Lo so amä ka asambela ayeke zo wa?

TONGANA mbeni zo ayeke dä so ayeke mä ka asambela, ka a yeke duti gi Nzapa, lo so asara ye kue. So lo la lo leke mongoli ti zo, gi lo oko la lo lingbi ti diko ye so ayeke na yâ ti li ti e. Nga gi lo oko la lo lingbi ti kiri tënë na asambela na ti mû maboko na azo. Me peut-être mo hunda tere ti mo, mo tene, ‘Nzapa ayeke nga dä la?’

Mingi ti azo apensé so tongana zo amä na bê na Nzapa, andâ lo ke aye so senda-ye afa. Me tënë so a tene senda-ye na tënë ti mango na bê na Nzapa ague oko ape so ayeke tâ tënë pëpe. Bâ tapande so ge.

◼ Mbeni gingo nda ti ye so a sara ade ti ninga pëpe na tere ti aprofesseur ti science 1 646 so ayeke fa mbeti na akota université 21 ti Amerika afa so gi ala 550 la atene Nzapa ayeke ti lo dä pëpe.

Tapande so afa so mingi ti awasenda-ye amä na bê so Nzapa ayeke dä.

Ye so afa biani so Nzapa ayeke dä

A lingbi zo amä na bê na Nzapa gi tongaso sân mbeni ye so afa atene lo yeke dä? Oko ape. So a tene mabe aye ti tene ti yeda na mbeni ye sân ti hinga wala ye ni ayeke dä wala pëpe ayeke tâ tënë ape. Bible atene so mabe ayeke “fango polele na gigi ye so afa atene aye so mo bâ ni pëpe ayeke dä biani.” (aHébreu 11:1). Fini Mbuki, 2001, atene so ‘mabe ayeke sara titene aye so lê ti zo abâ ni pëpe, lo hinga atene, aye ni ayeke dä biani.’ Na tapande, mo lingbi ti bâ pupu ape me mo hinga mo tene pupu ayeke dä ngbanga ti so tongana pupu asara, akugbe ti keke ayeke yengere. Legeoko nga, e lingbi ti bâ Nzapa pëpe, Lo so amä ka asambela, me ambeni ye ayeke dä so apusu e ti mä na bê so lo yeke dä biani.

Aye ni so afa atene Nzapa ayeke dä, e lingbi ti bâ ni na ndo wa? E bâ gi ndo na tere ti e. Bible  atene: “Biani, da oko oko kue, mbeni zo si asara ni, me zo so asara aye kue ayeke Nzapa.” (aHébreu 3:4). Tënë so ayeke tâ tënë, ni la ape? Tongana mo mû ngoi ti bâ tongana nyen la atongoro ayeke tambela na lê ti nduzu, tongana nyen la fini abâ gigi, wala ti bâ mongoli ti zo, so mbeni ye na ndo ti sese ti lingbi na ni ayeke dä pëpe, peut-être mo yeke tene so mbeni ye ayeke dä so ayeke kota ahon azo. *

Me gi bango aye ni so alingbi ti fa na e ye kue na ndo ti Nzapa ape. A yeke tongana ti so mo yeke na yâ ti da so yanga ni akanga na mo mä go ti gere ti mbeni zo na gigi. Mo hinga so mbeni zo la ayeke ga so, me a yeke zo wa? Ti hinga zo ni, a yeke nzoni mo zi yanga-da ni si. E yeke sara nga tongaso tongana e ye ti hinga Zo so asara aye kue.

Bible ayeke tongana yanga-da so azi lege na mo ti hinga ye na ndo ti Nzapa. Tongana mo zi yâ ni si mo bâ tongana nyen la ambeni prophétie ni aga tâ tënë na yâ ti anzene nzene ye ni kue, mo yeke mä na bê so Nzapa ayeke dä. * Me gi so ape, ambaï ti yâ ni so afa tongana nyen la Nzapa asara ye ândö na azo ayeke fa na mo tâ sarango ye ti tere ti Nzapa ni mveni, Lo so amä ka asambela.

Sarango ye ti Nzapa ayeke tongana nyen?

