Tënë so Bible atene so ande a yeke zingo akuâ, mo mä na bê na ni? * A nzere mingi ti bâ so ande e yeke kiri ti bâ tere na afami ti e so akui awe. Me tënë ni so ayeke ga ande tâ tënë la? Ti wara kiringo tënë ni, e yeke bâ tapande ti abazengele ti Jésus Christ.

Abazengele ti Jésus amä na bê lani ngangu na tënë ti zingongo ti akuâ. Ndali ti nyen? Ndali ti araison use tongaso. Kozo ni, a yeke ndali ti so a zingo lani Jésus ni wani na kuâ. Abazengele nga na “aita ahon ngbangbo oku na ngoi oko” abâ Jésus na lê ti ala na peko ti so a zingo lo na kuâ (1 aCorinthien 15:6). Na ndo ni, gbâ ti azo ayeda na ni nga ala sara tënë na ndo ni, tongana ti so a-Évangile osio afa ni.—Matthieu 27:62–28:20; Marc 16:1-8; Luc 24:1-53; Jean 20:1–21:25.

Use ni, abazengele ni abâ na lê ti ala tongana nyen la Jésus azingo azo ota lani. Kozo ni ayeke na Naïn, use ni na Capernaüm nga ota ni na Béthanie (Luc 7:11-17; 8:49-56; Jean 11:1-44). Ti ndangba ni so, so a sara tënë ni kozo na yâ ti mbeti so, andu tâ gi mbeni sewa so Jésus aye ni mingi. Zia e kiri e bâ ye ni so asi so nzoni.

“Ita ti mo ayeke zingo na kuâ.” Jésus la asara tënë so na Marthe, so ita ti lo Lazare akui a sara lango osio awe. Me Marthe amä lani yâ ti tënë ti Jésus ni so ape. Ni la lo tene: “Mbi hinga so lo yeke zingo ande na kuâ.” Ti lo, lo pensé so zingongo ti Lazare ni angbâ encore ayo mingi. Me na peko ti so Jésus atene “mbi yeke zingongo ti akuâ nga na fini”, lo zingo Lazare na kuâ. Na bango ye so, li ti Marthe adoit ti kpe kue!—Jean 11:23-25.

Lazare ayeke lani na ndo wa na yâ ti alango osio so lo kui so? Lazare atene pëpe so ni gue lani na mbeni ndo nde na yâ ti alango osio ni so, ën-en. Lo yeke nga pëpe na mbeni yingo so akui ape, si ague na yayu. Na ngoi so Jésus azingo Lazare, lo zi lo na nzoni ndo na tere ti Nzapa na yayu kâ la si lo kiri na lo na sese ge ape. Me Lazare ni ayeke lani na ndo wa na yâ ti alango osio ni so? Lo lango lani gi na yâ ti dû ti kuâ.—Zo-ti-fa-tene 9:5, 10.

Girisa pëpe so Jésus ahaka lani kuâ na lango so a yeke zingo zo ni gi na zingongo ti akuâ. Mbaï ni atene: “‘Kamarade ti e Lazare alango, me mbi yeke gue kâ ti zingo lo na lango ni.’ Tongaso adisciple ni atene na lo: ‘Seigneur, tongana lo yeke lango, fade tere ti lo ayeke kaï.’ Me Jésus ayeke sara  tënë ti kuâ ti Lazare. Ye oko, ala bâ ti ala atene lo yeke sara tënë ti lango so zo ayeke lango ti wu tere ti lo. Ni la, na ngoi ni so, Jésus atene polele na ala atene: ‘Lazare akui awe.’” (Jean 11:11-14). Tongaso, Jésus akiri na Lazare na fini nga lo mû lo na afami ti lo. So pendere matabisi si Jésus amû na sewa ni so!

Zingongo so Jésus azingo lani na azo na kuâ na ngoi so lo yeke na sese ge ayeke gi mbeni kete yanga ti ye so lo yeke sara ande na ngoi so lo yeke duti Gbia na yâ ti Royaume ti Nzapa. * Ni la, na ngoi ni so ande, Jésus ayeke zingo azo so alango na yâ ti dû ti kuâ. Ndali ni la si lo tene: “Mbi yeke zingongo ti akuâ.” Tara ti bâ nzerengo tere so mo yeke duti ande na ni ti bâ afami ti mo so a zingo ala! Nga tara ti bâ nzerengo tere ti azo ni so a yeke zingo ande ala so!—Luc 8:56.

Jésus atene na Marthe, lo tene: “Zo so amä na bê na mbi, atâa lo kui, lo yeke kiri na fini. Na zo kue so ayeke na fini nga lo mä na bê na mbi, lo yeke kui pëpe, lâ oko pëpe.” (Jean 11:25, 26). Azo so Jésus ayeke zingo ande ala na ngoi ti komandema ti lo ti ngu saki oko ayeke duti ande na fini kpu na kpu gi tongana ala mä na bê biani na lo.

Na peko ti so Jésus atene akpengba tënë so na ndo ti zingongo ti akuâ, lo hunda Marthe, lo tene: “Mo mä na bê na tënë so?” Marthe ni atene: “En, mbi mä na bê na ni, Seigneur. Mbi mä na bê awe so mo yeke Christ, Molenge ti Nzapa.” (Jean 11:26, 27). Ka mo, mo kue mo ye ti duti na mara ti mabe ti Marthe so na ndo ti tënë ti zingongo ti akuâ? Ti duti na ni, kozoni kue a yeke nzoni mo manda ye na ndo ti ye so Nzapa aye ti sara ndali ti azo kue (Jean 17:3; 1 Timothée 2:4). Mandango ye ni so la si ayeke gue na mo ti duti na mabe. Ni la, tongana mo ye, mo lingbi ti hunda na aTémoin ti Jéhovah ti fa na mo ye so Bible afa na ndo ti tënë ni so. A yeke nzere ande na ala mingi ti sara lisoro na mo na ndo ti pendere beku ti zingongo ti akuâ so.