Na kete ti mbi, e lango nduru na Leipzig, na mbage ti Tö ti Allemagne. Ndo ni so ayo na frontière ti Tchèque nga na ti Pologne ape. Na ngoi so mbi yeke na ngu omene, a tokua babâ ti mbi ti sara kua na kodoro wande, na e kue e gue. Kozoni, e gue na Brésil, na use ni, e gue na Équateur.

Tongana mbi wara ngu 14, a tokua mbi na mbeni ekole na Allemagne. Teti so babâ na mama ti mbi ayeke yongoro kâ na Banga ti États-Unis, mbi wani la mbi yeke gi kobe ti yanga ti mbi. Ye so asara si mbi komanse ti pensé gi na mbi wani. Na mbi hinga pëpe ye so asarango ye ti mbi ni ayeke sara na ndo ti ambeni zo.

Na ngoi so mbi wara ngu 17, babâ na mama ti mbi akiri na Allemagne ni. Na tongo nda ni, mbi kiri na gbe ti ala. Me, teti so mbi ye ka ti sara gi ye ti li ti mbi, a yeke lani ngangu na mbi ti woko tere ti mbi na gbe ti ala. Ni la, tongana mbi wara ngu 18 awe, mbi quitté yanga-da ni.

Mbi duti kpô gbä, mbi ye gi ti hinga ndani so mbi yeke na fini. Na peko ti so mbi bâ aye nde nde so azo ayeke sara nga na abungbi nde nde so azo asigigi na ni, mbi bâ so nzoni ye so mbi lingbi ti sara na yâ ti gigi ti mbi, a yeke ti tene mbi fono mbi bâ apendere ye so ayeke na ndo ti sese biani, kozo ti tene azo abuba ni.

Mbi vo mbeni moto, mbi zia kodoro ti Allemagne ni, mbi gue na Afrika na moto. Me kete na pekoni, mbi kiri encore na Poto ti leke moto ti mbi ni. Ambeni lango kete na pekoni, mbi gue na yanga ti mbeni kota ngu na Portugal. Kâ, mbi mû desizion ti zia lege ti voyagengo na moto ni ti komanse ti voyagé gi na bateau.

Mbi tï na peko ti ambeni maseka so ayeke leke tere ti ala ti voyagé na lê ti kota ngu-ingo ti Atlantique. A yeke na popo ti ala la mbi na wali ti mbi Laurie e wara tere. Kozoni, e gue na azoa ti Antilles, na pekoni, e gue na Porto Rico e ngbâ kâ kete si e ga ti kiri na Poto. E sara nzara ti wara kete bateau ti ti e wani ti fono na ni. E gi ni teti anze ota tongaso, mawa ni ayeke so na ngoi so ade e wara ni ape, a mû mbi ti sara kua ti turugu na Allemagne.

Mbi sara nze 15 tongana turugu ti lê ti ngu na Allemagne. Na yâ ti angoi ni so, mbi na Laurie e sara mariage nga e leke ti ngbâ ti sara avoyage ti e ni. Ngoi kete kozo ti tene mbi komanse kua ti turugu ni, e vo coque ti mbeni kete bateau. Na ngoi so mbi  komanse kua ti turugu ni awe, yeke yeke e komanse ti lekere kete bateau ti e ni. E sara programme ti tene e sara kodoro gi na yâ ti kete bateau ni so tongaso si e lingbi ti fono ti bâ apendere ndo. A yeke na ngoi ni so la, so ti tene na peko ti kua ti turugu ni me kozo ti tene e hunzi lekerengo bateau ni, la si aTémoin ti Jéhovah aga afa tënë na e si e komanse ti manda Bible.

Na tongo nda ni, mbi bâ ti mbi mbi tene mbi yeke na gbâ ti ye ti changengo ni na yâ ti gigi ti mbi ape, ngbanga ti so mbi na wali ti mbi e sara mariage awe, nga mbi zia lege ti nyongo manga awe (aÉphésien 5:5). Nga, teti so e sara programme ti voyagé na yâ ti dunia ni kue, mbi pensé ti mbi mbi tene a yeke nzoni ti sara kota effort tongaso, ti mû fini ti e ti fono ti bâ apendere ye ti maboko ti Nzapa.

Andâ mbi yeke na aye ti changé na yâ ti gigi ti mbi, mbilimbili ti changé ambeni fason ti sarango ye ti mbi. Teti so mbi yeke zo ti baba nga mbi yeke pensé gi na mbi wani, mbi yeke fâ tere ti mbi gi na ndo ti akode so mbi yeke na ni nga na akua so mbi yeke sara. Fini ti mbi angoro lani gi na ndo ti mbi wani.