Bible afa so Nzapa, Lo so amä ka asambela, ayeke sara ye tongana zo, na mo lingbi ti hinga lo. Biani, gi zo la si alingbi ti mä mbeni tënë na ti mä yâ ni. Tënë ti Psaume 65:3 so adë bê ti e  mingi, a tene: “O Mo so Mo mä sambela, fade mi kue aga na Mo.” Lo yeke mä sambela ti azo so asambela lo na mabe. Nzapa ayeke na iri. * Bible afa so tongana azo ti mbilimbili asambela lo, Jéhovah ayeke “mä sambela” ti ala, me lo yeke “yongoro na azo ti sioni”.​—aProverbe 15:29.

Aye ayeke gbu ka bê ti Jéhovah. Lo yeke “Nzapa ti ndoye”, nga Bible atene lo yeke “Nzapa so ayeke na ngia”. (2 aCorinthien 13:11; 1 Timothée 1:11). Na ngoi so lani ye ti sioni amû ndo ti sese, Bible atene: “Vundu agbu bê ti Lo.” (Genèse 6:5, 6). Tënë so a tene Nzapa si asara pasi na azo ti tene lo tara ala ayeke mvene. Bible atene: “Nzapa alingbi sara sioye kete pëpe.” (Job 34:10). Me, peut-être mo hunda tere ti mo, mo tene, ‘Tongana Nzapa la asara aye kue, ka ngbanga ti nyen lo zia si pasi angbâ gi ti gue?’

Jéhovah amû na azo liberté ti soro ye so ala ye. Ye so afa confiance so lo yeke na ni na mbage ti e azo. So lo zia na e liberté ti soro mara ti fini so e ye ti duti na ni, a nzere na e ape? Mawa ni ayeke so mingi ti azo asara ye na liberté ti ala ni so nzoni ape, na ye so aga na pasi na ala nga na ambeni zo. Fadeso mbeni kota hundango ndo ayeke dä so a lingbi e gbu li ti e na ndo ni. A yeke so: Nzapa ayeke sara ande tongana nyen ti zi pasi sân ti tene zo agirisa liberté ti lo ni so? E yeke wara kiringo tënë ni na article ti peko.

[Akete tënë na gbe ni]

[Encadré na lembeti 5]

Abungbi ti vorongo la azia kite na bê ti mo?

A yeke mawa mingi ti bâ so abungbi ti vorongo la asara si azo mingi ayeke na kite so mbeni Nzapa ti tene amä sambela ti ala ayeke dä. Abungbi ni ayôro tere ti ala na yâ ti bira, aye ti aterroriste nga ala yeke kanga lê na ndo ti tënë ti langongo na amolenge. Aye so asara si même azo so ayeke sambela atene so ala mä na bê na Nzapa encore ape.

Abungbi ti vorongo Nzapa ayeke ka na gunda ti asioni ye ndali ti nyen? Ndali ti so asioni zo ayeke sara aye ti sioni na iri ti abungbi ni so. Bible atene so ambeni zo ayeke mû iri ti Chrétien ti sara aye ti sioni. Bazengele Paul atene lani na a-ancien ti ândö, lo tene: “Na popo ti ala wani, ambeni koli ayeke londo na ala yeke sara atënë so ala ba yâ ni kirikiri ti gboto na adisciple na peko ti ala.”​—Kusala 20:29, 30.

Nzapa ake na bê oko abungbi ti vorongo ti wataka. Biani, Bible afa so “mênë ti azo kue so a fâ ala lani na ndo ti sese” ayeke na li ti ala (Apocalypse 18:24). Teti so ala fa tâ tënë pëpe na ndo ti tâ Nzapa, lo so lo sara ye mingi na ndoye, na lê ti Jéhovah ala yeke na ngbanga ti mênë na li ti ala.​—1 Jean 4:8.

Nzapa, Lo so amä ka asambela, ayeke bâ mawa ti azo so abungbi ti vorongo ayeke sara pasi na ala. Teti so lo ye azo, na yâ ti kete ngoi, lo yeke mû ngangu na Jésus ti fâ ngbanga na ndo ti abungbi so kue, so ayeke handa lê ti azo handango. Jésus atene: “Fade azo mingi ayeke tene na mbi, ‘Seigneur, Seigneur, e tene aprophétie na iri ti mo pëpe?’ . . . Me fade mbi yeke tene na ala: Mbi hinga ala lâ oko pëpe! Ala hon yongoro kâ na tere ti mbi, ala azo so akpe ndia pëpe.”​—Matthieu 7:22, 23.