Ti pardonné zo aye ti tene ti zia ti sara ngonzo na terê ti zo so ason bê ti mo, nga ti bata zo ni na bê ape. Ti pardonné zo aye ti tene pëpe ti bâ faute so a sara na terê ti mo so tongana senge ye wala ti sara sanka ni.

MAMA-NDIA TI BIBLE: “Ala ngbâ ti kanga bê na amba ti ala na popo ti ala, na ti pardonné mba na bê ti ala kue, même tongana mbeni zo ayeke na tënë ti dema na terê ti mba ti lo.”—aColossien 3:13.

“Tongana mo ye mbeni zo, mo yeke gi pëpe ti bâ gï afaute ti lo, me mo yeke gi ti bâ anzoni sarango ye ti lo.”—Aaron.

Ti bata zo na bê ayeke sara sioni na seni ti mo nga ayeke sara si mo yeke na vundu. Nga, a peut ti buba songo ti mo na koli wala wali ti mo.

“Mbeni lâ, koli ti mbi ayeda so lo sara mbeni ye so ason mbi mingi. A yeke lani ngangu na mbi ti pardonné lo. Na nda ni mbi sara ni, me mbi regretté so mbi sara ni hio ape so. Ye ni so aga na e ambeni kpale senge senge.”—Julia.

HUNDA TERÊ TI MO

Tongana ti peko, koli wala wali ti mo asara mbeni ye wala lo tene mbeni tënë so ason mo, hunda terê ti mo:

• ‘Eskê mbi ninga ka na ngonzo ape?’

• ‘Eskê faute ni so ayeke kota faute mingi, ni la mbi bezoin ti tene lo tene na mbi pardon si? wala eskê mbi peut ti girisa gï na ndö ni yeke awe ape?’

SARA LISORO NA KOLI WALA WALI TI MO

• A yeke hunda ka na e ngoi oke ti tene e pardonné mba na popo ti e?

• Nyen la e peut ti sara ti tene e pardonné mba hio?

AWANGO

• Tongana koli wala wali ti mo ason bê ti mo, gi ti tene hio ape so lo sara mbana la.

• Pardonné koli wala wali ti mo na ye so lo sara so, na hinga so “fani mingi e kue e yeke pika gere ti e.”—Jacques 3:2.

“A yeke facile ti pardonné terê tongana ala use kue la asara faute, me a yeke ga ngangu tongana na bango ni a yeke faute ti mbeni oko. Ti yeda na pardon so mba ti mo ahunda na mo nga ti pardonné lo, a bezoin ti tene zo asara terê ti lo kete.”—Kimberly.

MAMA-NDIA TI BIBLE: “Gi ti leke tënë hio.”—Matthieu 5:25.