Mo pensé so azo apeut ti kaï gbâ ti akpale so asara si e yeke na siriri ape, e duti nzoni ape nga e yeke gi bê ndali ti gigi ti kekereke ti e? Ti leke biani akpale ni, e doit ti hinga ye so ayeke na gunda ni.

Zia e mû mbeni tapande, mbeni koli so iri ti lo Tom atï kobela na pekoni lo kui. Nyen la asara si lo kui? Mbeni docteur ti hôpital so ague na lo dä kozoni si lo kui atene: “Na ngoi so terê ti lo akomanse ti son, zo oko agi ti hinga tâ vrai ye so ayeke na gunda ni ape.” Na bango ni, adocteur so abâ Tom kozo amû gï na lo ambeni yorö ti tene lo sentir terê ti lo bien.

Eskê a yeke mara ti fason so azo ayeke tara ti leke na akpale ti dunia so la ape? Na tapande ti kanga lege na tënë ti kengo ndia, agouvernement ayeke lu andia, ala yeke zia acaméra ti bâ aye so azo ayeke sara, nga ala yeke mû na aturugu aye so ayeke aidé ala ti sara kua ti ala nzoni. Aye ni so atara ti marché, me atâa so kue aye ni so aleke pëpe ye so ayeke tâ na vrai gunda ti kpale ni. Sarango ye ti azo afa ye so ayeke na yâ ti li ti ala, ye so ayeke na bê ti ala nga ye so ala ye.

Daniel, so avivre na mbeni kodro ti Amérique du Sud so ayeke pauvre, atene: “Lani gigi ti e ayeke nzoni, e yeke sara mbeto ti abraqueur ape. Me ti fadeso, mbeni gbata wala mbeni kete kodro so siriri ayeke na yâ ni ayeke dä ape. Kpale ti nginza so ayeke na yâ ti kodro ni amû lege na e ti bâ polele so mingi ti azo ayeke sara bê ti aye ti amba ti ala, nga ala bâ fini ti amba ti ala tongana senge ye.”

Elias * akpe mbeni bira so asi na Moyen-Orient. Na pekoni lo komanse ti manda Bible. Lo tene: “Na yâ ti gbata so mbi kono dä, asewa, akota zo ti kodro nga na akota zo ti nzapa ayeke encouragé amaseka-koli ti mû mbage na bira ni tongaso si iri ti ala awu. Na mbage ti awato ti ala, a yeke oko ye so a yeke hunda na amaseka-koli ti sara la! Aye so kue asara si mbi bâ so a yeke ye ti mawa ti sara confiance na azo ti komande.”

Bible ayeke na raison ti tene:

• “Abibe ti [zo] na bê ti lo ayeke gï na ndö ti ye ti sioni ngbene ye so lo de maseka.”​—Genèse 8:21.

• “Bê ti zo ayeke handa zo mingi ahon ambeni ye kue, nga a yeke sioni mingi. Zo wa la alingbi ti hinga bê ti zo?”​—Jérémie 17:9.

• “Aye so alondo na bê ayeke: sioni tënë, tënë ti fango zo, . . . tënë ti lango-sioni, tënë ti nzi, tënë ti témoin ti wataka.”​—Matthieu 15:19.

Azo apeut pëpe ti zi asioni bibe so ayeke na yâ ti bê ti azo si ayeke pusu ala ti sara ye ti sioni. Tongana ti so e bâ na yâ ti mbage so ahon, asioni bibe so azo ayeke na ni akiri aga gï sioni sioni (2 Timothée 3:1-5). Aye so kue asi atâa so azo ahinga ye laso mingi nga alege ti kangbingo asango na popo ti azo ayeke mingi ahon ti kozo. Me ka ndali ti nyen la e azo e peut pëpe ti sara si siriri aduti na ndö ti sese kue? Ye ni ahon ngangu ti e? Eskê siriri apeut lâ oko ape ti duti na ndö ti sese kue?

Même tongana mbeni lege ayeke dä ti zi asioni bibe so azo ayeke na ni, a yeke duti ande lakue ngangu na e ti sara si siriri aduti biani na yâ ti dunia kue. Ngbanga ti nyen? Ngbanga ti so ambeni ye ayeke dä so e azo e yeke na ngangu ti sara ni ape.

Tâ tënë ni ayeke so: “A yeke même na [zo] wani ti fa lege na gere ti lo pëpe.” (Jérémie 10:23). Biani, a créé e  ti komande terê ti e wani ape. A créé nga e pëpe ti komande na ndö ti amba ti e legeoko tongana ti so a créé e pëpe ti vivre na gbe ti ngu.

Gbu li na ndö ti atënë so: Eskê azo aye ka ti tene mbeni zo la afa na ala fason so ala doit ti vivre na ni? Wala eskê ala ye ka ti tene mbeni zo la afa na ala ye so ala doit ti pensé na ndö ti tënë ti tukungo ngo wala fason so ala doit ti fa lege na amolenge ti ala? So ayeke gï ambeni ye so aga na kangbi na popo ti azo la. Tongaso, tënë so Bible atene so ayeke tâ tënë, même si a yeke ngangu ti yeda na ni: E azo e yeke na ngangu nga na droit ti komande na ndö ti amba ti e ape. Me, ka zo wa la alingbi ti aidé e zo wa?

Nzoni ye ti sara ayeke ti tourné na mbage ti Zo so acréé e. Ambeni zo apensé so Lo girisa e awe, me lo girisa e ape. Tongana e diko Bible, e yeke bâ so lo yeke pensé na e. Tongana e mä yâ ti atënë ti Bible ni nzoni, e yeke hinga e wani nzoni mingi, nga e yeke hinga ndani so sioni ayeke depuis na yâ ti dunia so. E yeke comprendre nga ndali ti nyen la mbeni wandara ti Allemagne atene: “Azo nga na agouvernement amanda ye oko ape na lege ti aye so asi na yâ ti mbaï ti e azo, nga ala changé asarango ye ti ala ape.”

Jésus so ayeke Molenge ti Nzapa atene: “A yeke hinga so ndara ayeke mbilimbili na lege ti akusala ti lo” wala aye ti pekoni (Luc 7:35). Mbeni tapande ti tënë ti ndara ni ayeke na Ésaïe 2:22, so atene: “Ndali ti nzoni ti ala wani, ala zia ti zia bê ti ala na ndö ti senge zo.” Tongana e mä wango so, e yeke zia bê ti e pëpe na ndö ti mbeni ye so apeut pëpe ti si. Kenneth so avivre na yâ ti mbeni gbata ti Amérique du Nord so azo ayeke sara ye ti ngangu dä mingi atene: “Zo ti poroso ti so aga atene ni yeke ga na changement, mbeni aga atene oko tënë ni, me ala sara ye oko ape. So lakue azo apeut ti sara ye alingbi na tënë ti yanga ti ala ape so afa so tënë ti Bible ayeke tâ tënë.”

Daniel so e sara tënë ti lo fade atene: “Lango oko oko so ayeke hon akiri afa na mbi polele so e azo e peut ti komande na lege ni ape. . . . A yeke pëpe ndali ti so mo yeke na nginza na banque wala mo sara ambeni ye so apeut ti ga na mo nginza la afa so mo peut pëpe ti gi bê ti mo ndali ti gigi ti kekereke. Mbi bâ azo so abâ pasi ndali ti so ala zia bê ti ala na aye so ala yeke na ni.”

Bible a-aidé e ti zia bê ti e pëpe na ndö ti mbeni ye so apeut lâ oko ti si ape. Lo mû nga na e beku tongana ti so e yeke gue ti bâ.