Ga nduru na Nzapa

‘Zia si mbi kiri na mo’

Mo sara ândö na Jéhovah si mo zia lege ni? A si na mo awe ti pensé ti kiri na mbage ti lo? me mo gi bê ti mo wala lo yeke yamba mo ande la? E wa mo ti diko article so nga na mbeni so ayeke ga na pekoni so nzoni. A sara ni ndali ti mo.

MBENI wali so akono na yâ ti bungbi ti Jéhovah si lo dö lege ni lo zia atene: “Mbi sambela Jéhovah ti zia si mbi kiri na lo na ti pardone mbi teti so mbi zia vundu na bê ti lo.” Mawa ti lo asara mo? Mo hunda tere ti mo wala Nzapa ayeke bâ azo so asara na lo ândö so tongana nyen? Lo girisa ala awe la? Lo ye si ala “kiri na lo” nga la? Ti kiri tënë na ahundango ndo so, zia e bâ atënë so Jéhovah atene, so Jérémie afa pekoni. Kite ayeke pëpe so akiringo tënë ni ayeke sara ande nzoni na mo.​—Diko Jérémie 31:18-20.

Zia e bâ na ngoi wa la Jérémie asû atënë so. Na ngu 740 kozo ti Christ, angu mingi kozoni si a dü Jérémie, Jéhovah azia lege na azo ti Assyrie ti kinda royaume ti akete mara bale-oko ti Israël na ti gue na azo ni na Assyrie. * Jéhovah azia lege na sengo ndo so ngbanga ti so azo ni atï na yâ ti kota siokpari, ala ke ti mä agbotongo mê so aprophète amû na ala lege mingi (2 aGbia 17:5-18). Tongaso ala bâ pasi ngbanga ti so yâ ti songo ti ala na Nzapa ti ala afâ nga ala yo na kodoro ti ala. Me, aye so asi na ala so apusu ala ti kiri na mbage ti Jéhovah? Jéhovah agirisa ala kue kue kue? Lo yeke yeda ti yamba ala?

“Mbi ke siokpari ti mbi”

Kâ na ngbâa ni li ti amolenge ti Israël ni aga dä na ala changé bê ti ala kue. Jéhovah abâ changengo bê ti ala ni. Mä tënë so Jéhovah atene ti fa na vundu so ayeke na yâ ti bê ti azo ti Israël ni, so lo iri ala na iri ti Éphraïm.

Jéhovah atene: “Mbi mä Éphraïm biani, lo toto teti lo mveni.” (Versê 18). Lo mä dema ti azo ti Israël so ala yeke dema ndali ti vundu ti peko ti siokpari ti ala. Ala yeke tongana mbeni molenge-koli so adö yanga-da ti babâ ti lo azia si lo gue lo sara ye ti kirikiri na so na mawa lo yeke yengi li ti lo ndali ti pasi so lo bâ na pekoni, si lo ye ti kiri na yanga-da ti babâ ti lo (Luc 15:11-17). Nyen la azo ni atene nyen?

“Mo se mbi awe, . . . legeoko tongana a se molenge ti bagara so ahinga joug pëpe.” (Versê 18). Azo ni ahinga so sengo ndo ni alingbi na ala. Ala yeke tongana molenge ti bagara so ade a dressé lo pëpe. Hakango ye so aye ti tene so ala yeke tongana mbeni molenge ti bagara so mbeni mbeti atene “a yeke pika lo na keke pëpe tongana lo ke fade pëpe ti tene a zia joug [wala ngbongboro keke ti fango na yaka] na ndo ti go ti lo.”

“Kiri mbi na lege ni, na fade mbi kiri, teti Mo yeke L’Éternel Nzapa ti mbi.” (Versê 18). Azo ni asara tere ti ala kete na ala iri ndo na Nzapa. Ala sara siokpari, me fadeso ala toto na Jéhovah ti mû maboko na ala ti kiri na lo. Tene ti Nzapa, Kozo Mbouki, atene: “Mo iri mbi si fade  mbi kiri na mo, tënë ti so mo yeke Yahve Nzapa ti mbi.” 

“Mbi ke siokpari ti mbi . . . Kamene agbu mbi, biani, même kamene asara lê ti mbi.” (Versê 19). Vundu asara azo ni ngbanga ti so ala sara siokpari. Ala yeda na faute ti ala ni. Kamene nga na vundu asara ala mingi, mo bâ mo tene ala yeke pika ndo ti kate ti ala na mawa.​—Luc 15:18, 19, 21.

