MAMA-NDIA TI BIBLE: “Zo so asara ngonzo hio pëpe ayeke nzoni ahon wangangu.”​—aProverbe 16:32.

NDA TI VERSÊ NI: Ti gi ti hon ndö ti ngonzo ti e, a yeke sara nzoni na e. Na ambeni ngoi e peut ti duti na raison ti sara ngonzo, me tongana e kanga ngonzo ni ape, akpale mingi apeut ti ga na pekoni. Ambeni wandara atene so tongana ngonzo agbu zo ngangu, mingi ni lo yeke tene mbeni tënë wala lo yeke sara mbeni ye so lo regretté na pekoni.

YE SO MO PEUT TI SARA: Gi ti hon ndö ti ngonzo ti mo kozo si ngonzo ahon ndö ti mo. Ambeni zo apensé so tongana zo asungba na ngonzo, a ye ti fa so lo yeke ngangu zo, me ti vrai ni ye ni ayeke tongaso ape. Bible atene: “Zo so alingbi ti kanga ndö ti ngonzo ti lo pëpe, lo yeke tongana gbata so a mû ni, so gbagba ni ayeke dä pëpe.” (aProverbe 25:28). Mbeni ye so apeut ti aidé e ti kanga ngonzo ti e ayeke ti gi ti hinga vrai ye so apassé. Bible atene: “Zo so ahinga ti bâ yâ ti aye nzoni ayeke sara ngonzo hio pëpe.” (aProverbe 19:11). A yeke bien ti gi ti hinga nda ti kpale ni nzoni, peut-être e yeke hinga mbeni ye so apeut ti sara si ngonzo ti e ni adë.

MAMA-NDIA TI BIBLE: “Ala fa singila ti bê ti ala.”—aColossien 3:15.

NDA TI VERSÊ NI: A tene ka so gï azo so ayeke fa singila ti bê ti ala la apeut ti duti na ngia. Même ambeni zo so aperdre mbeni fami ti ala wala mbeni ye ti ala ti ngangu ngere ayeda na tënë so. Ala tene so ye so a-aidé ala ayeke so ala ngbâ ti pensé pëpe na aye so ala perdre ni, me ala zia lê ti ala na ndö ti aye so angbâ na ala so ala doit ti fa singila ti bê ti ala ndali ni.

YE SO MO PEUT TI SARA: Lâ oko oko, sara na mbeti aye so mo ye ti kiri singila ndali ni. Pensé même na akete kete ye, na tapande pendere sigingo ti lâ, mbeni nzoni lisoro so mo na mbeni zo  so mo ye lo asara, wala mo peut ti kiri singila ndali ti so mo ngbâ na fini. Tongana mo pensé na aye ni so nga mo kiri singila ndali ni, a peut ti sara si mo duti na ngia.

Tongana mo hinga ndani so mo doit ti kiri singila na sewa nga na akamarade ti mo apeut ti aidé mo mingi. Tongana mo hinga ye so mo ye mingi na mbage ti amba ti mo, tene ni na ala na yanga wala na mbeti. A yeke sara si songo ti mo na ala akpengba nga terê ti mo ayeke nzere ndali ti so mo sara mbeni nzoni ye ndali ti amba ti mo.—Kusala 20:35.

KPE TI PAPA NA AZO.

“Tongo nda ti tiri ayeke tongana zingo lege ti gbâ ti ngu. Kozo si papa alondo, londo mo hon ti mo.”​—APROVERBE 17:14.

KPE TI GI BÊ SENGE SENGE NA NDÖ TI GIGI TI KEKEREKE.

“Ala gi bê ti ala lâ oko pëpe ngbanga ti kekereke, ndali ti so kekereke ayeke ande na agingo bê ti lo wani.”​—MATTHIEU 6:34.

DO TERÊ APE TI SARA YE, ME GBU LI NZONI KOZO SI.

“Nzoni gbungo li so mo yeke na ni ayeke bâ ndo na ndö ti mo.”​—APROVERBE 2:11.