“Aye kue so mo ye, fa ni na mbi, na a yeke nzere ande na mbi ti sara ni.” Kite ayeke dä pëpe so, tongana a yeke mbeni zo so mo hinga lo lâ oko ape wala mbeni zo so mo hinga lo gi tongaso, mo yeke tene mara ti tënë ni so na lo ape. Me, tongana a yeke mbeni kota kamarade ti mo, mo yeke tene na lo mara ti tënë ni so sân gingo bê. Akota kamarade ayeke ka nduru ti sara ye so anzere na mba.

Bible atene so Jéhovah ayeke sara lakue ye so lo hinga lo tene ayeke zia ngia na bê ti awakua ti lo. Na tapande, Gbia David, so ayeke lani na kpengba songo na Nzapa, atene: “O L’Éternel Nzapa ti mbi, kusala ti kpene ti Mo, na bibe ti Mo teti e awu mingi; . . . zo alingbi diko kue pëpe.” (Psaume 40:6). Na ndo ni kue, Jéhovah asara même aye so alingbi ti zia ngia na bê ti azo so ade ti hinga lo ape, lo mû na ala “akobe mingi mingi na lo sara si ngia asi bê ti ala.”—Kusala 14:17.

Teti so Jéhovah ayeke sara gi ye so alingbi ti zia ngia na bê ti azo, a yeke nga na lege ni ti tene azo so aye ti ga kamarade ti Nzapa asara aye so alingbi ti “mû ngia na bê ti” lo (aProverbe 27:11). Me, nyen la mbilimbili mo lingbi ti sara ti zia ngia na bê ti Nzapa? Bible afa ye ni, a tene: “Ala girisa pëpe ti sara ye ti nzoni nga ti kangbi ye na zo, teti a yeke mara ti asandaga tongaso si anzere na Nzapa.” (aHébreu 13:16). Ye so aye ti tene so, ti sara nzoni nga ti kangbi ye na mba ti e la ayeke akota ye so alingbi ti zia ngia na bê ti Jéhovah?

Bible atene: “Tongana mabe ayeke dä pëpe zo alingbi ti nzere na lê ti Nzapa pëpe.” (aHébreu 11:6). A yeke nga nzoni e hinga so, lani, a yeke na peko ti so “Abraham amä na bê na Jéhovah” la si “a iri lo ‘kamarade ti Jéhovah.’” (Jacques 2:23). Jésus afa nga so, tongana e ye ti wara tufa ti Nzapa, a yeke kota ye ti tene e “mä na bê na Nzapa”. (Jean 14:1). Me, mo yeke sara tongana nyen ti wara mabe so Nzapa ayeke gi ni na mbage ti azo so lo ye ti ga na ala na mbage ti lo so? Mo lingbi ti to nda ni na mandango Bible lakue. Na sarango tongaso, mo yeke wara “tâ hingango ye ti ye so bê ti Nzapa aye” nga mo yeke hinga ye so mo lingbi ti sara ti “mû ngia mingi na lo.” Na pekoni, teti so hingango ye ti mo na ndo ti Jéhovah ayeke kono nga so mo yeke sara ye alingbi na ye so lo hunda, fade mabe ti mo na mbage ti lo ayeke kono nga lo yeke ga nduru mingi na mo.—aColossien 1:9, 10.