Azo aye ti hinga akiringo tënë ni

“Zo oko oko ayeke na bango ndo ti lo na ndo ti [Jésus]. Atâa e mä na bê na lo wala pëpe, e kue e yeke hunda tere ti e, e tene, ‘Koli ni so ayeke nga gi zo wa?’”​—STAN GUTHRIE, MBENI WASUNGO MBETI.

AZO aye ti hinga ye na ndo ti Jésus. Abuku so asara tënë na ndo ti lo amû ndo nga afilm ti lo asi singo. Me, azo angbâ gi ti hunda tënë na ndo ti lo. Jésus ayeke zo wa biani? Azo ayeke na abango ndo nde nde na ndo ti tënë so.

Ade ti sara ngu mingi pëpe, awagosinga use azia hundango ndo so na ndo ti Internet “Jésus ayeke lani zo wa?” na ala tisa azo ti kiri tënë na ni. Ambeni kiringo tënë ni la na gbe ni ge:

● “Na bango ni lo yeke lani mbeni rabbi (wafango ye) so ahinga ti bâ mawa ti azo na so a lingbi azo amû tapande ti lo.”

● “Lo yeke lani mbeni senge zo tongana e me so asara aye mingi na yâ ti fini ti lo.”

● “Ye oko afa pëpe so Jésus ayeke lani dä.”

● “Jésus ayeke Molenge ti Nzapa, a dü lo, lo kui na lo zingo na kuâ ti zi e na yâ ti siokpari. Laso lo yeke na fini, na lo yeke kiri ti ga ge na sese.”

● “Mbi hinga so Jésus Christ ayeke ngengele oko molenge ti Nzapa, lo oko so lo yeke zo nga lo oko so lo yeke mbeni nzapa.”

● “Jésus ayeke tënë ti tere ndali ti akota zo.”

Ti tâ tënë ni, mara ti abango ndo nde nde so ala kue la alingbi ti duti tâ kiringo tënë ni pëpe. Tâ na ndo wa la si e lingbi ti wara tâ kiringo tënë na ahundango ndo ti e na ndo ti Jésus? Azo so asigigi na Tour ti Ba Ndo so amä na bê so Bible ayeke tënë ti yanga ti Nzapa na gi lo Bible ni wani la alingbi ti fa na e tâ tënë na ndo ti Jésus. *—2 Timothée 3:16.

Na article ti peko, e yeke bâ akiringo tënë so Bible amû na ambeni hundango ndo so azo ayeke hunda ka na ndo ti Jésus. Jésus wani atene so lege ti salut azi na “zo kue so amä na bê na lo”. (Jean 3:16). E wa mo ti bâ akiringo tënë ni na ti bâ wala mo yeke na bezoin ti manda ye mingi na ndo ti lo nga ti hinga ye so mo lingbi ti sara ti mä na bê na lo.

[Kete tënë na gbe ni]