Mbeni lâ, mbi diko fango ye ti Jésus so ayeke na Matthieu, chapitre 5-7. Na tongo nda ni, mbi mä yâ ti tënë so Jésus atene na ndo ti dutingo na ngia so nzoni ape. Na tapande, lo tene ngia ayeke na azo so nzara ti mbilimbili asara ala tongana nzara ti kobe na ti ngu (Matthieu 5:6). Ni la, mbi hunda tere ti mbi mbi tene, ‘Tongana zo abezoin mbeni ye, a lingbi ti sara si lo duti na ngia ni tongana nyen?’ Me, teti so mbi ngbâ lakue ti manda ye, mbi ga ti bâ so e kue e bezoin aye ti yingo wala tënë ti Nzapa. Me e doit ti sara tere ti e kete ti hinga bezoin ni so si e lingbi ti kaï ni. Ye so ague oko na tënë ti Jésus so: “Ngia ayeke na ala so ahinga so ala yeke na bezoin ti aye ti yingo.”—Matthieu 5:3.

Na peko ti so e komanse ti manda Bible na Allemagne, e gue na France, na pekoni e gue na Italie. Na ando kue so e gue dä, e tingbi tere na aTémoin ti Jéhovah. Ye so adö bê ti mbi mingi ayeke tâ yengo tere nga na beoko so ayeke na popo ti ala. Mbi bâ so aTémoin ayeke biani mbeni kota sewa ti aita (Jean 13:34, 35). Asi na mbeni ngoi, mbi na Laurie e wara batême e ga aTémoin ti Jéhovah.

Na peko ti batême ti e ni, mbi ngbâ ti gi ti changé afason ti sarango ye ti mbi ni. Mbi na Laurie e mû bateau ti e ni e gue na mbage ti Afrika juska na kota ngu-ingo ti Atlantique ti si na États-Unis. E yeke gi e use na yâ ti kete bateau ni na milieu ti kota ngu ni so. Kâ la si mbi ga ti bâ so mbi yeke ye oko ape tongana a haka mbi na Nzapa so acréé aye kue. Teti so mbi yeke na ye oko ti sarango ni na milieu ti kota ngu ni so ape, mbi fâ tere ti mbi na dikongo Bible. Mbaï ti fini ti Jésus, na ngoi so lo yeke lani ge na ndo ti sese, apika bê ti mbi mingi. Jésus ayeke lani zo so siokpari oko ayeke na tere ti lo ape nga akode so lo yeke na ni ahon ti azo kue, me lâ oko lo pika kate ti lo na ni ape. Fini ti lo angoro lani gi na ndo ti lo wani ape, me gi na ndo ti Babâ ti lo ti yayu awe.

Na ngoi so mbi gbu li ti mbi na ndo ti tapande ti Jésus so awe, mbi ga ti bâ so mbi doit ti zia Royaume ti Nzapa na kozo ndo na yâ ti fini ti mbi ahon ti fâ tere ti mbi ti sara gi ye so mbi ye (Matthieu 6:33). Ni la, tongana e si na États-Unis awe, e mû desizion ti zia lege ti avoyage ti e ni na ti ngbâ kâ ti zia li ti e gi na ndo ti kua ti Nzapa.

Ândö, na ngoi so mbi ngbâ lani ti sara gi ye ti li ti mbi so, mbi yeke nga lani na siriri ape, gingo bê ahon ndo ti mbi na ndo ti adesizion so mbi yeke mû. Me fadeso, mbi wara tâ lingu ti ndara so alingbi ti fa lege na mbi awe (Ésaïe 48:17, 18). Mbi hinga nga tâ ndani so mbi yeke na fini, so a yeke ti tene mbi sara kua ti Nzapa nga mbi mû maboko na ambeni zo ti manda ye na ndo ti Nzapa ni.

So mbi na Laurie e yeke bata andia ti Bible, ye so asara si songo ti mbi na lo akiri akpengba mingi. Mbi na lo e dü mbeni pendere molenge ti wali, so lo nga kue lo hinga Jéhovah fadeso awe nga lo ye Jéhovah ni.

Na yâ ti gigi ti e, e wara nga akpale. Me, na ngangu ti Jéhovah, e yeke ngbâ lakue ti sara kua ti lo nga ti ngbâ ti zia bê ti e na lo.—aProverbe 3:5, 6.