၁။ ဒီ​စာ​အုပ်​ကို အသေအချာ လေ့​လာ​ပြီး​နောက် သင် ဘာ​တွေး​မိ​နိုင်​သလဲ။

ဒီ​စာ​အုပ်​ကို လေ့​လာ​တဲ့​အခါ ဘု​ရား​ကတိ​ပြု​ထား​တဲ့ ထာ​ဝ​ရ​အသက်၊ လူ​သေတွေရဲ့ အခြေ​အနေ၊ ရှင်​ပြန်​ထ​မြောက်​ခြင်း​မျှော်​လင့်​ချက် စ​တဲ့ ကျမ်း​စာ​အမှန်​တ​ရား အတော်​များ​များ​ကို သင်​သိ​ခဲ့ရ​ပြီ။ (ဒေ​သနာ ၉:၅။ လုကာ ၂၃:၄၃။ ယောဟန် ၅:၂၈၊ ၂၉။ ဗျာဒိတ် ၂၁:၃၊ ၄) ယေဟောဝါ​သက်​သေတွေရဲ့ အစည်း​အဝေး​တွေ​ကို စတင်​တက်​ရောက်​ပြီး သူတို့​ဟာ စစ်​မှန်​တဲ့​ဝတ်​ပြု​ရေး​နဲ့​အညီ ပြု​မူ​နေ​ထိုင်​သူ​တွေ​ဖြစ်​မှန်း သင် လက်ခံ​မှာ​ပါ။ (ယောဟန် ၁၃:၃၅) အခု​တော့ သင်​ဟာ ယေဟောဝါ​နဲ့ ရင်း​နှီး​တဲ့​ဆက်ဆံ​ရေး ရှိ​လာ​ပြီး ကိုယ်​တော့်​ကို ဝတ်​ပြု​ဖို့ ဆုံး​ဖြတ်​ထား​မှာ​ပဲ။ ဒါ​ဆို​ရင် ‘ဘု​ရား​သခင်​ကို ဝတ်​ပြု​ဖို့ အခု ငါ ဘာ​လုပ်​ရ​မလဲ’ လို့ သင်​တွေး​မိ​နိုင်​တယ်။

၂။ အီ​သီ​ယိုး​ပီး​ယား​တစ်​ယောက် ဘာ​ကြောင့် နှစ်ခြင်း​ခံ​ချင်​တာ​လဲ။

^၂ ယေရှု​ခေတ်​က အီ​သီ​ယိုး​ပီး​ယား​တစ်​ယောက်​လည်း အဲဒီ​လို​ပဲ တွေး​ခဲ့​တယ်။ ယေရှု​ရဲ့​တ​ပည့်​ဖိ​လိပ္ပု​က ယေရှု ရှင်​ပြန်​ထ​မြောက်​ပြီး​နောက် နှစ်​အနည်း​ငယ်​အကြာ​မှာ သူ့​ကို ဟော​ခဲ့​တာ။ ဖိ​လိပ္ပု​က ယေရှု​ဟာ မေရှိ​ယ​ဖြစ်​မှန်း အထောက်​အထား​နဲ့ ရှင်း​ပြတယ်။ အဲဒီ​လူ​ဟာ သိ​လိုက်​ရ​တာ​တွေ​ကြောင့် ရင်​ထဲ​ထိ​သွား​တဲ့​အတွက် “ဒီ​မှာ ရေ​ရှိ​တာ​ပဲ။ ကျွန်​တော် နှစ်ခြင်း​မခံ​ရ​အောင် ဘာ​က တား​ဆီး​နေ​လို့​လဲ” လို့​ပြော​တော့​တယ်။—တမန်​တော် ၈:၂၆-၃၆။

၃။ (က) နောက်​လိုက်​တွေ​ကို ယေရှု ဘယ်​လို​မိန့်မှာ​ခဲ့​သလဲ။ (ခ) နှစ်ခြင်း​ကို ဘယ်​လို ပေး​ရ​သလဲ။

^၃ ယေဟောဝါ​ကို ဝတ်​ပြု​ချင်​ရင် နှစ်ခြင်း​ခံ​ရ​မယ်​လို့ ကျမ်း​စာ​က ရှင်း​ရှင်း​လင်း​လင်း​ပြော​တယ်။ ‘လူမျိုး​တ​ကာ​ဆီ​သွား​ပြီး လူ​တွေ​ကို ကျွန်​တော့်​တ​ပည့် ဖြစ်​လာ​အောင် သွန်သင်​ပေး​ကြ​ပါ။ နှစ်ခြင်း​ပေး​ကြ​ပါ’ ဆို​ပြီး နောက်​လိုက်​တွေ​ကို ယေရှု​ပြော​တယ်။ (မဿဲ ၂၈:၁၉) ယေရှု​ကိုယ်​တိုင် နှစ်ခြင်း​ခံ​ပြီး ပုံနမူနာ​ပြခဲ့​တယ်။ ခေါင်း​ပေါ် ရေ​ဖျန်း​ရုံ​မဟုတ်​ဘဲ ရေ​ထဲ စုံး​စုံး​မြုပ်​အောင် နှစ်​ခဲ့​တယ်။ (မဿဲ ၃:၁၆) အခု​ချိန်​မှာ​လည်း ခ​ရစ်​ယာန်​တစ်​ယောက် နှစ်ခြင်း​ခံ​တဲ့​အခါ ရေ​ထဲ စုံး​စုံး​မြုပ်​အောင် နှစ်​ရ​မယ်။

