ရှင်းလင်းချက်
၁ ယေဟောဝါ
ဘုရားသခင့်နာမည်ဟာ ယေဟောဝါလို့ ခေါ်တယ်၊ “ကိုယ်တော် ဖြစ်လာစေတယ်” လို့ အဓိပ္ပာယ်ရှိတယ်။ ယေဟောဝါဟာ အနန္တတန်ခိုးရှင်၊ အရာခပ်သိမ်း ဖန်ဆင်းရှင်ပဲ။ လုပ်ဖို့ ဆုံးဖြတ်ထားတာမှန်သမျှကို လုပ်ဆောင်နိုင်တဲ့တန်ခိုးလည်း ရှိတယ်။
ဟီဘရူးဘာသာစကားမှာ ဘုရားသခင့်နာမည်ကို ဗျည်းလေးလုံးနဲ့ ရေးသားတယ်။ မြန်မာလိုဆိုရင် ယဟဝဟ ဖြစ်တယ်။ မူရင်းဟီဘရူးကျမ်းစောင်တွေမှာ ဘုရားနာမည် အကြိမ်ပေါင်း ၇,၀၀၀ နီးပါး ပါတယ်။ ကမ္ဘာတစ်ဝန်းက လူတွေဟာ ယေဟောဝါဆိုတဲ့ နာမည်ကို သူတို့ဘာသာစကားအလိုက် ရေးသားပုံကိုယ်စီ၊ အသုံးတွင်နေတဲ့ အသံထွက်ကိုယ်စီ ရှိကြတယ်။
၂ ကျမ်းစာကို ‘ဘုရားသခင့်စွမ်းအားတော်ရဲ့ လမ်းညွှန်မှုနဲ့ ရေးထားတယ်’
ကျမ်းစာရဲ့အာဘော်ရှင်ဟာ ဘုရားသခင် ဖြစ်တယ်။ လူတွေကိုသုံးပြီး ကျမ်းစာရေးသားစေတယ်။ လုပ်ငန်းရှင်တစ်ယောက် သူ့ကိုယ်စား အတွင်းရေးမှူးကို စာတစ်စောင် ရေးခိုင်းတာနဲ့ နှိုင်းယှဉ်နိုင်တယ်။ ဘုရားသခင်က ကျမ်းရေးသူတွေကို စွမ်းအားတော်နဲ့ လမ်းညွှန်ပြီး မိမိရဲ့အတွေးအခေါ်တွေကို ချရေးခိုင်းတယ်။ ဘုရားသခင်ရဲ့ စွမ်းအားတော်ဟာ သူတို့ကို နည်းမျိုးစုံနဲ့ လမ်းညွှန်တယ်။ တစ်ခါတစ်ရံ စိတ်အာရုံတွေ၊ အိပ်မက်တွေ ပေးပြီး အဲဒါတွေကို ချရေးစေတယ်။
၃ လမ်းညွှန်ချက်များ (အခြေခံမူများ)
အခြေခံအမှန်တရားကို ရှင်းပြတဲ့ ကျမ်းစာသွန်သင်ချက်တွေ ဖြစ်တယ်။ ဥပမာ၊ “မကောင်းတဲ့ အပေါင်းအသင်းဟာ ကောင်းတဲ့အကျင့်ကို ပျက်စီးစေတတ်တယ်” ဆိုတဲ့ လမ်းညွှန်ချက်က ကိုယ်ပေါင်းတဲ့သူတွေဟာ ကိုယ့်အပေါ် ကောင်းကျိုး၊ ဆိုးကျိုး သက်ရောက်မှုရှိတယ်ဆိုတာ သင်ပေးတယ်။ (၁ ကောရိန္သု ၁၅:၃၃) “လူဟာ မျိုးစေ့ကြဲတဲ့အတိုင်း ရိတ်သိမ်းရလိမ့်မယ်” ဆိုတဲ့ လမ်းညွှန်ချက်က ကျွန်တော်တို့လုပ်ရပ်ရဲ့ အကျိုးဆက်ကို ရှောင်လွှဲလို့မရဘူးဆိုတာ သင်ပေးတယ်။—ဂလာတိ ၆:၇။
၄ ကြိုဟောချက် (ပရောဖက်ပြုချက်)
ဘုရားသခင်ဆီကလာတဲ့ သတင်းစကား ဖြစ်တယ်။ ဘုရားအလိုတော်အကြောင်း ရှင်းပြချက်၊ ကျင့်ဝတ်ဆိုင်ရာ သွန်သင်ချက်၊ မိန့်မှာချက်၊ တရားစီရင်ချက် ဖြစ်နိုင်တယ်။ အနာဂတ်မှာ ဖြစ်လာမယ့်အရာတစ်ခုနဲ့ပတ်သက်တဲ့ သတင်းစကားလည်း ဖြစ်နိုင်တယ်။ ကျမ်းစာထဲမှာ ပြည့်စုံခဲ့ပြီးသား ကြိုဟောချက်တွေ အများကြီးပါတယ်။
၅ မေရှိယအကြောင်း ကြိုဟောချက်များ
မေရှိယအကြောင်း ကျမ်းစာကြိုဟောချက်အများကြီးကို ယေရှု ပြည့်စုံစေတယ်။ “ မေရှိယအကြောင်း ကြိုဟောချက်များ” လေးထောင့်ကွက်ကို ကြည့်ပါ။
▸ အခန်း ၂၊ အပိုဒ် ၁၇၊ အောက်ခြေမှတ်ချက်
၆ ကမ္ဘာမြေအတွက် ယေဟောဝါရဲ့ ရည်ရွယ်ချက်
ယေဟောဝါဟာ မိမိကိုချစ်တဲ့လူတွေ နေထိုင်ဖို့ ကမ္ဘာမြေကို ပရဒိသုစံအိမ်အဖြစ် ဖန်ဆင်းခဲ့တယ်။ ကိုယ်တော့်ရည်ရွယ်ချက် မပြောင်းလဲပါဘူး။ မကြာခင်မှာ ဘုရားသခင်ဟာ ဆိုးသွမ်းမှုကို ဖယ်ရှားပြီး မိမိကိုဝတ်ပြုသူတွေကို ထာဝရအသက် ပေးမယ်။
