Sarango nzoni na zo ayeke kota ye na lê ti Nzapa

MBENI mbakoro-koli so ayeke missionnaire asi na Japon ade ti sara ngu mingi ape. Lo hinga ti tene yanga ti kodoro ni nzoni kue ape na lo tingbi na mbeni maseka-koli ti Japon ni. Maseka ni ayeda ti tene yenga oko oko missionnaire ni aga na yanga-da ti lo ti manda Bible na lo. Sarango ye ti mbakoro ni so anzere na maseka so mingi, ndali ti so lakue, na ngia na yanga nga na nzoni bê, lo yeke mû ngoi ti kiri tënë na gbâ ti atënë so maseka so ayeke hunda na lo.

So missionnaire ni ayeke sara lakue nzoni na maseka so, a yeke mbeni ye so maseka ni ayeke girisa ni lâ oko ape. Na yâ ti li ti lo lo tene: ‘Tongana Bible asara si zo aga tâ nzoni tongaso, mbi yeke manda ni ti hinga ye so ayeke na yâ ni.’ A sara si lo yeda ti manda mbeni ye so lo hinga ni lâ oko ape. Biani, sarango nzoni na zo ayeke nzere ka na bê ti zo na alingbi ti sara ye na ndo ti zo ni, ahon même tënë ti yanga so zo alingbi ti tene ni.

A bâ nga ni na yâ ti sarango ye ti tere ti Nzapa

E yeke ka lakue nduru ti sara nzoni na asongo ti e. Me ti bâ ni nzoni, sarango nzoni na zo alondo na Nzapa. Jésus atene so Babâ ti lo ti yayu ayeke sara nzoni na azo so lo ye ala nga na “azo so ayeke kiri singila pëpe”. Jésus awa nga adisciple ti lo ti sara ye tongana Nzapa, lo tene: “A lingbi ala ga azo so alingbi kue tongana ti so Babâ ti ala so ayeke na yayu alingbi kue.”​—Luc 6:35; Matthieu 5:48; Exode 34:6.

E azo so Nzapa asara e na image ti lo, e lingbi nga ti sara nzoni na zo tongana lo (Genèse 1:27). Tâ tënë, e lingbi ti sara nzoni na asongo ti e, me nga na azo so ayo na e. Bible afa so sarango nzoni na zo ayeke mbeni mbage ti pendere lengo ti yingo vulu ti Nzapa, wala ngangu ti lo (aGalate 5:22). Ni la, zo so ayeke manda ye mingi na ndo ti Nzapa nga lo lë kpengba songo na lo, zo ni so alingbi ti wara mara ti sarango ye.

Sarango nzoni na zo ayeke mbeni ye so ahinga na azo nga mbeni ye so ayeke kota ye na lê ti Nzapa. Ni la, a yeke na lege ni ti tene Nzapa awa e ti “sara nzoni na mba”. (aÉphésien 4:32). Bazengele Paul atene nga na e ti “girisa pëpe tënë ti yambango agene nzoni.”​—aHébreu 13:2.

Na yâ ti dunia so e yeke dä laso, gbâ ti azo ayeke sara nzoni na amba ti ala ape nga ala yeke kiri singila pëpe. Tongaso, lege ayeke dä ti tene e sara nzoni na azo, même na awande? Nyen la alingbi ti mû maboko na e ti sara tongaso? Nga, ndali ti nyen si a lingbi e gbu li ti e dä?

A yeke kota ye na lê ti Nzapa

Na peko ti so bazengele Paul awa e ti sara nzoni na awande, lo ngbâ lo tene: “Ndali ni, ambeni zo ayamba lani a-ange, me ala hinga pëpe so a yeke a-ange la.” Tongana mo la si mara ti ye tongaso asi na mo, a yeke nzere na mo ape? Na peko ti so lo sara tënë ti yambango a-ange ni, lo tene so azo ni ‘ahinga pëpe so a yeke a-ange la.’ Lo ye ti tene so tongana e yeke sara ka nzoni na azo, même na awande wala azo so e hinga ala oko ape, nzoni ye alingbi ti ga na pekoni.

