Alberto asara lani ngu bale-oko tongaso na kua ti turugu. Lo fa peko ti mbeni ye so asi, lo tene: “Aumônier ti e airi tënë nzoni na ndo ti e, lo tene: ‘Nzapa aduti na ala.’ Me tënë so aga na li ti mbi ayeke so Bible atene e fâ zo ape; tongaso a yeke na lege ni ti tene mbi gue mbi fâ azo?”

Ray ayeke ti lo lani turugu ti lê ti ngu na ngoi ti Use Bira so Amû Sese Kue. Mbeni lâ, lo tene na aumônier ti ala: “Aumônier, mo yeke ga ka mo sambela na ndo ti e aturugu ti tene e gue e sö benda. Me mo pensé so awato ti e ayeke sara nga tongaso ape?” Aumônier ni atene na lo so Seigneur ayeke sara ka ambeni ye so zo alingbi ti mä yâ ni ape.

Tongana mo gi li ti mo gbä na tënë ni so, hinga so a yeke gi mo oko ape.

Jésus atene so mbeni oko ti acommandement so ayeke kota ahon atanga ni kue ayeke ti “ndoye mba ti mo tongana mo wani.” (Marc 12:31). Jésus ni atene so tongana mba ti mo ni alango nduru na mo, wala lo yeke zo ti mara ti mo wala zo ti kodoro ti mo si mo ndoye lo? Ên-ën. Lo tene na adisciple ti lo, lo tene: “A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.” (Jean 13:34, 35). Ndoye so ayeke na popo ti adisciple ni ayeke duti nde mingi, si a ga mbeni ye so a hinga ala na ni. Ala yeke yeda ti zia fini ti ala na lê ti kuâ ndali ti amba ti ala ahon ti fâ amba ti ala.

A-Chrétien ti ândö asara ye lani alingbi na tënë ti Jésus so. Mbeni kota bakari (The Encyclopedia of Religion) so asara tënë ti abungbi ti Nzapa atene: “Akota zo ti eglize, tongana Tertullien na Origène, ayeda so a ke lani na aChrétien ti fâ zo. Ndia ni so akanga lege na ala ti ga aturugu ti Rome.”

So aTémoin ti Jéhovah ayeke na yâ ti mingi ti akodoro, tongana bira ayeke na popo ti akodoro use, a yeke wara aTémoin ti Jéhovah na yâ ti akodoro ni so nga. Me ala yeke sara effort ti tene azo angbâ ti bâ so ndoye ayeke na popo ti ala.

Na tapande, na ngu 1994, na ngoi ti bira so atï na popo ti aHutu na aTutsi na Rwanda, aTémoin ti Jéhovah abi tere ti ala na yâ ti bira ni kete ape. A-Témoin ti Jéhovah so ayeke aHutu abata ala so ayeke aTutsi, na aTutsi ni nga asara tongaso, atâa so a lingbi ti fâ ala ndali ni. Tongana aturugu-kpale ti aHutu so a iri ala a-Interahamwe abâ aTémoin ti Jéhovah use so ayeke aHutu so ahonde amba ti ala Témoin so ayeke aTutsi, ala tene: “E yeke fâ ala ndali ti so ala mû maboko na aTutsi ti kpe.” Mawa ni ayeke so a fâ lani aTémoin use so ayeke aHutu so.​—Jean 15:13.

Ti mo, ye so aTémoin ti Jéhovah asara so alingbi na tënë so Jésus atene fade na ndo ti tâ ndoye so?