၇ စာတန်မာရ်နတ်
စာတန်ဟာ ဘုရားသခင်ကို စတင်ပုန်ကန်တဲ့ ကောင်းကင်တမန် ဖြစ်တယ်။ စာတန်ဆိုတာ “ခုခံသူ” လို့အဓိပ္ပာယ်ရှိတယ်။ ယေဟောဝါကို ဆန့်ကျင်တိုက်ခိုက်တဲ့အတွက် အဲဒီနာမည် ရခဲ့တာ။ သူ့ကို မာရ်နတ်လို့လည်း ခေါ်တယ်။ “အသရေဖျက်သူ” လို့အဓိပ္ပာယ်ရှိတယ်။ ဘုရားသခင်အကြောင်း လိမ်ပြောပြီး လူတွေကို လှည့်စားတဲ့အတွက် အဲဒီနာမည် ရခဲ့တာ။
၈ ကောင်းကင်တမန်များ
ကမ္ဘာမြေကို မဖန်ဆင်းခင် ကြာမြင့်စွာကတည်းက ကောင်းကင်တမန်တွေကို ယေဟောဝါ ဖန်ဆင်းခဲ့တယ်။ သူတို့ကို ကောင်းကင်မှာနေဖို့ ဖန်ဆင်းထားတာ။ ကောင်းကင်တမန် သန်းရာနဲ့ချီ ရှိတယ်။ (ဒံယေလ ၇:၁၀) နာမည်ကိုယ်စီ၊ အရည်အသွေးကိုယ်စီ ရှိကြတယ်။ သစ္စာရှိတဲ့ကောင်းကင်တမန်တွေဟာ လူတွေကိုးကွယ်တာကို လက်မခံဘူး၊ နှိမ့်ချမှုရှိကြတယ်။ သူတို့မှာ အဆင့်အမျိုးမျိုး၊ တာဝန်အမျိုးမျိုး ရှိတယ်။ ယေဟောဝါရဲ့ ရာဇပလ္လင်ရှေ့မှာ အမှုဆောင်ရတာ၊ ဘုရားရဲ့ သတင်းစကားကို ကြားပြောရတာ၊ မြေကြီးပေါ်ရှိ ကျေးကျွန်တွေကို ကာကွယ်၊ လမ်းညွှန်ပေးရတာ၊ ဘုရားရဲ့ တရားစီရင်ချက်အတိုင်း လုပ်ဆောင်ပေးရတာ၊ ဟောပြောခြင်းလုပ်ငန်းကို ကူညီပံ့ပိုးပေးရတာ စတဲ့ တာဝန်အမျိုးမျိုး ရှိတယ်။ (ဆာလံ ၃၄:၇။ ဗျာဒိတ် ၁၄:၆။ ၂၂:၈၊ ၉) လာမယ့် အာမဂေဒုန်စစ်ပွဲမှာ ယေရှုဘက်ကနေ ကူညီတိုက်ခိုက်ပေးကြလိမ့်မယ်။—ဗျာဒိတ် ၁၆:၁၄၊ ၁၆။ ၁၉:၁၄၊ ၁၅။
၉ အပြစ်
ယေဟောဝါနဲ့ ဒါမှမဟုတ် အလိုတော်နဲ့ ဆန့်ကျင်တဲ့အရာမှန်သမျှဟာ အပြစ်ပဲ။ အပြစ်ဟာ ဘုရားနဲ့ ကျွန်တော်တို့ရဲ့ ရင်းနှီးတဲ့ဆက်ဆံရေးကို ထိခိုက်စေတယ်။ ဒါကြောင့် အပြစ်ကို တမင်တကာ မလုပ်အောင် ကူညီတဲ့ ပညတ်တွေ၊ လမ်းညွှန်ချက်တွေကို ဘုရားပေးထားတယ်။ အစတုန်းက ယေဟောဝါ ဖန်ဆင်းတာမှန်သမျှ ပြည့်ဝစုံလင်တယ်။ ဒါပေမဲ့ အာဒံနဲ့ဧဝ ယေဟောဝါကို မနာခံတဲ့အခါ သူတို့ အပြစ်ရှိသွားတယ်၊ ပြည့်ဝစုံလင်မှု မရှိတော့ဘဲ အိုမင်းပြီး သေရတယ်။ ကျွန်တော်တို့လည်း အာဒံဆီက အပြစ်ကို အမွေရခဲ့လို့ အိုမင်းပြီး သေကြရတယ်။
၁၀ အာမဂေဒုန်
စာတန့်လောကနဲ့ ဆိုးညစ်မှုမှန်သမျှကို ဖျက်ဆီးမယ့် ဘုရားသခင့်စစ်ပွဲ ဖြစ်တယ်။
၁၁ ဘုရားသခင့်နိုင်ငံတော်
ဘုရားသခင့်နိုင်ငံတော်ဆိုတာ ကောင်းကင်မှာ ယေဟောဝါ တည်ထောင်ထားတဲ့ အစိုးရ ဖြစ်တယ်။ ယေရှုခရစ်ဟာ ဘုရင်အဖြစ် အုပ်စိုးမယ်။ အနာဂတ်မှာ ယေဟောဝါဟာ ဒီနိုင်ငံတော်ကို သုံးပြီး ဆိုးညစ်မှုမှန်သမျှကို ဖယ်ရှားမယ်။ ကမ္ဘာမြေကို ဘုရားသခင့်နိုင်ငံတော် အုပ်စိုးမယ်။
၁၂ ယေရှုခရစ်
ဘုရားသခင်က ဘာကိုမှ မဖန်ဆင်းခင် ယေရှုကို ဖန်ဆင်းတယ်။ လူအားလုံးအတွက် အသေခံဖို့ ယေရှုကို မြေကြီးပေါ် စေလွှတ်ခဲ့တယ်။ ယေရှု အသတ်ခံရပြီးတဲ့နောက် ယေဟောဝါက ယေရှုကို ရှင်ပြန်ထမြောက်စေတယ်။ အခု၊ ယေရှုဟာ ကောင်းကင်မှာ ဘုရားသခင့် နိုင်ငံတော်ဘုရင်အဖြစ် အုပ်စိုးနေပြီ။
