၁။ ကျွန်​တော်​တို့​ရဲ့ အသက်​ပေး​ရှင်​ဟာ ဘယ်​သူ​လဲ။

ယေ​ဟော​ဝါ​ဟာ “အသက်​ရှင်​တဲ့​ဘု​ရား” ဖြစ်​တယ်။ (ယေ​ရ​မိ ၁၀:၁၀) ကျွန်​တော်​တို့​ရဲ့ ဖန်​ဆင်း​ရှင်၊ အသက်​ပေး​ရှင်​လည်း ဖြစ်​တယ်။ “ကိုယ်​တော်​က အရာ​ခပ်​သိမ်း​ကို ဖန်​ဆင်း​ခဲ့​တယ်။ အရာ​ခပ်​သိမ်း​ဟာ အလို​တော်​ကြောင့် ဖန်​ဆင်း​ခံ​ရ​ပြီး တည်​ရှိ​နေ​တယ်” လို့ ကျမ်း​စာ​ပြော​တယ်။ (ဗျာဒိတ် ၄:၁၁) ယေဟောဝါ​ဟာ ကျွန်​တော်​တို့​ကို အသက်​ရှင်​စေ​ချင်​တယ်။ အသက်​ဟာ ဘု​ရား​ပေး​တဲ့ အဖိုး​တန်​ဆု​လက်​ဆောင်​ပဲ။—ဆာလံ ၃၆:၉ ကို​ဖတ်​ပါ။

၂။ အောင်​မြင်​တဲ့​ဘဝ​ကို ဘယ်​လို ပိုင်​ဆိုင်​နိုင်​သလဲ။

^၂ ကျွန်​တော်​တို့ အသက်​ဆက်​နိုင်​ဖို့ လို​အပ်​တဲ့ အစာ​ရေ​စာ​တွေ​ကို ယေဟောဝါ ပေး​ထား​တယ်။ (တမန်​တော် ၁၇:၂၈) ဒါ​တင် မက​သေး​ဘူး။ ဘဝ​ကို ပျော်​မွေ့​စေ​ချင်​တယ်။ (တမန်​တော် ၁၄:၁၅-၁၇) အောင်​မြင်​တဲ့​ဘဝ​​​​​ ပိုင်​ဆိုင်​ချင်​ရင် ဘု​ရားရဲ့​ပညတ်​တွေ​ကို နာ​ခံ​ဖို့​လို​တယ်။—ဟေ​ရှာ​ယ ၄၈:၁၇၊ ၁၈။

၃။ အာ​ဗေ​လ​ကို ကာ​အိ​န ​သတ်​လိုက်​တဲ့​အခါ ယေဟောဝါ ဘာ​လုပ်​ခဲ့​သလဲ။

^၃ ကျွန်​တော်​တို့​ရဲ့​အသက်​ရော သူ​တစ်ပါး​ရဲ့​အသက်​ပါ ယေဟောဝါ​အတွက် အဖိုး​တန်​တယ်​လို့ ကျမ်း​စာ သွန်သင်​တယ်။ အာ​ဒံ​နဲ့ ဧ​ဝ​ရဲ့​သား ကာ​အိ​န​က ညီ​အာ​ဗေ​လ​ကို အရမ်း​ဒေါသ​ထွက်​တဲ့​အခါ သူ့​ဒေါသ​ကို ထိန်း​ဖို့ ယေဟောဝါ သတိ​ပေး​တယ်။ ကာ​အိ​န​က နား​မထောင်​ဘူး။ ဒေါသ​ထွက်​လွန်း​လို့ “ညီ​အာ​ဗေ​လ​ကို ရန်ရှာ​ပြီး သတ်​လိုက်​တယ်။” (ကမ္ဘာဦး ၄:၃-၈) အာ​ဗေ​လ​ကို သတ်​လိုက်​တဲ့​အတွက် ကာ​အိ​န​ကို ယေဟောဝါ ဒဏ်​ပေး​ခဲ့​တယ်။ (ကမ္ဘာဦး ၄:၉-၁၁) ဒါ​ကြောင့် ဒေါသ​ထွက်​တာ၊ မုန်း​တီး​တာ​ဟာ အန္တရာယ်​ရှိ​တယ်။ အကြမ်း​ဖက်​သူ၊ ရက်​စက်​သူ ဖြစ်​စေ​နိုင်​လို့​ပဲ။ အဲဒီ​လို​လူ​ဟာ ထာ​ဝ​ရ​အသက် မရ​နိုင်​ဘူး။ (၁ ယောဟန် ၃:၁၅ ကို​ဖတ်​ပါ။) ယေဟောဝါ​ရဲ့​နှစ်​သက်​မှု ရ​ဖို့ လူ​တိုင်း​ကို ချစ်​တတ်​အောင် ကျွန်​တော်​တို့ သင်​ယူ​ရ​မယ်။—၁ ယောဟန် ၃:၁၁၊ ၁၂။