Azo ti Israël achangé bê ti ala, ngbanga ti so vundu ahon ndo ti ala, ala fa siokpari ti ala na Nzapa, na ala dö lege ti siokpari ti ala ni ala zia. Fade Nzapa ayeke mä toto ti ala ni? Lo yeke yeda ti tene ala kiri na lo?

“Fade Mbi sara be-nzoni na lo biani”

Songo so Jéhovah ayeke na ni na azo ti Israël ayeke tongana ti mbeni babâ na molenge ti lo. Lo tene: “Mbi yeke Babâ ti Israël, na Éphraïm ayeke kozo molenge ti Mbi.” (Jérémie 31:9). Babâ wa la so aye molenge ti lo ayeke ke ande ti tene molenge ni akiri na lo tongana molenge ni achangé tâ bê ti lo tongaso? Ti Jéhovah a yeke tongana nyen? Bâ tënë so lo tene na azo ti lo.

“Éphraïm ayeke molenge ti Mbi so Mbi ndoye lo? lo yeke molenge so amû ngia na Mbi? teti lakue tongana Mbi sara tënë ti ke lo, Mbi ngbâ ti dabe Mbi na lo mingi.” (Versê 20). So pendere tënë ape! Tongana ti so mbeni babâ so aye amolenge ti lo ayeke kanga lê pëpe na ndo ti sioni ti ala, Jéhovah nga kue asara tënë “ti ke” amolenge ti lo, azo ti Israël, na lege so lo gboto mê ti ala lege mingi. Na ngoi so ala ke na mbana ti bê ti ala ti mä lo, lo zia si a gue na ala na ngbâa, a yeke mo bâ mo tene lo zia ala, ala hon. Me même atâa so lo se ala, lo girisa ala pëpe, na lo lingbi ti sara tongaso lâ oko pëpe. Babâ so aye amolenge ti lo ayeke girisa ala pëpe. So Jéhovah abâ so amolenge ti lo achangé bê ti ala kue, a sara nyen na ndo ti lo?

“Mbi bima na bê ti Mbi teti lo; fade Mbi sara be-nzoni na lo biani.” (Versê 20). Jéhovah aye mingi ti tene amolenge ti lo akiri na lo. So ala changé bê ti ala kue andu bê ti lo, na lo ye gi ti tene ala kiri na lo. Tongana ti babâ ti yâ ti parabole ti Jésus so molenge ti lo agirisa si lo kiri, Jéhovah abâ “mawa” ti amolenge ti lo na lo ye si ala kiri na lo.​—Luc 15:20.

“Jéhovah ayeda ti tene mbi kiri!”

Atënë ti Jérémie 31:18-20 afa na e polele so Jéhovah ahinga ti bâ mawa ti zo. Nzapa agirisa pëpe azo so asara na lo ândö si adö lege ti lo azia. Ka tongana ala ye ti kiri na lo, lo yeke sara tongana nyen? “Fade Lo pardone [ala] kue.” (Ésaïe 55:7). Azo so agbian bê ti ala kue si akiri na lo, lo yeke ke ala pëpe (Psaume 51:19). Me, lo yeke yamba ala na ngia na bê.​—Luc 15:22-24.

Wali so e sara tënë ti lo fade na tongo nda ni kâ asara mbeni ye ti kiri na Jéhovah, lo gue na congrégation ti aTémoin ti Jéhovah ti ndo so lo yeke dä. Kozo ye so a lingbi lo sara lani ayeke ti tene lo hon ndo ti sioni bibe so lo yeke na ni. Lo tene: “Na bê ti mbi lani mbi tene mbi kpa ape.” Me a-ancien atene atënë so akpengba lo na ala mû maboko na lo ti kiri ti wara nzoni songo na Jéhovah. Na ngia na bê mingi, lo tene: “A nzere na mbi mingi so Jéhovah ayeda ti tene mbi kiri!”

Tongana mo sara na Jéhovah ândö si mo ye ti kiri na lo, e wa mo ti gue na congrégation ti aTémoin ti Jéhovah ti ndo so mo yeke dä. Girisa pëpe so zo kue so achangé bê ti lo na lo toto na Jéhovah, lo tene, ‘Zia si mbi kiri na mo,’ Jéhovah ayeke bâ mawa ti lo na lo yeke yamba lo.

[Kete tënë na gbe ni]