengele Paul afa ni polele na yâ ti mbeti ti lo so lo tokua ni na aHébreu, so lo tene: “Na peko ti so e wara tâ hingango ye na ndo ti tâ tënë awe, tongana e ngbâ na yâ ti siokpari na mbana, sandaga ndali ti asiokpari ti e ayeke dä mbeni pëpe, me ye so angbâ ayeke gi kungo na mbeto na bê ngbanga nga na mbanda so ayeke tongana wâ si ayeke te ande ala so ake Nzapa.” (aHébreu 10:26, 27). Ndali ti nyen Nzapa so ayeke Nzapa ti ndoye asara ye tongaso?

Tongana mbeni zo ayeke sara ka mbeni siokpari na mbana, lo lingbi ti ga tâ sioni mingi si a yeke ngangu na lo ti changé. Bible ahaka mara ti zo tongaso na mbeni zen so alingbi gbian nzoroko ti lo pëpe (Jérémie 13:23). Nga, tongana lo zia lege ni pëpe, lo sara ye so Bible airi ni “siokpari ti lakue lakue”, so pardon ayeke dä ndali ni pëpe.​—Marc 3:29, La Sainte Bible en sango.

Mara ti ye so asi lani na Adam na Ève nga na Judas Iscariote so la. Teti so Nzapa asara Adam na Ève na siokpari oko na tere ti ala pëpe nga teti so commandement so lani lo mû na ala ayeke polele na ala mä yâ ni nzoni, a yeke polele so ala ke yanga ti lo na mbana. Ndali ni la si Nzapa apardone ala pëpe. Nga tënë so Nzapa atene na ala na pekoni afa so lege ti tene ala gbian bê ti ala ayeke dä pëpe (Genèse 3:16-24). Ti Judas, atâa so lo yeke na siokpari na tere ti lo, lo hinga Jésus, Molenge ti Nzapa, tâ nzoni mingi me lo kä lo. Jésus wani atene Judas ayeke “molenge so a yeke futi lo ande”. (Jean 17:12). Bible afa nga so Zabolo ayeke babâ ti siokpari, na lo nga kue a yeke futi gi lo  futingo (1 Jean 3:8; Apocalypse 12:12). Azo so asara si Nzapa ake ala biaku biaku.

Me, ti hinga so Jéhovah ayeke pardone nga ambeni zo so asara siokpari adë bê ti e. Lo kanga bê mingi, nga tongana azo asara siokpari na mbana pëpe lo yeke fâ gi ngbanga hio na li ti ala pëpe (Ézéchiel 33:11). Lo hunda ala ti gbian bê ti ala si lo pardone ala. Bible atene: “Zia zo ti sioni ake lege ti lo, na zo ti kirikiri ake bibe ti lo; zia lo kiri na L’Éternel, na fade Lo sara be-nzoni na lo; zia lo kiri na Nzapa ti e, na fade Lo pardone lo kue.”​—Ésaïe 55:7.

Nzoni bango ndo na ndo ti ndoye nga na kengo ndo

Biani, e atâ Chrétien so e ye ti sara ye tongana Nzapa, a lingbi e hinga lawa si a yeke ngoi ti ndoye zo nga lawa si a yeke ngoi ti ke zo. Yengo so e ye na mbeni zo alingbi ti sara si e sara ye na lege ni pëpe. Me atënë ti disciple Jude so ge alingbi ti mû maboko na e ti duti na nzoni bango ndo na ndo ti tënë ti sarango nzoni bê na zo nga na kengo siokpari so lo sara so, lo tene: “Zia ala ngbâ ti sara nzoni bê na ambeni zo ni, ala sara tongaso na mbeto, na oko ngoi ni ala ke même bongo ti yâ ni so mitele asara saleté na tere ni.” (Jude 22, 23). A lingbi e ke siokpari so zo ni asara me pëpe zo ni so asara siokpari ni.

A hunda nga na aChrétien ti ye awato ti ala na sarango ye ti nzoni na ala. Jésus atene: “Ala ngbâ ti ndoye awato ti ala na ti sambela ndali ti azo so ayeke sara ye ti ngangu na ala.” (Matthieu 5:44). Ndani la si aTémoin ti Jéhovah ayeke fa lakue nzoni tënë ti Royaume ti Nzapa na amba ti ala, même si azo ni ake tënë ni (Matthieu 24:14). Teti so aTémoin ayeke bâ aye ni tongana ti so Bible abâ na ni, na lê ti ala Jéhovah alingbi ti ndoye azo kue na ti sara nzoni bê na ala. Atâa so azo abâ kusala ti aTémoin na nzoni lê pëpe wala ala ke ti mä ala wala même ala sara ngangu na ala, ala yeke sara ye ague oko na wango ti bazengele Paul so, so lo tene: “Ala ngbâ ti iri tënë nzoni na ndo ti azo so ayeke sara ye ti ngangu na ala, ala iri tënë nzoni na li ti azo, me ala deba azo pëpe . . . Ala kiri sioni teti sioni na mbeni zo pëpe.” (aRomain 12:14, 17). Ala girisa pëpe so Jéhovah la ayeke bâ zo wa la alingbi na ndoye ti lo nga zo wa la lo yeke ke lo. Gi lo oko la alingbi ti tene zo tongaso angbâ na fini nga zo tongaso alingbi na kuâ.​—aHébreu 10:30.

Biani, “Nzapa ayeke ndoye.” Ni la, a lingbi e fa singila ti bê ti e ndali ti ndoye ti lo na e sara kue ti gi ti hinga ye so bê ti lo aye na ti sara ye ague oko na ni. A yeke nzere ande na aTémoin ti Jéhovah ti ndo so mo yeke dä ti mû maboko na mo na yâ ti Bible ti mo wani ti hinga ye so bê ti Nzapa aye nga ti hinga tongana nyen ti sara ye alingbi na ni. Tongana mo sara tongaso, Nzapa ayeke ke mo pëpe me lo yeke ye mo.

[Kete tënë na lembeti 13]

“Ye omene ayeke so L’Éternel ake, même ye mbasambala so ayeke ye ti sioni mingi na lê ti Lo: Lê so abâ ndo na fandara, menga so asara tënë ti wataka, na maboko so asa mênë ti azo ti mbilimbili, bê so agi lege ti sara sioye, na gere so akpe fade fade ti sara sioni, témoin ti wataka so asara tënë ti mvene, na zo so abi tënë ti tiri na popo ti aita.”​—APROVERBE 6:16-19

[Kete tënë na lembeti 14]

“Na peko ti so e wara tâ hingango ye na ndo ti tâ tënë awe, tongana e ngbâ na yâ ti siokpari na mbana, sandaga ndali ti asiokpari ti e ayeke dä mbeni pëpe, me ye so angbâ ayeke gi kungo na mbeto na bê ngbanga nga na mbanda so ayeke tongana wâ si ayeke te ande ala so ake Nzapa.”​—AHÉBREU 10:26, 27

[Kete tënë na lembeti 15]

“Zia zo ti sioni ake lege ti lo, na zo ti kirikiri ake bibe ti lo; zia lo kiri na L’Éternel, na fade Lo sara be-nzoni na lo; . . . fade Lo pardone lo kue.”​—ÉSAÏE 55:7

[Foto na lembeti 14]

Babâ so aye molenge ti lo ayeke se lo ti mû maboko na lo

[Foto na lembeti 15]

Nzapa afa ndoye ti lo na mbage ti gbâ ti azo ti kanga na lo sara nzoni bê na ala