Azo kutu mingi na ndo ti dunia mobimba azia bê ti ala kue gi na ndo ti Royaume ti Nzapa. Ala mû gi peko ti tapande so Jésus azia, lo so lo fa na adisciple ti lo ti tene ala sambela, ala tene: “E ye royaume ti Mo aga. E ye ala sara na sese ye so bê ti Mo aye.” —Matthieu 6:10, La Sainte Bible en sango.

Me mawa ni ayeke so, na ngoi so azo mingi ayeke bi bê ti ala na ndo ti Royaume ti Nzapa, na bango ni, mingi ti a-eglize abi bê ti ala na ni mingi ape. A yeke ndali ni la mbeni wasungo mbaï, so iri ti lo ayeke Herbert George Wells, atene so Jésus abâ lani na nene ni mingi fango ye so lo iri ni Royaume ti yayu, me na yâ ti mingi ti a-eglize, azo ni abâ ti ala fango ye ni so na nene ni ape.

Me ti aTémoin ti Jéhovah ayeke nde, ala yeke gboto lê ti azo mingi na ndo ti Royaume ti Nzapa. Bâ gi mbeni tapande ni: Mbeti so mo ngbâ ti diko ni so ayeke kota mbeti-sango ti e la. A sigigi na ni na ayanga ti kodoro 220. Wungo ni kue, so a pete ni nze na nze, a yeke nduru na million 46. Ye so asara si, na ndo ti dunia mobimba, lo la lo yeke mbeti-sango so a kangbi ni mingi. Mo hinga kota tokua so mbeti ni so ayeke fa? Bâ gi iri ti mbeti ni kue: Tour ti Ba Ndo Afa Tene ti Royaume ti Jéhovah.  *

E aTémoin ti Jéhovah e sara akota effort ni so ti fa tënë ti Royaume ti Nzapa ndali ti nyen? Mbeni raison ni oko ayeke so, e hinga e tene Royaume ti Nzapa la ayeke kota mama-tene ti yâ ti Bible, so ayeke kota buku so ayeke na ndo ti dunia mobimba kue. Nga, e hinga na bê ti e kue so gi Royaume ti Nzapa oko la si ayeke vrai yorö ti akpale ti azo laso.

Tongana aTémoin ti Jéhovah ayeke gboto lê ti azo na ndo ti Royaume ti Nzapa, a yeke gi tapande ti Jésus la ala yeke mû pekoni so. Lani tongana Jésus ayeke na ndo ti sese ge, fini ti lo aluti gi na ndo ti Royaume ti Nzapa nga fango tënë ti lo kue angoro gi na ndo ni (Luc 4:43). Ngbanga ti nyen tënë ti Royaume ti Nzapa agbu lani bê ti Jésus tongaso? Nga Royaume ni ayeke ga na mo anzoni ye wa? Tongana mo ye ti wara akiringo tënë ti Bible na ndo ni, diko a-article so aga na pekoni so.