၄။ နှစ်ခြင်း​က ဘာ​ကို ဖော်ပြနေ​သလဲ။

^၄ နှစ်ခြင်း​ခံ​တာ​က တ​ကယ်​ပဲ ဘု​ရား​မိတ်ဆွေ​ဖြစ်​ချင်​တယ်၊ ဘု​ရား​ကို ဝတ်​ပြု​ချင်​တယ်​ဆို​တာ လူ​အများ​မြင်​အောင် ပြလိုက်​တာ​ပဲ။ (ဆာလံ ၄၀:၇၊ ၈) ဒီ​တော့ ‘နှစ်ခြင်း​ခံ​နိုင်​အောင် ဘာ​လုပ်​ရ​မလဲ’ ဆို​ပြီး သင် တွေး​မိ​မှာ​ပဲ။

၅။ (က) နှစ်ခြင်း​မခံ​ခင် ဦး​ဆုံး ဘာ​လုပ်​ရ​မလဲ။ (ခ) ခ​ရစ်​ယာန်​အစည်း​အဝေး​တွေ​ကို တက်​ရောက်​ဖို့ ဘာ​ကြောင့် အရေး​ကြီး​သလဲ။

^၅ နှစ်ခြင်း​မခံ​ခင် ယေဟောဝါ​နဲ့ ယေရှု​အကြောင်း သိ​ကျွမ်း​ဖို့ လို​တယ်။ သင် ကျမ်း​စာ​လေ့​လာ​နေ​တယ်​ဆို​က​တည်း​က ဒီ​အချက်​ကို လုပ်​ဆောင်​နေ​ပြီ။ (ယောဟန် ၁၇:၃ ကို​ဖတ်​ပါ။) ဒါ​နဲ့ မလုံ​လောက်​သေး​ဘူး။ ယေဟောဝါ​ရဲ့ အလို​တော်​ကို “တိ​ကျ​မှန်​ကန်​စွာ သိ​ကျွမ်း” ဖို့​လို​တယ်​လို့ ကျမ်း​စာ​ပြော​တယ်။ (ကောလောသဲ ၁:၉) ယေဟောဝါ​သက်​သေတွေရဲ့ အစည်း​အဝေး​တွေ​က ယေဟောဝါ​နဲ့ ရင်း​နှီး​တဲ့​ဆက်ဆံ​ရေး ခိုင်​မြဲစေ​ဖို့ ကူညီ​ပေး​ပါ​လိမ့်​မယ်။ ဒါ​ဟာ အဲဒီ​အစည်း​အဝေး​တွေ​ကို မှန်​မှန်​တက်​ရောက်​ဖို့ အရေး​ကြီး​တဲ့ အကြောင်း​ရင်း​တစ်​ခု​ပဲ။—ဟီ​ဘ​ရူး ၁၀:၂၄၊ ၂၅။

၆။ နှစ်ခြင်း​မခံ​ခင်​မှာ ကျမ်း​စာ​အကြောင်း ဘယ်​လောက် သိ​ထား​ဖို့​လို​သလဲ။

^၆ နှစ်ခြင်း​မခံ​ခင် ကျမ်း​စာ​မှာ​ပါ​သမျှ သိ​ထား​ရ​မယ်​လို့ ယေဟောဝါ မတောင်း​ဆို​ပါ​ဘူး။ အီ​သီ​ယိုး​ပီး​ယား​အမျိုး​သား​ကို​လည်း နှစ်ခြင်း​မခံ​ခင် အကုန်​သိ​ထား​ရ​မယ်​လို့ ယေဟောဝါ မတောင်း​ဆို​ခဲ့​ဘူး။ (တမန်​တော် ၈:၃၀၊ ၃၁) ဘု​ရား​သခင်​အကြောင်း ကျွန်​တော်​တို့ ထာ​ဝ​စဉ် လေ့​လာ​သွား​ရ​မှာ။ (ဒေ​သနာ ၃:၁၁) ဒါ​ပေမဲ့ နှစ်ခြင်း​ခံ​ဖို့​ဆို​ရင် အနည်း​ဆုံး​တော့ ကျမ်း​စာ​ရဲ့ အခြေ​ခံ​သွန်သင်​ချက်​တွေ​ကို သိ​နား​လည်​ပြီး လက်ခံ​ဖို့ လို​တယ်။—ဟီ​ဘ​ရူး ၅:၁၂။