၄။ အစ္စရေးတွေ​ကို ဘု​ရား​ပေး​တဲ့ ပညတ်​တစ်​ခု​က အသက်​ဆု​လက်​ဆောင်​အကြောင်း ဘာ​သင်​ပေး​သလဲ။

^၄ နှစ်​ထောင်​နဲ့​ချီ ကြာ​ပြီး​တဲ့​နောက် မော​ရှေ​ကို ပညတ်​တော်​ဆယ်​ပါး ပေး​ချိန်​မှာ ယေဟောဝါ​ဟာ အသက်​ကို တန်​ဖိုး​ထား​တယ်​ဆို​တာ ဖော်ပြတယ်။ ပညတ်​တစ်​ခု​မှာ “လူ့​အသက် မသတ်​နဲ့” လို့ ပြော​ထား​တယ်။ (တ​ရား​ဟော​ရာ ၅:၁၇) တ​မင်​တ​ကာ လူ​သတ်​မယ်​ဆို​ရင် သတ်​တဲ့​သူ​ဟာ သေဒဏ်​ခံ​ရ​မယ်။

၅။ ကိုယ်​ဝန်​ဖျက်​ချ​တာ​ကို ဘု​ရား ဘယ်​လို​ရှု​မြင်​သလဲ။

^၅ ကိုယ်​ဝန်​ဖျက်​ချ​တာ​ကို ဘု​ရား ဘယ်​လို​ရှု​မြင်​သလဲ။ မမွေး​သေး​တဲ့ ကလေး​ရဲ့​အသက်​တောင် ယေဟောဝါ​အတွက် အဖိုး​တန်​တယ်။ အစ္စရေးတွေ​ကို​ပေး​တဲ့ ပညတ်​တစ်​ခု​မှာ လူ​တစ်​ယောက်​ဟာ ကိုယ်​ဝန်​ဆောင်​မိ​ခင်​ကို ထိ​ခိုက်​အောင်​လုပ်​လို့ က​လေး​သေသွား​မယ်​ဆို​ရင် သေဒဏ်​ခံ​ရ​မယ်​လို့ ယေဟောဝါ ပြော​တယ်။ (ထွက်​မြောက်​ရာ ၂၁:၂၂၊ ၂၃ ကို​ဖတ်​ပါ။ ဆာလံ ၁၂၇:၃) ဒါ​ကြောင့် ကိုယ်​ဝန်​ဖျက်​ချ​တာ မှား​တယ်​ဆို​တာ သိ​ရ​တယ်။—ရှင်း​လင်း​ချက် ၂၈ ကို​ကြည့်​ပါ။

၆၊ ၇။ အသက်​ကို တန်​ဖိုး​ထား​မှန်း ဘယ်​လို​ပြနိုင်​သလဲ။

^၆ ကျွန်​တော်​တို့​ရဲ့​အသက်​ကို​ရော သူ​တစ်ပါး​ရဲ့​အသက်​ကို​ပါ တန်​ဖိုး​ထား​မှန်း ဘယ်​လို​ပြနိုင်​သလဲ။ ကိုယ့်​အသက်​ကို​ရော သူ​တစ်ပါး​အသက်​ကို​ပါ အန္တရာယ်​ဖြစ်​စေ​မယ့်​အရာ မှန်​သမျှ​ကို ရှောင်ရ​မယ်။ ဒါ​ကြောင့် ဆေး​ရွက်​ကြီး၊ ကွမ်း၊ မူး​ယစ်​ဆေး​တွေ​ကို သုံး​စွဲ​မှာ မဟုတ်​ဘူး။ ဒါ​တွေ​ဟာ ကျွန်​တော်​တို့​ကို အန္တရာယ်​ပေး​နိုင်​တဲ့​အပြင် အသက်​ပါ ဆုံး​ရှုံး​စေ​နိုင်​လို့​ပဲ။