၁၃ သီတင်း ၇၀ အကြောင်း ကြိုဟောချက်
မေရှိယပေါ်လာမယ့်အချိန်ကို ကျမ်းစာကြိုဟောတယ်။ ၆၉ သီတင်းအဆုံးမှာ မေရှိယ ပေါ်ထွန်းမယ်။ ၆၉ သီတင်းဟာ ဘီစီ ၄၅၅ မှာ စတင်ပြီး အေဒီ ၂၉ မှာ ကုန်ဆုံးတယ်။
အေဒီ ၂၉ မှာ ကုန်ဆုံးမှန်း ဘယ်လိုသိရသလဲ။ နေဟမိဟာ ဘီစီ ၄၅၅ မှာ ဂျေရုဆလင်မြို့ကို ပြန်လာပြီး မြို့ကို ပြန်တည်ဆောက်တယ်။ အဲဒီအချိန်မှာ ၆၉ သီတင်း စတင်တယ်။ (ဒံယေလ ၉:၂၅။ နေဟမိ ၂:၁၊ ၅-၈) “တစ်ဒါဇင်” ဆိုတာ ၁၂ ဂဏန်းကို ဆိုလိုသလို “တစ်သီတင်း” ဆိုတာ ၇ ဂဏန်းကို ဆိုလိုတယ်။ ဒီကြိုဟောချက်မှာပါတဲ့ သီတင်းပတ်တွေက ခုနစ်ရက်ရှိတဲ့ သီတင်းပတ်ကို မဆိုလိုဘူး။ “တစ်ရက်ကို တစ်နှစ်” ဆိုတဲ့ သတ်မှတ်ချက်အရ သီတင်းနှစ်တွေကို ဆိုလိုတယ်။ (တောလည်ရာ ၁၄:၃၄။ ယေဇကျေလ ၄:၆) သီတင်းတစ်ပတ်ဟာ ခုနစ်နှစ်ကြာတယ်။ ၆၉ သီတင်းဟာ (၆၉ x ၇) ၄၈၃ နှစ်ကြာတယ်။ ဘီစီ ၄၅၅ ကနေ နှစ်ပေါင်း ၄၈၃ နှစ်ကို တွက်လိုက်ရင် အေဒီ ၂၉ အထိရောက်တယ်။ အဲဒီနှစ်ဟာ ယေရှု နှစ်ခြင်းခံပြီး မေရှိယဖြစ်လာတဲ့နှစ် အတိအကျပဲ။—လုကာ ၃:၁၊ ၂၊ ၂၁၊ ၂၂။
အဲဒီပရောဖက်ပြုချက်မှာ နောက်ထပ် ခုနစ်နှစ်ကြာတဲ့ သီတင်းပတ်အကြောင်းလည်း ကြိုဟောထားတယ်။ အဲဒီသီတင်းပတ်အတွင်း အေဒီ ၃၃ မှာ မေရှိယ အသတ်ခံရမယ်။ အေဒီ ၃၆ ကစပြီး ဘုရားသခင့်နိုင်ငံတော် သတင်းကောင်းကို ဂျူးလူမျိုးအပြင် လူမျိုးအားလုံးကို ဟောပြောရလိမ့်မယ်။—ဒံယေလ ၉:၂၄-၂၇။
၁၄ သုံးပါးပေါင်းတစ်ဆူ သွန်သင်ချက်
ယေဟောဝါဘုရားဟာ ဖန်ဆင်းရှင် ဖြစ်တယ်၊ ဘာကိုမှ မဖန်ဆင်းခင် ယေရှုကို ဖန်ဆင်းခဲ့တယ်လို့ ကျမ်းစာသွန်သင်တယ်။ (ကောလောသဲ ၁:၁၅၊ ၁၆) ယေရှုဟာ အနန္တတန်ခိုးရှင်ဘုရားသခင် မဟုတ်ဘူး။ ဘုရားနဲ့တန်းတူဖြစ်တယ်လို့ သူ တစ်ခါမှ မပြောခဲ့ဘူး။ “အဖဘုရားက ကျွန်တော့်ထက် ပိုကြီးမြတ်တယ်” လို့ပဲ ပြောတယ်။ (ယောဟန် ၁၄:၂၈။ ၁ ကောရိန္သု ၁၅:၂၈) ခမည်းတော်၊ သားတော်၊ သန့်ရှင်းသော ဝိညာဉ်တော်ဟာ ပုဂ္ဂိုလ်သုံးပါး ဘုရားတစ်ဆူဆိုပြီး ဘာသာတချို့ သွန်သင်တယ်။ တကယ်တော့ ကျမ်းစာမှာ “သုံးပါးပေါင်းတစ်ဆူ” ဆိုတဲ့ စကားလုံး မပါဘူး။ ဒါဟာ မှားယွင်းတဲ့သွန်သင်ချက်ပဲ။
သန့်ရှင်းသော ဝိညာဉ်တော် တစ်နည်းအားဖြင့် စွမ်းအားတော်ဟာ ဘုရားသခင်ရဲ့ သက်ဝင်လှုပ်ရှားနေတဲ့ စွမ်းအား၊ အလိုတော်ပြီးမြောက်စေဖို့ အသုံးပြုတဲ့ မျက်မြင်မရတန်ခိုး ဖြစ်တယ်။ ပုဂ္ဂိုလ်တစ်ပါး မဟုတ်ဘူး။ ဥပမာ၊ အစောပိုင်းခရစ်ယာန်တွေဟာ “သန့်ရှင်းသော စွမ်းအားတော်နဲ့ပြည့်” ခဲ့တယ်။ ယေဟောဝါက “စွမ်းအားတော်ကို လူအမျိုးမျိုးအပေါ် ငါသွန်းလောင်းမယ်” လို့ပြောခဲ့တယ်။—တမန်တော် ၂:၁-၄၊ ၁၇။
၁၅ လက်ဝါးကားတိုင်
စစ်မှန်တဲ့ခရစ်ယာန်တွေဟာ ဘုရားသခင်ကို ဝတ်ပြုရာမှာ လက်ဝါးကားတိုင်ကို ဘာလို့ မသုံးတာလဲ။