၇။ ကျမ်း​စာ​လေ့​လာ​ခြင်း​က သင့်​ကို ဘယ်​လို​ကူညီ​ပေး​သလဲ။

^၇ “ယုံ​ကြည်​ခြင်း​မရှိ​ရင် ဘု​ရား​သခင်​ရဲ့ စိတ်​တော်​နဲ့ မတွေ့​နိုင်​ဘူး” လို့ ကျမ်း​စာ​ပြော​တယ်။ (ဟီ​ဘ​ရူး ၁၁:၆) ဒါ​ကြောင့် နှစ်ခြင်း​မခံ​ခင်​မှာ ယုံ​ကြည်​ခြင်း ရှိ​ဖို့​လို​တယ်။ ယေရှု​ရဲ့​နောက်​လိုက်​တွေ သွန်သင်​ပေး​တာ​ကို ကြား​တဲ့​အခါ ရှေး​ခေတ် ကော​ရိန္သု​မြို့​သား​တ​ချို့ “ယုံ​ကြည်​လာ​ပြီး နှစ်ခြင်း​ခံ​ကြ​တယ်” လို့ ကျမ်း​စာ​ပြော​တယ်။ (တမန်​တော် ၁၈:၈) အလား​တူ​ပဲ၊ ကျမ်း​စာ​လေ့​လာ​ခြင်း​က ဘု​ရားရဲ့​ကတိ​တွေ​ကို​သာ​မက ယေရှု​ရဲ့​ရွေး​ဖိုး​ဟာ အပြစ်​နဲ့ သေခြင်း​က​နေ ကယ်​တင်​နိုင်​စွမ်း​ရှိ​မှန်း​ကို​ပါ ယုံ​ကြည်​လာ​အောင် ကူညီ​ပေး​တယ်။—ယောရှု ၂၃:၁၄။ တမန်​တော် ၄:၁၂။ ၂ တိမောသေ ၃:၁၆၊ ၁၇။

၈။ သိ​ရှိ​လာ​တာ​တွေ​ကို တ​ခြား​သူ​ကို ပြော​ပြဖို့ ဘာ​က လှုံ့​ဆော်​ပေး​မလဲ။

^၈ ကျမ်း​စာ​လေ့​လာ​တာ​နဲ့​အမျှ သင့်​အသက်​တာ​ကို ဘယ်​လို​အကျိုး​ပြု​မှန်း သိ​မြင်​လာ​တဲ့​အခါ ယုံ​ကြည်​ခြင်း ပို​ခိုင်​ခံ့​လာ​မယ်။ အဲဒီ​အခါ သိ​ရှိ​လာ​တာ​တွေ​ကို တ​ခြား​သူ​ကို ပြော​ပြချင်​လာ​ပါ​လိမ့်​မယ်။ (ယေ​ရ​မိ ၂၀:၉။ ၂ ကော​ရိန္သု ၄:၁၃) ဒါ​ဆို ဘယ်​သူ့​ကို ပြော​ပြရ​မလဲ။

၉၊ ၁၀။ (က) သင် သိ​ရှိ​လာ​တာ​တွေ​ကို ဘယ်​သူ​တွေ​ကို အရင်​ဆုံး ပြော​ပြနိုင်​သလဲ။ (ခ) အသင်း​တော်​နဲ့​အတူ ဟော​ပြော​ချင်​တယ်​ဆို​ရင် ဘာ​လုပ်​ရ​မလဲ။

^၉ သိ​ရှိ​လာ​တာ​တွေ​ကို မိသား​စု၊ မိတ်ဆွေ၊ အိမ်​နီး​ချင်း၊ အလုပ်​ဖော်​တွေ​ကို သင် ပြော​ပြချင်​မှာ​ပဲ။ ဒါ​ဟာ ကောင်း​ပါ​တယ်။ အဲဒီ​လို​ပြော​ပြတဲ့​အခါ​တိုင်း ကြင်နာ​မှု​နဲ့ မေတ္တာ​ပါ​ဖို့​တော့ လို​တယ်။ နောက်​ပိုင်း​မှာ အသင်း​တော်​နဲ့​အတူ ပူး​ပေါင်း​ပြီး ဟော​ပြော​လာ​နိုင်​မယ်။ အဲဒီ​လို​ဟော​ဖို့ အသင့်​ဖြစ်​ပြီဆို​ရင် အသင်း​တော်​နဲ့​အတူ ဟော​ပြော​ခြင်း​လုပ်ငန်း​မှာ ပါ​ဝင်​ချင်​တဲ့​အကြောင်း ကျမ်း​စာ​သင်​ပေး​တဲ့​သူ​ကို ပြော​ပြနိုင်​တယ်။ သင် ဟော​ဖို့ အသင့်​ဖြစ်​နေ​ပြီ၊ ကျမ်း​စာ​စံနှုန်း​တွေ​နဲ့​အညီ နေ​ထိုင်​နေ​ပြီလို့ သူ​ယူ​ဆ​ရင် သူ​နဲ့​အတူ အသင်း​တော်​အကြီး​အကဲ​နှစ်​ဦး​ကို သင် တွေ့​ဆုံ​ရ​ပါ​လိမ့်​မယ်။