^၇ ဘု​ရား​ပေး​ထား​တဲ့ အသက်​နဲ့ ကိုယ်​ခန္ဓာ​ကို ဘု​ရား​နှစ်​သက်​တဲ့​နည်း​အတိုင်း အသုံး​ပြု​ရ​မယ်။ ဒါ​ကြောင့် ကျွန်​တော်​တို့​ရဲ့ ကိုယ်​ခန္ဓာ​ကို ဂရု​စိုက်​ရ​မယ်။ ဂရု​မစိုက်​ရင် ဘု​ရား​သခင့်​အမြင်​မှာ မသန့်​ရှင်း​သူ​တွေ ဖြစ်​သွား​လိမ့်​မယ်။ (ရော​မ ၆:၁၉။ ၁၂:၁။ ၂ ကော​ရိန္သု ၇:၁) အသက်​ကို အဖိုး​တန်​တဲ့​အရာ​အဖြစ် မရှု​မြင်​ဘူး​ဆို​ရင် အသက်​ပေး​ရှင် ယေဟောဝါ​ကို ဝတ်​ပြု​ဖို့ မဖြစ်​နိုင်​ဘူး။ အကျင့်​ဆိုး​တွေ​ကို ဖြတ်​ဖို့ အတော့်​ကို​ခက်​ပေမဲ့ အသက်​ကို အဖိုး​တန်​တဲ့​အရာ​အဖြစ် ရှု​မြင်​ပြီး ကြိုး​စား​အား​ထုတ်​မယ်​ဆို​ရင် ယေဟောဝါ ကူညီ​ပေး​ပါ​လိမ့်​မယ်။

၈။ ကိုယ့်​အသက်​ရော သူ​တစ်ပါး​အသက်​ပါ အန္တရာယ်​ဖြစ်​စေ​မယ့်​အရာ​ကို ရှောင်​ဖို့ ကျွန်​တော်​တို့ ဘာ​လုပ်​ရ​မလဲ။

^၈ အသက်​ဟာ အဖိုး​တန်​ဆု​လက်​ဆောင်​ဖြစ်​မှန်း ကျွန်​တော်​တို့ သိ​ခဲ့ရ​ပြီ။ ကိုယ့်​အသက်​ရော သူ​တစ်ပါး​အသက်​ပါ အန္တရာယ်​ဖြစ်​စေ​မယ့်​အရာ​ကို ကျွန်​တော်​တို့ အတတ်​နိုင်​ဆုံး ရှောင်​မယ်​ဆို​တာ ယေဟောဝါ ယုံ​တယ်။ ကား၊ ဆိုင်​ကယ်​နဲ့ တ​ခြား​ယာဉ်​တွေ​ကို အန္တရာယ်​ကင်း​အောင် ဂရု​တ​စိုက်​မောင်း​နှင်​တယ်။ အန္တရာယ်​ရှိ​တဲ့၊ ကြမ်း​တမ်း​တဲ့ အား​က​စား​နည်း​တွေ​ကို ရှောင်​တယ်။ (ဆာလံ ၁၁:၅) ကျွန်​တော်​တို့​ရဲ့ နေ​အိမ်​ကို​လည်း အတတ်​နိုင်​ဆုံး အန္တရာယ်​ကင်း​အောင် ထား​တယ်။ ‘အိမ်​မိုး​ပေါ်​က​နေ တစ်​ယောက်​ယောက် ပြုတ်​ကျ​လို့ အိမ်​သား​တွေ​အပေါ် အပြစ်​သင့်​တာ​မျိုး မဖြစ်​စေ​ဖို့ အိမ်​သစ်​ဆောက်​တဲ့​အခါ အိမ်​မိုး​ပတ်​လည်​မှာ အကာ​အရံ လုပ်​ထား​ရ​မယ်’ လို့ အစ္စရေးတွေ​ကို ယေဟောဝါ မိန့်မှာ​တယ်။—တ​ရား​ဟော​ရာ ၂၂:၈။