(၁)လက်ဝါးကားတိုင်ကို ဟိုးအရင်ကတည်းက မှားယွင်းတဲ့ဘာသာမှာ သုံးတယ်။ ရှေးအချိန်က သဘာဝတရား ကိုးကွယ်မှုနဲ့ တိတ္ထိတွေရဲ့ လိင်ဆိုင်ရာ ဓလေ့ထုံးစံတွေမှာလည်း သုံးတယ်။ ယေရှုသေပြီးနောက် နှစ်ပေါင်း ၃၀၀ အတွင်း ခရစ်ယာန်တွေဟာ ဝတ်ပြုရေးမှာ လက်ဝါးကားတိုင် မသုံးကြဘူး။ နောက်ပိုင်း၊ ရောမဧကရာဇ် ကွန်စတင်တိုင်းဟာ လက်ဝါးကားတိုင်ကို ခရစ်ယာန်ဘာသာရဲ့ အမှတ်အသားအဖြစ် သတ်မှတ်လိုက်တယ်။ ခရစ်ယာန်ဘာသာကို ပိုပြီးလူသိများစေဖို့ ဒီအမှတ်အသားကို အသုံးပြုကြတယ်။ ဒါပေမဲ့ လက်ဝါးကားတိုင်ဟာ ယေရှုခရစ်နဲ့ ဘာမှမပတ်သက်ဘူး။ “ခရစ်ယာန်ခေတ်မတိုင်ခင်၊ ခရစ်ယာန်နဲ့မဆိုင်တဲ့ ယဉ်ကျေးမှုတွေမှာ လက်ဝါးကားတိုင် အသုံးပြုတာကို တွေ့ရတယ်” လို့ ကက်သလစ်စွယ်စုံကျမ်းသစ်မှာ ရှင်းပြတယ်။
(၂)ယေရှုဟာ လက်ဝါးကားတိုင်ပေါ် သေဆုံးခဲ့တာ မဟုတ်ဘူး။ “လက်ဝါးကားတိုင်” လို့ပြန်ဆိုတဲ့ ဂရိစကားလုံးဟာ “ဖြောင့်တန်းတဲ့သစ်တိုင်၊” “သစ်ချောင်း၊” “သစ်ပင်” ဆိုတဲ့အဓိပ္ပာယ် ရှိတယ်။ “ဂရိကျမ်းစာ[ဓမ္မသစ်ကျမ်း]မှာ သစ်နှစ်ပိုင်းကို ဆိုလိုတဲ့သဘော လုံးဝမပါဘူး” လို့ ကောမ်ပဲနီယန်ကျမ်းစာမှာ ရှင်းပြတယ်။ ယေရှုဟာ ဖြောင့်တန်းတဲ့ သစ်တိုင်ပေါ် သေဆုံးခဲ့တယ်။
(၃) ဝတ်ပြုရေးမှာ ရုပ်တုတွေ၊ အမှတ်အသားတွေ သုံးတာကို ယေဟောဝါ မကြိုက်ဘူး။—ထွက်မြောက်ရာ ၂၀:၄၊ ၅။ ၁ ကောရိန္သု ၁၀:၁၄။
၁၆ အောက်မေ့ရာပွဲ
ယေရှုက မိမိရဲ့သေခြင်း အောက်မေ့ရာပွဲကို ကျင်းပဖို့ တပည့်တွေကို မိန့်မှာခဲ့တယ်။ အောက်မေ့ရာပွဲကို နှစ်စဉ် နိသန်လ ၁၄ ရက်မှာ ကျင်းပတယ်။ အဲဒီနေ့ဟာ အစ္စရေးတွေ ပသခါပွဲ ကျင်းပတဲ့နေ့ပဲ။ ယေရှုရဲ့အသားနဲ့ သွေးကို ကိုယ်စားပြုတဲ့ မုန့်နဲ့ ဝိုင်ကို အောက်မေ့ရာပွဲ တက်ရောက်သူအားလုံးဆီ လက်ဆင့်ကမ်းတယ်။ ကောင်းကင်မှာ ယေရှုနဲ့အတူ အုပ်စိုးမယ့်သူတွေကတော့ မုန့်နဲ့ ဝိုင်ကို စားသုံးကြတယ်။ မြေကြီးပေါ် ထာဝစဉ်နေထိုင်ဖို့ မျှော်လင့်ချက်ရှိသူတွေဟာ မုန့်နဲ့ ဝိုင်ကို မစားသုံးပေမဲ့ အောက်မေ့ရာပွဲကို လေးစားစွာ တက်ရောက်ကြတယ်။
၁၇ အသက်
ဟီဘရူးစကားလုံး ‘နီးဖက်ရှ်’ နဲ့ ဂရိစကားလုံး ‘ပစီးခီး’ ကို မြန်မာလို “အသက်” ဆိုပြီး ကျမ်းချက်တချို့မှာ ပြန်ဆိုထားတယ်။ ကျမ်းစာထဲက အဲဒီဟီဘရူးနဲ့ ဂရိစကားလုံး အသုံးပြုပုံကို ဆန်းစစ်ကြည့်တဲ့အခါ အခြေခံအားဖြင့် (၁) လူတွေ၊ (၂) တိရစ္ဆာန်တွေ၊ (၃) လူနဲ့ တိရစ္ဆာန်မှာရှိတဲ့ အသက်ကို ရည်ညွှန်းမှန်း သိသာတယ်။ (ကမ္ဘာဦး ၁:၂၀။ ယေဇကျေလ ၁၈:၄။ ယောဟန် ၁၀:၁၁။ ၁ ပေတရု ၃:၂၀) တချို့ကျမ်းစာတွေမှာ ပြန်ဆိုထားသလို “ဝိညာဉ်” ကို မဆိုလိုဘူး။ ကမ္ဘာမြေပေါ်အသက်ရှင်တဲ့ သတ္တဝါတွေနဲ့ ပတ်သက်ပြီး ပြောတဲ့အခါ ‘နီးဖက်ရှ်’ နဲ့ ‘ပစီးခီး’ နှစ်ခုစလုံးဟာ အကောင်အထည်ရှိတဲ့၊ ထိတွေ့လို့ရတဲ့၊ မြင်တွေ့နိုင်တဲ့၊ သေဆုံးတတ်တဲ့အရာတွေကို ရည်ညွှန်းမှန်း ကျမ်းစာက ဖော်ပြတယ်။ တစ်ခုခုကို အကြွင်းမဲ့၊ အစွမ်းရှိသမျှနဲ့ လုပ်ဆောင်တာကိုလည်း ဆိုလိုတယ်။ (တရားဟောရာ ၆:၅။ မဿဲ ၂၂:၃၇) ဒီမူရင်းစကားလုံးဟာ သတ္တဝါတွေရဲ့ အာသာဆန္ဒကို ရည်ညွှန်းတဲ့အခါ ရှိသလို အသေကောင်တွေ၊ အလောင်းတွေကိုလည်း ရည်ညွှန်းနိုင်တယ်။—တောလည်ရာ ၆:၆။ ပညာအလိမ္မာ ၂၃:၂။ ဟေရှာယ ၅၆:၁၁။ ဟဂ္ဂဲ ၂:၁၃။