^၁၀ အဲဒီ​တွေ့​ဆုံ​မှု​မှာ ဘာ​တွေ​ပြော​မှာ​လဲ။ ကျမ်း​စာ​ရဲ့ အခြေ​ခံ​သွန်သင်​ချက်​တွေ​ကို နား​လည်​ပြီး ယုံ​ကြည်​မှု ရှိ​မရှိ၊ နေ့​စဉ်​အသက်​တာ​မှာ ကျမ်း​စာ​သွန်သင်​ချက်​အတိုင်း နာ​ခံ​နေ​မနေ၊ ယေဟောဝါ​သက်​သေ ဖြစ်​ချင်​စိတ် တ​ကယ်​ရှိ​မရှိ သိ​နိုင်​ဖို့ အကြီး​အကဲ​တွေ​က သင်​နဲ့ ဆွေး​နွေး​ပါ​လိမ့်​မယ်။ အကြီး​အကဲ​တွေ​ဟာ သင်​အပါ​အဝင် အသင်း​တော်​သား​အားလုံး​ကို ဂရု​စိုက်​သူ​တွေ​ဖြစ်​တဲ့​အတွက် သူတို့​နဲ့ စကား​ပြော​ရ​မှာ မကြောက်​ပါ​နဲ့။ (တမန်​တော် ၂၀:၂၈။ ၁ ပေတရု ၅:၂၊ ၃) တွေ့​ဆုံ​မှု​ပြီး​နောက် အသင်း​တော်​နဲ့​အတူ ဟော​ပြော​လို့ရ​မရ သင့်​ကို သူတို့ အသိ​ပေး​ပါ​လိမ့်​မယ်။

၁၁။ အသင်း​တော်​နဲ့​အတူ မဟော​ပြော​ခင် သင့်​ဘက်​က ပြု​ပြင်​ပြောင်း​လဲ​မှု​တွေ​လုပ်​ဖို့ ဘာ​ကြောင့် အရေး​ကြီး​တာ​လဲ။

^၁၁ အသင်း​တော်​နဲ့​အတူ မဟော​ပြော​ခင် သင့်​ဘက်​က ပြု​ပြင်​ပြောင်း​လဲ​ဖို့ လို​အပ်​တဲ့​အရာတွေ​ကို အကြီး​အကဲ​တွေ ရှင်း​ပြပေး​ပါ​လိမ့်​မယ်။ အဲဒီ​လို​ပြု​ပြင်​ပြောင်း​လဲ​ဖို့ ဘာ​ကြောင့် အရေး​ကြီး​တာ​လဲ။ ဘု​ရား​သခင်​အကြောင်း တ​ခြား​သူ​တွေ​ကို ပြော​ပြတဲ့​အခါ ကျွန်​တော်​တို့​ဟာ ယေဟောဝါ​ကို ကိုယ်​စား​ပြု​နေ​လို့၊ ကိုယ်​တော့်​ကို ဂုဏ်​တင်​တဲ့​နည်း​နဲ့ ပြု​မူ​နေ​ထိုင်​ရ​မှာ ဖြစ်​လို့​ပဲ။—၁ ကော​ရိန္သု ၆:၉၊ ၁၀။ ဂလာ​တိ ၅:၁၉-၂၁။

၁၂။ လူ​တိုင်း ဘာ​ကြောင့် နောင်​တ​ရ​ဖို့ လို​သလဲ။

^၁၂ နှစ်ခြင်း​မခံ​ခင် သင်​လုပ်​ရ​မယ့်​အရာ ရှိ​သေး​တယ်။ တမန်​တော်​ပေတရု​က “ဒါ​ကြောင့် ခင်​ဗျား​တို့​ရဲ့​အပြစ်​တွေ​ကို ပယ်​ဖျက်​စေ​ချင်​တယ်​ဆို​ရင် နောင်​တ​ရ​ကြ​ပါ။ ဘု​ရား​သခင်​ဆီ ပြန်​လှည့်​လာ​ကြ​ပါ” လို့​ပြော​တယ်။ (တမန်​တော် ၃:၁၉) နောင်​တ​ရ​တယ်​ဆို​တာ ဘာ​ကို​ဆိုလို​တာ​လဲ။ လုပ်​မိ​ခဲ့​တဲ့ မကောင်း​မှု​အတွက် အလွန်​ဝမ်း​နည်း​တယ်​ဆို​တဲ့ အဓိပ္ပာယ်​ပဲ။ ဥပမာ၊ လိင်​အကျင့်​ယို​ယွင်း​တဲ့ ဘဝ​မျိုး​နဲ့ နေ​ထိုင်​ခဲ့ရင် နောင်​တ​ရ​ဖို့​လို​တယ်။ သင့်​ဘဝ​မှာ မှန်​ရာ​ကို​လုပ်​ဖို့ အစွမ်း​ကုန် ကြိုး​စား​ခဲ့ရင်​တောင် နောင်​တ​ရ​ဖို့ လို​နေ​ဆဲ​ပဲ။ ကျွန်​တော်​တို့​အားလုံး အပြစ်​သား​တွေ​ဖြစ်​ပြီး ဘု​ရားရဲ့ ခွင့်​လွှတ်​မှု လို​အပ်​နေ​လို့​ပဲ။—ရော​မ ၃:၂၃။ ၅:၁၂။