၉။ တိ​ရစ္ဆာန်တွေ​ကို ဘယ်​လို ပြု​မူ​ဆက်ဆံ​သင့်​သလဲ။

^၉ တိ​ရစ္ဆာန်တွေ​ကို ကျွန်​တော်​တို့​ရဲ့ ပြု​မူ​ဆက်ဆံ​ပုံ​က​လည်း ယေဟောဝါ​အတွက် အရေး​ပါ​တယ်။ အသား​စား​ဖို့၊ ဝတ်​ဖို့​အတွက် တိ​ရစ္ဆာန်တွေ​ကို ယေဟောဝါ သတ်​ခွင့်​ပြု​တယ်။ အသက်​အန္တရာယ်​ပြု​လာ​တဲ့ တိ​ရစ္ဆာန်တွေ​ကို​လည်း သတ်​ခွင့်​ပြု​တယ်။ (ကမ္ဘာဦး ၃:၂၁။ ၉:၃။ ထွက်​မြောက်​ရာ ၂၁:၂၈) ဒါ​ပေမဲ့ တိ​ရစ္ဆာန်တွေ​ကို ရက်​စက်​တာ၊ အပျော်​သဘော​နဲ့ သတ်​တာ​ကို လုပ်​လို့​မရ​ဘူး။—ပညာ​အလိမ္မာ ၁၂:၁၀။

၁၀။ သွေး​ဟာ အသက်​ကို ကိုယ်​စား​ပြု​မှန်း ဘယ်​လို​သိ​ရ​သလဲ။

^၁၀ သွေး​ဟာ အသက်​ကို ကိုယ်​စား​ပြု​လို့ ယေဟောဝါ​အတွက် မြင့်​မြတ်​တယ်။ အာ​ဗေ​လ​ကို ကာ​အိ​န သတ်​ပြီး​တဲ့​နောက် “မင်း​ညီ​ရဲ့​သွေး​က မြေကြီး​ထဲ​က​နေ ငါ့​ကို အော်​ဟစ်​နေ​ပြီ” လို့ ယေဟောဝါ​ပြော​တယ်။ (ကမ္ဘာဦး ၄:၁၀) အာ​ဗေ​လ​ရဲ့​သွေး​ဟာ သူ့​အသက်​ကို ကိုယ်​စား​ပြု​တယ်။ အာ​ဗေ​လ​ကို သတ်​တဲ့​အတွက် ကာ​အိ​န​ကို ယေဟောဝါ ဒဏ်​ပေး​တယ်။ နော​ဧ​ခေတ် ရေ​လွှမ်း​မိုး​ဘေး​ပြီး​နောက် သွေး​ဟာ အသက်​ကို ကိုယ်​စား​ပြု​မှန်း ယေဟောဝါ ထပ်​ဖော်ပြခဲ့​တယ်။ နော​ဧ​နဲ့ မိသား​စု​တွေ​ကို တိ​ရစ္ဆာန်​အသား​စား​ဖို့ ယေဟောဝါ ခွင့်​ပြု​တယ်။ “မြေပေါ်​က သက်​ရှိ​တိ​ရစ္ဆာန်တွေ​ကို စား​နိုင်​တယ်။ စိမ်း​လန်း​တဲ့​အပင်​တွေ​လို​ပဲ တိရစ္ဆာန်တွေ​ကို​လည်း မင်း​တို့​စား​ဖို့ ငါ​ပေး​တယ်” လို့ ဘု​ရား​ပြော​တယ်။ ဒါ​ပေမဲ့ ယေဟောဝါ မစား​ခိုင်း​တဲ့​အရာ​တစ်​ခု ရှိ​တယ်– “သွေး​ဟာ အသက်​ဖြစ်​လို့ သွေး​ပါ​တဲ့​အသား​ကို​တော့ မစား​နဲ့။”—ကမ္ဘာဦး ၁:၂၉။ ၉:၃၊ ၄။

