Mbeni zo amä ka asambela ti e?

“Mbi yeke lani na kite so Nzapa ayeke dä. Me, kamême ngoi na ngoi mbi yeke sambela. Mbi hinga lani ape wala mbeni zo ayeke mä mbi, me mbi pensé a yeke tongaso. Mbi yeke lani na ngia ape nga mbi hinga lani ndani so mbi yeke na fini ape. Mbi ye lani ti mä na bê na Nzapa ape ngbanga ti so ti mbi gi abuba zo la alingbi ti sara mara ti ye tongaso.”​—PATRICIA, * IRLANDE.

MO KUE mo yeke bâ ye ni tongana ti Patricia so? Mo yeke sambela kamême atâa so mo hinga ape wala Nzapa ayeke dä? Tongana a yeke tongaso, hinga mo tene a yeke mo oko ape. Bâ atapande so ge.

◼ Na Angleterre, a hunda lani tënë na azo 2 200 na ndo ti Nzapa. Azo 500 tongaso na popo ti ala ayeda so mbeni Nzapa ayeke dä so asara dunia na so lo yeke mä asambela. Me, kamême azo 1 200 tongaso na popo ti ala ayeke sambela ngoi na ngoi.

◼ Na yâ ti akodoro nde nde a hunda tënë na azo 10 000. A ga ti bâ so na popo ti azo so atene Nzapa ayeke dä pëpe, mingi ti ala ayeke sambela ka.

Nda ti kite ti ala ni ayeke nyen?

Allan, so ayeke na Angleterre, atene: “Lani, mbi mä na bê na Nzapa ape ngbanga ti so ti mbi a sigigi na abungbi ti vorongo Nzapa ti wara na nginza na ti wara na azo. Nga mbi yeke tene lani so tongana Nzapa ayeke dä, ka aye ti kirikiri alingbi fade ti duti dä tongaso ape. Me, a si ka so mbi yeke duti kpô na mbi yeke sara tënë, me mbi hinga ape wala a yeke na mbeni zo wala a yeke na mbeni ye. Mbi yeke hunda nga tere ti mbi, mbi tene: ‘A dü mbi ngbanga ti nyen?’”

Azo kue so ayeke na mara ti bibe so ayeke na araison ti ala. Mingi ni kite ti ala ni ayeke ndali ti so ala wara pëpe akiringo tënë na ahundango ndo ti ala, atënë tongana:

◼ Nzapa ayeke dä?

◼ Abungbi ti vorongo Nzapa ayeke sara aye ti sioni tongaso ngbanga ti nyen?

◼ Nzapa azia si azo ayeke bâ pasi ngbanga ti nyen?

Tongana mo wara akiringo tënë na ahundango ndo so, mo yeke sambela ande sân gingo bê?

[Kete tënë na gbe ni]