Azo ahunda atene . . .

Nyongo manga ayeke sioni na lê ti Nzapa?

▪ Azo so aye ti hinga pensé ti Nzapa ayeke hunda peut-être tere ti ala na ndo ti tënë so, teti mbeni ndia tongaso na ndo ti manga ayeke na yâ ti Bible ape. So aye ti fa so a yeke ngangu ti hinga bango ndo ti Nzapa na ndo ni? Oko ape!

Bible atene: “Atënë kue ti yâ ti Mbeti ti Nzapa, a sara ni na mbeti na gbe ti yingo ti Nzapa.” (2 Timothée 3:16). Na yâ ni e yeke wara ambeni tënë so afa polele bango ndo ti Nzapa na ndo ti seni ti e. Kozoni kue, e yeke bâ ambeni ye so awandara awara so afa ye so manga ayeke sara na tere ti zo. Na pekoni awe, e yeke bâ bango ndo ti Bible na ndo ni.

Manga ayeke sara sioni na tere ti zo nga asara si zo ayeke kui hio. Na France, tongana a mû azo 10 so akui, oko akui kuâ ti manga. Mbeni ndokua na France so ayeke bâ tënë ti nyongo manga atene so, ngu oko oko, wungo ti azo so akui ndali ti manga ayeke mingi ahon ti azo so akui “ndali ti so ala fâ tere ti ala wala a fâ ala fango, wala ala kui ndali ti sämba, mbangi, ndao ti lege, SIDA, tongana a bungbi ni kue oko.”

Azo so anyon manga ayeke sara sioni na amba ti ala. Zo alingbi ti kpe pëpe sioni so guru ti manga ayeke sara na tere ti zo. Azo so ayeke nyon ka manga ape si guru ni aga na hon ti ala alingbi ti wara kobela ti cancer ti fufu nga na kobela ti bê. Ade ti ninga ape, adocteur abâ so asioni yorö so ayeke na yâ ti guru ti manga ayeke ngbâ na tere ti abongo nga na ambeni ye nde a ninga, même si guru ni ahon kue awe. Asioni yorö so ayeke sara sioni mingi na amolenge nga asara si ala yeke manda ye nzoni ape.

Nyongo manga ayeke sara zo ngbâa. A yeke sara si zo awara asioni ngobo. Biani, awandara apensé so dutingo ngbâa ti nicotine, sioni yorö so ayeke na yâ ti manga, asara si a yeke ngangu na zo ti zi tere ti lo dä.

Bible atene ti lo nyen na ndo ti aye so? Bâ atënë so ge:

Nzapa aye si e mû fini na nene ni. Na yâ ti Ndia so Nzapa amû ândö na Israël, lo fa so tongana mbeni zo aye ti nzere na lê ti lo a lingbi lo mû fini ti azo na nene ni (Deutéronome 5:17). Na tapande, a lingbi ala sara mbeni kete ye tongana gbagba so angoro tere ti li ti da ni. Senge ape, ali ti da ti ala ayeke lani plat plat nga ayeke mbeni ndo so azo ayeke duti dä. Gbagba ni so ayeke kanga lege na mbeni zo ti yâ ti sewa ni wala mbeni zo nde ti tï na ti wara sioni wala ti kui (Deutéronome 22:8). Mbeni ndia ni ayeke ti tene wa ti mbeni nyama asara kue ti tene nyama ti lo asara sioni na tere ti mbeni zo ape (Exode 21:28, 29). Tongaso, zo so ayeke nyon manga ague nde na tënë so ayeke na peko ti andia so. Lo yeke sara sioni na tere ti lo wani, me nga aguru ti manga so lo nyon ayeke sara sioni na tere ti azo so ayeke na tere ti lo.

Nzapa aye si e ye lo nga e ye amba ti e. Jésus Christ ahunda lani na adisciple ti lo ti bata acommandement use so ayeke kota ahon atanga ni kue. Acommandement ni so ahunda ti ye Nzapa na bê ti ala kue, na âme ti ala kue, na bibe ti ala kue nga na ngangu ti ala kue, nga ti ye amba ti ala tongana ala wani (Marc 12:28-31). Nzapa la amû fini na zo. Tongaso, zo so anyon manga afa so fini ayeke ye oko na lê ti lo ape, nga so lo ye Nzapa ape (Kusala 17:26-28). Sioni ngobo ti zo ni so alingbi ti sara sioni na ambeni zo. Ni la, tongana lo tene ni ye amba ti ni, andâ gi mvene la.

Nzapa aye si e zia lege ti asioni ngobo. Bible awa aChrétien ti zi “aye kue so asara si tere na bibe aga sioni”. (2 aCorinthien 7:1). A yeke polele so nyongo manga ayeke sara sioni na tere ti zo. Me azo so aye ti zia lege ti nyongo manga ti nzere na Nzapa ayeke tingbi na mbeni kota kpale. Me na ngangu ti Nzapa, ala lingbi ti zia lege ti sioni ngobo so biaku biaku.