၁၁။ အစ္စရေး​လူမျိုး​ကို သွေး​နဲ့​ပတ်​သက်​ပြီး ဘု​ရား ဘယ်​လို​မိန့်မှာ​သလဲ။

^၁၁ သွေး​မစား​ဖို့ နော​ဧ​ကို မိန့်မှာ​ပြီး အနှစ် ၈၀၀ လောက်​မှာ ယေဟောဝါ​က “အစ္စရေး​လူမျိုး​ဖြစ်​စေ၊ လာ​အခြေ​ချ​တဲ့ တိုင်း​တစ်ပါး​သား​ဖြစ်​စေ တစ်​ယောက်​ယောက်​က အမဲ​လိုက်​တဲ့​အခါ သား​ရဲ ဒါ​မှ​မဟုတ် ငှက်​ကို​ဖမ်း​မိ​ရင် သွေး​ကို သွန်​ပြီး မြေနဲ့​ဖုံး​ရ​မယ်” လို့ မိမိ​ရဲ့​လူမျိုး​ကို ထပ်​မိန့်မှာ​တယ်။ အဲဒီ​နောက် ‘သွေး​ကို မစား​ရ​ဘူး’ လို့​ပြော​တယ်။ (ဝတ်​ပြု​ရာ ၁၇:၁၃၊ ၁၄) ယေဟောဝါ​က သွေး​ကို မြင့်​မြတ်​တဲ့​အရာ​အဖြစ် ရှု​မြင်​စေ​ချင်​တုန်း​ပဲ။ သူတို့ အသား​စား​နိုင်​ပေမဲ့ သွေး​ကို​တော့ မစား​ရ​ဘူး။ တိ​ရစ္ဆာန်တွေ​ကို သတ်​စား​တဲ့​အခါ သွေး​ကို မြေပေါ်​သွန်​ရ​မယ်။

၁၂။ သွေး​ကို ခ​ရစ်​ယာန်တွေ ဘယ်​လို​ရှု​မြင်​သလဲ။

^၁၂ ယေရှု​သေဆုံး​ပြီး နှစ်​အနည်း​ငယ်​အကြာ​မှာ ဂျေရု​ဆ​လင်​မြို့​မှာ​ရှိ​တဲ့ တမန်​တော်​တွေ၊ ခ​ရစ်​ယာန်​အသင်း​တော် အကြီး​အကဲ​တွေ တွေ့​ဆုံ​ခဲ့​ကြ​တယ်။ အစ္စရေးတွေ​ကို ပေး​ခဲ့​တဲ့ ပညတ်​တ​ရား​ထဲ​က ဘယ်​ပညတ်​တွေ​ကို ခ​ရစ်​ယာန်တွေ လိုက်​နာ​ဖို့ လို​သေး​သလဲ​ဆို​တာ ဆုံး​ဖြတ်​ကြ​ဖို့​ဖြစ်​တယ်။ (တမန်​တော် ၁၅:၂၈၊ ၂၉ ကို​ဖတ်​ပါ။ တမန်​တော် ၂၁:၂၅ ) ယေဟောဝါ​က သွေး​ဟာ မိမိ​အတွက် အဖိုး​တန်​နေ​ဆဲ​ပဲ၊ သွေး​ကို မြင့်​မြတ်​တဲ့​အရာ​အဖြစ် ရှု​မြင်​ဖို့ လို​နေ​ဆဲ​ပဲ​ဆို​တာ သူတို့​နား​လည်​လာ​အောင် ကူညီ​ပေး​ခဲ့​တယ်။ ပထ​မရာ​စု​ခ​ရစ်​ယာန်တွေ​ဟာ သွေး​ကို မစား​ရ၊ မသောက်​ရ​ဘူး။ သွေး ကောင်း​ကောင်း​မထုတ်​ထား​တဲ့ အသား​ကို မစား​ရ​ဘူး။ သွေး​ကို စား​သောက်​တာ​ဟာ ရုပ်​တု​ကိုးကွယ်​တာ၊ လိင်​အကျင့်​ယို​ယွင်း​တာ​နဲ့ အတူ​တူ​ပဲ။ ခ​ရစ်​ယာန်​စစ်​တွေ​ဟာ အဲဒီ​အချိန်​က​စ​ပြီး သွေး​ကို မစား၊ မသောက်​ကြ​ဘူး။ အခု​ချိန်​မှာ​ကော။ သွေး​ကို မြင့်​မြတ်​တဲ့​အရာ​အဖြစ် ယေဟောဝါ ရှု​မြင်​စေ​ချင်​တုန်း​ပါ​ပဲ။

