Royaume ti Nzapa ayeke mbeni gouvernement so ayeke na yayu. Lani Jésus atene na adisciple ti lo ti sambela ti tene Royaume ni so aga, ngbanga ti so Royaume ni la alingbi ti kiri na sarango ye ti mbilimbili nga na siriri na ndo ti sese. Gouvernement ti azo alingbi pëpe ti zi biaku biaku sarango ngangu na azo, kengo mba senge senge wala kobela. Me, Royaume ti Nzapa la alingbi ti zi aye so kue, na lo yeke sara ni ande. Nzapa asoro Jésus, Molenge ti lo, ti duti Gbia ti Royaume ni. Jéhovah asoro nga ambeni disciple ti Jésus ti komande legeoko na lo na yâ ti Royaume ni so. —Diko Luc 11:2; 22:28-30.

Na yâ ti kete ngoi, Royaume ti Nzapa ayeke lungula azo kue so ake komandema ti Nzapa. Ni la, tongana e sambela ti tene Royaume ti Nzapa aga, andâ e yeke hunda ti tene gouvernement ti Nzapa aga amû place ti agouvernement ti azo. —Diko Daniel 7:13, 14; Apocalypse 11:15, 18.

Jésus la alingbi ti duti Gbia ti Royaume ni ngbanga ti so lo hinga ti bâ mawa ti azo. Teti so lo yeke Molenge ti Nzapa, lo nga kue lo yeke na ngangu ti mû maboko na azo so ayeke toto ti tene Nzapa amû maboko na ala. —Diko Psaume72:8, 12-14.

Royaume ti Nzapa ayeke ga ande na anzoni ye na azo kue so ayeke sambela na bê ti ala kue ti tene Royaume ni aga, nga so ala yeke sara ye alingbi na aye ti bê ti Nzapa ni. Tongana mo manda Bible ti hinga ye na ndo ti Royaume ni, mo yeke regretté lâ oko ape. —Diko Luc 18:16, 17; Jean 4:23.