၁၃။ “ပြန်​လှည့်​လာ​ကြ​ပါ” ဆို​တာ ဘာ​ကို ဆိုလို​တာ​လဲ။

^၁၃ လုပ်​ခဲ့​တာ​တွေ​အတွက် ဝမ်း​နည်း​နေ​ရုံ​နဲ့ လုံ​လောက်​ပြီလား။ မလုံ​လောက်​သေး​ဘူး။ “ပြန်​လှည့်​လာ” ရ​မယ်​လို့ ပေတရု​ပြော​တယ်။ အရင်​က လုပ်​ခဲ့​တဲ့ မကောင်း​တဲ့​အကျင့်​မှန်​သမျှ​ကို စွန့်​ပယ်​ပြီး မှန်​ရာ​ကို စ​လုပ်​ရ​မယ်​ဆို​တဲ့ အဓိပ္ပာယ်​ပဲ။ ဥပမာ၊ ကိုယ်​မရောက်​ဖူး​တဲ့​နေ​ရာ​တစ်​ခု​ကို ခ​ရီး​သွား​နေ​တယ် ဆို​ပါ​စို့။ တစ်​အောင့်​ကြာ​တော့ လမ်း​မှား​နေ​မှန်း သိ​လိုက်​ရ​တယ်။ သင် ဘယ်​လို​လုပ်​မလဲ။ အရှိန်​လျှော့​လိုက်​မယ်၊ ရပ်​တန့်​ပြီး ပြန်​လှည့်​လာ​မယ်၊ အဲဒီ​နောက် လမ်း​မှန်​ပေါ် သွား​မှာ သေချာ​တယ်။ အဲဒီ​လို​ပဲ၊ ကျမ်း​စာ​လေ့​လာ​တဲ့​အခါ ပြောင်း​လဲ​ရ​မယ့်​အကျင့်​တွေ၊ ပြောင်း​လဲ​ရ​မယ့်​အရာတွေ ရှိ​မှန်း သင် သိ​လာ​ပါ​လိမ့်​မယ်။ အဲဒီ​အခါ လို​လို​လား​လား “ပြန်​လှည့်​လာ” ပါ၊ တစ်​နည်း​အား​ဖြင့် လို​အပ်​သလို ပြု​ပြင်​ပြောင်း​လဲ​ပြီး မှန်​ရာ​ကို စ​လုပ်​ပါ။

၁၄။ ဘု​ရား​သခင်​ဆီ ဘယ်​လို ဆက်​ကပ်​အပ်​နှံ​ရ​သလဲ။

^၁၄ နှစ်ခြင်း​မခံ​ခင် သင် လုပ်​ရ​မယ့်​အရာ နောက်​တစ်​ခု​က​တော့ ယေဟောဝါ​ဆီ ဆက်​ကပ်​အပ်​နှံ​တာ​ပဲ။ ယေဟောဝါ​ဆီ ဆက်​ကပ်​အပ်​နှံ​တယ်​ဆို​တာ ကိုယ်​တော့်​ကို​ပဲ ဝတ်​ပြု​မယ်၊ ဘဝ​မှာ အလို​တော်​ကို ဦးစား​ထား​မယ်​လို့ ဆုတောင်း​ပြီး ကတိ​ပေး​တာ​ဖြစ်​တယ်။—တ​ရား​ဟော​ရာ ၆:၁၅။

၁၅၊ ၁၆။ ဘာ​က ယေဟောဝါ​ဆီ ဆက်​ကပ်​အပ်​နှံ​ချင်​စိတ် ပေါ်​လာ​စေ​သလဲ။

^၁၅ ယေဟောဝါ​ကို​ပဲ ဝတ်​ပြု​ပါ့​မယ်​လို့ ကတိ​ပေး​တာ​ဟာ ချစ်​ရ​သူ​နဲ့ တစ်​သက်​လုံး အတူ​နေ​သွား​မယ်​လို့ ကတိ​ပေး​တာ​နဲ့ တူ​တယ်။ ဥပမာ၊ ကောင်​လေး​နဲ့ ကောင်​မလေး ချစ်​သူ​ဘဝ​ရောက်​သွား​ပြီ ဆို​ပါ​စို့။ ကောင်​လေး​က ကောင်မလေး​အကြောင်း ပို​သိ​လာ​လေ၊ ပို​ချစ်​လာ​လေ​ပဲ။ လက်​ထပ်​ယူ​ချင်​စိတ် တ​ဖွား​ဖွား​ပေါ်​လာ​လေ​ပဲ။ ဘဝ​နဲ့​ဆိုင်​တဲ့ အရေး​ကြီး​ဆုံး​ဖြတ်​ချက် ဖြစ်​ပေမဲ့ ကောင်​လေး​ဟာ ကောင်​မလေး​ကို ချစ်​တဲ့​အတွက် အိမ်​ထောင်​တာဝန်​ကို ယူ​ဖို့ ဝန်​မလေး​ဘူး။