၁၃။ ခ​ရစ်​ယာန်တွေ ဘာ​လို့ သွေး​မသွင်း​တာ​လဲ။

^၁၃ ဒါ​ဆို​ရင် ခ​ရစ်​ယာန်တွေ သွေး​မသွင်းရ​ဘူး​ဆို​တဲ့ သဘော​လား။ ဟုတ်​ပါ​တယ်။ သွေး​ကို မစား​ရ၊ မသောက်​ရ​ဘူး​လို့ ယေဟောဝါ မိန့်မှာ​ထား​တယ်။ ဆရာ​ဝန်​က အရက်​မသောက်​နဲ့​လို့ မှာ​တယ်​ဆို​ပါ​စို့။ သွေး​ကြော​က​တစ်ဆင့် ကိုယ်​ခန္ဓာ​ထဲ သွင်း​မလား။ သွင်း​မှာ​မဟုတ်​ဘူး။ အဲဒီ​လို​ပဲ၊ သွေး​ကို မစား​ရ၊ မသောက်​ရ​ဆို​တဲ့ မိန့်မှာ​ချက်​ဟာ သွေး​သွင်း​တာ​ကို​လည်း လက်ခံ​လို့ မရ​ဘူး​ဆို​တဲ့​သဘော​ပဲ။—ရှင်း​လင်း​ချက် ၂၉ ကို​ကြည့်​ပါ။

၁၄၊ ၁၅။ ခ​ရစ်​ယာန်​တစ်​ယောက်​အနေ​နဲ့ အသက်​ကို တန်​ဖိုး​ထား​လေး​မြတ်​ဖို့၊ ယေဟောဝါ​ကို နာ​ခံ​ဖို့ ဘယ်​လောက်​အရေး​ကြီး​သလဲ။

^၁၄ ကျွန်​တော်​တို့ သွေး​မသွင်းရင် သေမယ်​လို့ ဆ​ရာ​ဝန် ပြော​လာရင်​ကော။ သွေး​နဲ့​ပတ်​သက်​တဲ့ ဘု​ရားရဲ့​ပညတ်​ကို နာ​ခံ​မယ်၊ မနာ​ခံ​ဘူး​ဆို​တာ ကိုယ်​တိုင်​ဆုံး​ဖြတ်​ရ​မယ်။ ခ​ရစ်​ယာန်တွေ​ဟာ ဘု​ရား​ပေး​တဲ့ အသက်​ဆု​လက်​ဆောင်​ကို အလွန်​လေး​မြတ်​တဲ့​အတွက် အသက်​ဆက်​ရှင်​ဖို့ တ​ခြား​ကု​သနည်း​တွေ​ကို ရှာ​ဖွေ​မှာ​ဖြစ်​တယ်။ သွေး​သွင်း​တာ​ကို​တော့ လက်ခံ​မှာ မဟုတ်​ဘူး။

^၁၅ ကျန်း​မာ​ရေး​ကောင်း​အောင် ကျွန်​တော်​တို့ အတတ်​နိုင်​ဆုံး ဂရု​စိုက်​ကြ​တယ်။ အသက်​ဟာ ဘု​ရား​သခင်​အတွက် အဖိုး​တန်​လို့ သွေး​သွင်း​တာ​ကို​တော့ လက်ခံ​မှာ မဟုတ်​ဘူး။ ယေဟောဝါ​ကို မနာ​ခံ​ဘဲ အသက်​ဆက်​ရှင်​ဖို့ ကြိုး​စား​တာ​ထက် ဘု​ရား​ကို နာ​ခံ​တာ​ဟာ ပို​အရေး​ကြီး​တယ်။ “ကိုယ့်​အသက်​ကို ကယ်​ချင်​သူ​ဟာ အသက်​ဆုံး​ရ​လိမ့်​မယ်။ ကျွန်​တော့်​ကြောင့် အသက်​ဆုံး​တဲ့​သူ​က​တော့ အသက်​ပြန်​ရှင်​ရ​လိမ့်​မယ်” လို့ ယေရှု​ပြော​တယ်။ (မဿဲ ၁၆:၂၅) ကျွန်​တော်​တို့​ဟာ ယေဟောဝါ​ကို ချစ်​လို့ နာ​ခံ​ကြ​တယ်။ ကျွန်​တော်​တို့​အတွက် ဘာ​အကောင်း​ဆုံး​လဲ​ဆို​တာ ဘု​ရား​သိ​တယ်။ ဒါ​ကြောင့် ကျွန်​တော်​တို့​ဟာ ယေဟောဝါ​လို​ပဲ အသက်​ကို အဖိုး​တန်​တဲ့​အရာ၊ မြင့်​မြတ်​တဲ့​အရာ​အဖြစ် ရှု​မြင်​ကြ​တယ်။—ဟီ​ဘ​ရူး ၁၁:၆။

