Mbi kono na yâ ti mbeni ndo so warango kua ayeke ngangu dä, na yâ ti gbata ti Montréal. Babâ ti mbi akui na ngoi so mbi yeke na nze omene, na a yeke mama ti mbi lo oko la abata e. A dü e miombe, na mbi la mbi yeke tanga ti molenge ni.

Na ngoi so mbi yeke kono, fini ti mbi ti lâ oko oko angoro gi na tere ti mbangi, ajeu ti nginza, sarango ye ti ngangu na zo nga sarango kamarade na asioni zo. Na ngoi so mbi yeke na ngu bale-oko, mbi komanse ti gue tokua na awali-ndumba nga na a-escroc. Mbi yeke tene mvene lani mingi, nga a nzere ka lani na mbi mingi ti escroqué azo na alege kue so mbi peut ti sara ni. Aye ni so aga lani tongana mbeni ye ti tere ti mbi.

Na ngoi so mbi yeke lani na ngu 14, mbi ga mbeni kota escroc. Mbi yeke vo lani aye so a sara ni na lor, na tapande amontre, aye ti maboko, abague. Mbi yeke sara na ndo ni 14-carat, na pekoni mbi gue mbi kä ni na azo na ndo ti lege nga na place ti akango ye. A nzere ka lani na mbi mingi ti wara gbâ ti nginza sân ti sara kota effort. Na mbeni ngoi, nginza so mbi wara na yâ ti lango oko asi dollar 10 000!

Na ngoi so mbi wara ngu 15, a tomba mbi na yâ ti da so a yeke fa lege na amolenge ti kpengbango-li dä. Ye so asara si mbi hinga ndo so mbi peut ti lango dä ape. Mbi yeke lango lani na bê ti lege, na yâ ti aparc wala na ndo ti akamarade.

Azo ti Lapolice ayeke hunda lani yâ ti mbi mingi, ngbanga ti so mbi yeke escroqué lani azo mingi. Teti so mbi yeke kä ka akungba ti nzi ape, a bi mbi lâ oko na da ti kanga ape. Me, mbi yeke futa lani anginza mingi ndali ti sarango ye ti escroc nga ndali ti kango aye sân ti tene a mû na mbi lege ti sara ni. Sân mbeto, mbi yeke bata lani nginza ti a-escroc. A lingbi lani ti sara sioni na mbi ndali ni, ye so asara si na ambeni ngoi, mbi yeke tambela na ngombe na tere ti mbi. Na ambeni ngoi, mbi sara kua ndali ti ambeni zo so kua ti ala ayeke ti sara sioni na zo.

Kozo ngoi so mbi mä tënë ti Nzapa, a yeke na ngoi so mbi yeke na ngu 17. Mbi yeke vivre lani na mbeni ndeko ti mbi na ngoi so aTémoin ti Jéhovah akomanse  ti manda Bible na lo. Me, teti so mbi ye lani andia ti Bible ape, mbi dö lo mbi zia na mbi gue na peko ti mbeni ndeko ti mbi ni nde.

Kota changement ni aga na ngoi so aTémoin akomanse ti manda Bible na use ndeko ti mbi ni nga kue! Lo changé asarango ye ti lo, na li ti mbi akpe kue ti bâ so lo ga kpô mingi ahon ti kozo nga lo yeke sara ye na kangango bê. Na ngoi so a tisa mbi lani ti gue na mbeni bungbi na Da ti Royaume ti aTémoin ti Jéhovah, mbi yeda. Azo ni ayamba mbi lani na ngia, ala yeke sara ye na nengo tere nga na nzoni bê. Ti mbi bango mara ti ye tongaso la! Lâ oko azo ti sewa ti mbi aye mbi tongaso ape. Depuis so mbi yeke molenge juska mbi kono na ni, a sara ye lani na mbi na ndoye ape nga na nzoni bê ape. Ye so mbi gue mbi bâ kâ na mbage ti aTémoin ti Jéhovah so, a yeke tâ ye so mbi yeke na bezoin ni la. Na ngoi so aTémoin ti Jéhovah ni ahunda ti manda Bible na mbi, mbi yeda na bê ti mbi kue.