^၁၆ သင်​လည်း ယေဟောဝါ​အကြောင်း သိ​လာ​တာ​နဲ့​အမျှ ကိုယ်​တော့်​ကို ချစ်​လာ​တယ်၊ ဘု​ရား​အမှု​ဆောင်​ဖို့ အတတ်​နိုင်​ဆုံး ကြိုး​စား​ချင်​လာ​တယ်။ အဲဒီ​အခါ ဘု​ရား​အမှု​ဆောင်​မယ်​လို့ ဆုတောင်း​ပြီး ကတိ​ပေး​ချင်​စိတ် တ​ဖွား​ဖွား​ပေါ်​လာ​ပါ​လိမ့်​မယ်။ ယေရှု​နောက်​လိုက် ဖြစ်​ချင်​သူ​တိုင်း “ကိုယ့်​ကိုယ်​ကိုယ် ငြင်း​ပယ်​ရ​မယ်” လို့ ကျမ်း​စာ​ပြော​တယ်။ (မာကု ၈:၃၄) ဘာ​ကို​ဆိုလို​တာ​လဲ။ အသက်​တာ​မှာ ယေဟောဝါ​ကို နာ​ခံ​တာ​ကို နံ​ပါတ်​တစ် ဦးစား​ထား​ရ​မယ်​ဆို​တဲ့ အဓိပ္ပာယ်​ပဲ။ ကိုယ့်​ဆန္ဒ၊ ကိုယ့်​ပန်း​တိုင်​တွေ​ထက် ယေဟောဝါ​ဖြစ်​စေ​ချင်​တာ​ကို အဓိ​က ​ဦးစား​ပေး​ရ​မယ်။—၁ ပေတရု ၄:၂ ကို​ဖတ်​ပါ။

၁၇။ တ​ချို့​က ကိုယ့်​ကိုယ်​ကိုယ် ယေဟောဝါ​ဆီ ဘာ​လို့ မအပ်​နှံ​ကြ​တာ​လဲ။

^၁၇ တ​ချို့​က ကိုယ့်​ကိုယ်​ကိုယ် ယေဟောဝါ​ဆီ မအပ်​နှံ​ကြ​ဘူး။ ဘု​ရား​အမှု​ဆောင်​မယ်​ဆို​တဲ့​ကတိ မတည်​မှာ​ကို စိုး​ရိမ်​နေ​လို့​ပဲ။ ယေဟောဝါ​ကို စိတ်​မငြို​ငြင်​စေ​ချင်​လို့၊ မအပ်​နှံ​ဘဲ​နေ​ရင် ကိုယ့်​လုပ်​ရပ်တွေ​အတွက် ယေဟောဝါ​ဆီ ဖြေရှင်း​ချက် ပေး​စ​ရာ​မလို​ဘူး​ဆို​ပြီး ယူ​ဆ​လို့ ဖြစ်​နိုင်​တယ်။

၁၈။ ယေဟောဝါ​ငြို​ငြင်​မှာ စိုး​တဲ့​စိတ်​ကို အောင်​မြင်​ကျော်​လွှား​ဖို့ ဘာ​က ကူညီ​ပေး​မလဲ။

^၁၈ ယေဟောဝါ​အပေါ်​ထား​တဲ့ မေတ္တာ​က ကိုယ်​တော်​ငြို​ငြင်​မှာ စိုး​တဲ့​စိတ်​ကို အောင်​မြင်​ကျော်​လွှား​ဖို့ သင့်​ကို ကူညီ​ပေး​ပါ​လိမ့်​မယ်။ ဘု​ရား​ကို​ချစ်​တဲ့​အတွက် ကတိ​တည်​အောင် အတတ်​နိုင်​ဆုံး လုပ်​ဆောင်​ပါ​လိမ့်​မယ်။ (ဒေ​သနာ ၅:၄။ ကောလောသဲ ၁:၁၀) ယေဟောဝါ​ရဲ့​အလို​တော်​ဆောင်​ဖို့ ခက်​ခဲ​လွန်း​တယ်​လို့ သင်​ယူ​ဆ​မှာ မဟုတ်​ဘူး။ တမန်​တော်​ယောဟန်​က “ဘု​ရား​သခင်​ကို ချစ်​တယ်​ဆို​တာ ပညတ်​ချက်​တွေ လိုက်​နာ​တာ​ကို ဆိုလို​တယ်။ ပညတ်​ချက်​တွေ​ဟာ လိုက်​နာ​ဖို့ ခက်​ခဲ​လွန်း​တဲ့​အရာ မဟုတ်​ပါ​ဘူး” လို့ ရေးခဲ့​တယ်။—၁ ယောဟန် ၅:၃။