၁၆။ ဘု​ရားရဲ့​ကျေး​ကျွန်​တွေ​ဟာ ကိုယ်​တော့်​ကို ဘာ​လို့​နာ​ခံ​ကြ​တာ​လဲ။

^၁၆ ဘု​ရားရဲ့ သစ္စာ​ရှိ​ကျေး​ကျွန်​တွေ​ဟာ သွေး​နဲ့​ပတ်​သက်​တဲ့ ဘု​ရားရဲ့​ပညတ်​ကို နာ​ခံ​ဖို့ ဆုံး​ဖြတ်​ထား​ကြ​တယ်။ သွေး​ကို စား​မှာ၊ သောက်​မှာ မဟုတ်​ဘူး။ ဆေး​ကု​သတဲ့​အခါ သွေး​ကို အသုံး​ပြု​မှာ မဟုတ်​ဘူး။ * အသက်​ကယ်​ဖို့​အတွက် တ​ခြား​ကု​သနည်း​တွေ​ကို​တော့ လက်ခံ​ကြ​ပါ​တယ်။ သူတို့​အတွက် ဘာ​အကောင်း​ဆုံး​လဲ​ဆို​တာ အသက်​နဲ့ သွေး​ကို ဖန်​ဆင်း​တဲ့​အရှင် သိ​ထား​မှန်း ယုံ​ကြည်​စိတ်​ချ​ကြ​တယ်။ သင်​ကော အဲဒီ​လို ယုံ​ကြည်​စိတ်​ချ​သလား။

၁၇။ အစ္စရေးတွေ သွေး​ကို​အသုံး​ပြု​ဖို့ ယေဟောဝါ​ခွင့်​ပြု​တဲ့ တစ်​ခု​တည်း​သော​နည်း​ဟာ ဘာ​လဲ။

^၁၇ မော​ရှေ​ကို​ပေး​ခဲ့​တဲ့ ပညတ်​တ​ရား​မှာ “သတ္တ​ဝါ​ရဲ့ အသက်​ဟာ သွေး​မှာ ရှိ​တယ်။ မင်း​တို့​ရဲ့​အပြစ်​ကို​ဖြေဖို့ [ခွင့်​လွှတ်​မှု​တောင်း​ခံ​ဖို့] သွေး​ကို ပူ​ဇော်​ရာ​ပလ္လင်​ပေါ်​မှာ လောင်း​ရ​မယ်​လို့ ငါ​သတ်​မှတ်​ထား​ပြီ။ . . . အပြစ်​ကို ဖြေပေး​နိုင်​တာ သွေး​ပဲ” လို့ အစ္စရေးတွေ​ကို ယေဟောဝါ​ပြော​တယ်။ (ဝတ်​ပြု​ရာ ၁၇:၁၁) အစ္စရေးတွေ အပြစ်​လုပ်​မိ​တဲ့​အခါ တိ​ရစ္ဆာန်​ကို ပူ​ဇော်​ပြီး တိ​ရစ္ဆာန်ရဲ့​သွေး​ကို ပူ​ဇော်​ရာ​ပလ္လင်​ပေါ်​မှာ လောင်း​ဖို့ ပု​ရော​ဟိတ်​ကို တောင်း​ဆို​နိုင်​တယ်။ ဒီ​နည်း​နဲ့ ယေဟောဝါ​ရဲ့ ခွင့်​လွှတ်​မှု​ကို တောင်း​ခံ​နိုင်​တယ်။ ဒါ​ဟာ သွေး​ကို​အသုံး​ပြု​ဖို့ ယေဟောဝါ​ခွင့်​ပြု​တဲ့ တစ်​ခု​တည်း​သော​နည်း​ပဲ။

