Azo ahunda atene . . . 

Zo wa la asara si “tongoro” ni asigigi, zo wa?

▪ Na ngoi ti Matanga ti Noël, mo yeke bâ ka na yâ ti asenète wala na yâ ti afoto a yeke fa ka agbia ota, wala awandara, so ague ti bâ kete Jésus na yâ ti sanduku ti tengo kobe ti anyama? Mbaï ni atene Nzapa amû tongoro ti fa lege na azo ni juska na ndo so a dü Jésus dä na Bethléhem. Na ambeni kodoro, mingi ti amolenge ni ahinga même iri ti agbia ni so na li, so ayeke Melchior, Gaspar nga na Balthazar. Me, mbaï ni so ague tâ oko na ye so Bible atene? Oko pëpe. Mingi ti aye ni ayeke tâ ye pëpe.

Kozoni, azo ni so ayeke lani azo wa? Na yanga ti Grec ti ândö, Bible atene pëpe so ala yeke agbia, wala awandara, me lo tene so ala yeke azo ti gingo nda ti ye na lege ti atongoro, so ayeke sarango ye ti apaïen ândö. Bible afa nga pëpe iri ti ala na lo fa nga wungo ti ala pëpe.

Use ni, na ngoi wa la si ala gue abâ Jésus ni? A yeke pëpe na ngoi so Jésus angbâ bébé na yâ ti sanduku ti tengo kobe ti anyama. E hinga ni tongana nyen? Évangile ti Matthieu atene: “Na ngoi so ala lï na yâ ti da ni, ala bâ kete molenge ni na Marie, mama ti lo.” (Matthieu 2:11). Bâ so a tene Jésus angbâ lani fini bébé pëpe, me lo yeke “kete molenge”. Marie na Joseph ayeke mbeni pëpe na yâ ti da ti anyama ni; me ala yeke na yâ ti mbeni da nde.

Ota ni, zo wa la asara si “tongoro” ni asigigi ti fa lege na akoli ni so, zo wa? Akota zo ti a-eglize atene Nzapa la atokua “tongoro” ni so. A yeke tâ tënë la? Girisa pëpe so “tongoro” ni ague na azo ni kozoni na Bethléhem pëpe. Me, lo gue na ala na Gbia Hérode na Jérusalem, gbia so ayeke fâ azo sioni na so aye pëpe si mbeni zo amû place ti lo. Ala sara tënë ti dungo Jésus na sioni gbia so na ala tene na lo so molenge ni ayeke ga “gbia ti aJuif”. (Matthieu 2:2). Na mango tënë ni so, Gbia Hérode ake molenge ni ngangu. Lo handa ala, lo tene na kiringo ti ala, ala ga a fa na ni ndo so molenge ni ayeke dä si ni nga kue ni gue ni bâ lo. Na pekoni, “tongoro” ni ague na ala na da ti Joseph na Marie. Ye so akoli so ayeke sara so alingbi fade ti ga na ye ti sioni na kete molenge so. Me merci so Nzapa abata lo. Teti so akoli ni akiri afa peko ti ye ni na Hérode pëpe, ngonzo agbu lo, lo mû yanga ti tene a fâ akete molenge-koli kue ti ngu use wala na gbe ni so ayeke na Bethléhem nga na akodoro so ayeke na tere ni.​—Matthieu 2:16.

Mbeni lâ, Jéhovah asara tënë ti Jésus, lo tene lo yeke “Molenge ti mbi so mbi ndoye lo mingi, lo so bê ti mbi anzere na lo mingi.” (Matthieu 3:17). Bâ si: Babâ ti ndoye tongaso, so aye sarango ye ti mbilimbili, alingbi ti soro apaïen so ti tokua ala? so na yâ ti Ndia ti lo wani lo ke tënë ti gingo nda ti aye na lege ti atongoro so? (Deutéronome 18:10). Fade lo yeke sara kusala na mbeni tongoro ti gue na ala na Hérode, sioni gbia so, so mawa ti zo asara lo ti kete pëpe, ti fa na lo mbeni tënë so ayeke zia kota ngonzo na bê ti lo? Fade Nzapa ayeke kiri ti sara kusala na oko tongoro so nga na akoli so ti fa ndo so kete molenge ti lo ni ayeke dä?

Zia e bâ mbeni tapande: Mbeni turugu ti kota kamba atokua oko nzoni turugu ti lo na mbage ti awato ti lo ti bembe ndo kâ. Fade lo yeke fa na awato ti lo ndo so ala lingbi ti wara turugu ti lo ni dä? Ti kete ape! A yeke nga oko tongaso na Jésus. Jéhovah atokua lo na yâ ti dunia so ayeke sioni mingi. Fade lo yeke fa na sioni Gbia Hérode ndo so kete molenge ti lo ni ayeke dä? Oko ape!

Tongaso, zo wa la asara si “tongoro” so, wala mbeni ye so akpa tongoro, asigigi, zo wa? Ti tâ tënë ni, zo wa la aye kuâ ti Jésus, zo wa? Zo wa la aye si Jésus akono ape si lo sara kua ti lo so Nzapa atokua lo ndali ni na ndo ti sese ape, zo wa? Zo wa la aye gi ti handa azo na ti tene mvene, zo wa? Zo wa la aye ti sara sioni na azo na ti fâ ala, zo wa? Jésus wani afa “zo ti mvene na babâ ti mvene” so, lo so “na ngoi so lo to nda ni, lo yeke wafango zo”, lo tene a yeke Satan Zabolo.​—Jean 8:44.