၁၉။ ယေဟောဝါ​ဆီ ဆက်​ကပ်​အပ်​နှံ​ရ​မှာ​ကို ဘာ​လို့ မတွန့်​ဆုတ်​သင့်​သလဲ။

^၁၉ ယေဟောဝါ​ဆီ ကိုယ့်​ကိုယ်​ကိုယ် ဆက်​ကပ်​အပ်​နှံ​ဖို့ ပြည့်​ဝ​စုံလင်​သူ ဖြစ်​စ​ရာ မလို​ပါ​ဘူး။ မတတ်​နိုင်​တာ​ကို လုပ်​ဖို့ ကိုယ်​တော် ဘယ်​တော့​မှ မတောင်း​ဆို​ဘူး။ (ဆာလံ ၁၀၃:၁၄) မှန်​ရာ​လုပ်​ဆောင်​နိုင်​အောင် သင့်​ကို ကိုယ်​တော် ကူညီ​ပါ​လိမ့်​မယ်။ (ဟေ​ရှာ​ယ ၄၁:၁၀) ယေဟောဝါ​ကို စိတ်​နှလုံး​အကြွင်း​မဲ့ ယုံ​ကြည်​ကိုး​စား​ပါ။ ဒါ​ဆို​ရင် ‘ဘု​ရား​က သင့်​လမ်း​ခ​ရီးတွေ​ကို ဖြောင့်​ဖြူး​စေ​မယ်။’—ပညာ​အလိမ္မာ ၃:၅၊ ၆။

၂၀။ ကိုယ့်​ကိုယ်​ကိုယ် ဘု​ရား​ဆီ ဆက်​ကပ်​အပ်​နှံ​ပြီး​နောက် ဘာ​လုပ်​ရ​ဦး​မလဲ။

^၂၀ ယေဟောဝါ​ဆီ ဆက်​ကပ်​အပ်​နှံ​ဖို့ အသင့်​ဖြစ်​ပြီလို့ သင် ယူ​ဆ​သလား။ ယေဟောဝါ​ဆီ ဆက်​ကပ်​အပ်​နှံ​ပြီး​ပြီဆို​ရင် နောက်​တစ်ဆင့်​အတွက် အသင့်​ဖြစ်​နေ​ပြီ။ သင် နှစ်ခြင်း​ခံ​ရ​ဦး​မယ်။

၂၁၊ ၂၂။ သင့်​ယုံ​ကြည်​ခြင်း​ကို ဘယ်​လို​နည်း​နဲ့ “လူ​သိ​ရှင်​ကြား ကြေ​ညာ” နိုင်​သလဲ။

^၂၁ သင် ယေဟောဝါ​ဆီ ဆက်​ကပ်​အပ်​နှံ​ပြီး​ပြီ၊ နှစ်ခြင်း​ခံ​ချင်​ပြီဆို​ရင် အသင်း​တော်​မှာ​ရှိ​တဲ့ အကြီး​အကဲ​အဖွဲ့​ရဲ့ ညှိ​နှိုင်း​ရေးမှူး​ကို အသိ​ပေး​ပါ။ ကျမ်း​စာ​ရဲ့ အခြေ​ခံ​သွန်သင်​ချက်​တွေ​ကို သင်​နဲ့ ပြန်​သုံးသပ်​နိုင်​ဖို့ အကြီး​အကဲ​တ​ချို့​ကို သူ​စီ​စဉ်​ပေး​ပါ​လိမ့်​မယ်။ သင် အရည်​အချင်း​ပြည့်​မီ​တယ်​လို့ သူတို့​ယူ​ဆ​ရင် ယေဟောဝါ​သက်​သေတွေ ကျင်း​ပမယ့် အစည်း​အဝေး​ကြီး​တစ်​ခု​မှာ နှစ်ခြင်း​ခံ​နိုင်​ပြီဆို​တာ အသိ​ပေး​ပါ​လိမ့်​မယ်။ အဲဒီ​အစည်း​အဝေး​မှာ နှစ်ခြင်း​ရဲ့​အဓိပ္ပာယ်​ကို ရှင်း​ပြတဲ့ ဟော​ပြော​ချက် ပါ​တယ်။ ဟော​ပြော​သူ​က နှစ်ခြင်း​ခံ​ဖို့ အသင့်​ဖြစ်​နေ​သူ​တွေ​ကို ရိုး​ရှင်း​တဲ့​မေး​ခွန်း​နှစ်​ခု မေး​ပါ​လိမ့်​မယ်။ အဲဒီ​မေး​ခွန်း​တွေ​ကို ဖြေဆို​တာ​ဟာ သင့်​ယုံ​ကြည်​ခြင်း​ကို “လူ​သိ​ရှင်​ကြား ကြေ​ညာ” တာ​ဖြစ်​တယ်။—ရော​မ ၁၀:၁၀။

^၂၂ အဲဒီ​နောက် ရေ​ထဲ​ကို စုံး​စုံး​မြုပ်​အောင် နှစ်​ပြီး နှစ်ခြင်း​ခံ​ရ​မယ်။ နှစ်ခြင်း​ခံ​တာ​က ယေဟောဝါ​ဆီ သင့်​ကိုယ်​သင် အပ်​နှံ​ပြီး​ပြီ၊ အခု ယေဟောဝါ​သက်​သေတစ်​ယောက် ဖြစ်​ပြီဆို​တာ လူ​အများ​ရှေ့ ပြလိုက်​တာ​ပဲ။