၁၈။ ယေရှု​ရဲ့ ပူ​ဇော်​သက္ကာ​က ကျွန်​တော်​တို့​ကို ဘာ​အကျိုး​ကျေး​ဇူး​တွေ ရ​စေ​သလဲ။

^၁၈ ယေရှု မြေကြီး​ပေါ်​ရောက်​လာ​ပြီး ကျွန်​တော်​တို့​ရဲ့​အပြစ်​တွေ ခွင့်​လွှတ်​ခံ​ရ​ဖို့ သူ့​ရဲ့​အသက်​သွေး​ကို ပေး​ဆပ်​ခဲ့​တယ်။ ဒီ​နည်း​နဲ့ တိ​ရစ္ဆာန်​ပူ​ဇော်​တဲ့ ပညတ်​ကို ပယ်​ဖျက်​ခဲ့​တယ်။ (မဿဲ ၂၀:၂၈။ ဟီ​ဘ​ရူး ၁၀:၁) ယေရှု​ရဲ့​အသက်​ဟာ သိပ်​အဖိုး​တန်​တယ်။ ဒါ​ကြောင့် ယေဟောဝါ​က ယေရှု​ကို ကောင်း​ကင်​ဆီ ရှင်​ပြန်​ထ​မြောက်​စေ​ပြီး​တဲ့​နောက် လူ​အားလုံး​ကို ထာ​ဝ​စဉ် အသက်​ရှင်​နိုင်​မယ့်​အခွင့် ပေး​နိုင်​ခဲ့​တယ်။—ယောဟန် ၃:၁၆။ ဟီ​ဘ​ရူး ၉:၁၁၊ ၁၂။ ၁ ပေတရု ၁:၁၈၊ ၁၉။

၁၉။ ‘တစ်​ယောက်​ယောက် ကယ်​တင်​ခြင်း​မရရင် အပြစ်​မသင့်’ စေ​ဖို့ ကျွန်​တော်​တို့ ဘာ​လုပ်​ရ​မလဲ။

^၁၉ ယေရှု​ရဲ့ အသက်​ဆု​လက်​ဆောင်​အတွက် ယေဟောဝါ​ကို ကျွန်​တော်​တို့ ကျေး​ဇူး​တင်​ကြ​တယ်။ ယေရှု​ကို ယုံ​ကြည်​မယ်​ဆို​ရင် ထာ​ဝ​စဉ် အသက်​ရှင်​နိုင်​မယ်​ဆို​တဲ့​အကြောင်း လူ​တွေ​ကို ပြော​ပြချင်​တယ်။ လူ​တွေ​ကို ချစ်​တဲ့​အတွက် ဘယ်​လို​နည်း​နဲ့ အသက်​ရ​နိုင်​တယ်​ဆို​တာ အတတ်​နိုင်​ဆုံး သင်​ပေး​ချင်​တယ်။ (ယေဇကျေလ ၃:၁၇-၂၁) ဒါ​ဆို​ရင် “တစ်​ယောက်​ယောက် ကယ်​တင်​ခြင်း​မရရင် ကျွန်​တော့်​အပြစ် မဟုတ်​ဘူး။ . . . ဘု​ရား​သခင်​ရဲ့ ရည်​ရွယ်​ချက်​မှန်​သမျှ မထိမ်​ချန်​ဘဲ ခင်​ဗျား​တို့​ကို ကျွန်​တော် ပြော​ပြခဲ့လို့​ပဲ” ဆို​ပြီး တမန်​တော်​ပေါလု​လို ကျွန်​တော်​တို့ ပြော​နိုင်​ပါ​လိမ့်​မယ်။ (တမန်​တော် ၂၀:၂၆၊ ၂၇) ယေဟောဝါ​အကြောင်း၊ အသက်​ဟာ ဘု​ရား​အတွက် တန်​ဖိုး​ရှိ​ကြောင်း လူ​တွေ​ကို ကျွန်​တော်​တို့ ပြော​ပြတဲ့​အခါ အသက်​နဲ့ သွေး​ကို ဘယ်​လောက် တန်​ဖိုး​ထား​လေး​မြတ်​တယ်​ဆို​တာ ဖော်ပြတယ်။