Ti bâ ni nzoni, aye so mbi manda na yâ ti Bible la asö lani fini ti mbi. Mbi na ambeni mba ti mbi use, e leke lani ti sara mbeni braquage ti tene amû lege na mbi ti futa na abon ti jeu ti nginza so angbâ na li ti mbi, so ahon dollar 50 000. Merci so mbi gue lani ape so! Amba ti mbi ni ague ti ala lani. Me, a gbu mbeni oko, na a fâ mbeni oko ni.

Tongana mbi yeke manda lani Bible, mbi ga ti bâ so a lingbi mbi changé aye mingi na yâ ti gigi ti mbi. Na tapande, 1 aCorinthien 6:10 atene: “Azo ti nzi, wala azo ti sarango bê ti ye, wala angbâa ti sämba, wala azo ti zongango ndo, wala azo ti mungo ye ti zo na likisi, royaume ti Nzapa ayeke ga ti ala pëpe.” Na ngoi so mbi diko lani versê so, ngu ti lê ti mbi asigigi ngbanga ti so mbi ga ti bâ so mbi sara aye ti sioni mingi. Mbi bâ so a lingbi mbi changé tâ gi fini ti mbi kue awe (aRomain 12:2). Mbi yeke lani zo so aye sarango ye ti ngangu mingi nga gigi ti mbi angoro gi na tere ti mvene.

Me mbi manda nga na yâ ti Bible so, Jéhovah ayeke sara nzoni bê na zo nga lo yeke pardonné zo (Ésaïe 1:18). Mbi sambela lani mingi, na mbi toto na Jéhovah ti mû maboko na mbi ti sigigi na yâ ti mara ti vie ni so. Na mungo maboko ti lo, mbi wara lege ti changé yeke yeke. Mbeni kota ye so mbi sara lani ayeke so, mbi na ndeko ti mbi ni e sara mariage.

Mbi yeke lani na ngu 24 la mbi sara mariage nga mbi yeke na amolenge ota. Tongaso, mbi doit ti gi lani ti sara mbeni kua so ayeke na lege ni. Me, mbi hinga lani mbeti mingi ape nga mbi yeke na diplôme ape. Ge encore, mbi kiri mbi sambela Jéhovah mingi. Na pekoni mbi komanse ti gi kua. Mbi tene na azo so ayeke mû azo na kua so, mbi ye ti changé fini ti mbi nga mbi ye ti sara mbeni kua so ayeke na lege ni. Na ambeni ngoi, mbi fa na ala so mbi yeke manda Bible nga mbi ye ti ga mbeni nzoni molenge ti kodoro. Gbâ ti apatron ti ando ti kua ni ake ti mû mbi na kua. Na nda ni, na peko ti so mbi fa aye so mbi yeke sara na yâ ti gigi ti mbi ti ândö, mbeni patron ni atene: “Mbi hinga nga vrai raison so apusu mbi ape, me mbeni ye atene na mbi so a lingbi mbi mû mo na kua.” Mbi hinga lani so ayeke kiringo tënë na asambela ti mbi la. Ambeni ngoi na pekoni, mbi na wali ti mbi kue e wara batême, e ga aTémoin ti Jéhovah.

Tongana mbi ngbâ na fini laso, a yeke ndali ti so mbi yeke sara ye alingbi na afango ye ti Bible, nga mbi yeke sara ye tongana ti atâ Chrétien. Mbi yeke na mbeni nzoni sewa. Mbi hinga so Jéhovah apardonné mbi awe, nga mbi yeke na mbeni nzoni conscience.

A sara ngu 14 tongaso awe la mbi yeke sara kua ti fango tënë ti Nzapa teti angbonga mingi ti mû maboko na azo ti hinga ye so Bible afa. Nga ade ti ninga ape, wali ti mbi kue atï nga dä na peko ti mbi na yâ ti kua ni so. Na yâ ti angu 30 so ahon, mbi yeke na ngia ti mû maboko na azo 22, so mbi na ala e sara kua oko, ti ga azo so ayeke voro Jéhovah. Mbi ngbâ ti gue na aplace ti kango ye, me ti so ni so, mbi yeke gue kâ ti escroqué azo pëpe, tongana ti so mbi yeke sara lani. Mbi yeke gue kâ ti fa na ala tënë ti Nzapa. Mbi ye ti fa na ala so ala lingbi ti duti ande na fini na yâ ti mbeni fini dunia so a-escroc ayeke duti ande na yâ ni kete ape.—Psaume 37:10, 11.