Lisoro na mbeni koli: Anzoni zo kue la ayeke gue na yayu?

ATÉMOIN TI JÉHOVAH aye ka ti sara lisoro na azo na ndo ti Bible. Mbeni tënë ti yâ ti Bible ayeke dä so agbu bê ti mo na so mo ye ti hinga ndani? Mo ye ti hinga ye na ndo ti mbeni ye so aTémoin ti Jéhovah amä na bê dä wala so ala yeke sara ni? Tongaso, ti peko tongana mo tingbi na aTémoin ti Jéhovah, hunda tënë ni na ala. A yeke nzere ande na ala ti sara lisoro na mo na ndo ni.

Atënë so na gbe ni ge afa lisoro so mbeni Témoin ti Jéhovah alingbi ti sara na mbeni zo. Na tapande, mbeni Témoin ti Jéhovah, so e yeke iri lo Marcus, ayeke fa tënë na mbeni koli so e yeke iri lo Robert.

Azo so ayeke gue na yayu ayeke gue ti sara nyen kâ?

Marcus: Mingi ti azo amä na bê so tongana anzoni zo akui ala yeke gue na yayu na peko ti kuâ ti ala. Mo kue mo mä na bê tongaso?

Robert: En. Mbi mä na bê so anzoni zo ayeke gue na yayu. Mbi nga kue mbi yeke na beku ni.

Marcus: So tâ pendere beku! Bible asara tënë mingi na ndo ti ye so ayeke na yayu kâ nga na ndo ti pasa so zo ayeke na ni ti gue kâ. Me mo hinga ye so azo so ayeke gue kâ ayeke gue ti sara?

Robert: E yeke gue ti duti na tere ti Nzapa ti gonda lo lakue lakue.

Marcus: A yeke pendere beku biani. Me, Bible asara pëpe gi tënë ti pasa so azo ni so ayeke gue kâ ayeke na ni me lo fa nga kota kua so ayeke ku azo ni.

Robert: Kua ti nyen la ayeke ku ala kâ?

Marcus: Kua ni la a fa na Apocalypse 5:10, so atene: “Mo [so ti tene Jésus, mo] sara si ala ga mbeni royaume na aprêtre ti Nzapa ti e, na ala yeke komande tongana agbia na ndo ti sese.” Mo bâ, Robert, ala so ague na yayu, kua ti nyen la ala yeke gue ti sara kâ?

Robert: Versê ni atene ala yeke gue na yayu ti komande ande tongana agbia na ndo ti sese.

Marcus: Ni la.

Ala yeke komande na ndo ti azo wa?

Marcus: Tongana azo so ayeke gue na yayu ayeke komande ande tongana agbia, a fa so ambeni zo ayeke dä so ala yeke komande na ndo ti ala, ni la ape? Bâ kete si, tongana mbeni ngorogbia ayeke na azo na gbe ti lo ape ti komande ala, raison ti komandema ti lo ni ayeke so wa?

Robert: Mbi bâ ye so mo ye ti tene so awe.

Marcus: Tongaso, azo ni ayeke gue ti komande na ndo ti azo wa?

Robert: Mbi pensé e yeke komande ande na ndo ti azo na ndo ti sese, azo so ade ala kui ti ala ape na so ade ala gue na yayu ape.

Marcus: A yeke duti ande tongaso gi tongana anzoni zo kue ague na yayu si. Me mo  pensé so ambeni nzoni zo ayeke gue ti ala na yayu ape me ala yeke ngbâ ti ala na sese ge?

Robert: Zo so ayeke Chrétien ahinga so anzoni zo ayeke gue na yayu.

Marcus: Mbi hunda tënë so senge ape, a yeke ndali ti tënë so ayeke na Psaume 37:29. Mo ye ti diko ni?

Robert: Nzoni. Versê ni atene: “Sese ni aga ye ti héritier ti azo ti mbilimbili, na fade ala duti dä lakue.”

Marcus: Merci. Na lege ti versê so, mingi ti anzoni zo ayeke duti ande na ndo wa?

Robert: Versê ni atene ala yeke duti ande na ndo ti sese.

Marcus: Ni la. Me a yeke gi teti kete ngoi ape. E bâ na yâ ti versê ni, a tene: ‘Fade ala duti dä lakue.’

Robert: Peut-être a ye gi ti tene so a yeke wara lakue anzoni zo na ndo ti sese ge. Tongana e kui e gue na yayu awe, a yeke dü ambeni nzoni zo na peko ti e.

Marcus: Azo mingi ayeke fa peut-être nda ti versê ni tongaso. Me mo pensé nyen, versê so aye peut-être ti sara tënë ti mbeni ye nde la ape? Hinga ape lo ye ti sara tënë ti anzoni zo so ayeke ngbâ kpu na kpu na ndo ti sese. Mo bâ ni tongana nyen?

Robert: Mbi hinga li ti mbi na ni encore ape.

Paradis ayeke duti ande na ndo ti sese

Marcus: Bon, bâ mbeni versê ni nde so asara tënë na ndo ti fini so azo ayeke duti ande na ni na ndo ti sese. A yeke na Apocalypse 21:4. Versê ni asara tënë ti azo so ayeke duti ande na ngoi ni kâ, a tene: “Fade lo [so ti tene Nzapa, lo] yeke mbô ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.” Pendere ye la ayeke ku e so ape?

Robert: Ni la. Me na mbi, a ye ti sara tënë ti fini so azo ayeke duti ande na ni na yayu.

Marcus: A yeke tâ tënë so azo so ayeke gue na yayu ayeke wara mara ti dutingo so. Me kiri mo bâ versê ni kete. A tene nyen la ayeke si ande na kuâ nyen?

Robert: A tene “kuâ ayeke duti ande dä mbeni pëpe”.

