Tongana nyen mo peut ti fa so mo bâ fini na nene ni?
NGBANGA TI NYEN LA A YEKE KOTA YE TI BÂ FINI NA NENE NI?
Tongana mo sara aye so apeut buba seni ti mo wala ti ambeni zo, ye so afa so mo bâ fini ti mo nga na ti ambeni zo na nene ni ape.
-
Nyongo manga ayeke sara si zo awara cancer na ayeke buba ngangu so terê ti e ayeke na ni ti tiri na akobela. Mingi ti azo so akui na cancer ti poumon ayeke ndali ti so ala yeke nyon manga wala ndali ti so azo so ayeke na terê ti ala ayeke nyon ni.
-
Ngu oko oko, tirengo gbâ ti azo na ngombe asara si azo mingi ayeke tï na yâ ti kota vundu. Mbeni gingo nda ti ye afa so “mingi ti azo so asö kuâ na peko ti so a pika ngombe na yâ ti a-ekole ayeke tï na yâ ti kota vundu nga ayeke bâ pasi na kobela ti li angu mingi na peko ni.”
-
Azo so ayeke nyon sämba wala adrogue na so ayeke kpe na oto apeut ti zia fini ti azo so ayeke hon na terê ti lege na yâ ti kpale. Tongana azo abâ fini na nene ni ape, asenge zo apeut ti wara kä.
YE SO MO PEUT TI SARA
Bata seni ti mo. Lege ayeke dä ti zia aye tongana nyongo manga, manga ti électronique, nyongo sämba ahon ndö ni wala nyongo mbangi. Mara ti aye tongaso ayeke buba seni ti mo nga afa so mo bâ fini ti azo so ayeke na terê ti mo na nene ni ape, ye so andu nga azo ti sewa ti mo.
Pensé na nzoni duti ti mo nga na ti amba ti mo. Ti kpe ti tene ambeni ye ti sioni asi, leke aye so abuba na terê ti da ti mo. Sara hange na temps so mo yeke kpe na oto, nga bâ si aye ti terê ti oto ti mo asara kua nzoni. Zia pëpe si azo apusu mo ti sara akua so apeut ti sara si mo wara kota kä wala kuâ.
Sara ye na azo na nzoni bê. Tongana e bâ fini na nene ni afa so e sara ye na nzoni bê na azo kue, atâa mara ti ala, kodro ti ala, ala yeke na mosoro, ala yeke awayere, ala hinga mbeti wala pëpe. Na ndö ni, tënë ti kengo zo senge senge la ayeke sara si bira nga na sarango ye ti ngangu amû ndo na yâ ti dunia.
TONGANA NYEN LA ATÉMOIN TI JÉHOVAH AYEKE AIDÉ AZO TI BÂ FINI NA NENE NI?
A-Témoin ti Jéhovah ayeke aidé azo ti tene ala bata seni ti ala. Aye so e yeke fa na azo na yâ ti Bible ayeke aidé ala ti zia lege ti asioni sarango ye so apeut ti buba seni ti ala.
E yeke sara ye alingbi na andia ti sécurité na yâ ti aprojet ti construction ti e. Avolontaire so ayeke aidé ti leke ando so e yeke sara abungbi dä nga na ambeni ndo ni nde so a yeke sara a-ekole ti mandango Bible dä, a yeke formé ala ti kpe ti sara a-accident na aplace ti kua ni. A yeke vérifié ada ti e ni lakue ti tene ague oko na andia ti sécurité ti ndo ni.
E yeke aidé azo so awara akota kpale. Na yâ ti anze 12 so ahon ade ti ninga ape, grâce na a-offrande so azo amû, e mû maboko na azo 200 so awara akota kpale na yâ ti dunia kue nga e dépensé presque million 12 ti dollar ti aidé aita so ayeke na yâ ti akpale.
Na temps so kobela ti Ébola akomanse ti mû ndo na mbage ti Afrique de l’Ouest (2014) nga na République Démocratique du Congo (2018), e fa na azo aye so ala peut ti sara ti tene sioni kobela so amû ndo ape. E tokua azo ti causé na groupe ti azo ni na ndö ti tënë so li ni ayeke “Mango yanga ayeke sö fini ti zo.” E zia ngu ti sukulango maboko na yanga ti aDa ti Royaume oko oko nga e fa na aita ambeni ye so ala peut ti sara ti tene kobela ni amû ndo ape.
Na Sierra Leone, mbeni ndokua ti radio agonda aTémoin ti Jéhovah ndali so ala aidé amba ti ala aTémoin nga na azo so ayeke aTémoin ape ti sara ambeni ye ti tene kobela ti Ébola amû ala ape.
Mbeni place ti sukulango maboko na Da ti Royaume na temps so Ébola amû ndo na 2014 na Libéria
a Na ngoi ti azo ti Israël ti ândö, ye so a hunda so ayeke na lege ti ndara ndali ti so andu tënë ti sécurité ti azo ti sewa ni nga na ti ambeni zo.