၂၃။ “အဖဘု​ရားရဲ့​နာ​မည်၊ သား​တော်​ရဲ့​နာ​မည်၊ သန့်​ရှင်း​သော စွမ်းအား​တော်​ရဲ့ နာ​မည်​နဲ့” နှစ်ခြင်း​ခံ​တယ်​ဆို​တာ ဘာ​ကို​ဆိုလို​တာ​လဲ။

^၂၃ ယေရှု​ရဲ့​တ​ပည့်တွေ​ဟာ “အဖဘု​ရားရဲ့​နာ​မည်၊ သား​တော်​ရဲ့​နာ​မည်၊ သန့်​ရှင်း​သော စွမ်းအား​တော်​ရဲ့​နာ​မည်​နဲ့” နှစ်ခြင်း​ခံ​ရ​မယ်​ဆို​ပြီး ပြော​ထား​တယ်။ (မဿဲ ၂၈:၁၉ ကို​ဖတ်​ပါ။) ဘာ​ကို​ဆိုလို​တာ​လဲ။ ယေဟောဝါ​ရဲ့ အခွင့်​အာ​ဏာ၊ ဘု​ရားရဲ့ရည်​ရွည်​ချက်​မှာ ယေရှု​ရဲ့​အခန်း​ကဏ္ဍ၊ အလို​တော်​ပြည့်​စုံ​အောင် စွမ်းအား​တော်​ကို ဘု​ရား​အသုံး​ပြု​တယ်ဆိုတာ အသိ​အမှတ်​ပြု​ခြင်း​ကို ဆိုလို​တယ်။—ဆာလံ ၈၃:၁၈။ မဿဲ ၂၈:၁၈။ ဂလာ​တိ ၅:၂၂၊ ၂၃။ ၂ ပေတရု ၁:၂၁။

၂၄၊ ၂၅။ (က) နှစ်ခြင်း​ဟာ ဘာ​ကို ဆိုလို​တာ​လဲ။ (ခ) နောက်​ဆုံး​အခန်း​မှာ ဘာ​အကြောင်း ဆွေး​နွေး​မလဲ။

^၂၄ နှစ်ခြင်း​မှာ အရေး​ကြီး​တဲ့​ဆိုလို​ချက်​တစ်​ခု ရှိ​သေး​တယ်။ ရေ​ထဲ စုံး​စုံး​မြုပ်​အောင် နှစ်​တာ​က သင်​ဟာ ဘဝ​လမ်း​စဉ်​ဟောင်း​ကို စွန့်​လိုက်​ပြီ၊ ဘဝ​လမ်း​စဉ်​ဟောင်း​မှာ သေဆုံး​သွား​ပြီဆို​တဲ့ သဘော​ပဲ။ ရေ​ထဲ​က ထ​လာ​တဲ့​အခါ ဘု​ရား​အလို​တော်​ဆောင်​ဖို့ ဘဝ​သစ်​မှာ ပြန်​ရှင်​လာ​ပြီ၊ အခု​ချိန်​က​စ​ပြီး ယေဟောဝါ​ကို ဝတ်​ပြု​တော့​မယ်​ဆို​တာ ဖော်ပြတယ်။ လူ​တစ်ဦး၊ အဖွဲ့​အစည်း​တစ်​ခု၊ လုပ်ငန်း​တစ်​ခု​ဆီ သင့်​ကိုယ်​သင် အပ်​နှံ​လိုက်​တာ မဟုတ်​မှန်း သတိ​ရ​ပါ။ သင့်​အသက်​တာ​ကို ယေဟောဝါ​ဆီ အပ်​နှံ​လိုက်​တာ​ပဲ။

^၂၅ ဆက်​ကပ်​အပ်​နှံ​လိုက်​တဲ့​အတွက် ဘု​ရား​သခင်​နဲ့ သင် ရင်း​နှီး​ခွင့်​ရ​လာ​နိုင်​တယ်။ (ဆာလံ ၂၅:၁၄) လူ​တစ်​ယောက် နှစ်ခြင်း​ခံ​လိုက်​တာ​နဲ့ ကယ်​တင်​ခြင်း​ရ​ပြီလို့ မဆိုလို​ဘူး။ တမန်​တော်​ပေါလု​က “ကယ်​တင်​ခြင်း​ရ​ဖို့ ကြောက်​ရွံ့​တုန်​လှုပ်​တဲ့​စိတ်​နဲ့ ဆက်​ကြိုး​စား​နေ​ကြ​ပါ” လို့ရေးခဲ့​တယ်။ (ဖိ​လိပ္ပိ ၂:၁၂) နှစ်ခြင်း​ခံ​တာ​ဟာ အစ​ပဲ ရှိ​သေး​တယ်။ ဒီ​တော့ ယေဟောဝါ​နဲ့ အမြဲရင်း​နှီး​အောင် ဘာ​လုပ်​နိုင်​သလဲ။ နောက်​ဆုံး​အခန်း​က အဖြေပေး​ပါ​လိမ့်​မယ်။