၁၈ စွမ်းအား
ကျမ်းစာမှာ “စွမ်းအား” ဆိုပြီး ပြန်ဆိုလေ့ရှိတဲ့ ဟီဘရူးနဲ့ ဂရိစကားလုံးဟာ အဓိပ္ပာယ်များစွာရှိတယ်။ နှစ်မျိုးစလုံးဟာ လူနဲ့ တိရစ္ဆာန်တွေရဲ့ အသက်စွမ်းအား၊ လေစတဲ့ မမြင်နိုင်တဲ့အရာကို ရည်ညွှန်းလေ့ရှိတယ်။ ဝိညာဉ်ပုဂ္ဂိုလ်နဲ့ ဘုရားသခင်ရဲ့ သက်ဝင်လှုပ်ရှားနေတဲ့ စွမ်းအား ဒါမှမဟုတ် သန့်ရှင်းသော စွမ်းအားတော်ကိုလည်း ရည်ညွှန်းတယ်။ လူသေပြီးနောက် ဆက်အသက်ရှင်နေတဲ့အရာ ရှိတယ်လို့ ကျမ်းစာ မသွန်သင်ဘူး။—ထွက်မြောက်ရာ ၃၅:၂၁။ ဆာလံ ၁၀၄:၂၉။ မဿဲ ၁၂:၄၃။ လုကာ ၁၁:၁၃။
၁၉ ဂေဟင်နာ
ဂေဟင်နာဆိုတာ အမှိုက်တွေကို မီးရှို့ဖျက်ဆီးတဲ့နေရာ၊ ဂျေရုဆလင်မြို့အနီးမှာရှိတဲ့ ချိုင့်ဝှမ်းနာမည် ဖြစ်တယ်။ ယေရှုခေတ်မှာ တိရစ္ဆာန်ကိုဖြစ်ဖြစ်၊ လူကိုဖြစ်ဖြစ် အဲဒီချိုင့်ဝှမ်းထဲ ပစ်ချပြီး အရှင်လတ်လတ် မီးရှို့ ညှဉ်းဆဲတယ်ဆိုတဲ့ အထောက်အထား မရှိဘူး။ ဒါကြောင့် ဂေဟင်နာဆိုတာ လူသေတွေကို မီးနဲ့ ထာဝရညှဉ်းဆဲတဲ့၊ မမြင်နိုင်တဲ့နေရာအဖြစ် တင်စားလို့ မရဘူး။ ဂေဟင်နာထဲ ပစ်ချခံရသူတွေအကြောင်း ယေရှု ပြောတဲ့အခါ ထာဝရဖျက်ဆီးခြင်းအကြောင်း ပြောနေတာဖြစ်တယ်။—မဿဲ ၅:၂၂။ ၁၀:၂၈။
၂၀ သခင့်ဆုတောင်းချက်
တပည့်တွေကို ဆုတောင်းနည်းသင်ပေးချိန်မှာ ယေရှုတောင်းတဲ့ ဆုတောင်းချက် ဖြစ်တယ်။ ကောင်းကင်အဖ ဒါမှမဟုတ် စံပြဆုတောင်းချက်လို့လည်း ခေါ်တယ်။ ဒီနည်းအတိုင်း ဆုတောင်းဖို့ ယေရှုသင်ပေးတယ်–
“နာမတော် သန့်ရှင်းမြင့်မြတ်ပါစေ”
နာမတော် ကဲ့ရဲ့ရှုတ်ချစရာ ဖြစ်စေတဲ့အရာမှန်သမျှကို ဖယ်ရှားပေးဖို့ ယေဟောဝါဆီ ကျွန်တော်တို့ ဆုတောင်းကြတယ်။ ဒါမှ ကောင်းကင်၊ မြေကြီးပေါ် ရှိသူတိုင်း နာမတော်ကို ဂုဏ်တင်ပြီး ရိုသေလေးစားနိုင်မယ်။
“နိုင်ငံတော် လာပါစေ”
ဘုရားသခင့်အစိုးရက စာတန်ရဲ့ ဆိုးညစ်တဲ့လောကကို ဖျက်ဆီးဖို့၊ ကမ္ဘာမြေကို အုပ်ချုပ်ဖို့၊ ကမ္ဘာမြေကို ပရဒိသုဖြစ်စေဖို့ ကျွန်တော်တို့ ဆုတောင်းကြတယ်။
“အလိုတော်ဟာ . . . ကမ္ဘာမြေမှာလည်း ပြည့်စုံပါစေ”
ကမ္ဘာမြေအတွက် ဘုရားသခင့်ရည်ရွယ်ချက် ပြည့်စုံစေဖို့ ကျွန်တော်တို့ ဆုတောင်းတယ်။ ဒါမှ ယေဟောဝါရဲ့ မူလရည်ရွယ်ချက်အတိုင်း နာခံမှုရှိတဲ့ ပြည့်ဝစုံလင်သူတွေဟာ ပရဒိသုမှာ ထာဝစဉ် အသက်ရှင်နိုင်မယ်။
၂၁ ရွေးဖိုး
