Lë kpengba songo na Lo so amä ka asambela

MINGI ti azo so atene ani mä na bê na Nzapa alingbi ti fa tâ nda ti mabe ti ala ni nzoni ape. Ala lingbi nga ti fa pëpe ndani so abungbi ti vorongo ayeke sara ka aye ti sioni nga ndani so Nzapa azia si azo ayeke bâ pasi. Ye so angbâ na ala ayeke gi ti sambela mbeni Nzapa so ala hinga li ti ala na lo ape.

Me ti mo, mo lingbi ti lë kpengba songo na Nzapa. Tongana mo manda ye nzoni na ndo ti Nzapa, mabe ti mo ayeke kpengba, nga mo yeke ye lo mingi. Tâ mabe aluti na ndo ti ye so afa atene ye ni ayeke dä (aHébreu 11:1). Tongana mo manda tâ tënë na ndo ti Nzapa, mo yeke hinga lo nga mo lingbi ti sara tënë na lo tongana ti tâ kamarade. Bâ tapande ti ambeni zo so ândö ayeke sambela ka atâa so na bê ti ala lani ala hinga ape wala Nzapa ayeke dä.

◼ Patricia, so e sara tënë ti lo na lembeti ota awe, atene: “Mbeni lâ, mbi na ambeni kamarade ti mbi bale-oko tongaso e yeke sara lisoro. Mbi tene na ala so mbeni Témoin ti Jéhovah asi na yanga-da la mbi kpe so. Lo na babâ ti mbi asara lisoro. Babâ amä na bê na Nzapa ape. Lisoro ti e ni atï fadeso na ndo ti tënë ti Nzapa. Mbeni kamarade ti mbi ni atene: ‘Hinga ape, aTémoin ti Jéhovah ayeke na raison.’

“Mbeni nde atene: ‘E gue na bungbi ti ala e bâ ma!’ Tongaso, e gue. Atâa so atënë so e mä ka, e mä na bê na ni kue ape, ambeni na popo ti e angbâ ti gue na abungbi ni gi ndali ti so aTémoin ni ayamba e nzoni.

“Me, na mbeni dimanche mbi mä mbeni tënë so achangé bango ndo ti mbi. Zo so amû lani diskur ni afa ndani so azo ayeke bâ pasi. Mbi hinga nga lani ape so a leke lani zo nzoni-kue, me so na lege ti zo oko la siokpari na kuâ amû ndo kue. Témoin ni so afa nga ndani so a lingbi Jésus akui ti tene azo akiri awara ye so kozo zo so agirisa ni (aRomain 5:12, 18, 19). * Ge so, lê ti mbi azi. Na bê ti mbi, mbi tene: ‘Tâ tënë, Nzapa ayeke dä na lo yeke pensé na e.’ Tongaso, mbi ngbâ lakue ti manda Bible, nga kete na pekoni, mbi bâ so mbi lingbi ti sambela mbeni zo so ayeke tâ dä biani. Kozo ti tene mara ti ye tongaso asi na mbi la.”

◼ Allan, so a sara nga tënë ti lo na lembeti ota ni, atene: “Mbeni lâ, aTémoin ti Jéhovah apika yanga-da ti e, na wali ti mbi atene na ala ti lï ngbanga ti so tënë so ala tene na lo na ndo ti  dutingo na fini lakue lakue na ndo ti sese anzere na lo. Bê ti mbi ason. Tongaso, mbi zia aTémoin ni na salon, mbi iri wali ti mbi e gue na cuisine na mbi tene na lo, ‘Mä na bê na tënë ti ala ni so ape!’

“Lo tene na mbi: ‘Ka mo wani mo gue mo fa na ala so tënë ti ala ni ayeke na lege ni ape!’

“Mbi gue, me mbi sara gbä. A-Témoin ni ason na ndo ti mbi ape na ala zia na mbi mbeni mbeti so asara tënë na ndo ti création nga na évolution. Lege so mbeti ni afa na aye ni ayeke tâ polele si apusu mbi ti hinga ye mingi na ndo ti Nzapa. Tongaso, mbi yeda ti manda Bible na aTémoin ni. Hio mbi ga ti bâ so aye so Bible afa ayeke tâ nde mingi na aye so mbi pensé kozo na ndo abungbi ti vorongo. Nga, so mbi yeke manda ye na ndo ti Jéhovah, yeke na yeke atënë ti sambela ti mbi, yâ ni ane nga. Ambeni sarango ye ti mbi ayeke dä lani so anzere ape, tongaso mbi sambela Jéhovah ti mû maboko na mbi dä. Mbi hinga mbi tene lo mä lani asambela ti mbi ni.”

◼ André, so ayeke na Angleterre, atene: “Mbi yeke lani na bango ndo ti mbi wani na ndo ti tënë ti Nzapa nga mbi ye tënë ti senda-ye mingi. Me, mbi mä na bê lani na tënë ti évolution gi ndali ti so azo atene so a yeke tâ ye. Nga, ndali ti asioni ye kue so ayeke si laso, mbi tene lani mbi tene Nzapa ayeke ti lo dä ape.

“Me, a si ka so mbi yeke tene na bê ti mbi: ‘Tongana Nzapa ayeke na yayu kâ, mbi ye ti hinga ndani so e yeke na ndo ti sese ge. Mbi ye nga ti hinga ndani so sarango ye ti sioni nga na bira ahon ndo ni.’ Tongana kpale asi, mbi yeke  sambela ti wara mungo maboko, me mbi hinga nga zo so mbi yeke sambela lo so ape.

