Na oko ngoi ni, ambeni zo abâ so amaseka so amû ngoi mingi na ndö ti Internet, a yeke wara akpale tongana . . .

• gango ngbâa ti a-appareil ti ala.

• gingo yanga ti azo.

• bango porno, atâa mo ye wala mo ye ape.

NGBÂA TI A-APPAREIL

Ambeni ye nga na ajeu so ayeke na ndö ti Internet, a leke ni ti tene zo aga ngbâa ni. Mbeni mbeti atene: “A-application so ayeke na ndö ti téléphone ti e, a leke ni ti tene lakue e yeke gï na ndö ti téléphone ti e.” Tongana e yeke bâ apublicité so ayeke sigi na lê ti a-appareil ti e, a yeke sara si awadengo buze awara nginza na lege ni.

TI GBU LI NA NDÖ NI: Eskê amolenge ti mo ayeke lakue gï na ndö ti a-appareil ti ala? Tongana nyen la mo peut ti aidé ala ti sara kua nzoni na ngoi ti ala?​—A-ÉPHÉSIEN 5:15, 16.

GINGO YANGA NA NDÖ TI INTERNET

Tongana azo ayeke na ndö ti Internet, ambeni ayeke sara ye na ngangu, ala yeke tene abuba tënë, ala yeke sara ye so ason bê ti zo, na a peut ti sara si aga gingo yanga.

Ambeni zo ayeke sara ye na lege ni ape na ndö ti aréseaux sociaux ndali ti so ala yeke gboto lê ti azo na ndö ti ala. Wala tongana mbeni zo abâ so a zia lo na yâ ti mbeni ye ape, na tapande, tongana lo bâ so a tisa lo na mbeni matanga ape apeut ti sara si bê ti lo ason.

TI GBU LI NA NDÖ NI: Eskê amolenge ti mo ayeke tene asioni tënë na ndö ti aréseaux sociaux? (aÉphésien 4:31). Ala yeke sentir terê ti ala tongana nyen tongana ala bâ so amba ti ala asara mbeni ye sân ala?

PORNO

A yeke ngangu ape ti bâ asioni ye na ndö ti Internet. Ambeni babâ na mama asara kua na mbeni application ti kanga lege na amolenge ti ala ti bâ asioni ye, me amarché kue ape.

Sexto ayeke tokuango na lege ti téléphone amessage, afoto wala avidéo so zo ni wani azia terê ti lo senge, so ndia apeut ti ke ni. Na ambeni kodro, a peut ti gue na mbeni zo na gbele ngbanga tongana lo tokua afoto ti bungbingo koli na wali na mbeni molenge.

TI GBU LI NA NDÖ NI: Tongana nyen la mo peut ti aidé amolenge ti mo ti ke ti bâ wala ti tokua afoto ti bungbingo koli na wali na lege ti Internet?​—A-ÉPHÉSIEN 5:3, 4.

FA YE NA AMOLENGE TI MO

Atâa so amolenge ahinga ti sara kua nzoni na a-appareil, ala bezoin ti tene a fa lege na ala. Mbeni buku afa so ayeke sioni mingi ti mû na amolenge mbeni smartphone wala mbeni appareil tongana ade a fa na ala ape ti sara kua na ni nzoni.

Bâ aye so mo ye ti sara ye alingbi na ni, wala sû apensé ti mo wani na mbeti.

• Fa na molenge ti mo ti sara ye na lege ni na ngoi so lo yeke gue na ndö ti Internet

• Aidé molenge ti mo ti tene bê ti lo ason ape tongana a zia lo na yâ ti mbeni ye ape

• Sara kue ti bata molenge ti mo na aye ti sioni so ayeke na ndö ti Internet

• Bâ aye so ayeke na yâ ti téléphone ti molenge ti mo ngoi na ngoi

• Fa l’heure oke la molenge ti mo apeut ti sara kua na téléphone ti lo lâ oko oko

• Ke na lo ti sara kua na a-appareil na temps so lo doit ti lango

• Ke na lo ti sara kua na a-appareil na temps so ala yeke te ye