YE SO BIBLE AFA: “Ala ngbâ ti . . . pardone mba na bê ti ala kue, tongana mbeni zo ayeke na tënë ti dema na tere ti mba ti lo. Gi tongana ti so Jéhovah apardone ala na bê ti lo kue, ala nga ala sara tongaso.”—aColossien 3:13.

Ye so aye ti tene nyen? Na yâ ti Bible, a haka siokpari na bon ti nginza nga a haka pardon na zingo bon na li ti mbeni zo (Luc 11:4). Mbeni bakari atene so tënë ti yanga ti Grec so a kiri peko ni na “pardonné”, a ye ti tene “ti zi bon na li ti mbeni zo, na hundango ni encore ape.” Tongaso, tongana e décidé ti pardonné mbeni zo so asara sioni na e, e yeke ku pëpe mbeni ye na pekoni. So e yeda ti pardonné zo ni so, a ye ti tene pëpe so e yeda na sioni sarango ye ti zo ni wala a ye pëpe ti fa so sioni so lo sara na e ason e ape. Me, a ye gi ti fa so e ye ti sara ngonzo ape, atâa so e yeke na droit ti dema tere ti e.

Tënë ni alingbi na ngoi ti e? E kue e yeke sara ka afaute, ndali ti so e yeke na siokpari na yâ ti tere ti e (aRomain 3:23). Tongaso, a yeke nzoni ti tene e duti nduru ti pardonné azo, ndali ti so lawa lawa, e yeke na bezoin ti tene azo apardonné e nga. Na ndo ni, tongana e soro ti pardonné azo, e nga kue e yeke wara anzoni ye na pekoni. E tene tongaso ngbanga ti nyen?

Tongana e duti gi na ngonzo, e bata zo na bê nga e ke ti pardonné zo, e yeke sara gi sioni na tere ti e wani la. Mara ti aye tongaso alingbi ti buba ngia so e yeke na ni na yâ ti fini ti e nga ti sara si e yeke gi na vundu. Ye so alingbi nga ti ga na e kpale ti seni. Yoichi Chida nga na Andrew Steptoe, so ayeke ambeni kota docteur, atene mbeni tënë so ayeke na yâ ti mbeni mbeti-sango (Journal of the American College of Cardiology), so a tene: “Ade ti ninga ape, ambeni gingo nda ti ye afa so kamba ayeke na popo ti sarango ngonzo, batango zo na bê na kobela ti bê.”

Tongana e pardonné azo na bê ti e kue, e yeke wara anzoni ye na pekoni. Na tapande, e yeke mä tere na amba ti e, e yeke na siriri nga na nzoni songo na ala. Me kota ye ni ahon kue, e yeke mû tapande ti Nzapa so ayeke pardonné na bê kue azo so asara siokpari si ala changé bê ti ala. Lo yeke ku nga na mbage ti e ti tene e nga kue e sara tongaso.—Marc 11:25; aÉphésien 4:32; 5:1.