“Mbeni lâ, mbeni zo amû na wali ti mbi tract Sese ti laso ayeke sö kuâ ande? so aTémoin ti Jéhovah la asigigi na ni. Mbi yeke hunda ka tere ti mbi na tënë so mingi. A sara si mbi tene, ‘Atënë ti yâ ni ayeke mû ande maboko na mbi la?’ Nga, na mbeni lango nde, mbi gue na vacances, na mbeni zo amû na mbi buku Bible: A Yeke Tene ti Nzapa Wala ti Azo? Mbi diko ni na mbi bâ so Bible amä tere nzoni na tâ senda-ye. Tongaso mbi decidé ti manda ye mingi na ndo ti Bible ni. Mbeni lâ mbeni Témoin ahunda na mbi si mbi ye ti manda Bible. Mbi yeda. Yeke na yeke mbi mä yâ ti aye so Jéhovah aleke ti sara, na lo ga tâ zo na lê ti mbi, mbeni zo so mbi lingbi ti fa atënë ti bê ti mbi na lo na yâ ti sambela.”

◼ Jan, mbeni wali so ayeke ândö Protestant na Angleterre, atene: “Teti so azo so atene ani voro Nzapa ayeke handa lê ti azo mingi nga ndali ti so azo ayeke bâ pasi, mbi dö lege ti vorongo Nzapa mbi zia. Mbi dö mandango mbeti mbi zia, na mbi bi tere ti mbi na yâ ti hengo bia nga na pikango guitare ti wara na nginza. Ge la mbi wara Pat. Lo yeke mbeni koli so babâ na mama ti lo ayeke aCatholique, me lo nga kue lo zia lege ti mango na bê na Nzapa tongana mbi.

“E na ambeni zo so adö nga lege ti mandango mbeti azia si e lango da oko. Azo ni so abi tere ti ala na yâ ti vorongo ti azo ti Asie. Nga mingi ni e yeke sara lisoro ngbii juska na bê ti bï na ndo ti ndani so e azo e yeke na ndo ti sese ge. Atâa so mbi na Pat, e mä na bê na Nzapa ape, e hinga e tene mbeni ye adoit ti duti dä, so asara si azo ayeke na fini.

“Na pekoni e gue na banga ti Angleterre ti gi kua ti pikango mozoko. Kâ, e dü molenge. Na mbeni bï tere ti molenge ti e ni ason. Atâa so mbi mä na bê na Nzapa ape, kamême mbi sambela lo. Kete na pekoni mbi na Pat e mä tere encore ape. Tongaso mbi mû molenge ti e ni mbi hon. Ge nga, mbi sambela ti wara mungo maboko, mbi tene tongana mbeni nzapa ayeke dä so ayeke mä mbi, fade lo yeke mä. Pat nga kue asambela, me mbi hinga ape.

“Kete na pekoni na yâ ti oko lango ni, aTémoin ti Jéhovah use asi na yanga-da ti Pat na ala fa na lo ambeni wango ti Bible na ndo ti kpale ti e ni. Pat airi mbi na téléphone na lo tene na mbi si mbi yeda ti tene mbi na lo e manda Bible na aTémoin. Mbi yeda. Na yâ ti mandango ye ti e ni, e manda so ti nzere na Nzapa, a lingbi e sara mariage. E pensé e tene a yeke duti ngangu ndali ti so mbi na Pat e mä tere nzoni ape.

“E ye lani ti hinga ye mingi na ndo ti gango tâ tënë ti aprophétie ti Bible, na ndo ti ndani so azo ayeke bâ pasi nga na ndo ti Royaume ti Nzapa. Tongana angoi ayeke hon, e manda so Nzapa ayeke bi bê na e azo, tongaso e ye ti sara ye so lo fa. E sara mariage. Ndara so ayeke na yâ ti Bible amû maboko na e ti bata amolenge ti e ota nzoni. Biani, e hinga na bê ti e so Jéhovah amä lani asambela ti e ni.”

Bâ aye ni mo wani

Tongana ti azo kutu mingi, azo so e sara tënë ti ala ge atï na yâ ti handa ti abungbi ti vorongo nzapa ti wataka ape. Nga na lege ti mandango Bible, ala hinga ndani so Nzapa azia si azo ayeke bâ pasi. Mo bâ? Ye so asara si azo so ahinga na bê ti ala kue so Jéhovah ayeke mä biani asambela ayeke so ala mä yâ ti ye so Bible afa so tâ nzoni.

Mo ye ti bâ nga aye so afa biani atene Nzapa ayeke dä? A-Témoin ti Jéhovah ayeke duti ande na ngia ti mû maboko na mo ti hinga tâ tënë na ndo ti Jéhovah nga ti hinga ye so mo lingbi ti sara ti lë kpengba songo na “Lo so Lo mä [ka] sambela”.​—Psaume 65:3.

[Kete tënë na gbe ni]

[Tënë na lembeti 10]

“Yeke na yeke mbi mä yâ ti aye so Jéhovah aleke ti sara, na ye so asara si mbi bâ lo tongana tâ zo na lê ti mbi, mbeni zo so mbi lingbi ti fa atënë ti bê ti mbi na lo na yâ ti sambela”

[Foto na lembeti 9]

Tâ mabe aluti na ndo ti ye so afa atene ye ni ayeke dä nga na hingango tâ tënë na ndo ti Nzapa