LEGE OKE LA MO MÄ AZO ATENE SO TI WARA NGIA NGA TI RÉUSSIR A LINGBI ZO ADUTI NA GBÂ TI MOSORO SI? Ndali ti so azo mingi ayeke na pensé ni so, ala yeke sara kua ngangu teti al’heure mingi tongaso si ala wara gbâ ti nginza. Me eskê mosoro la ayeke sara si zo aduti na ngia lakue? Aye so asi afa nyen na e?

Tongana ti so mbeni mbeti (Journal of Happiness Studies) atene, tongana e wara aye so zo ayeke tâ na bezoin ni ti ngbâ na fini awe, ti wara gbâ ti nginza encore na ndö ni ayeke sara pëpe si e kiri e wara ngia mingi. Me nginza la ayeke kpale ni ape. Mbeni mbeti sango (Monitor on Psychology) atene so “ti fâ terê ti mo ti gi [nginza] la ayeke sara si mo yeke na ngia ape.” Tënë so akpa terê mingi na wango so Bible amû, so a tene: “Ndoye ti nginza ayeke gunda ti mara ti asioni ye nde nde kue, nga na gingo ti wara mara ti ndoye ni so ambeni . . . [a]kpo terê ti ala na aye ti vundu mingi.” (1 Timothée 6:9, 10). Na popo ti aye ti vundu ni so a yeke wara aye wa?

ZO NI AYEKE GI BÊ MINGI NGA LO YEKE LANGO APE NDALI TI SO LO DOIT TI BATA AMOSORO TI LO. “Senge zo ti kua ayeke lango nzoni, atâa lo te ye mingi wala lo te ye mingi pëpe; me gbâ ti aye ti zo ti mosoro asara si lo lango pëpe.”—Zo-ti-fa-tene 5:12.

BÊ TI ZO NI AYEKE SON NDALI TI SO LO WARA PËPE NGIA SO LO KU NI. Zo ayeke wara vundu ni so ndali ti so nzara ti nginza ayeke mbeni ye so zo apeut ti kaï ni ape. Bible atene: “Zo so aye argent mingi, argent kue so lo wara ayeke lingbi lo pëpe, nga zo so aye mosoro mingi, mosoro kue so lo wara ayeke lingbi lo pëpe.” (Zo-ti-fa-tene 5:10). Ndoye ti nginza apeut nga ti pusu zo ti zia lege ti sarango aye so ayeke sara si lo duti na ngia, na tapande ti duti legeoko na sewa wala na akamarade ti lo nga ti voro Nzapa.

VUNDU AYEKE SARA ZO NI NGA BÊ TI LO AYEKE SON TONGANA LO PERDRE AMOSORO TI LO. “Fâ terê ti mo ti gi mosoro pëpe. Luti kete na fa so mo hinga ndo. Na ngoi so mo bi lê ti mo na ndö ni, a yeke dä encore ape, ndali ti so kpangbi ti aigle ayeke sigi na terê ni na a yeke huru ahon.”—aProverbe 23:4, 5.

ZIA BÊ GÏ NA NDÖ TI YE SO MO YEKE NA NI. “E ga na ye oko pëpe na yâ ti dunia so nga e lingbi ti mû ye oko pëpe ti hon na ni. Ni la, tongana e yeke na kobe, bongo na ndo ti lango, so alingbi na e awe.” (1 Timothée 6:7, 8). Azo so ayeke zia bê ti ala gï na ndö ti ye so ala yeke na ni, mingi ni ala yeke dema terê ti ala ape, nga ala yeke sara bê ti ye ape. Ndali ti so ala yeke gi pëpe ti wara aye so ahon ngangu ti ala, ala yeke gi bê ti ala senge senge ape.

MÛ YE NA AZO. “Mungo ye na zo aga na ngia mingi ahon warango ye na tïtî zo.” (Kusala 20:35). Azo so ayeke mû ka ye na zo ayeke na ngia mingi ndali ti so anzere ka na ala ti sara si amba ti ala aduti na ngia, même tongana ye so ala peut ti mû ni ayeke gï kete ngoi ti ala wala ngangu ti ala. Mingi ni na pekoni, ala yeke wara aye so zo alingbi ti vo ni vongo na nginza ape, aye tongana ndoye, nengo so azo amû na ala, atâ kamarade so ayeke mû ye nga na ala!—Luc 6:38.

BÂ AZO NA NENE NI AHON MOSORO. “A yeke nzoni ti te kugbe ti kasa na ndo so ndoye ayeke dä ahon ti te bagara ti mafuta na ndo so kengo terê ayeke dä.” (aProverbe 15:17). Nyen la versê so aye ti fa? Songo ti ndoye so ayeke na popo ti e na amba ti e ayeke kota mingi ahon mosoro. Nga, tongana ti so e yeke bâ ande, tongana e ye ti duti na ngia, a yeke kota ye ti duti na ndoye.

Sabina, mbeni wali so ayeke na Amérique du sud, abâ so awango ti Bible ayeke nzoni. Koli ti lo adö lo azia lani, na lo doit ti sara effort ti wara aye so lo nga na amolenge ti lo ti wali use ayeke na bezoin ni. Sabina ayeke sara lani kua use, na lakue lo doit ti zingo na ngbonga osio ti ndapre. Atâa so lo yeke na aye mingi ti sara, lo komanse ti manda Bible. Ye ti pekoni ayeke so wa?

Atâa so lo wara gbâ ti nginza ape, bango ndo ti lo na ndö ti gigi achangé ngangu mingi! Na tapande, lo wara ngia so zo ayeke wara tongana lo manda tënë ti Nzapa (Matthieu 5:3). Lo wara atâ kamarade na popo ti amba ti lo so lo na ala asara nzapa oko. Lo wara nga ngia tongana lo fa na amba ti lo aye so lo manda.

Bible atene: “A yeke hinga so ndara ayeke mbilimbili na lege ti aye ti peko ni.” (Matthieu 11:19, kete tënë na gbe ni). Ni la, tongana zo azia bê gï na ndö ti ye so lo yeke na ni, lo mû ye na azo nga lo bâ azo na nene ni ahon mosoro, lo yeke wara lakue aye ti nzoni na pekoni!