ယေဟောဝါက လူတွေကို အပြစ်နဲ့ သေခြင်းကနေ ကယ်တင်ဖို့ ရွေးဖိုး စီစဉ်ပေးတယ်။ ရွေးဖိုးဟာ ပထမလူသားအာဒံ ဆုံးရှုံးခဲ့တဲ့ ပြည့်ဝစုံလင်တဲ့အသက်ကို ပြန်ဝယ်ယူဖို့၊ ယေဟောဝါနဲ့ ရင်းနှီးတဲ့ဆက်ဆံရေး ပြန်ရနိုင်ဖို့ ပေးရတဲ့အခ ဖြစ်တယ်။ ဘုရားသခင်က ယေရှုကို မြေကြီးပေါ် စေလွှတ်ပြီး အပြစ်သားအားလုံးအတွက် အသေခံစေခဲ့တယ်။ ယေရှုရဲ့သေခြင်းကြောင့် လူအားလုံး ထာဝစဉ် အသက်ရှင်ခွင့်၊ ပြည့်ဝစုံလင်သူတွေဖြစ်ခွင့် ရရှိကြတယ်။
၂၂ ၁၉၁၄ ခုနှစ်ဟာ ဘာကြောင့် အရေးပါတဲ့နှစ် ဖြစ်သလဲ
ဒံယေလအခန်းကြီး ၄ မှာပါတဲ့ ကြိုဟောချက်အရ ၁၉၁၄ ခုနှစ်မှာ ဘုရားသခင့်နိုင်ငံ တည်ထောင်မယ်ဆိုတာ သိရတယ်။
ကြိုဟောချက်– ယေဟောဝါက ဘုရင်နေဗုခဒ်နေဇာကို ခုတ်လှဲခံရတဲ့ သစ်ပင်ကြီးအကြောင်း အိပ်မက်ပေးတယ်။ “ခုနစ်ကာလ” အတွင်း သစ်ပင် မကြီးထွားစေဖို့ ပင်စည်ကို သံကြိုး၊ ကြေးနီကြိုးနဲ့ ပတ်ချည်ထားတယ်။ အဲဒီနောက် သစ်ပင် ပြန်ကြီးထွားလာတယ်။—ဒံယေလ ၄:၁၊ ၁၀-၁၆။
အဲဒီကြိုဟောချက်က ကျွန်တော်တို့နဲ့သက်ဆိုင်ပုံ– အဲဒီသစ်ပင်ဟာ ဘုရားသခင့်အုပ်ချုပ်မှုကို ပုံဆောင်တယ်။ ယေဟောဝါက ဂျေရုဆလင်မှာ ဘုရင်တွေ ခန့်အပ်ပြီး အစ္စရေးတွေကို အုပ်စိုးစေခဲ့တာ နှစ်ပေါင်းများစွာ ကြာပြီ။ (၁ ရာဇဝင်ချုပ် ၂၉:၂၃) ဒါပေမဲ့ အဲဒီဘုရင်တွေ သစ္စာမဲ့တဲ့အတွက် သူတို့ရဲ့မင်းဆက် ပြတ်သွားတယ်။ ဘီစီ ၆၀၇ မှာ ဂျေရုဆလင် ဖျက်ဆီးခံခဲ့ရတယ်။ ဒါဟာ “ခုနစ်ကာလ” ရဲ့အစပဲ။ (၂ ဘုရင်များ ၂၅:၁၊ ၈-၁၀။ ယေဇကျေလ ၂၁:၂၅-၂၇) “လူမျိုးခြားတွေအတွက် သတ်မှတ်ထားချိန် စေ့သွားတဲ့အထိ ဂျေရုဆလင်မြို့ကို လူမျိုးခြားတွေ နင်းချေကြလိမ့်မယ်” လို့ ယေရှုပြောတဲ့အခါ “ခုနစ်ကာလ” ကိုဆိုလိုနေတာ ဖြစ်တယ်။ (လုကာ ၂၁:၂၄) ဒါကြောင့် ယေရှု မြေကြီးပေါ်ရှိနေချိန်မှာ “ခုနစ်ကာလ” မကုန်ဆုံးသေးဘူး။ “ခုနစ်ကာလ” အဆုံးမှာ ဘုရင်တစ်ပါး ခန့်အပ်မယ်လို့ ယေဟောဝါ ကတိပေးတယ်။ ဒီဘုရင်သစ် ယေရှုရဲ့ အုပ်ချုပ်မှုဟာ ကမ္ဘာပေါ်မှာရှိတဲ့ လူသားတွေအတွက် ထာဝရကောင်းချီးတွေကို အလျှံပယ် ယူဆောင်လာလိမ့်မယ်။—လုကာ ၁:၃၀-၃၃။
“ခုနစ်ကာလ” ရဲ့ကြာရှည်မှု– “ခုနစ်ကာလ” ဟာ နှစ်ပေါင်း ၂,၅၂၀ ကြာရှည်တယ်။ ဘီစီ ၆၀၇ ကနေ နှစ်ပေါင်း ၂,၅၂၀ ကို ရေတွက်လိုက်ရင် ၁၉၁၄ ခုနှစ်မှာ ကုန်ဆုံးတယ်။ အဲဒီနှစ်မှာပဲ ယေဟောဝါက ယေရှုကို နိုင်ငံတော်ဘုရင်အဖြစ် ကောင်းကင်မှာ နန်းတင်ခဲ့တယ်။
နှစ်ပေါင်း ၂,၅၂၀ ကို ဘယ်လိုရသလဲ။ သုံးကာလခွဲဟာ ရက်ပေါင်း ၁,၂၆၀ နဲ့ညီတယ်လို့ ကျမ်းစာပြောတယ်။ (ဗျာဒိတ် ၁၂:၆၊ ၁၄) ဒါကြောင့် “ခုနစ်ကာလ” ဟာ ရက်ပေါင်း ၁,၂၆၀ ရဲ့နှစ်ဆ ရက်ပေါင်း ၂,၅၂၀ နဲ့ညီတယ်။ “တစ်ရက်ကို တစ်နှစ်” ဆိုတဲ့ ကျမ်းစာတွက်ချက်မှုအရ ရက်ပေါင်း ၂,၅၂၀ ဟာ နှစ်ပေါင်း ၂,၅၂၀ နဲ့ညီတယ်။—တောလည်ရာ ၁၄:၃၄။ ယေဇကျေလ ၄:၆။
၂၃ ကောင်းကင်တမန်မင်း မိက္ခေလ
“ကောင်းကင်တမန်တွေရဲ့ အကြီးအမှူး” လို့ အဓိပ္ပာယ်ရှိတယ်။ ကောင်းကင်တမန်မင်းတစ်ပါးတည်း ရှိတယ်၊ သူ့နာမည် မိက္ခေလဖြစ်တယ်လို့ ကျမ်းစာဖော်ပြတယ်။—ဒံယေလ ၁၂:၁။ ယုဒ ၉။
