Nzapa la ayeke punir e so?

Na peko ti so sese ayengi ngangu na Japon nga ngu asuku afâ azo mingi na mars 2011, mbeni mokonzi ti poroso ti kodoro ni atene: “Atâa so mawa ti azo ni asara mbi, ti mbi tembatsu la (so ti tene punition ti Nzapa).”

Na ngoi so azo ahon 220 000 akui na yâ ti yengingo ti sese so ayengi na Haïti na janvier 2010, mbeni kota wafango tënë ti Nzapa atene so a yeke ngbanga ti so “ala te mbele na Zabolo” la na a lingbi ala “kiri na mbage ti nzapa.”

Na ngoi so azo 79 akui na yâ ti mbeni wusuwusu na Manille na kodoro ti Philippines, mbeni bua ti Eglize Catholique atene: “Nzapa aye ti sara si li ti e akiri dä.” Mbeni mbeti-sango afa so tongana a mû akota zo 100, ala 21 abâ so Nzapa la ayeke tuku ngonzo ti lo na ndo ti azo na lege ti aye tongana pikango ti akota ngu nga na ambeni mara ti akpale tongaso so ayeke si na kodoro ni lakue lakue so.

A YEKE fini ye pëpe so azo atene Nzapa la ayeke punir azo ti sioni na lege ti aye tongana sukungo ti ngu nga na ambeni ye tongaso. Na ngu 1755, na peko ti so azo 60 000 akui na yâ ti mbeni yengingo ti sese, so asara si wâ atï na yâ ti kodoro ni nga ngu asuku na amene azo na Lisbonne, Portugal, Voltaire, mbeni wasenda-ndara so azo ahinga lo mingi, ahunda tere ti lo: “Ye so asi so afa so sioni ti azo ti Lisbonne ayeke mingi ahon ti azo ti Paris? so ala nga kue ayeke sara ye ti kirikiri mingi so?” Biani, azo kutu mingi ayeke hunda tere ti ala wala Nzapa ayeke tokua akpale so na ndo ti azo ti punir ala. Na yâ ti akodoro mingi azo abâ akpale so tongana ye ti maboko ti Nzapa.

Na bango aye so kue, a lingbi e hunda tere ti e: Biani Nzapa ayeke punir azo na lege ti aye tongaso? Gbâ ti akpale so atï na ndo ti azo na yâ ti angoi so ayeke punition ti Nzapa la?

Na bingo tënë hio na li ti Nzapa, ambeni afa mbaï ti aye so asi na yâ ti Bible so afa so Nzapa afuti azo na lege ti aye tongaso (Genèse 7:17-22; 18:20; 19:24, 25; Nombre 16:31-35). Me tongana e bi lê nzoni na yâ ti ambaï so, na yâ ti aye oko oko so asi, akota ye ota asigigi dä. Kozoni, a gboto mê ti azo ni kozo. Use ni, nde na akpale so laso ayeke fâ anzoni zo na asioni zo kue legeoko, ti Nzapa gi asioni zo so aye pëpe ti changé wala ala so ake ti mä agbotongo mê so, ala la ayeke kui. Ota ni, Nzapa aleke ti tene azo so tënë ayeke na li ti ala pëpe asö kuâ.​—Genèse 7:1, 23; 19:15-17; Nombre 16:23-27.

Na yâ ti akpale mingi mingi so afuti fini ti azo kutu mingi laso, ye oko afa pëpe so Nzapa la ayeke na pekoni. Ka nyen la asara si akpale ni so ayeke gue gi guengo na li ni so? Nyen la e lingbi ti sara na yâ ti aye tongaso? Mbeni ngoi ayeke duti ande dä so akpale so ayeke hunzi? Mo yeke wara kiringo tënë ni na yâ ti a-article ti peko.