Na yâ ti aBible mingi, tongana a si na tënë ti Paul so, a yeke tokua zo ka na mbaï ti Abraham na Lot so ayeke na chapitre 18 nga na 19 ti Genèse. Na yâ ti achapitre so, a sara tënë ti a-ange so gango ti ala akpa ti awande. Ala si na Abraham nga na Lot na mbeni kota tokua ti Nzapa.  Na Abraham lani, tokua ni so andu tënë ti dungo mbeni molenge-koli so Abraham ayeke dü ande. Ti Lot, a yeke lani mbeni tokua na ndo ti futingo ti agbata ti Sodome na Gomorrhe so Nzapa ayeke futi ni na yâ ti kete ngoi.​—Genèse 18:1-10; 19:1-3, 15-17.

Tongana mo diko aversê so a fa ge, mo yeke bâ so Abraham na Lot asara nzoni na azo so ahon hongo na so ala hinga ala oko ape. Lani, na ngoi ti a-Abraham, yambango agene, atâa awande wala akamarade wala afami, ayeke kota ye mingi na lê ti azo ni nga alï na yâ ti ngobo ti ala. Même na yâ ti Ndia ti Moïse, a hunda lani na azo ti Israël ti bâ lege ti awande so ayeke na kodoro ti ala (Deutéronome 10:17-19). Me même so kue, Abraham na Lot asara ye ahon ye so na pekoni a ga a lï na yâ ti Ndia ti Moïse. Tënë ti yambango agene nzoni agbu bê ti ala mingi, na Nzapa asara tufa na ndo ti ala.

Sarango nzoni so Abraham asara na azo aga na lo aye ti nzoni na pekoni. Nzapa asara si lo dü molenge ti koli. A ga nga na e aye ti nzoni. Tongana nyen? Ye so Abraham na molenge ti lo Isaac asara lani amû lege na Nzapa ti sara si ye so lo leke na bê ti lo ti sara aga tâ tënë. Na yâ ti sewa ti ala la si Jésus, so ayeke Messie ni, abâ gigi, nga aye mingi so andu Jéhovah na Jésus angoro mingi na ndo ti Abraham na Isaac. Nga teti so Abraham aduti nduru ti mû Isaac na sandaga, a fa tongana nyen Nzapa, na yâ ti ndoye ti lo nga nzoni bê ti lo, ayeke mû ande sandaga so ayeke mû lege na azo ti wara salut.​—Genèse 22:1-18; Matthieu 1:1, 2; Jean 3:16.

Ambaï so afa tâ ye so Nzapa ayeke ku na mbage ti azo so lo ye ala. A fa nga so lo ye si azo asara nzoni na amba ti ala. Sarango nzoni na zo ayeke biani kota ye mingi na lê ti lo.

Sarango nzoni na zo asara si e hinga Nzapa nzoni

Bible afa so na ngoi ti e azo mingi ayeke duti “azo so ahinga ti kiri singila pëpe, azo so ayeke abe-ta-zo pëpe, azo so aye amba ti ala zo pëpe”. (2 Timothée 3:1-3). E hinga so lâ na lâ mo yeke tingbi na mara ti azo tongaso. Me ni la si ayeke pusu e ti zia ti sara nzoni na zo ape, ên-ën. Bible atene na aChrétien: “Ala kiri sioni teti sioni na mbeni zo pëpe. Ala sara aye so ayeke nzoni na lê ti azo kue.”​—aRomain 12:17.

A yeke nzoni e sara kue ti sara nzoni na azo. Bible atene: “Zo kue so ayeke na ndoye, . . . lo hinga Nzapa.” (1 Jean 4:7). Mbeni lege ti fa na ndoye ti e ni ayeke ti sara nzoni na azo (1 aCorinthien 13:4). Tâ tënë, tongana e sara nzoni na amba ti e azo, e yeke hinga Nzapa nzoni mingi, na ye so ayeke sara si e duti na ngia. Na yâ ti mbeni fango ye ti lo, Jésus atene: “Ngia ayeke na ala so ayeke sara nzoni bê na amba ti ala, teti fade a yeke sara nzoni bê na ala. Ngia ayeke na ala so bê ti ala avuru, teti fade ala yeke bâ Nzapa.”​—Matthieu 5:7, 8.