မိက္ခေလဟာ ဘုရားသခင်ရဲ့ သစ္စာရှိကောင်းကင်တမန်တပ်ကို ဦးဆောင်သူပဲ။ ‘မိက္ခေလနဲ့ သူ့ရဲ့ကောင်းကင်တမန်တွေက နဂါးနဲ့ သူ့ရဲ့ ကောင်းကင်တမန်တွေကို တိုက်ခိုက်တယ်’ ဆိုပြီး ဗျာဒိတ် ၁၂:၇ မှာပြောတယ်။ ဗျာဒိတ်ကျမ်းမှာ ယေရှုကို ဘုရားသခင့်စစ်တပ်ရဲ့ ခေါင်းဆောင်လို့ ပြောထားတဲ့အတွက် မိက္ခေလဆိုတာ ယေရှုရဲ့ နာမည်နောက်တစ်မျိုး ဖြစ်တယ်။—ဗျာဒိတ် ၁၉:၁၄-၁၆။
၂၄ နောက်ဆုံးကာလ
စာတန့်လောကကို ဘုရားသခင့်နိုင်ငံတော် မဖျက်ဆီးခင် ကမ္ဘာပေါ်မှာ သမိုင်းဝင်ဖြစ်ရပ်တွေ ဖြစ်ပျက်မယ့်ကာလကို ဆိုလိုတယ်။ ကျမ်းစာကြိုဟောချက်တွေထဲက “လောကစနစ်နိဂုံးပိုင်း၊” “လူသားရောက်ရှိနေချိန်” ဆိုတဲ့ အသုံးအနှုန်းတွေဟာ နောက်ဆုံးကာလကိုပဲ ဆိုလိုတယ်။ (မဿဲ ၂၄:၃၊ ၂၇၊ ၃၇) ကောင်းကင်မှာ ဘုရားသခင့်နိုင်ငံတော် စတင်အုပ်စိုးတဲ့ ၁၉၁၄ ခုနှစ်မှာ “နောက်ဆုံးကာလ” စတင်ပြီး စာတန့်လောကကို ဖျက်ဆီးမယ့် အာမဂေဒုန်မှာ ကုန်ဆုံးမယ်။ —၂ တိမောသေ ၃:၁။ ၂ ပေတရု ၃:၃။
၂၅ ရှင်ပြန်ထမြောက်ခြင်း
သေလွန်သူ အသက်ပြန်ရှင်လာအောင် ဘုရားသခင် လုပ်ပေးတာကို ရှင်ပြန်ထမြောက်ခြင်းလို့ ခေါ်တယ်။ ကျမ်းစာထဲမှာ ရှင်ပြန်ထမြောက်ခဲ့သူ ကိုးယောက်အကြောင်း ပါတယ်။ ရှင်ပြန်ထမြောက်အောင် လုပ်ပေးခဲ့သူတွေကတော့ ဧလိယ၊ ဧလိရှဲ၊ ယေရှု၊ ပေတရု၊ ပေါလုဖြစ်တယ်။ ဘုရားပေးတန်ခိုးနဲ့သာ အဲဒီအံ့ဖွယ်အမှုတွေကို လုပ်ဆောင်နိုင်တာ။ “ဖြောင့်မတ်သူရော မဖြောင့်မတ်သူတွေပါ” ကမ္ဘာမြေပေါ် ရှင်ပြန်ထမြောက်လာမယ်ဆိုပြီး ယေဟောဝါ ကတိပေးတယ်။ (တမန်တော် ၂၄:၁၅) ကောင်းကင်ကို ရှင်ပြန်ထမြောက်တဲ့အကြောင်းကိုလည်း ကျမ်းစာဖော်ပြတယ်။ ဘုရားသခင် ဘိသိက်ပေး ရွေးချယ်ထားသူတွေဟာ ကောင်းကင်မှာ ယေရှုနဲ့အတူ ရှိနေဖို့ ရှင်ပြန်ထမြောက်ကြတယ်။—ယောဟန် ၅:၂၈၊ ၂၉။ ၁၁:၂၅။ ဖိလိပ္ပိ ၃:၁၁။ ဗျာဒိတ် ၂၀:၅၊ ၆။
၂၆ နတ်ဆိုးပညာလိုက်စားခြင်း
နတ်ဆိုးပညာလိုက်စားတယ်ဆိုတာ တိုက်ရိုက်ဖြစ်စေ၊ ပယောဂဆရာ၊ နတ်ဆရာတို့လို ကြားခံလူကတစ်ဆင့်ဖြစ်စေ နတ်ဆိုးတွေနဲ့ ဆက်သွယ်တာကို ဆိုလိုတယ်။ လူသေပေမဲ့ ဝိညာဉ်မသေဘူး၊ တန်ခိုးကြီးတဲ့ တစ္ဆေသရဲ ဖြစ်သွားတယ်ဆိုတဲ့ သွန်သင်ချက်အမှားကို ယုံကြည်တဲ့အတွက် နတ်ဆိုးပညာကို လူတွေ လိုက်စားကြတယ်။ နတ်ဆိုးတွေဟာ ဘုရားကို မနာခံဖို့လည်း လူတွေကို သွေးဆောင်တယ်။ နတ်ဆိုးပညာထဲမှာ နက္ခတ်ဗေဒင်၊ ပယောဂအတတ်၊ မှော်အတတ်၊ စုန်းအတတ်၊ အယူသီးတာ၊ ဂမ္ဘီရပညာ၊ သဘာဝလွန် စွမ်းအားတွေလည်း ပါဝင်တယ်။ စာအုပ်၊ မဂ္ဂဇင်း၊ ရာသီခွင်ဗေဒင်၊ ရုပ်ရှင်၊ ပိုစတာ၊ သီချင်းအများစုက မှော်ပညာ၊ နတ်ဆိုးနဲ့ သဘာဝလွန်စွမ်းအားတွေဟာ အန္တရာယ်ကင်းပြီး စိတ်လှုပ်ရှားစရာကောင်းတယ်လို့ ထင်ရစေတယ်။ လူသေအတွက် ပူဇော်ပသတာ၊ အသုဘအခမ်းအနား၊ နှစ်ပတ်လည် စျာပနအခမ်းအနား၊ အသုဘအိမ်မှာ ညလုံးပေါက် မအိပ်ဘဲစောင့်တာ စတဲ့ အသုဘထုံးစံအများစုဟာ နတ်ဆိုးတွေနဲ့ ဆက်နွှယ်နေတယ်။ တချို့သူတွေဟာ နတ်ဆိုးတွေဆီက တန်ခိုးရဖို့ မူးယစ်ဆေး သုံးလေ့ရှိတယ်။—ဂလာတိ ၅:၂၀။ ဗျာဒိတ် ၂၁:၈။