Marcus: Ni la. Tongana a tene mbeni ye ayeke dä encore ape, donc lo yeke dä kozo na mbeni ndo. A yeke tongaso ape?

Robert: En, a yeke tongaso.

Marcus: Me kuâ ayeke na yayu kozo? Oko ape! A yeke gi na ndo ti sese ge la si azo ayeke kui, ni la ape?

Robert: Tënë ni alï mingi.

Marcus: Mo bâ, Bible atene so ambeni nzoni zo ayeke gue na yayu, me tanga ti anzoni zo ayeke ngbâ ti ala na ndo ti sese ge. Mbi hinga so mo mä tënë so awe, so atene: “Ngia ayeke na azo so ayeke na tâ be-ti-molenge, teti fade sese so aga ye ti héritier ti ala.”​—Matthieu 5:5, La Sainte Bible en sango.

Robert: En, mbi mä ka versê so. A diko ka ni mingi na eglize.

Marcus: Tongana sese aga ye ti héritier ti azo ti tâ be-ti-molenge, a ye ti tene so azo ayeke ngbâ na ndo ti sese ande. Nga apendere ye so a sara tënë ni na Apocalypse so ayeke ga tâ tënë na ndo ti ala. Ala yeke bâ so dunia so achangé biani biani ndali ti so Nzapa ayeke zi ande aye ti sioni kue so ayeke na ndo ni, même kuâ kue lo yeke zi ni.

Robert: Mbi mä yâ ti tënë ti mo ni, me gi versê oko wala use alingbi ti fa ndani kue ape.

Marcus: Tâ tënë. Me gbâ ti aversê ayeke dä so afa nda ti tënë so nzoni. Tongana mo yeke na ngoi, mbi yeke fa na mo mbeni so mbi ye ni mingi.

Robert: Nzoni. Ngoi ayeke dä.

“Fade azo ti sioni ayeke mbeni pëpe”

Marcus: E diko fade Psaume 37, versê ni 29. Zia e zi ni fadeso na versê 10 nga na 11. Mo ye ti diko ni?

 Robert: Mbi diko ni senge. “A ngbâ kete, na fade azo ti sioni ayeke mbeni pëpe; fade mo bâ ndo so ala duti dä, na ala yeke mbeni pëpe. Me azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.”

Marcus: Merci. Na versê 11 ni, a tene “azo so ayeke na tâ be-ti-molenge,” so ti tene anzoni zo, ayeke duti ande na ndo wa?

Robert: Versê ni atene so “sese ni aga ye ti héritier ti ala”. Me versê so aye ti sara tënë ti ngoi so e yeke dä so, ndali ti so e yeke wara anzoni zo laso na ndo ti sese.

Marcus: A yeke tâ tënë. Me bâ nga so versê ni atene so anzoni zo ayeke “wara ngia na yâ [ti] siriri so awu mingi.” Siriri ayeke dä laso?

Robert: A yeke dä ape.

Marcus: Tongaso, versê so ayeke ga tâ tënë tongana nyen? Zia mbi mû mbeni tapande: Mo yeke na ambeni kete kete da na yâ ti mbeni kota gbagba na mo zia ni na louément. Ambeni zo so aloué ni ayeke anzoni zo, ala yeke bata da ni nzoni nga ala ye ti wara tënë na avoizin ti ala ape. A nzere na mo ti loué da ti mo na mara ti azo tongaso. Me ambeni zo ni ayeke ti ala asioni locataire. Ala buba na mo ndo ni nga ala yeke gi na tënë na amba ti ala. Tongana asioni locataire so aye ti zia sioni fason ti ala ni ape, mo yeke sara nyen na ala?

Robert: Mbi yeke tomba ala.

Marcus: Tâ gi ye so Nzapa aga nduru ti sara na asioni zo la. Bâ versê 10 ni, a tene: “Fade azo ti sioni ayeke mbeni pëpe.” A ye ti tene so Nzapa ayeke “tomba” azo so ayeke ga na kpale na amba ti ala. Na pekoni awe, anzoni zo ayeke duti na yâ ti siriri na ndo ti sese. Me mbi bâ so tënë so atene anzoni zo ayeke ngbâ kpu na kpu na ndo ti sese ayeke nde na tënë so a fa na mo kozo.

Robert: En, lâ oko mbi mä mara ti tënë so na eglize ti mbi ape.

Marcus: Tongana ti so mo tene fade, gi versê oko wala use alingbi ti fa nda ti tënë ni kue ape. Ti tâ tënë ni, a hunda ngoi ti tene e bâ ye kue so Bible afa na ndo ti ye so ayeke si ande na anzoni zo. Me tongana ti so e bâ na yâ ti aversê so e diko fade, mo pensé so ambeni nzoni zo ayeke gue na yayu na ambeni mingi ayeke ngbâ kpu na kpu na ndo ti sese ge?

Robert: Mbi yeke sûr ape. Me kamême aversê so mo diko ni fade ge so afa ti ala aye ni tongaso. Mbi yeke kiri ti gbu li ti mbi dä nzoni.

Marcus: Hinga ape na ngoi so mo yeke gbu li ti mo, ambeni tënë ayeke ga na li ti mo. Na tapande, azo so aduti na fini kozo na e, ala kue ague na yayu? Tongana ala gue na yayu ape, ala yeke gi na ndo wa?

Robert: So pendere hundango ndo la.

Marcus: Tongana mo ye, mbi yeke sara na mbeti ambeni versê so asara tënë na ndo ni, tongaso si mo diko ni na mo gbu li ti mo na ndo ni. * Nga, tongana mo ye, mbi yeke kiri ti tene e sara lisoro na ndo ni. Mo ye tongaso?

Robert: En. Merci.

[Kete tënë na gbe ni]