Bâ tapande ti maseka-wali Aki, mbeni mama  ti amolenge use. Lo yeke ti kodoro ti Japon. Na peko ti so mama ti lo akui kuâ ti ngangu, Aki atï na yâ ti kota vundu. Na ambeni ngoi, vundu ti lo ni ahon ndo ti lo si lo gue ka lo bâ docteur. Kete na pekoni, mbeni sewa aga alango na yâ ti vaka ti lo nduru na tere ti da ti lo. Babâ ti sewa ni akui na yâ ti mbeni ndao ti lege ade ti ninga pëpe, na wali ni angbâ na akete molenge oku ti bata ala. Mawa ti sewa ni so asara Aki mingi si lo sara kue ti sara songo na wali ni nga na amolenge ni. Lo yeke tö kobe lo yeke mû na ala, lo yeke mû abongo ti so amolenge ti lo ayü ni pëpe na amolenge ti wali ni nga lo sara ambeni ye nde na ala. Sarango nzoni na sewa so asara si Aki akiri awara ngangu. Lo bâ tâ tongana nyen la tënë ti yâ ti Bible so ayeke tâ tënë, a tene: “Ngia ayeke mingi tongana zo amû ye na zo ahon ti wara ye na maboko ti zo.” (Kusala 20:35). Biani, sarango nzoni na zo alingbi ti duti tâ nzoni ye so mo lingbi ti sara na ngoi so mo yeke na yâ ti vundu.

A yeke tongana mungo ye na Jéhovah na bon la

Ti sara nzoni na zo ahunda lakue nginza ape. A hunda pëpe ti tene mo duti na moyen ni wala na ngangu ti tere si mo sara ni, ên-ën. Me kete hengo ngia, wala mbeni nzoni tënë, wala mungo maboko, wala mbeni kete cadeau, wala ti zia place ti mo na mbeni zo tongana ala sara molongo ndali ti mbeni ye alingbi ti sara ye mingi. Tongana a si so mo hinga tënë so mo lingbi ti tene ape wala ye so mo lingbi ti sara ape, tene anzoni tënë wala sara mbeni nzoni ye na zo ni. Maseka-koli so e sara tënë ti lo fade na tongo nda ti article so, e bâ so nzoni bê so missionnaire ni afa na mbage ti lo anzere na lo mingi, atâa kpale ti yanga ti kodoro so ayeke na popo ti ala. Biani, a yeke senge ape si Nzapa ahunda na awakua ti lo ti “ndoye nzobe”.​—Michée 6:8.

Kete nzoni ye so zo asara alingbi ti sara ye mingi. Nga, tongana a londo na bê na a yeke ndali ti so e ye Nzapa, a yeke sara nzoni na e nga na zo so e sara nzoni ni na lo. Même tongana azo akiri singila na nzoni bê ti mo ni ape, a ye ti tene pëpe so mo buba ngoi ti mo bubango. Na lê ti Nzapa, a yeke kota ye mingi. Bible atene na e so nzoni ye so e sara na zo ayeke tongana mungo ye na Jéhovah na bon la (aProverbe 19:17). E wa mo ti bâ na alege wa mo lingbi ti sara nzoni na azo so ayeke na tere ti mo.

[Tënë na lembeti 20]

Tongana mo hinga ye so mo lingbi ti sara ape, tene anzoni tënë wala sara mbeni nzoni ye

[Foto na lembeti 19]

Ndali ti so Abraham asara nzoni na zo, Nzapa asara tufa na ndo ti lo mingi

[Foto na lembeti 20]

Sarango nzoni na zo ayeke tongana mungo ye na Jéhovah na bon la