၂၇ ယေဟောဝါရဲ့ အချုပ်အခြာအာဏာ
ယေဟောဝါဟာ အနန္တတန်ခိုးရှင်၊ စကြဝဠာဖန်ဆင်းရှင် ဖြစ်တယ်။ (ဗျာဒိတ် ၁၅:၃) ဒါကြောင့် အရာခပ်သိမ်းကို ပိုင်ဆိုင်သူ၊ ဖန်ဆင်းရာအားလုံးကို အုပ်စိုးပိုင်ထိုက်တဲ့ အချုပ်အခြာအာဏာပိုင်ရှင် ဖြစ်တယ်။ (ဆာလံ ၂၄:၁။ ဟေရှာယ ၄၀:၂၁-၂၃။ ဗျာဒိတ် ၄:၁၁) ဖန်ဆင်းရာမှန်သမျှအတွက် ပညတ်ဥပဒေတွေ၊ နိယာမတရားတွေကို ချမှတ်ပေးတယ်။ လူတွေကို ဘုရင်တင်မြှောက်ခွင့် ယေဟောဝါမှာ ရှိတယ်။ ဘုရားသခင်ကို ချစ်ပြီး နာခံတာဟာ ဘုရားရဲ့ အချုပ်အခြာအာဏာကို ထောက်ခံရာရောက်တယ်။—၁ ရာဇဝင်ချုပ် ၂၉:၁၁။
၂၈ ကိုယ်ဝန်ဖျက်ချခြင်း
မတော်တဆ ဒါမှမဟုတ် ခန္ဓာကိုယ်ရဲ့ သဘာဝတုံ့ပြန်မှုကြောင့် မဟုတ်ဘဲ မမွေးသေးတဲ့ကလေး သေအောင် တမင်တကာ သတ်တာကို ဆိုလိုတယ်။ သန္ဓေတည်ချိန်ကစပြီး ကလေးဟာ မိခင်ရဲ့အစိတ်အပိုင်းမျှသာ မဟုတ်ဘဲ လူသားတစ်ဦး ဖြစ်နေပြီ။
၂၉ သွေးသွင်းခြင်း
လူတစ်ဦးရဲ့ သွေး ဒါမှမဟုတ် အဓိက သွေးအစိတ်အပိုင်း လေးခုအနက် တစ်ခုကို တခြားသူရဲ့ခန္ဓာကိုယ်ထဲ သွင်းတာ၊ သွေးကို သိုလှောင်ပြီးနောက် ခန္ဓာကိုယ်ထဲ ပြန်သွင်းတာ ဖြစ်တယ်။ အဓိက သွေးအစိတ်အပိုင်းလေးခုကတော့ သွေးနီဥ၊ သွေးဖြူဥ၊ သွေးဥမွှား၊ သွေးရည်ကြည် ဖြစ်တယ်။
၃၀ ဆုံးမခြင်း
ကျမ်းစာမှာပါတဲ့ “ဆုံးမခြင်း” ဆိုတဲ့ စကားလုံးဟာ ပြစ်ဒဏ်ပေးရုံလောက်ပဲ မဟုတ်ဘူး။ သွန်သင်တာ၊ ပညာပေးတာ၊ တည့်မတ်ပေးတာတွေ ပါဝင်တယ်။ ယေဟောဝါ ဆုံးမတဲ့အခါ ရုန့်ရင်းကြမ်းတမ်းတာ၊ ရက်စက်တာတွေ မရှိဘူး။ (ပညာအလိမ္မာ ၄:၁၊ ၂) ယေဟောဝါဟာ မိဘတွေအတွက် အကောင်းဆုံးပုံသက်သေ ချမှတ်ခဲ့တယ်။ ဘုရားရဲ့ဆုံးမမှု ထိရောက်လွန်းလို့ လူတစ်ဦးဟာ ဆုံးမမှုကို နှစ်သက်လာနိုင်တယ်။ (ပညာအလိမ္မာ ၁၂:၁) ယေဟောဝါဟာ မိမိရဲ့လူတွေကို ချစ်တဲ့အတွက် သူတို့ကို လေ့ကျင့်ပေးတယ်။ မှားယွင်းတဲ့သဘောထားကို တည့်မတ်ပေးဖို့၊ ကိုယ်တော်နှစ်သက်တဲ့ နည်းအတိုင်း တွေးတောလုပ်ဆောင်တတ်ဖို့ သွန်သင်ချက်တွေ ပေးတယ်။ မိဘတွေရဲ့ဆုံးမမှုမှာ နာခံသင့်တဲ့အကြောင်းရင်းတွေကို သားသမီး နားလည်လာအောင် ကူညီပေးတာ ပါဝင်တယ်။ ယေဟောဝါနဲ့ သမ္မာကျမ်းစာကို ချစ်မြတ်နိုးလာအောင်၊ ကျမ်းစာလမ်းညွှန်ချက်တွေကို သဘောပေါက်လာအောင် သွန်သင်ပေးတာလည်း ပါတယ်။
၃၁ နတ်ဆိုးများ
နတ်ဆိုးတွေဟာ လူထက်တန်ခိုးကြီးတဲ့၊ မမြင်နိုင်တဲ့ ဝိညာဉ်သတ္တဝါဆိုးတွေ ဖြစ်တယ်။ ဘုရားသခင်ကို သူတို့ မနာခံတဲ့အတွက် ဘုရားရဲ့ရန်သူ၊ ကောင်းကင်တမန်ဆိုးတွေ ဖြစ်လာတယ်။ (ကမ္ဘာဦး ၆:၂။ ယုဒ ၆) သူတို့ဟာ စာတန်နဲ့ပူးပေါင်းပြီး ယေဟောဝါကို ဆန့်ကျင်ပုန်ကန်ခဲ့တယ်။—တရားဟောရာ ၃၂:၁၇။ လုကာ ၈:၃၀။ တမန်တော် ၁၆:၁၆။ ယာကုပ် ၂:၁၉။