Bible atene so azo so aye “ye ti yingo”, wala azo so aye ti bata songo ti ala na Nzapa, abâ apensé ti Nzapa na nene ni nga ala yeke sara ye alingbi na andia ti lo. Me azo ti mitele ayeke luti gï na ndö ti ye so na lê ti ala ayeke nzoni wala ayeke sioni, nga ala sara gï ye ti bê ti ala.​—Jude 18, 19; aÉphésien 5:1.

MAMA-NDIA TI BIBLE: “Tongana bê ti mo anze kue na yâ ti angoi ti kpale, ngangu ti mo ayeke kiri gï kete.”—aProverbe 24:10, kete tënë na gbe ni

NDA TI VERSÊ NI: Tongana e découragé e yeke duti na ngangu ape ti hon ndö ti akpale. Me beku apeut ti mû ngangu na e nga apeut ti sara si e bâ so akpale ti e ayeke gï teti kete ngoi; ti tâ tënë ni, na peko ti ngangu kpale e peut ti wara mbeni ye ti nzoni.

YE SO MO PEUT TI SARA: Pensé na anzoni ye so ayeke si ande kekereke. Ahon ti gi bê na ndö ti aye so apeut ti si wala ti ku ti tene ye kue aga gï nzoni si, sara aye so apeut ti mû lege na mo ti si na ye so mo zia na gbele mo ti si dä. Me girisa nga ape so, “ye so [mo] ku terê ti [mo] na ni pëpe” alingbi ti si (Zo-ti-fa-tene 9:11). Me mingi ni, aye ayeke passé ka nzoni ahon ti so e pensé na ni. Ni la Bible atene: “Lu angongoa ti kobe ti mo na ndapre, na juska lakui zia si maboko ti mo aduti senge pëpe, ndali ti so mo hinga pëpe lo so wa la ayeke maï ande, wala so ge wala so kâ, wala ni use kue ayeke maï nzoni”.—Zo-ti-fa-tene 11:6.

MAMA-NDIA TI BIBLE: “Sara si mbi hinga ndo . . . Tënë ti mo ayeke tâ tënë.”​—Psaume 119:144, 160.

NDA TI VERSÊ NI: Bible akiri tënë na ahunda so azo ayeke hunda ka terê ti ala na ni. Na tapande, a kiri tënë na ahunda tongana:

•   E azo e bâ gigi tongana nyen?

• Ngbanga ti nyen la e yeke na ndö ti sese?

• Nyen la ayeke si na zo na peko ti kuâ ti lo?

• Gigi ni kue awe la?

Gigi ti azo mingi aga nzoni ahon ti kozo ndali ti so ala gbu li na ndö ti akiringo tënë ti Bible na ndö ti ahunda so nga na ambeni nde.

YE SO MO PEUT TI SARA: Gbu li na ndö ti aye so Bible afa. Hunda na mbeni Témoin ti Jéhovah ti aidé mo ti mä yâ ti Bible. Gue na ndö ti site ti e, jw.org, wala ga na mbeni oko ti abungbi ti e; zo ayeke payé si alï ape, zo kue apeut ti lï senge.

MO BEZOIN TI HINGA NZAPA NGA TI SARA AYE SO LO HUNDA.

“Ngia ayeke na ala so ahinga so ala yeke na bezoin ti aye ti yingo.”​—MATTHIEU 5:3.

MANDA YE MINGI NA NDÖ TI NZAPA SO AYEKE WA TI BIBLE.

“Ala gi Nzapa . . . na ala wara lo biani . . . Lo yeke yongoro pëpe na e oko oko kue.”​—KUSALA 17:27.

DIKO BIBLE NGA GBU LI NA NDÖ NI.

“Ngia ayeke na zo so . . . ngia ti lo ayeke na yâ ti ndia ti Jéhovah, * na lo gbu li ti lo na ndö ti ndia ni bï na lâ. . . . Ye kue so lo sara ayeke ga nzoni.”​—PSAUME 1:1-3, kete tënë na gbe ni.